Mulongwe “muntu ngomumvwana limwi.” Mucikozyanyo, Jonatani a Davida bakaba balongwe beni-beni ciindi Davida naakajaya Goliati. (1Sam. 18:1) Aumwi wakajisi bube bwakapa kuti mweenzinyina amuyande. Aboobo, zilongwe zyancobeni ziyeeme aluzyibo lwini-lwini. Citola ciindi alimwi ciyandika kubeleka canguzu kutegwa muzyibane amuntu uumwi. Nokuba boobo, ncuuba-uba kujana mulongwe aintaneti, kayi nkutyanka buyo. Akaambo kakuti aintaneti bantu inga balibambilila limwi cakwaamba, alimwi balakonzya kusala mbobayanda kuti bantu kabababona, ncuuba kulisisa bwini mbobabede. Aboobo, ncibotu kusala bantu mbomuyanda kuti babe balongwe banu. Ikuti muntu ngomutazyi kabotu wamulomba kuti abe mweenzinyoko a social media, mutayoowi kukaka akaambo buyo kakuti tamuyandi kumumvwisya bubi. Akaambo kantenda ziliko, ibamwi basala kutaabelesyela limwi ma social network. Pele mbuti kuti mwasala kubelesya social network imwi, ntwaambo nzi ntomweelede kuyeeya?

AMWEEBELELE KAVIDIYO KAKUTI AMWIIBELESYE KABOTU INTANETI, MPOONYA MWIINGULE MIBUZYO IITOBELA:

• Ncinzi ncomweelede kulanga-langa kamutanaamba cili coonse naa kutuma mafwoto?

• Nkaambo nzi ncomweelede kusala kabotu balongwe aintaneti?

• Nkaambo nzi ncomweelede kulibikkila ciindi ncomubelesya a social network?​—Ef. 5:15, 16