Amubulangile Buzuba bwa Jehova
Cibalo 20
Amubulangile Buzuba bwa Jehova
1. Ino mwakalimvwa buti ciindi cakusaanguna nomwakaiya kuti lufwutuko kumapenzi aabweende bwazintu oobu bubyaabi luli afwaafwi kusika?
ICINTU cimwi cakusaanguna ncomwakaiya mu Bbaibbele ncakuti, imakanze aa Jehova ngakuti nyika yoonse mbwiizulwa yeelede kuba paradaiso. Munyika eeyo mpya, inkondo, milandu, bucete, kuciswa, kupenga alimwi akufwa tazikooyoobako pe. Nobaba baabo bafwide bayoobusigwa. Elo tabuliboteli kaka bulangizi oobu! Mbobuli afwaafwi kuzuzikizyigwa kulakankaizyigwa akubako kwa Kristo cakutalibonya kali Mwami uulela kwalo ikwakatalika mu 1914 akuti kuzwa leelyo twali mumazuba aakumamanino aanyika eeyi mbyaabi. Kumamanino aamazuba aaya aakumamanino, Jehova uyoonyonyoona bweende bwazintu oobu bubyaabi akuleta nyika mpya njaakasyomezya!
2. Ino “buzuba bwa-Jehova” ninzi?
2 Ibbaibbele lyaamba ciindi eeci calunyonyooko kuti “[M]buzuba bwa-Jehova.” (2 Petro 3:10) ‘Mbuzuba bwabukali bwa-Jehova’ kunyika yoonse ya Saatani. (Zefaniya 2:3) Imamanino aambubo inooli “nkondo yabuzuba bupati bwa-Leza Singuzuzyoonse . . . , [ii]tegwa muci-Hebrayo Harmagedoni,” ooko “bami boonse banyika” nkobaya kunyonyoodwa limwi. (Ciyubunuzyo 16:14, 16) Sena bukkale bwanu butondezya kuti mulaa lusyomo lwakuti “buzuba bwa-Jehova” oobu buli afwaafwi?—Zefaniya 1:14-18; Jeremiya 25:33.
3. (a) Ino buzuba bwa Jehova buyoosika lili? (b) Ino mbuti mbotwagwasyigwaa Jehova akaambo kakutabuyubununa “buzuba obo, niciba ciindi”?
3 Ibbaibbele taakwe nolitwaambila pe buzuba bwini Jesu Kristo nayooboola kali Sikunyonyoona wa Jehova wabweende bwazintu bwa Saatani. Jesu wakaamba kuti: “Taakwe muntu uubuzi buzuba obo, niciba ciindi, pe, nibaba baangelo bakujulu, naba Mwana, pele Taata alike nguuzi.” (Marko 13:32) Ikuti naa kuli umwi uutamuyandi Jehova, ulakonzya kutalika kuyeeya kuti buzuba bwakwe bucili kule akutalika kubikkila maano kuzintu zyakumubili. Pele aabo bamuyanda ncobeni Jehova, bayoomubelekela camoyo woonse kakutakwe makani naa ndiilili bweende bwazintu oobu bubyaabi nobuyoomana.—Intembauzyo 37:4; 1 Johane 5:3.
4. Ino mmajwi nzi aakucenjezya ngaakaamba Jesu?
4 Ikucenjezya baabo bamuyanda Jehova, Jesu waamba kuti: “Amucenjele, kamulindila akukomba, nkaambo tamuzi ciindi nociyooba.” (Marko 13:33-37) Utukulwaizya kuti, ikulya alimwi akunywa naa “makataazyo aabuumi buno” tazyeelede kuba zintu nzyotubikkila maano kapati cakuti mane twaluba mbociyandika kupakamana loko muziindi eezyi.—Luka 21:34-36; Matayo 24:37-42.
5. Ino ncinzi ciyoocitika bwaakusika buzuba bwa Jehova kweelanaa mbwaakapandulula Petro?
5 Awalo Petro utulaya kuzumanana kulangila “buzuba bwakusika kwa-Leza, mboliyoomana ijulu kukupya, atunyenyeezyi notuyootentwa akweenzunuka.” Imfwulumende zyabantu zyoonse—“ijulu”—ziyoonyonyoonwa antoomwe aciinga cabantu babyaabi boonse—“nyika”—alimwi “azintu zyamujulu” zyayo naa busongo amicito yanyika eeyi mbyaabi, mbuli kuyanda kulyeendelezya beni muciindi cakweendelezyegwaa Leza alimwi abukkale bwakutalilemeka akuyandisya zintu zyakumubili. Mubusena bwamfwulumende eezyi kuyooba “ijulu ipya [Bwami bwa Leza bwakujulu] anyika impya [iciinga cabantu cipya aanyika]” “imunookkala bululami.” (2 Petro 3:10-13, NW) Izintu eezyi izinoogambya munyika ziyoocitika mubuzuba alimwi aciindi citayeeyelwi pe.—Matayo 24:44.
Amuzumanane Kupakamana Kucitondezyo
6. (a) Ino bwiinguzi bwa Jesu kumubuzyo wabasikwiiya bakwe bwakazuzikizyigwa kusikila aali kujatikizya mamanino aabweende bwazintu bwaba Juda? (b) Ino nzibeela nzi zyabwiinguzi bwa Jesu izitondezya zintu alimwi abukkale bwakali kuyoocitika kuzwa mu 1914 kuya kumbele?
6 Ikweelanaa ciindi ncotupona, tweelede kwaazyiba kabotu makani aacitondezyo cijatikizya zintu zinji izitondezya mazuba aakumamanino—“mamanino aaciindi.” Amuyeeye kuti Jesu naakaingula mubuzyo wabasikwiiya bakwe uulembedwe kuli Matayo 24:3, zimwi zyazintu nzyaakapandulula mutupango 4 kusikila ku 22 zyakazuzikizyigwa asyoonto kubweende bwaba Juda kuzwa mu 33 C.E. kusikila mu 70 C.E. Pele businsimi oobu bwakazuzikizyigwa kapati kutalikila mu 1914, iciindi ‘cakubako kwa Kristo acamamanino aabweende bwazintu.’ Ibbuku lya Matayo 24:23-28 lilaamba cakali kuyoocitika kuzwa mumwaka wa 70 C.E. kusikila kuciindi cakubako kwa Kristo. Izintu zipandulwidwe kuli Matayo 24:29–25:46 zyakali kuyoocitika muciindi camamanino.
7. (a) Ino nkaambo nzi swebo kutugama ncotweelede kupakamana kuzintu zili mukucitika mazubaano izizuzikizya citondezyo? (b) Amwiingule mibuzyo iili kumamanino aamuncali wa 7, ikutondezya mbocali kuzuzikizyigwa citondezyo kuzwa mu 1914.
7 Umwi aumwi wesu kumugama weelede kupakamana kuzintu alimwi abukkale buzuzikizya citondezyo. Ikubona zintu eezyi mbozyeendelanaa businsimi bwa Bbaibbele kuyootugwasya kuzumanana kulangila kusika kwabuzuba bwa Jehova. Alimwi kuyootugwasya kubakombelezya bantu notubacenjezya kujatikizya mbobuli afwaafwi buzuba oobo. (Isaya 61:1, 2) Katujisi makanze aaya mumizeezo, nkooko lino atulange-lange mibuzyo iitobela iitondezya zibeela-beela zyacitondezyo kweelanaa mbozilembedwe kuli Matayo 24:7 alimwi a Luka 21:10, 11.
Ino mmuunzila nzi iigambya kapati ikubukilana ‘kwacisi acisinyina alimwi abwami abwaminyina’ ikwakasinsimwa mbokwazuzikizyigwa kutalikila mu 1914? Ino ncinzi cali kucitika kuzwa leelyo kujatikizya nkondo?
Ino mbulwazi nzi bwakajaya bantu banji mu 1918 kwiinda baabo bakafwa mu Nkondo Yanyika Yakusaanguna? Nokuba kuti bantunsi basumpuka kapati muluzibo lwabusilisi, ino mmalwazi nzi aacijaya tuulunzuma twabantu?
Mbuti kubula kwacakulya mbokwabapezya bantu munyika nokuba kuti kwali lusumpuko mumakani aasayaansi mumwaanda wamyaka wamana?
Ino ncinzi cimupa kusyoma kuti 2 Timoteo 3:1-5, 13 tayaambi mbuli mbobwabede bukkale bwabantu lyoonse pele yaamba zintu mbozyaindila kubija mbotuyaabuya kumamanino aamazuba aakumamanino?
Ikwaandaanizyigwa Kwabantu
8. (a) Ino mmakani nzi aambi aapandulwidwe kuli Matayo 13:24-30, 36-43 ngaakaamba Jesu kuti aliswaangene amamanino aabweende bwazintu? (b) Ino cikozyanyo ca Jesu cipandulula nzi?
8 Nkozili azimwi zintu zipati nzyaakaamba Jesu kuti zyakali kuyoocitika kumamanino aabweende bwazintu. Cimwi cazyeezyi nkwaandaanizyigwa kwa “bana ba-Bwami” ku “bana ba-Mubi.” Jesu wakacaamba eeci mucikozyanyo cakwe camuunda wamaila oomo mubi mwaakaminzya insaku zinji. Mucikozyanyo cakwe, “maila” ayiminina Banakristo beni-beni bananikidwe. “Insaku” mbabaabo ibalyaamba kuba Banakristo pele ibalitondezya kuti ‘mbana ba Mubi’ nkaambo balikakatide kunyika kwalo Diabolosi nkwali mweendelezi. Aaba balaandanizyidwe kuzwa “[ku]bana ba-Bwami [bwa Leza]” alimwi babalilidwe kulibaabo ibayoonyonyoonwa. (Matayo 13:24-30, 36-43) Sena kwaandaanya ooku kwakacitika kale?
9. (a) Ino nkwaandaanizyigwa nzi kwakacitika munzila mpati kulibaabo boonse balyaamba kuba Banakristo noyakainda Nkondo Yanyika Yakusaanguna? (b) Ino mbuti Banakristo bananike mbobakatondezya kuti bakali babelesi bakasimpe ba Bwami?
9 Noyakamana Nkondo Yanyika Yakusaanguna, kwakaba kwaandaanizyigwa kuba muzibeela zyobile kwabaabo boonse ibakali kulyaamba kuba Banakristo: (1) Basololi bazikombelo bamu Kristendomu abasikubatobela balo bakaambilizya caantangalala kuti bakali kwiisyoma kapati mbunga yakali kutegwa League of Nations (yalo lino yiitwa kuti United Nations) pele kumwi kabacilyaamba kuti balasyomeka kuzisi zyabo, alimwi a (2) Banakristo bakasimpe bakuciindi eeco noyakainda nkondo eeyo, balo bakazumanana kubelekela Bwami bwa Leza bwabu Mesiya kutali masi aamunyika eeyi. (Johane 17:16) Aaba bakasinizya kuti bakali babelesi ba Bwami bwa Leza kwiinda mukuzumanana kukambauka “Makani Mabotu aa-Bwami” munyika yoonse. (Matayo 24:14) Ino ncinzi cakatobela?
10. Ino ncintu nzi cakusaanguna cakatobela akaambo kamulimo wabukambausi bwa Bwami?
10 Cakusaanguna, kwakali kuyobololwa kwabaabo basyeede bananikidwe amuuya wa Leza, ibajisi bulangizi bwakuyoobaa Kristo kabali cibeela ca Bwami bwakujulu. Nokuba kuti aaba bantu bakali mumasi aindene-indene alimwi amumisyobo-misyobo, bakakamantanizyigwa mumbunga yomwe. Imamanino aakugwalwa kwabananike aaba kuyaabuswena afwaafwi.—Ciyubunuzyo 7:3, 4.
11. (a) Ino mmulimo nzi wakuyobolola iwazumanana kucitwa kusikila sunu, alimwi ino weendelanaa businsimi buli? (b) Ino kuzuzikizyigwa kwabusinsimi oobu kutondezya nzi?
11 Kuzwawaawo, kwiinda mubusolozi bwa Kristo kwakatalika kuyobololwa baabo ibamu “nkamu impati . . . bazwa kuzisi zyoonse akumisyobo yoonse akumikowa yoonse akumyaambo yoonse.” Aaba mbabacibeela ca “mbelele zimwi” ibayoofwutuka “kumapenzi ayo mapati” akuyoonjila munyika mpya ya Leza. (Ciyubunuzyo 7:9, 14; Johane 10:16) Ooyu mulimo wakukambauka Bwami bwa Leza mamanino kaatanasika wazumanana kusikila sunu. Cakusyomeka, ibankamu mpati yambelele zimwi, balo lino ibabalilwa kutuulunzuma, bagwasyilizya bananike basyeede kwaambilizya mulumbe wa Bwami uuyandika kapati. Ooyu mulumbe uli mukwaambilizigwa mumasi oonse.
Ino Ncinzi Ciyoocitika Kumbele?
12. Ino ucili mupati buti mulimo wakukambauka weelede kucitwa kabutana kusika buzuba bwa Jehova?
12 Bumboni boonse bwabandikwa kale butondezya kuti tuli kwini kumamanino aamazuba akuti buzuba bwa Jehova bulaafwaafwi kapati. Pele sena kuli aabumbi businsimi bweelede kuzuzikizyigwa kabutanasika buzuba oobo buyoosya? Inzya, nkobuli. Mubwini, ikwaandaanizyigwa kwabantu kujatikizya Bwami takuna kumana pe. Mumasena aamwi oomo bantu bamumo mobakali kukazya kapati kwamyaka iili mbwiibede, lino mweelwe wabasikwiiya bapya uyaabuya ambele. Alimwi nomuba mumasena oomo bantu mobatayandi makani mabotu, luse lwa Jehova luli mukutondezyegwa kwiinda mukukambauka. Aboobo, kamuzumanana kuucita mulimo cabusungu! Jesu utusyomezya kuti waakumana mulimo ooyu, mamanino azoosika.
13. Kweelanaa mbokulembedwe ku 1 Ba-Tesalonika 5:2, 3, ino ncintu nzi cipati cicilangilwa kuyoocitika kumbele, alimwi ino eeci ciya kwaamba nzi kulindiswe?
13 Abumwi businsimi bupati bwamu Bbaibbele bwaambilizya kuti: “Nobanoozoocili mukwaamba kuti, Kwatontola, kwaliiba, elyo muciindi eco nciconya lunyonyooko luzoofwambaana kubasikila mbuli insungo mbozisikila uumisi, nkabela tabakooyooloboka pe.” (1 Ba-Tesalonika 5:2, 3) Ikwaambilizyigwa ooku kwakuti, “Kwatontola, kwaliiba” mbokuyoocitwa takuzibidwe kabotu calino pe. Pele mubwini eeci tacikaambi kuti basololi bamunyika banakwaamanide mapenzi oonse ngobajisi bantu. Aabo bazumanana kulangila kusika kwabuzuba bwa Jehova kunyina pe nobaya kweenwa akwaambilizya ooko. Balizi kuti iciya kutobela kuzwa waawo ndunyonyooko.
14. Ino nzintu nzi ziyoocitika ciindi camapenzi mapati, alimwi ino ziyootobelana buti?
14 Kumatalikilo aamapenzi mapati, ibeendelezi bayoomubukila Babuloni Mupati akumunyonyoona, walo uli mbulelo bwanyika yoonse bwabukombi bwakubeja. (Matayo 24:21; Ciyubunuzyo 17:15, 16) Kuzwawaawo, masi ayoobukila baabo batobela bulelo bwa Jehova, calo ciya kupa kuti bukali bwa Jehova butondezyegwe kumfwulumende zyazisi akuli baabo bazigwasyilizya. Aboobo mfwulumende eezyi zyoonse ziyoonyonyoonwa cakumaninina. Inkondo ya Harmagedoni eeyo iyooba njiyamamanino kumapenzi ayo mapati. Mpoona Saatani amadaimonaakwe bayoosowelwa mumulindi uutagoli, alimwi kuciindi eeco tabakacikonzyi limbi kuyunga bantu pe. Aaya ngaayooba mamanino aabuzuba bwa Jehova eelyo zina lyakwe noliyoosumpulwa akusalazyigwa.—Ezekieli 38:18, 22, 23; Ciyubunuzyo 19:11–20:3.
15. Ino nkaambo nzi ncokuli kulubizya kuyeeya kuti buzuba bwa Jehova bucili kule kapati kusika?
15 Mamanino aabweende oobu ayooboola aaciindi cini cibikkidwe, kweelanaa bubambe mbwabikkide Leza. Taakooyoomuka pe. (Habakuku 2:3) Mutalubi kuti, ilunyonyooko lwa Jerusalemu mu 70 C.E. lwakacitika cakufwambaana aaciindi ba Juda ncobatakali kulangila alimwi nobakali kuyeeya kuti ntenda yakaliindide. Alimwi ino mbuti kumakani aa Babuloni wansiku? Babuloni wakali aanguzu kapati, wakali kulisyoma alimwi wakali cingilidwe amalambo mapati alimwi mayumu. Pele, wakazundwa akuwisigwa mubusiku bomwe buyo. Aboobo, alwalo lunyonyooko lucitika aciindi citayeeyelwi luyoocitika kubweende bubyaabi oobu bwazintu. Lwaakusika, atukaakujanike katukamantenyi mubukombi bwakasimpe, mbwaanga tunakubulangila lyoonse buzuba bwa Jehova.
Mubandi Wakwiinduluka
• Nkaambo nzi ncociyandika kapati kubulangila lyoonse buzuba bwa Jehova? Ino mbuti mbotunga twacita boobo?
• Ino mbuti swebo kutugama mbotujatikizyidwe mumulimo wakwaandaanizyigwa kwabantu kuli mukucitwa?
• Ino ncinzi cilangilwa kucitika buzuba bwa Jehova kabutana kutalika? Aboobo, ino ncinzi swebo kutugama ncotweelede kuti katucita?
[Mibuzyo yaciiyo]
[Zifwanikiso izili apeeji 180, 181]
Lino-lino mazuba aakumamanino ayoogola, iciindi bweende bwa Saatani bwaakunyonyoonwa
