Cibalo 41

Ibana Bamukkomanisya Leza

MMWANA uuli anyika ngoyeeyela kuti wakamukkomanisya kapati Jehova?— Wakali Mwanaakwe, Jesu. Atubandike zintu nzyaakacita Jesu ikutegwa akkomanisye Bausyi bakujulu.

Imukwasyi wa Jesu wakali kukkala kubusena bwakali kulampa musinzo wamazuba otatwe kuzwa ku Jerusalemu, ooko kwakali tempele libotu lya Jehova. Itempele eelyo Jesu wakaliita kuti “[ni]ŋanda ya-Taata.” Imwaka amwaka walo alimwi amukwasyi wakwe bakali kuunka ooko akujanika kupobwe Lyakwiindilila.

Imwaka umwi, Jesu naakali amyaka yakuzyalwa iili 12, imukwasyi wakwe wakali kupiluka nolyakamana pobwe Lyakwiindilila. Tiibakazyiba kuti Jesu tanaakaliko akati kabasazinyina abalongwe kusikila ciindi nobakapumuna kuti boone. Aboobo ndilyonya, Mariya a Josefa bakapiluka ku Jerusalemu kuti bakamulangaule Jesu. Ino uyeeya kuti wakali kuli?—

Bakamujana mutempele. Wakali kuteelela cakali kwaamba bamayi alimwi wakali kubabuzya mibuzyo. Alimwi eelyo nobakali kumubuzya cimwi cintu, lyoonse buyo wakali kubaingula. Bakagambwa kapati kujatikizya bwiinguzi bubotu mbwaakali kubapa. Sena wakateelela lino kaambo Leza ncaakali kumukkomanina Mwanaakwe?—

Ee, eelyo Mariya alimwi a Josefa kumamanino nobakamujana Jesu, bakakkalwa moyo. Pele Jesu kunyina naakalibilikide pe. Wakalizyi kuti kutempele mbobwakali busena buli kabotu nkwaakali kunga wajanika. Aboobo wakababuzya kuti: “Sena tamuzi kuti ndileelede kuba muŋanda ya-Taata?” Wakalizyi kuti itempele yakali ŋanda ya Leza, alimwi wakalikkomene kujanika ooko.

 Kuzwa waawo, Mariya a Josefa bakabweza Jesu ooyo wakajisi myaka yakuzyalwa iili 12 kumunzi wabo ku Nazareta. Ino uyeeya kuti Jesu wakali kulilemeka buti kubazyali bakwe?— Ibbaibbele lyaamba kuti wakazumanana ‘kubabombela.’ Ino uyeeya kuti eeco caamba nzi?— Caamba kuti wakali kubaswiilila. Inzya, wakazicita eezyo bazyali bakwe nzyobakali kuyanda kuti acite, neliba leelyo eeci nocakali kwaamba kuyooteka maanzi kumugoti.—Luka 2:41-52.

Aboobo kociyeeyela eeci: Nokuba kuti Jesu wakalilondokede, wakabaswiilila ibazyali bakwe batakalondokede. Sena eeci cakamukkomanisya Leza?— Cakutadooneka cakamukkomanisya, mbwaanga Jwi lya Leza lyaambila bana kuti: “Nobana, amuswiilile bazyali banu.” (Baefeso 6:1, Ci) Ayebo uyoomukkomanisya Leza ikuti wabaswiilila bazyali bako mbubwenya bwakacita Jesu.

Ayimbi nzila mbonga wamukkomanisya Leza nkwiinda mukwaambila bamwi zyanguwe. Pele bantu bamwi balakonzya kwaamba kuti taceeleli pe kuti bana basyoonto kabaambila bamwi zya Leza. Pele eelyo bantu nobakasola kulesya basankwa basyoonto kucita ceeci, Jesu wakati:  ‘Sena tiimwakabala mu Magwalo kuti, Kuzwa kumilomo yatwana Leza wakacitya kuti kube lutembaulo?’ (Matayo 21:16) Aboobo toonse tulakonzya kwaambila bambi zya Jehova ambwali Leza mubotu, ikuti katuyanda ncobeni ikucita boobo. Alimwi ikuti naa twacita oobo, tuyoomukkomanisya Leza.

Ino zintu zijatikizya Leza nzyotunga twaambila bambi inga twazyiiya kuli?— Tulazyiiya notucita ciiyo cesu ca Bbaibbele aŋanda. Pele kuli zinji nzyotwiiya kubusena ooko bantu ba Leza nkobaswaanganina kutegwa baiye. Pele ino inga twabazyiba buti bantu ba Leza?—

Ino ncinzi bantu ncobacita kumiswaangano yabo? Sena mubwini bayiisya zintu zili mu Bbaibbele? Sena balalibala alimwi akulibandika ibbuku eeli? Oobo mbotumuteelela Leza, tee kayi?— Alimwi kumiswaangano ya Bunakristo inga twalangila kumvwa zintu nzyaamba Leza, tee kayi?— Pele ino mbuti kuti bantu baamba kuti toyelede kupona kweelana acaamba Bbaibbele? Sena bantu aabo inga wabaamba kuti mbantu ba Leza?—

Nceeci acimbi ncoyelede kuyeeyela. Ibbaibbele lyaamba kuti bantu ba Leza banooli “bantu kuzina lyakwe.” (Incito 15:14) Mbwaanga izina lya Leza ngu Jehova, tulakonzya kubabuzya bantu naa Jehova ngo Leza wabo. Ikuti naa baamba kuti peepe, nkokuti tuyoozyiba kuti tabali bantu bakwe. Alimwi bantu ba Leza bayandika kuti kabaambila bamwi zya Bwami bwa Leza. Alimwi beelede kuti kabatondezya luyando ndobajisi kuli Leza kwiinda mukutobela milawo yakwe.—1 Johane 5:3.

Ikuti kobazyi ibantu bacita zintu eezyo zyoonse, weelede kuswaangana ambabo kutegwa ukombe Leza. Weelede kuteelelesya lyamiswaangano eeyi alimwi akwiingula eelyo nokubuzyigwa mibuzyo. Eeco ncaakacita Jesu naakali muŋanda ya Leza. Alimwi kuti wacita zintu eezyo, uyoomukkomanisya Leza mbubwenya bwakacita Jesu.

Sena inga wayeeya bana bambi ibaambwa mu Bbaibbele ibakamukkomanisya Leza?— Timoteo ncikozyanyo cibotu. Bausyi tiibakali bakombi  ba Jehova pe. Pele banyina, ba Eunike bakali bakombi, antoomwe abanyinakulu ba Loisi. Timoteo wakali kubaswiilila eelyo wakaiya nzyayanda Jehova.

Timoteo naakakomena, imwaapostolo Paulo wakaswaya munzi oomo mwaakali kukkala. Wakabona kuti Timoteo wakali kuyandisisya kapati kubelekela Jehova. Aboobo wakatamba Timoteo kweenda anguwe kutegwa ajatikizyigwe muzintu zinji mumulimo wa Leza. Kufwumbwa kooko nkobakaunka, bakaambila bantu zya Bwami bwa Leza alimwi a Jesu.—Incito 16:1-5; 2 Timoteo 1:5; 3:14, 15.

Pele sena zikozyanyo zyamu Bbaibbele zijatikizya buyo basankwa basyoonto ibakamukkomanisya Leza?— Peepe. Koyeeya musimbi umwi muna Israyeli iwakamukkomanisya Leza. Naakali muumi, icisi caba Aramu alimwi acabana Israyeli tiizyakali kumvwana pe. Bumwi buzuba bana Aramu bakalwana bana Israyeli akutola musimbi ooyo wakacili mwana mubuzike. Wakatolwa kuŋanda yamupati wabasikalumamba wakali kutegwa Naamani. Ooko wakazyikuba mubelesi wamukaintu wa Naamani.

 Naamani wakali kuciswa cinsenda. Kunyina musilisi wakacikonzyede kumuponya. Pele musimbi ooyo musyoonto wakazwide ku Israyeli wakali kusyoma kuti umwi akati kababelesi ba Leza uulibedelede, imusinsimi, wakali kukonzya kumugwasya Naamani. Ee, Naamani amukaintu wakwe kunyina nobakali bakombi ba Jehova pe. Sena musimbi ooyo wakeelede kubaambila eeco ncaakazyi? Ino ncinzi ncowakali kunga wacita yebo?—

Imusimbi ooyo musyoonto wakati: ‘Ikuti Naamani naakaunka kumusinsimi wa Jehova mu Israyeli, Naamani wakali kukonzya kuponesyegwa kucinsenda cakwe.’ Naamani wakamuswiilila musimbi ooyo, aboobo wakaunka kumusinsimi wa Jehova. Eelyo naakacita eeco musinsimi wa Leza ncaakamwaambila kucita, wakaponesyegwa. Eeci cakapa kuti Naamani abe mukombi wa Leza wakasimpe.—2 Bami 5:1-15.

Sena ulayanda kugwasya umwi kwiiya kujatikizya Jehova alimwi azeezyo nzyakonzya kucita mbubwenya bwakacita musimbi uulya musyoonto?— Ino mbaani mbonga wagwasya?— Ee, kumatalikilo tabakonzyi kuyeeya kuti bayandika lugwasyo. Pele ulakonzya kubaambila kujatikizya zintu zibotu nzyacita Jehova. Alimwi balakonzya kuswiilila. Ulakonzya kusyoma kuti eeci ciyoomukkomanisya Leza.

Azimbi zikozyanyo zikonzya kubakulwaizya bakubusi kujatikizya ncobeelede kukkomanina kubelekela Leza zilajanwa ku Intembauzyo 122:1; 148:12, 13; Mukambausi 12:1; 1 Timoteo 4:12; alimwi a Ba-Hebrayo 10:23-25.

[Zifwanikiso izili apeeji 213]

Ino mbuti Jesu naakacili mwana mbwaakamukkomanisya Leza?

[Cifwanikiso icili apeeji 215]

Nokuba kuti bausyi tiibakali bakombi, ino ncinzi Timoteo ncaakayandisisya kucita?

[Cifwanikiso icili apeeji 216]

Ino mbuti musimbi ooyu muna Israyeli mbwaakamukkomanisya Leza?