Cibalo 15

Iciiyo Cituyiisya Kuba Basilubomba

SENA uliluzi lusalululo?— Ilusalululo caamba kutayanda muntu akaambo kakuti ulibonya bumbi naa waambaula mwaambo uumbi. Aboobo ikuba alusalululo nkulimvwa kumwi kubyaabi naa muzeezo mubi kujatikizya muntu uumbi kotana kumuzyiba kabotu.

Sena uyeeya kuti cililuzi ikusulaika muntu kotana kumuzyiba bwini mbwabede naa kumusulaika akaambo kakuti uliindene anduwe?— Peepe, ikusulaika bamwi takuluzi pe alimwi kunyina nokuli alubomba. Tatweelede kuba alunya kuli umwi akaambo kakuti uliindene andiswe.

Kociyeeyela eeci. Sena kuli muntu ngozyi ngomwiindene lukanda naa uukanana mwaambo wiimpene awako?— Ambweni kuli bantu mbozyi ibatalibonyi mbuli mbuwakabazyi akaambo kakuti bakalicisa naa balaciswa. Sena ulabayanda akubafwida lubomba bantu mbomwiindene limwi?—

Ikuti katuswiilila Mwiiyi Mupati, Jesu Kristo, tunooli alubomba kubantu boonse. Tatweelede kusalulula muntu uuli woonse akaambo kakuti uzwa kucisi cimbi naa nkaambo lukanda lwakwe luliindene andiswe. Tweelede kumufwida lubomba. Nokuba kuti tabali bantu boonse ibacisyoma eeci, nciiyo ncaakayiisya Jesu. Nkooko lino atucibandike.

Imu Juda umwi iwakali kusalulula bamwi wakaboola kuli Jesu akumubuzya mubuzyo wakuti, ‘Ino ncinzi ncendeelede kucita kutegwa ndikapone kukabe kutamani?’ Jesu wakalizyi kuti imwaalumi ooyo wakali kuyanda kuti amwaambile kuti tweelede kuba alubomba buyo kubantu bamuciinga cesu naa bamucisi cesu. Aboobo, muciindi cakuti awiingule mubuzyo mwini, Jesu wakabuzya mwaalumi ooyo kuti: ‘Ino Mulawo wa Leza waamba kuti tweelede kucita nzi?’

 Imwaalumi ooyo wakaingula kuti: ‘Weelede kuyanda Jehova Leza wako amoyo wako woonse, alimwi weelede kuyanda simukobonyoko mbuli mboliyanda omwini.’ Jesu wakati: ‘Waingula kabotu. Kozumanana kucita mbubonya oobo, eelyo uyoobujana buumi butamani.’

Pele mwaalumi ooyo tanaakayanda kubafwida lubomba naa kubayanda bantu mbobakaindene limwi. Aboobo wakasola kulibotya-botya. Wakabuzya Jesu kuti: “Ino munamuzeesu (simukoboma) nguni?” Ulakonzya kuti wakali kuyanda kuti Jesu aambe kuti: “Basimukobonyoko mbalongwe bako” naa kuti, “Mbantu ibalibonya mbuli nduwe.” Ikutegwa aingule mubuzyo ooyo, Jesu wakaana kaano kajatikizya mu Juda amuna Samariya. Ikaano aako kali boobu.

Umwi muntu wakali kweenda mumugwagwa kaselemuka kuzwa kumunzi wa Jerusalemu kuya ku Jeriko. Imwaalumi ooyu wakali mu Juda. Naakali kweenda, wakafwumpwa ababbi. Bakamuuma akumuwisizya ansi akumubbida mali azyakusama zyakwe zyoonse. Aabo babbi bakamuuma kapati cakuti wakalicisa, mpoonya bakamusiya kanetukide mumbali lyamugwagwa.

Nokwakainda kaindi kasyoonto buyo, kwakasika mupaizi umwi wakali kweenda mumugwagwa ngweena ooyo. Wakamubona mwaalumi  ooyo wakaumidwe kapati. Ino nowakacita nzi yebo?— Imupaizi ooyo wakaile kumulanga buyo, wamweenguluka akumwiinda. Kunyina naakayima pe. Kunyina cintu ncaakacita kutegwa amugwasye muntu ooyo.

Mpoonya alimwi kwakasika mwaalumi uumbi mukombi kapati mumugwagwa ngoona ooyo. Wakali mu Levi iwakali kubelekela mutempele ku Jerusalemu. Sena wakaima kutegwa amugwasye?— Peepe. Wakaile kwiinda buyo mbubwenya bwakacita mupaizi.

Mpoonya kwakasika muna Samariya. Sena wamubona keenda mumugwagwa?— Wakabona mu Juda kalede kaliciside kapati. Pele kozyiba kuti ibunji bwaba Samariya aba Juda kunyina nobakali kuyandana abuniini. (Johane 4:9) Aboobo, sena muna Samariya ooyu wakamulanga buyo mwaalumi ooyu kakunyina kumugwasya? Sena wakati: ‘Ino nkaambo nzi  ncondeelede kugwasya mu Juda ooyu? Kayi kunyina naali kunga wandigwasya ikuti nindali ndime ndalicisa’?

Muna Samariya wakalanga muntu ooyo wakalede mumbali aamugwagwa, eelyo wakamufwida luzyalo. Cakamwaalila kwiile kumusiya buyo kalede kusikila afwe. Aboobo wakaseluka aambongolo njaakatantide, wakaunka munsi lyamwaalumi ooyo akutalika kumubamba-bamba muzicisa zyakwe. Wakasanzya zicisa awaini alimwi akuzibombeka mafwuta. Eeci cakali kuyoogwasya kuponya zicisa eezyo cakufwambaana. Mpoonya wakazambaila zicisa eezyo acisani.

Ooyo muna Samariya wakamuyumuna kabotu-kabotu mwaalumi wakaliciside akumubikka aambongolo yakwe. Mpoonya bakeenda asyoonto-syoonto mumugwagwa mane basika kuŋanda yabeenzu naa kuka hotela. Ooko muna Samariya wakamubbadalila ŋanda yakuti ooyo mwaalumi akkale alimwi wakamulanganya kabotu.

Mpoonya Jesu wakabuzya mwaalumi ngwaakali kubandika limwi kuti: ‘Nguni akati kabaalumi botatwe aaba ngoyeeya kuti wakali simukobonyina mubotu?’ Ino yebo inga waingula buti? Sena wakali mupaizi, mu Levi, naa muna Samariya?—

Imwaalumi ooyo wakaingula kuti: ‘Imwaalumi ooyo wakaima akulanganya mwaalumi wakaliciside nguwakali simukobonyina mubotu.’ Jesu wakati: ‘Waingula kabotu. Koya ayebo ukacite mbubonya oobo.’—Luka 10:25-37.

 Elo kakali kabotu kaka kaano aako, tee kayi? Kalatondezya caantangalala aabo beelede kuba basimukoboma. Tabali buyo balongwe besu pe. Alimwi tabali buyo bantu bajisi lukanda lweelene alwesu naa mbotwaambaula limwi mwaambo omwe. Jesu wakatuyiisya kuti tube alubomba kubantu boonse, kunyina makani ankobazwa, mbobalibonya naa mwaambo ngobakanana.

Oobu mbwabede Jehova Leza. Tasalululi pe. Jesu wakaamba kuti: ‘Usowanu uuli kujulu ulapasuzya izuba lyakwe kubabi akubabotu. Alimwi ulawisizya imvwula kubabotu alimwi ababi.’ Aboobo tweelede kuba alubomba kubantu boonse mbubonya Leza mbwacita.—Matayo 5:44-48.

Aboobo, ino ncinzi ncoyoocita ikuti wabona muntu walicisa?— Ino mbuti kuti muntu ooyo kazwa kucisi cimbi naa kajisi lukanda lwiindene andojisi? Ucili simukobonyoko, aboobo weelede kumugwasya. Ikuti wabona kuti tokonzyi kumugwasya nkaambo ucili mwana, ulakonzya kulomba muntu mupati kuti akugwasye. Naa ulakonzya kulomba lugwasyo kumupulisa naa kubayi. Wacita boobo, nkokuti ulaa lubomba mbubonya mbuli mwaalumi uulya muna Samariya.

Imwiiyi Mupati uyanda kuti katuli alubomba. Uyanda kuti tubagwasye bamwi, kunyina makani naa mbabani. Nkakaambo ncaakaambila kaano kamu Samariya silubomba.

Ikujatikizya ciiyo eeci cakuyanda bantu boonse kakunyina kubikkila makani kumusyobo naa cisi nkobazwa, bala Tusimpi 19:22; Incito 10:34, 35; alimwi a 17:26.

[Zifwanikiso izili apeeji 83]

Ino mbuti mbotweelede kubalanganya aabo mbotwiindene mwaambo alukanda naa ibazwa kumasi aambi?

[Zifwanikiso izili apeeji 84, 85]

Ino nkaambo nzi muna Samariya ncaakali simukobonyina mubotu?

[Cifwanikiso icili apeeji 86]

Mbuti mbonga waba simukobonyina mubotu?