Cibalo 34

Ino Ncinzi Cicitika Twafwa?

MBUBWENYA mbuli mbozyi kale, ibantu mazubaano balacembaala, balaciswa alimwi balafwa. Nobaba bana bamwi balafwa. Sena weelede kuluyoowa lufwu naa muntu uuli woonse iwafwa?— Sena ulicizyi icicitika ikuti naa twafwa?—

Kunyina muntu uupona sunu iwakafwide kale akutalika kupona alimwi uukonzya kutwaambila cicitika muntu aafwa. Pele eelyo Jesu, Imwiiyi Mupati naakali anyika, kuli mwaalumi umwi iwakafwa akupona alimwi. Tulakonzya kwiiya cicitika kuli baabo ibafwa kwiinda mukubala makani aajatikizya nguwe. Imwaalumi ooyo wakali mulongwe wa Jesu alimwi wakali kukkala ku Betaniya, imunzi musyoonto uutali kule pe aku Jerusalemu. Izina lyakwe wakali Lazaro, alimwi wakajisi bacizyi bobile ibakali kwiitwa kuti Marta alimwi a Mariya. Atubone ceeco ncolyaamba Bbaibbele kuti ncecakacitika.

Bumwi buzuba Lazaro wakaciswa kapati. Aciindi eeco, Jesu wakali kule. Aboobo ba Marta alimwi a Mariya bakatuma muntu kuti akamwaambile Jesu kuti imwanookwabo Lazaro, wakalicisidwe kapati. Bakacita oobo akaambo kakuti bakalizyi kuti Jesu wakali kukonzya kuunka akuyoomuponya imunyina. Jesu tanaakali musilisi pe, pele wakalijisi nguzu nzyaakapedwe kuli Leza zyakuponya bulwazi buli boonse.—Matayo 15:30, 31.

Pele Jesu kataninga kuunka kuyoomubona Lazaro, bulwazi bwa Lazaro bwakalema eelyo wakafwa. Nokuba boobo Jesu wakaambila basikwiiya bakwe kuti Lazaro wakali koona eelyo wakali kuunka kuti akamusinsimune. Basikwiiya tiibakaciteelela ncaakali kwaamba Jesu. Aboobo cakusalazya Jesu wakati: “Lazaro wazaya.” Ino eeci caamba nzi kujatikizya lufwu?— Ee, caamba kuti lufwu luli  mbuli ŋonzi. Nkoona kupati cakuti muntu ooyo woona kunyina analota ziloto.

Mpoonya Jesu wakaboola kuzyooswaya Marta alimwi a Mariya. Ibalongwe banji-banji bamukwasyi bakalisikide kale. Bakaunka kuti bakaumbulizye bacizyi akaambo kakuti munyina wakafwa. Eelyo Marta naakamvwa kuti Jesu waboola, wakayumuka akumucinga. Ndilyonya awalo Mariya wakazwa kuti amubone Jesu. Wakali mubuumba kapati alimwi wakali kulila, eelyo wakawida ansi kumatende aa Jesu. Abalo balongwe ibakamutobela Mariya bakali kulila.

Imwiiyi Mupati wakalomba kuti bamwaambile ooko nkobakamuzikkila Lazaro. Aboobo bantu bakamutola Jesu kumpangala yabbwe ooko Lazaro nkwaakazikkilidwe. Jesu naakabona bantu boonse kabalila, awalo wakatalika kulila. Wakalizyi mbocicisa kufwidwa muntu uuyandwa.

Kumulyango kwampangala kwakali bbwe, aboobo Jesu wakati: “Amugwisye bbwe.” Sena bacite oobo?— Marta wakayeeya kuti tiicakali cibotu kucita boobo. Wakati: “Omwami, kuciindi cino ulanunka, nkaambo ulifwide mazuba one.”

Pele Jesu wakamwaambila kuti: “Sena nsikwe nendakwaambila kuti, Na wasyoma ulabona bulemu bwa-Leza?” Jesu wakali kwaamba kuti Marta wakali kunoobona cimwi cakali kuyoopa bulemu kuli Leza. Ino ncinzi Jesu ncaakali kuyanda kucita? Ibbwe nolyakagusigwa, Jesu wakapaila cakupozya kuli Jehova. Mpoonya Jesu wakoompolola ajwi pati ategwa: “Lazaro, kozwa omo”! Sena wakali kuyoozwa ncobeni mumpangala? Sena wakali kukonzya kucita oobo?—

Sena inga wamusinsimuna muntu uuli mukoona?— Inzya, inga wamusinsimuna ikuti wamwiita ajwi lipati. Pele sena awalo muntu uuli mukoona mulufwu inga wamusinsimuna?— Peepe. Noompolola buti, imuntu uufwide takonzyi kumvwa pe. Kunyina muntu uuli woonse anyika sunu ncakonzya kucita kutegwa abusye bantu bafwide.

Pele Jesu wakaliindene. Wakalijisi nguzu zyaalubazu nzyaakamupede Leza. Aboobo eelyo Jesu naakaita Lazaro, kwakacitika cintu cigambya  kapati. Imwaalumi ooyo wakafwide kwamazuba one wakazwa mumpangala! Wakabusigwa akutalika kupona alimwi! Wakali kukonzya kuyoya alimwi, kweenda alimwi akwaambaula! Inzya, Jesu wakamubusya Lazaro kuzwa kubafwu.—Johane 11:1-44.

Lino kociyeeyela eeci: Ino ncinzi cakacitika kuli Lazaro naakafwa? Sena cibeela cakwe cimwi—ibuumi naa muuya wakazwa mumubili wakwe akuunka kuyookkalila kubusena bumbi? Sena buumi bwa Lazaro bwakaunka kujulu? Sena wakali kupona kwamazuba aayo one kujulu a Leza alimwi abangelo basalala?—

Peepe, tanaakali kupona pe. Koyeeya kuti, Jesu wakaamba kuti Lazaro wakali koona. Ino inga uli muciimo cili buti noli mukoona? Noli mukoona kwaciindi cili mbocibede, kunyina nozyiba cicitika aawo mpobede, tee kayi?— Alimwi eelyo nowasinsimuka, inga tozyi naa wali koona kwaciindi cilamfwu buti kusikila mane walanga ciindi ankoloko.

Mbocibede oobo akubantu bafwide. Kunyina ncobazyi. Kunyina mbobalimvwa. Alimwi tabakonzyi kucita cintu cili coonse. Mbocakabede  akuli Lazaro oobo naakafwide. Lufwu luli mbuli koona eelyo muntu natakonzyi kwiibaluka cintu cili coonse. Ibbaibbele lyaamba kuti: “Pele bafwide tabezi cintu niciba comwe.”—Mukambausi 9:5, 10.

Alimwi kociyeeyela aceeci: Ikuti Lazaro naakali kujulu kwamazuba aayo one, sena naatakaamba kujatikizya mbokubede kujulu?— Alimwi ikuti naakali kujulu, sena Jesu naakamusinikizya kupiluka kunyika kuzwa kubusena oobo butaliboteli?— Peepe, naatakacita oobo!

Nokuba boobo, ibantu banji baamba kuti tubujisi buya buumi, alimwi baamba kuti ibuumi oobo bulazumanana eelyo mubili nowafwa. Baamba kuti ibuumi bwa Lazaro bwakali kupona kubusena bumwi. Pele Ibbaibbele teensyi ncolyaamba eeco pe. Lyaamba kuti Leza wakacita kuti mwaalumi wakusaanguna Adamu abe “muumi.” Adamu wakali muumi. Alimwi Bbaibbele lyaamba kuti eelyo Adamu naakabisya, wakafwa. Wakaba “mutunta,” naa uufwide alimwi wakapiluka kubulongo nkwaakabumbidwe. Alimwi Bbaibbele lyaamba kuti abalo bana ba Adamu boonse bakakona cibi alufwu.—Matalikilo 2:7; 3:17-19; Myeelwe 6:6; Ba-Roma 5:12.

Aboobo, cilasalala kuti tatujisi buumi bwaandeene amubili pe.  Umwi aumwi wandiswe mmuumi. Alimwi mbwaanga bantu bakakona cibi kuzwa kumwaalumi wakusaanguna Adamu, Ibbaibbele lyaamba kuti: ‘Muntu uubisya nguuyoofwa.’—Ezekieli 18:4.

Bantu bamwi balabayoowa bantu bafwide. Kunyina nobanga basika munsi lyanamaumbwe akaambo kakuyeeya kuti bantu bafwide bajisi buumi bwaandeene amubili ibukonzya kuletela mapenzi kubantu bapona. Pele sena muntu uufwide ulakonzya kuletela mapenzi kumuntu uupona?— Peepe, takonzyi pe.

Alimwi bantu bamwi mane basyoma kuti ibantu bafwide balakonzya kuswaya bantu bapona kabali muciimo camyuuya naa mizimo. Aboobo balababikkila cakulya bantu bafwide. Pele ibantu bacita boobo tabazisyomi pe nzyaamba Leza kujatikizya bantu bafwide. Ikuti katusyoma eeco Leza ncaamba, tatukabayoowi pe bantu bafwide. Alimwi kuti katumulumba ncobeni Leza akaambo kabuumi mbwatupede, tuyookutondezya kulumba kwesu kwiinda mukucita zintu nzyakkomanina.

Pele ulakonzya kotelaika kuti: ‘Sena Leza uyoobabusya ibana bafwide? Sena ncobeni ulayanda kubabusya?’ Atwaabandike makani aaya mucibalo citobela.

Atubale aambi makani mu Bbaibbele kujatikizya ciimo cabantu bafwide alimwi amuntu mbwali buumi, ku Intembauzyo 115:17; 146:3, 4; alimwi a Jeremiya 2:34.

[Cifwanikiso icili apeeji 179]

Ino ncinzi Jesu ncaakacitila Lazaro?

[Cifwanikiso icili apeeji 180]

Ino Lazaro wakali muciimo cili buti naakafwide?

[Cifwanikiso icili apeeji 181]

Ino nkaambo nzi ncotuteelede kubayoowa bantu bafwide?