Cibalo 35

Tulakonzya Kubuka Kuzwa Kulufwu!

IKUTI naa twafwa, sena Leza uyooyanda kutubusya, nkokuti kutupa kuti tupone alimwi?— Imwaalumi mululami Jobu wakali alusyomo lwakuti Leza uliyandide kutubusya. Aboobo eelyo Jobu naakazyiba kuti wakalaafwaafwi kufwa, wakaambila Leza kuti: “Noyoondiita njoovuwa.” Jobu wakati, Jehova Leza wakali kuyooyandisisya kumubusya.—Jobu 14:14, 15.

Jesu uli buyo mbuli Jehova Leza, nkokuti Bausyi. Jesu ulayanda kutugwasya. Eelyo mwaalumi umwi iwakali kuciswa cinsenda naakamwaambila kuti, “‘Kuti koyanda, ulakonzya kundiponya,’” Jesu wakaingula kuti: “‘Ndayanda.’” Eelyo wakamuponya ooyo mwaalumi wakali kuciswa cinsenda.—Maako 1:40-42, Ci.

Jesu wakaiya kuli Bausyi mbociyandika kubayanda bana. Iziindi zyobile ikaindi, Jehova wakabelesya babelesi bakwe ikubusya bana basyoonto. Elija wakakombelezya Jehova kuti abusye mwana mulombe wamwanakazi wakali kumusamausya. Alimwi Jehova wakacita oobo. Jehova alimwi wakabelesya mubelesi  wakwe Eliya ikubusya mulombe umwi.—1 Bami 17:17-24; 2 Bami 4:32-37.

Sena tacikukkomanisyi kapati ikuzyiba kuti Jehova ulatuyanda kapati?— Tatubikkili buyo maanu eelyo notuli baumi. Uyootwiibaluka aleelyo twaakufwa. Jesu wakaamba kuti aabo Bausyi mbobayanda bababona kuti mbaumi nokuba kuti balifwide! (Luka 20:38) Ibbaibbele lyaamba kuti ‘niluba lufu nibuba buumi niziba zintu ziliko naa ziciza tazikakonzyi kutwaandaanya kuluyando lwa Leza.’—Ba-Roma 8:38, 39.

Jesu naakacili anyika, wakatondezya kuti Jehova ulabalanganya bana basyoonto. Ndasyoma ulayeeya kuti Jesu wakajana ciindi cakubandika kubana kujatikizya Leza. Pele sena ulizyi kuti Leza wakapede Jesu nguzu zyakubusya bana bafwide kuzwa kubafwu?— Atubandike makani aakuciindi Jesu naakabusya mwana musimbi wakajisi myaka yakuzyalwa iili 12 iwamwaalumi uutegwa Jairo.

Jairo wakali kukkala abakaintu bakwe alimwi amwanaabo omwe buyo munsi lya Lwizi lwa Galilaya. Bumwi buzuba imwana ooyo musimbi wakaciswa kapati, alimwi Jairo wakazyiba kuti wakali afwaafwi kufwa. Wakatalika kuyeeya Jesu, imwaalumi mubotu ooyo Jairo ngwaakamvwide kuti ulakonzya kuponya bantu. Aboobo Jairo wakaunka kumukapaula. Wakamujana Jesu kunkomwe ya Lwizi lwa Galilaya, kayiisya bantu banji.

Jairo wakapunauka munkamu yabantu akusika kuli Jesu akumufwugamina. Wakaambila Jesu kuti: ‘Kana kangu kasimbi kaciswa kapati. Akaka ndakukomba boola ukagwasye. Ndakomba buya.’ Ndilyonya, Jesu wakayumuka antoomwe a Jairo. Inkamu yabantu yakaunkide kuyoobona Mwiiyi Mupati ayalo yakatobela. Pele nobakeenda musinzo uuli mbuubede, kwakabacinga baalumi kuzwa kuŋanda ya Jairo ibakamwaambila kuti: “Mwanaako wafwa kale. Ino ucimukatazizya nzi Mwiiyi?”

Jesu wakabamvwa baalumi aabo nobakaamba makani aaya. Wakalizyi mbocakamucisa Jairo ikufwidwa mwanaakwe omwe buyo. Aboobo  wakamwaambila kuti: ‘Utayoowi. Kosyoma buyo muli Leza, eelyo mwanaako musimbi uyooba kabotu.’ Bakazumanana kweenda kusikila mane basika kuŋanda ya Jairo. Aaŋanda ibalongwe bamukwasyi boonse bakali kulila. Bakali mubuumba akaambo kakuti kasimbi aako ikakali kalongwe kabo kakalifwide. Pele Jesu wakabaambila kuti: ‘Amuumune. Ooyu mwana tafwide pe, pele uloona.’

Jesu naakaamba makani aaya, bantu bakatalika kumuseka, nkaambo bakalizyi kuti mwana wakalifwide ncobeni. Aboobo ino uyeeya kuti nkaambo nzi Jesu ncaakaamba kuti uloona?— Ino uyeeya kuti nciiyo nzi ncaakali kuyanda kuyiisya bantu?— Wakali kuyanda kubazyibya kuti lufwu lulakonzya kuba mbuli leelyo muntu noona muŋonzi. Wakali kuyanda kubayiisya kuti kwiinda munguzu zya Leza, wakali kukonzya kubusya muntu kuti apone alimwi mbubwenya mbocitakatazyi kusinsimuna muntu woona.

Wakabatandila anze boonse akusiya buyo baapostolo bakwe ba Petro, Jakobo alimwi a Johane, bausyi alimwi abanyina bamusimbi. Mpoonya wakaunka kooko kwakali mwana ooyo. Wakamujata kukwaanza akwaamba kuti: ‘Omusimbi, buka!’ Ndilyonya wakabuka akutalika kweenda! Bausyi abanyina bakakondwa citaambiki.—Maako 5:21-24, 35-43, Ci; Luka 8:40-42, 49-56.

 Lino kociyeeyela eeci. Mbwaanga Jesu wakali kukonzya kubusya mwana musimbi ooyo, sena ulakonzya kucita oobo akubantu bambi?— Sena uyeeya kuti uyoocita ncobeni oobo?— Inzya, uyoocita. Jesu lwakwe wakati: ‘Ciyoosika ciindi boonse bali muzyuumbwe nibayoomvwa majwi aangu, eelyo bayoovwukkuka kuzwa muli nzizyo.’—Joni 5:28, 29, Ci.

Sena uyeeya kuti Jesu ulayanda kubabusya bantu?— Icikozyanyo cimbi camu Bbaibbele cilagwasya kwiingula mubuzyo ooyu. Icakacitika bumwi buzuba munsi aamunzi wa Naini citondezya mbwalimvwa Jesu kujatikizya bantu bauside mumadilwe.

Imwanakazi wakafwidwa mwanaakwe musankwa iwakali kulilwa wakali akati kabasidilwe eelyo nkamu yabantu eeyo noyakali kuzwa mu Naini. Kwakaindide ciindi cili mbocibede imulumaakwe kafwide, alimwi lino mwana ngwaakajisi alikke awalo wakafwa. Elo wakaluuside kapati kaka! Ibantu banji bamumunzi wa Naini bakamutobela eelyo mutumba wamwanaakwe musankwa nowakali kutolwa kuzwa mumunzi. Imwanakazi ooyo wakali kuyaabulila, alimwi kwakanyina cintu bantu ncobakali kunga bacita kutegwa bamuumbulizye.

Mubuzuba oobo, Jesu abasikwiiya bakwe bakali kweenda kabatozya kumunzi ooyo wa Naini. Nobakali afwaafwi amulyango wamunzi, bakaswaanganya nkamu yabantu bakali kuya kukuzikka mutumba wamwana musankwa wamwanakazi ooyo. Jesu naakamubona mwanakazi ooyo kalila, wakamweetelela kapati. Wakanjilwa mumoyo akaambo kabuusu bwakwe. Wakayanda kuti amugwasye.

Aboobo caluyando pele cakusinizya Jesu wakaambila mwanakazi ooyo kuti: “Leka kulila,” mpoonya wakamuswiilila. Mbwaakazicita zintu cakapa kuti bantu boonse bamulangilile cakuyandisisya. Eelyo Jesu naakaunka kumutumba, kulangilwa kuti boonse bakali kweezyeezya ncaakali kuyanda kucita. Jesu wakalailila kuti: “Mulombe, ndakwaambila, Buka”! Ndilyonya, wakakkala! Alimwi wakatalika kwaambaula.—Luka 7:11-17.

Koyeeya buyo mbwaakalimvwa mwanakazi ooyo! Ino yebo inga  walimvwa buti ikumutambula alimwi muyandwa wako iwakafwide?— Sena eeci tacitondezyi kuti Jesu mmasimpe ulabayanda bantu alimwi ulayanda kubagwasya?— Koyeeya buyo mbocinookkomanisya kapati munyika ya Leza mpya ikutambula bantu bakafwide ibayoopona alimwi!—2 Petro 3:13; Ciyubunuzyo 21:3, 4.

Aciindi eeco, bamwi babaabo ibayoobusigwa mbantu mbotwakazyi kabatana kufwa, kubikkilizyaa bana basyoonto. Tuyookonzya kubazyiba mbubwenya Jairo mbwaakamuzyiba mwanaakwe musimbi eelyo Jesu naakamubusya. Ibamwi banooli bantu bakafwa myaanda-myaanda nozyiba zyuulu-zyuulu zyamyaka zyainda. Pele nokuba kuti bakapona nsiku, Leza takabalubi pe.

Sena tacikkomanisyi ikuzyiba kuti oobo Jehova Leza alimwi a Mwanaakwe, Jesu, mbobatuyandisya?— Bayanda kuti katupona, ikutali buyo kwamyaka misyoonto, pele lyoonse mane kukabe kutamani!

Ikujatikizya bulangizi butaliboteli ibuli mu Bbaibbele kujatikizya bafwide, bala Isaya 25:8; Incito 24:15; alimwi a 1 Ba-Korinto 15:20-22.

[Zifwanikiso izili apeeji 182]

Ino mbuti Jehova mbwaakatondezya kuti ulabayanda bana basyoonto?

[Cifwanikiso icili apeeji 184]

Ino ncinzi ncotwiiya kujatikizya kubusigwa kwamwana musimbi wa Jairo nkwaakacita Jesu?

[Cifwanikiso icili apeeji 186]

Ino kubusigwa kwamwana omwe buyo ngwaakajisi mwanakazi ooyu kutondezya nzi?