1. Ino mapenzi nzi aataboneki aajanika mumikwasyi?

MOOTOKALA wakaindi wazwaa kusanzigwa akupolisyigwa. Kuli basikwiinda ulaŋaima, mbuli kuti mupya. Pele kunsi cibili-bili cilidwe nkalaya. Cili buyo mbuli mikwasyi imwi. Nokuba kuti aatala iboneka kabotu, kuseka-seka kwaatala kusisikizya buyoofu alimwi amapenzi. Kuŋanda kuli nkalaya iilya luumuno lwamukwasyi. Mapenzi obile aanga acita boobu mbudakwi alimwi abulwani.

2. (a) Ino Bbaibbele lyaamba nzi kumakani aakunywa bukoko? (b) Ino budakwi ninzi?

² Ibbaibbele talikasyi kunywa bukoko munzila yeelede pe, pele lilakasya bukolwi. (Tusimpi 23:20, 21; 1 Ba-Korinto 6:9, 10; 1 Timoteo 5:23; Tito 2:2, 3) Pele budakwi bulainda abukolwi; mbulwazi bwakuyanda bukoko lyoonse alimwi akwaalilwa kulyeendelezya mukunywa. Badakwi balakonzya kuba bantu bapati. Mukubula coolwe bakubusi abalo balakonzya kuba badakwi.

3, 4. Amupandulule mapenzi aaletwaa mudakwi kumukaakwe alimwi akubana.

³ Ibbaibbele kaindi lyakatondezya kuti kunywa bukoko munzila itayelede kulakonzya kunyonganya luumuno mumukwasyi. (Deuteronomo 21:18-21) Mukwasyi woonse ulapenga akaambo kabudakwi. Mukakwe ulapenga kuyeeya nzila zyakumulesya ikunywa mudakwi,  alimwi akulwana mapenzi ngaleta. Ulasola kusisa bukoko, kubutila, kusisa mali aakwe, alimwi akusola kumukombelezya kuyanda mukwasyi wakwe, ibuumi bwakwe, alimwi a Leza—pele mudakwi ulazumanana kunywa. Akaambo kakuti mukaintu wasola pele waalilwa kweendelezya kunywa kwamuntu oyu, ulatyompwa akulimvwa kuti taakwe ncakonzya kucita. Ulakonzya watalika kuyoowa mumoyo, kunyema, kulipa mulandu, kufwa nsoni, kulibilika, alimwi akulyuubya-ubya.

⁴ Bana balapenga akaambo kabudakwi bwabazyali babo. Bamwi balaumwa. Bamwi baloonwa cakusinikizigwa. Balakonzya mane akuyeeya kuti mbabo bakapa kuti bazyali babo babe badakwi. Akaambo kakutasyomeka kwamudakwi, inga bayeeya kuti boonse bantu mbobabede, aboobo kanjikanji balaleka kusyoma bantu. Nkaambo bana tabaangulukide kwaamba zintu zicitika kuŋanda, balakonzya batalika kuvwundika buyo mapenzi aabo mumoyo alimwi eci inga cabaletela buyo mapenzi aambi aakumubili. (Tusimpi 17:22) Bana bali boobu balakonzya kukomena aciimo eci cakutalisyoma naa kulyuubya-ubya.

5. Ino budakwi inga bweendelezegwa buti, alimwi nkaambo nzi eci ncocili ciyumu?

⁵ Nokuba kuti bahaabupampu banji baamba kuti penzi lyabudakwi talikonzyi kusilikwa, bunji bwabo balazumina kuti mudakwi ulakonzya kugwasigwa kuti naa walekela limwi kunywa. (Amukozyanisye a Matayo 5:29.) Nokuba boobo kucita kuti mudakwi azumine kugwasigwa ncintu cuuba-uba kwaamba kwiinda kucita nkaambo kanjikanji tazumini kuti ulijisi penzi elyo pe. Pele kuti banamukwasyi babweza ntaamu yakulwana penzi ndyobaletelwa abudakwi bwakwe, mudakwi inga  watalika kubona kuti ulijisi penzi. Musilisi uuzibide kugwasya badakwi alimwi amikwasyi yabo wakati: “Ndiyeeya kuti cintu cipati ncakuti mikwasyi izumanane buyo amilimo yabo yabuzuba-abuzuba munzila igwasya kapati. Mudakwi inga uyabubona kwaandaana kuliko akati kabanamukwasyi bamwi anguwe.”

6. Ino ndulayo nzi lugwasya kapati kumikwasyi iijisi mudakwi?

⁶ Kuti naa kuli mudakwi mumukwasyi wanu, lulayo lwa Bbaibbele ilwa muuya uusalala inga lwamugwasya kupona munzila iigwasya kapati. (Isaya 48:17; 2 Timoteo 3:16, 17) Amuyeeye njiisyo zimwi izyagwasya mikwasyi kulwana penzi lyabudakwi.

7. Kuti umwi mumukwasyi kali mudakwi, nguni weelede kupa mulandu?

⁷ Amuleke Kulipa Mulandu.  Ibbaibbele lyaamba kuti: “Umwi aumwi uleelede kunyampula mukuli wakwe mwini,” alimwi akuti “toonse buyo tuleelede kulyaambilila makani esu kubusyu bwa-Leza.” (Ba-Galatiya 6:5; Ba-Roma 14:12) Mudakwi ulakonzya kupa muzeezo wakuti banamukwasyi mbobakamunyonganya. Mucikozyanyo, ulakonzya waamba kuti: “Nentanywi nomwakandeendelezya kabotu.” Kuti naa bamwi babaanga balavwiilizya, bamukulwaizya kuti azumanane kunywa. Nokuba kuti tulapenga akaambo kabantu bamwi naa ambweni mukubula buyo coolwe, toonse—kubikkilizya abadakwi—tweelede kunyamuna mukuli wazintu nzyotucita.—Amukozyanisye a Ba-Filipi 2:12.

8. Muunzila nzi zimwi mudakwi nzyanga wagwasigwa kubona mapenzi ngaleta?

⁸ Mutanooyeeyi kuti lyoonse mweelede kukwabilila mudakwi kumapenzi ngaliletela akaambo kakunywa kwakwe.  Kasimpi kamu Bbaibbele ikaamba zyamuntu mukali kalakonzya kubeleka akumudakwi: “Na wamuvuna, ulaindulula alimwi.” (Tusimpi 19:19) Amumuleke mudakwi apenge akaambo kakunywa kwakwe. Amumuleke alisanzizye matombe ngaalicitila naa kulipandulwida  alikke kulibasimalelo aakwe kumilimo bwaca ikuti naa wakalibbizya kanywa.

9, 10. Ino nkaambo nzi mikwasyi yabadakwi ncoyeelede kujana lugwasyo, alimwi ndugwasyo lwabani kapati lweelede kuyandaula?

⁹ Amutambule lugwasyo kulibamwi.  Ibbuku lya Tusimpi 17:17 lyaamba kuti: “Muzwalani ulayandisya kuziindi zyoonse, alimwi munyina wazyalilwa mapenzi.” Kuti naa kuli mudakwi mumukwasyi wanu, muli mumapenzi. Muyandika kugwasya. Mutawayiwayi pe kuyandaula lugwasyo ‘kubazwalani beni-beni.’ (Tusimpi 18:24) Ikwaambaula aabantu baliteelela penzi naa aabo bakainda muciimo ncoona eco inga kwamugwasya kuziba ncomweelede kucita alimwi ancomuteelede kucita. Pele amucenjele. Amubandike abantu mbomusyoma, aabo ibakonzya kubamba “maseseke aanu.”—Tusimpi 11:13.

¹⁰ Amwiiye kusyoma Banakristo baalu.  Baalu mumbungano ya Bunakristo balakonzya kugwasya kapati. Aaba Baalumi basimide baliyiide kumakani aa Jwi lya Leza alimwi balizi mbozitobelwa njiisyo zyalyo. Balakonzya ncobeni kuba “macijilo aakulivuna kumuuwo aciyubilo cakucijila ciindi cakuwidwa imvula yamuyoba. Uyooba mbuli tulongalonga twamaanzi munkanda injumu, mbuli cenzule campangala impati munyika iikataazya.” (Isaya 32:2) Kunze kwakukwabilila mbungano yoonse kuzintu zinga zyainyonyoona, Banakristo baalu balaumbulizya, balatontozya, alimwi balabikkila maanu kumuntu amuntu uujisi mapenzi. Amugwasigwe ambabo.

11, 12. Ino nguni uugwasya kapati mikwasyi yabadakwi, alimwi ilugwasyo olu lupegwa buti?

¹¹ Kunze lyaboobo, amujane nguzu kuli Jehova.  Ibbaibbele lilatusyomezya mumajwi aatontozya aakuti: “Jehova uli afwaafwi kubawizukide mumoyo, ulafutula batete myuuya.” (Intembauzyo 34:18) Kuti naa mwalimvwa  kuwizuka moyo naa muuya akaambo kamapenzi akukkalaa mudakwi, amuzibe kuti “Jehova uli afwaafwi.” Ulaateelela mapenzi aanu.—1 Petro 5:6, 7.

¹² Kusyoma ncaamba Jehova mu Jwi lyakwe inga kwamugwasya kulwana muuya wakulibilika. (Intembauzyo 130:3, 4; Matayo 6:25-34; 1 Johane 3:19, 20) Kwiiya Jwi lya Leza alimwi akutobela njiisyo zyalyo kulakonzya kumugwasya kutambula lugwasyo lwamuuya wa Leza uusalala uunga wamupa “inguzu zigambya” kuti mukonzye kupona buzuba abuzuba.—2 Ba-Korinto 4:7. *

13. Ino ndipenzi nzi lyabili linyonganya mikwasyi minji?

¹³ Kunywa bukoko munzila iitayelede kuleta penzi limbi linyonganya mikwasyi minji—kulwana muŋanda.

14. Ino bulwani mumaanda bwakatalika lili, alimwi sunu izintu zili buti?

¹⁴ Kulwana kwakusaanguna mubuumi bwamuntu kwakacitikila mumukwasyi ababunyina bobile, Kaini a Abelo. (Matalikilo 4:8) Kuzwa ciindi eco kwali kulwana kwamisyobo yoonse mumaanda aabantu. Kuli balumi bauma bamakaintu babo, bamakaintu balwana balumi babo, bazyali baumina mulunya bana babo alimwi abana bapati basampula bazyali babo.

15. Ino ujatikizigwa buti moyo wabanamukwasyi abulwani bwamumaanda?

¹⁵ Kulwana kwamuŋanda takusiyi buyo zibata zyazilonda zyaamubili pe. Umwi mukaintu wakaumwa wakati: “Mumoyo kuli kufwa nsoni akulipa mulandu. Kanjikanji inga uyanda kuti koide kulede buyo mafwumofwumo oonse, kolombozya kuti nocali buyo ciloto cibi.” Ibana balangilila kulwana naa aabo bakazwa mumaanda muli bulwani, balakonzya abalo kuba balwani nobakomena, nobabaa mukwasyi wabo.

16, 17. Ino kupenzegwa kwamumoyo caamba nzi, alimwi mbuti banamukwasyi mbobapenga munzila eyi?

¹⁶ Bulwani bwamuŋanda tabujatikizyi buyo kuumana pe. Kanjikanji kuli akutukilana. Ibbuku lya Tusimpi 12:18 lyaamba kuti: “Majwi aabantu bamwi alayasa mbuli ipanga.” Ooku ‘kuyasana’ amajwi kujatikizya bulwani bwamumaanda kulabikkilizya akunongana, kubwentelana, kutambikizyanya matusi mabi alimwi akutongookana, kukongana kuumana. Izilonda zicaala mumoyo taziboneki pe, alimwi inga banji tabaziboni pe.

¹⁷ Cintu cuusisya nsoni kapati nkupenzya moyo wamwana—kumutongooka lyoonse alimwi akunyansya milimo yakwe, maanu, naa kumutola ansi. Kusampaula kuli boobu inga kwamutyompya mwana. Bana boonse bayandika kulaya. Pele Bbaibbele lilailila bamawisi  kuti: “Anywebo numawisi, mutanoonyenukili bana banu, kuti batanoosululwi.”—Ba-Kolose 3:21.

18. Ino bulwani bwamumaanda butalikila kuli, alimwi Bbaibbele litondezya kuti inga bwalesegwa buti?

¹⁸ Bulwani mumaanda butalikila mumoyo amumizeezo; micito yesu iletwaa kuyeeya kwesu. (Jakobo 1:14, 15) Kutegwa aleke kulwana, muntu weelede kusandula kuyeeya kwakwe. (Ba-Roma 12:2) Sena eco cilakonzeka? Ee. Ijwi lya Leza lilijisi nguzu zyakusandula bantu. Lilakonzya kugwisya “mampangala mayumu” aamizeezo yalunyonyoono. (2 Ba-Korinto 10:4; Ba-Hebrayo 4:12) Luzibo lwini-lwini lwa Bbaibbele lulakonzya kugwasya bantu kucincila limwi mukuyeeya kwabo cakuti inga baambwa kuti basama buntu bupya.—Ba-Efeso 4:22-24; Ba-Kolose 3:8-10.

19. Muunzila nzi Munakristo njayelede kumulanga akumweendelezya mukaakwe?

¹⁹ Mbwayelede kulangwa mukaako.  Ijwi lya Leza lyaamba kuti: ‘Balumi beelede kuyanda banakazi babo mbuli mibili yabo beni. Uuyanda mukaakwe waliyanda mwini.’ (Ba-Efeso 5:28) Ibbaibbele alimwi lyaamba kuti balumi beelede ‘balemeke bakazi babo mbuli cilongo cikompeme.’ (1 Petro 3:7) Bamakaintu balaililwa “kuyanda balumi babo” alimwi ‘akubalemya.’ (Tito 2:4; Ba-Efeso 5:33) Masimpe taakwe mulumi uuyoowa Leza uunga waamba kuti ulamuyanda ncobeni mukaintu wakwe kuti kamuuma akumusampaula. Alimwi taakwe mukaintu uunga waamba kuti ulamuyanda ncobeni alimwi ulamupa bulemu mulumaakwe kuti kamutongooka, kumubbodweda, naa kumubwentela.

20. Ino nguni uupede bazyali mukuli wakulanga bana, alimwi nkaambo nzi bazyali ncobateelede kulangila zintu nzibatakonzyi kucita bana babo?

²⁰ Mbobeelede kulangwa bana.  Bana baleelede kuyandwa  akubikkilwa maanu kubazyali babo. Ijwi lya Leza lyaamba kuti bana “ndukono luzwa kuli-Jehova” alimwi “mbulumbu bwakwe.” (Intembauzyo 127:3) Mukuli wakulanga lukono olu Jehova wakaupa kubazyali. Ibbaibbele lyaamba ‘zyamacece aamwana’ alimwi “[a]bufubafuba” bwabana. (1 Ba-Korinto 13:11; Tusimpi 22:15) Bazyali tabeelede kugambwa kuti babona bufwubafwuba mubana babo. Ibana baniini tabali bantu bapati pe. Bazyali tabeelede kulangila mwana kucita zintu zitali zyaciimo cakwe, nguzu zyakwe alimwi azintu ziteendelani abukkale mbwaakakomena abwalo.—Amubone aku Matalikilo 33:12-14.

21. Ino Leza uyanda kuti bazyali bacembeede balangwe buti alimwi beendelezegwe munzila ili buti?

²¹ Mbobeelede kulangwa bazyali bacembeede.  Ibbuku lya Levitiko 19:32 lyaamba kuti: “Buka kunembo lyabasimvwi akulemeka bapati.” Munzila eyi Mulawo wa Leza wali kukulwaizya kubapa bulemu kapati bacembeede. Oyu ulakonzya waba mulimo uukatazya kuti naa muzyali uucembeede kali ulatongooka-tongooka naa ambweni ulaciswa alimwi tafwambaani kweenda nokuba kuyeeya. Nokuba boobo bana bayeezegwa kuti “babweedezezye bazyali babo nzibakatambula kuli mbabo.” (1 Timoti 5:4 Ci) Eci caamba kuti beelede kweendelezya cabulemu ambweni akubagwasya mali aayandika. Kupenzya bazyali bacembeede naa kutabeendelezya kabotu taceendelani pe ancolitwaambila Bbaibbele kuti tubeendelezye.

22. Ino nciimo nzi ciyandika kapati kukuzunda penzi lyabulwani mumaanda, alimwi ceelede kutondezegwa munzila nzi?

²² Amube aciimo cakulyeendelezya.  Ibbuku lya Tusimpi 29:11 lyaamba kuti: “Mufubafuba ulaamba bukali bwakwe boonse, pele musongo ulabukasya akubutontozya.” Ino muuya wanu inga mwaweendelezya buti? Muciindi cakulekela nfundiilili mumoyo, amufwambaane kubweza ntaamu kumana mapenzi aatalika.  (Ba-Efeso 4:26, 27) Amuzwe kuti naa mwabona kuti mwaalilwa kulyeendelezya. Amupailile muuya uusalala wa-Leza kuti umugwasye kulyeendelezya. (Ba-Galatiya 5:22, 23) Kuunka mukweendeenda naa kukutauka mumilimo imbi iigwasya mubili kulakonzya kwamugwasya kukkazika moyo. (Tusimpi 17:14, 27) Amusole ‘kumuka kukalala.’—Tusimpi 14:29.

23. Ino ncinzi cinga cacitika kuti naa umwi wamumbungano ya Bunakristo lyoonse katondezya muuya wabulwani alimwi kateempwi, ambweni ulabikkilizya akuuma banamukwasyi?

²³ Akati kamilimo njatayandi Leza, Ibbaibbele lyaamba kuti kuli “inkondo, bulwani, . . . inyemo” alimwi lilayungizya kuti “abo bacitaula zintu zili boobo tabakooyookona Bwami bwa-Leza.” (Ba-Galatiya 5:19-21) Aboobo kufwumbwa muntu uulyaamba kuti Munakristo pele ulazumanana alimwi teempwi kutondezya muuya wabulwani, ambweni ulabikkilizya akuuma mukaintu abana, ulakonzya kugwisigwa mumbungano ya Bunakristo. (Amukozyanisye a 2 Johane 9, 10.) Munzila eyi mbungano ilakkala kiitajisi bantu balwani.—1 Ba-Korinto 5:6, 7; Ba-Galatiya 5:9.

24. (a) Ino aabo bapenzegwa mulukwatano lwabo inga basala kubweza ntaamu nzi? (b) Ino beenzinyina bajisi luyando alimwi abaalu inga bamugwasya buti muntu uupenzegwa amukaakwe, pele ncinzi ncobateelede kucita?

²⁴ Mbuti aabo Banakristo ibaumwa amuntu ngobakwetene limwi uutasoli kutondezya kuti ulakonzya kucinca? Bamwi basala kukkala amuntu uuli boobu akaambo katwaambo tusiyene-siyene. Bamwi basala kumusiya akaambo kakuyeeya kuti ulabanyonganizizya mizeezo, bukombi bwabo, alimwi amubili wabo—ambweni abuumi bwabo. Cili kumuntu lwakwe uupenzegwa kulisalila ntaamu njayanda kubweza kweelana alusyomo lwakwe muli Jehova. (1 Ba-Korinto 7:10, 11)  Beenzinyina beni-beni, basazinyina naa Banakristo baalu balakonzya bayanda kugwasya alimwi akulaya, pele tabeelede kusinikizya muntu ooyu uupenzegwa kubweza ntaamu imwi. Cili kuli nguwe mwini kulisalila nzila njatitole.—Ba-Roma 14:4; Ba-Galatiya 6:5.

25. Ino mmakanze nzi aamukwasyi Jehova ngajisi?

²⁵ Ciindi Jehova naakabaleta antoomwe ba Adamu a Eva mulukwatano, taakali kuyanda kuti mikwasyi kiizakala amapenzi aanyonganya mbuli budakwi naa  bulwani. (Ba-Efeso 3:14, 15) Mukwasyi wakeelede kuba waluyando alimwi aluumuno alimwi zintu nzyayanda muntu mumoyo, mumizeezo alimwi azyakumuuya zyakeelede kuzuzikizigwa. Nokuba boobo buumi bwamukwasyi bwakatalika kubija kufwambaana akaambo kacibi cakaboola.—Amukozyanisye a Mukambausi 8:9.

26. Ino ncinzi ciyakucitika kuli baabo basola kutobela malailile aa Jehova?

²⁶ Mucoolwe Jehova tanaaleka makanze aakwe aajatikizya mukwasyi. Usyomezya kuleta nyika mpya iilaa luumuno ibantu “[mo]bayookala caluumuno, taakwe naba omwe uuyoobayoosya.” (Ezekiele 34:28) Ciindi eco, budakwi, bulwani mumaanda, amapenzi aambi oonse ayakumanina limwi. Kuseka-seka kwabantu takunooli kokuya kwaatala buyo, ikwakusola kusisa buyoofu alimwi amapenzi, pele kunooli akaambo kakuti bali “muluumuno lunji.”—Intembauzyo 37:11.