Amuliibe Akati Kabantu ba Leza
Cibalo 17
Amuliibe Akati Kabantu ba Leza
1, 2. Ino mbuti ciimo cabantu boonse mbocili mbuli cabantu bali mubusena bwapalanganizigwa amvwula yaguwo?
ATWAAMBE kuti imvwula yaguwo yapalanganya zintu kubusena nkomukkala. Iŋanda yenu yamwaika, alimwi zintu zyenu zyoonse zyaloba. Zyakulya zyaceya. Caide kubaanga tacikwe ambocicitwa. Mpoona, kusika zintu zyakumugwasilizya nzyomwatali kuyeeyela. Kwaletwa maunda-maunda aazyakulya azyakusama. Mwayakilwa ŋanda mpya. Tee kayi inga mwamulumba muntu ooyo iwamwaabila zintu eezyo.
2 Kuli cintu cikozyenye aceeci icicitika sunu. Mbuli mvwula eeyo, kuzanga kwaba Adamu a Eva kwanyonganya bantu. Imunzi wamuntu iwa Paradaiso wakasweeka. Kuzwa leelyo, imfwulumende zyabantu zyakakilwa kukwabilila bantu kunkondo, kumilandu, alimwi akutalulama. Ibukombi bwabasiya anzala bantu yazyakulya zyakumuuya zigwasya. Pesi munzila yakumuuya Jehova Leza lino waabila zyakulya, zyakusama, amayusilo. Ino eeci ucicita buti?
“MUZIKE MUSYOMESI UUCENJEDE”
3. Mbuti Jehova mbwapa zintu kubantu, kwatondezegwa muzikozyanyo nzi?
3 Izintu zyakugwasilizya bantu balimumanyongwe zilaabigwa munzila yabulondo, alimwi Jehova wapa zyakumuuya kubantu bakwe munzila iikozyenye. Mucikozyanyo, ibana Israyeli bakali “mbungano ya-Jehova” kwamyaka iisika ku 1,500. Akati kabo kwakali baabo mbakali kubelesya Leza ikuyiisya Mulawo wakwe. (1 Makani 28:8; 2 Makani 17:7-9) Mumwaanda wamyaka wakusaanguna C.E., Jehova wakatalisya mbunga ya Bunakristo. Imbungano zyakabambwa, zyakali kubeleka abusolozi bwakabunga keendelezya kalo kakali kabaapostolo abaalu. (Incito 15:22-31) Mbubwena asunu, Jehova bantu bakwe ulabeendelezya kwiinda mumbunga yeendelene. Tucizi buti eeci?
4. Nguni wajanika kuba “muzike musyomesi uucenjede” mumazuba aasunu, alimwi mbuti zipo zya Leza zyakumuuya mboziletwa?
4 Jesu wakaamba kuti kuciindi cakubako kwakwe munguzu zya Bwami, “muzike musyomesi uucenjede” uyoojanika upa basikumutobela “zilyo zyabo kuciindi ceelede.” (Matayo 24:45-47) Ino ciindi Jesu naakapegwa Bwami kujulu mu 1914, ooyu “muzike” wakajanika kuba ni? Tabakonzi kuba basololi ba Kristendomu pe. Balo bakageme kusanina matanga abo twaambo tugwasilizya mfwulumende zyazisi zyabo mu Nkondo Yanyika ya I. Pesi izilyo zyakumuuya izyeelede zyakali kupegwa aciindi ceelede ankamu ya Banakristo beni-beni bakananikidwe muuya uusalala wa Leza alimwi ibakali akati kabaabo Jesu mbaakaita kuti “katanga kaniini.” (Luka 12:32) Aaba Banakristo bananike bakakambauka Bwami bwa Leza muciindi camfwulumende zyabantu. Aboobo, mukwiinda kwamyaka mamiliyoni aa “mbelele zimwi” izilulami zyasangana a “muzike” munanike mukukomba kwakasimpe. (Johane 10:16) Kabelesya “muzike musyomesi” a Kabunga kakwe Keendelezya ikasunu, Leza usololela mbunga yakwe yeendelene mukuleta zilyo, zyakusama, mayusilo aakumuuya kuli baabo boonse bayanda kubaa zintu eezi.
“ZILYO ZYABO KUCIINDI CEELEDE”
5. Nciimo nzi cakumuuya iciliwo munyika sunu, pesi ninzi Jehova ncacita kujatikizya ncico?
5 Jesu wakati: “Teensi insima ilike njaaponena muntu, ulaponena amajwi oonse aazwa kumulomo wa-Leza.” (Matayo 4:4) Pele mukubula coolwe bunji bwabantu tababikkili maanu kumajwi aa Leza. Mbuli bwakaambilizya musinsimi wa Jehova Amosi, kuli nzala iitali “nzala yansima nanka nyota yamaanzi pe. Ninzala yakuswiilila majwi aa-Jehova.” (Amosi 8:11) Nobaba bantu bakombi kapati bali munzala yazyakumuuya. Nokuba boobo, kuyanda kwa Jehova nkwakuti “bantu bamisyobo yoonse bafutulwe akuboola kuluzibo lwakuziba lusinizyo.” (1 Timoteo 2:3, 4, NW) Aboobo ulapa maunda-maunda aazilyo zyakumuuya. Ino nkuli nkozinga zyajanwa?
6. Mbuti Jehova mbwaali kusanina bantu munzila yakumuuya muziindi zyainda?
6 Muciindi coonse cainda, Jehova waaba zilyo zyakumuuya kunkamu yabantu bakwe antoomwe. (Isaya 65:13) Mucikozyanyo, ibapaizi bana Israyeli bakabunganya baalumi, bamakaintu, abana kukwiiya Mulawo wa Leza antoomwe munkamu. (Deuteronomo 31:9, 12) Mubusolozi bwakabunga keendelezya, Ibanakristo bamumwaanda wamyaka wakusaanguna bakabamba mbungano akucita miswaangano yakwiiya akukulwaizya kuliboonse. (Ba-Roma 16:5; Filimona 1, 2) Bakamboni ba Jehova balacitobela cilengwa eeci. Mwatambwa kuti kamujanika kumiswaangano yabo yoonse.
7. Mbuti kujanika kumiswaangano ya Bunakristo lyoonse mbokuswaangene aluzibo alimwi alusyomo?
7 Aneeno mulakonzya kamuyiide kale zinji mukuliyiisya kwenu mu Bbaibbele. Ambweni kuli wali kumugwasya. (Incito 8:30-35) Pesi lusyomo lwenu lulakonzya kukozyanya acisyango calo cinga cayuminina akufwa kuti naa catabambililwa bweelede. Aboobo muleelede kutambula busani bwakumuuya bweelede. (1 Timoteo 4:6) Miswaangano ya Bunakristo ilapa bubambe bwalwiiyo ibwaanzilidwe kumusanina munzila yakumuuya akumugwasya kuzumanana kuyaambele mulusyomo mbomuyaabusumpuka muluzibo lwa Leza.—Ba-Kolose 1:9, 10.
8. Nkaambo nzi ncotukulwaizigwa kujanika kumiswaangano ya Bakamboni ba Jehova?
8 Miswaangano ilabeleka aumbi mulimo mupati. Paulo wakalemba ategwa: “Katunga katuyeeyana, k[a]tubusyanya-busyana mukuyandana akucita milimo mibotu. Tutanoonga katuleka kulibunga-bunga.” (Ba-Hebrayo 10:24, 25) Ibbala lyaci Giliki ilisandulwidwe kuti ‘kubusyanya-busyanya’ lilakonzya alimwi akwaamba “kunona, kukwenga.” Kasimpi kamu Bbaibbele kaamba kuti: “Lubulo lulanona lubulonyina, mbubonya obo muntu ulanona busyu bwamweenzinyina.” (Tusimpi 27:17) Swebo toonse tuyandika “kunona” lyoonse. Imapenzi aamunyika aabuzubaa buzuba alakonzya kufwumpya lusyomo lwesu. Ciindi notujanika kumiswaangano ya Bunakristo, kuli kukulwaizyanya. (Baloma 1:11, 12, Ci) Basimbungano balaatobela malailile aamwaapostolo Paulo aakuti, “kamuciya bugwasyanya akuyakana,” alimwi micito iili boobu ilalunona lusyomo lwesu. (1 Ba-Tesalonika 5:11) Alimwi kujanika kumiswaangano ya Bunakristo lyoonse kutondezya kuti Leza tulamuyanda alimwi kutupa ciindi cakuti katumutembaula.—Intembauzyo 35:18.
“AMUBE ALUYANDANO”
9. Mbuti Jehova mbwaapa cikozyanyo cakutondezya luyando?
9 Paulo wakalemba ategwa: “Amube aluyandano, ikuti luyandano ncecaanzyo cabuumi bulondokede.” (Ba-Kolose 3:14) Jehova watugwasya kabotu-kabotu kuti tube aluyando. Munzila nzi? Banakristo balakonzya kutondezya luyando nkaambo luli akati kamicelo iipedwe aa Leza yamuuya uusalala wa Jehova. (Ba-Galatiya 5:22, 23) Jehova lwakwe watondezya luyando lupati kwiinda mukutuma Mwanaakwe simuzyalwa alikke kutegwa ambweni inga twaakubaa buumi butamani. (Johane 3:16) Eeci citondezyo caluyando cipati kwiinda zyoonse cipa cikozyanyo cambuli mbotunga twatondezya bube oobu. “Kuti Leza wakatuyanda boobo, aswebo tuleelede kuyandana umwi aumwi,” mbwaakalemba mwaapostolo Johane.—1 Johane 4:11.
10. Mbuti mbotunga twagwasigwa a “bunyina [boonse, NW]”?
10 Kujanika kwenu mumiswaangano ku Ŋanda ya Bwami kuyoomupa ciindi cibotu cakutondezya luyando. Kwalo ooko muyoojana bantu baindene-indene loko. Cakutadooneka bunji bwambabo bayoomukkomanisya. Aino bantu baliindene bube bwabo naaba akati kabaabo babelekela Jehova. Ambweni musule mwali kwiide kubatantamuka bantu mbomutakozyenye kuzintu zimubotela ambuli mbomubede. Pesi Banakristo beelede kuti “[ba]yande babunyina [boonse, NW].” (1 Petro 2:17) Aboobo aabe makanze eenu kuzibana abaabo bajanika ku Ŋanda ya Bwami—nobaba bantu mbomwiindene misela, ibube, mubala naa lwiiyo. Muyoojana kuti aumwi kuli bube bumwi buyandika walo mwacitide kabotu loko.
11. Nkaambo nzi kwiindana kwambobabede bantu ba Jehova ncokuteelede kumunyonganya?
11 Ikwiindana kwabube bwabantu mumbungano takweelede kuti mane kumunyonganye pe. Mucikozyanyo, amuyeeye myootokala minji kaiyaabweenda antoomwe awenu mumugwagwa. Tayeendi alubilo lomwe yoonse, alimwi tayeelene kululama yoonse pe. Imwi yeendede makkilomita manji, pesi mbuli wenu, imwi yazwaa kutalika. Pesi nokuba kwiindana ooku, nyoonse muyaabweenda mumugwagwa ooyo. Cili mbubwena akubantu bali mumbungano. Tabeendelaamwi kwiiya bube bwa Bunakristo boonse pe. Kuyungizya waawo, tabakozyenye mbobapona munzila yakumubili ayakumuuya. Bamwi bali kumukomba Jehova kwamyaka minji; ibambi bazwaa kutalika. Pesi boonse baleenda munzila iiya kubuumi butamani, “alukamantano lwamoyo omwe alwamiyeeyo yomwe.” (1 Ba-Korinto 1:10) Aboobo amulangisye zintu nzyobakonzya aabo bali mumbungano mubusena bwazintu nzyobakakilwa. Kucita boobo kuyoomupa kubotelwa kumoyo, nkaambo muyoobona kuti Leza ncobeni uli akati kabantu aaba. Alimwi tee nkonkuko nkomuyanda kuba ooko.—1 Ba-Korinto 14:25.
12, 13. (a) Kuti muntu umwi mumbungano wamubisizya, ninzi ncomunga mwacita? (b) Nkaambo nzi ncokuteelede kubikkilila?
12 Mbokunga bantu boonse tabalondokede, zimwi ziindi umwi mumbungano inga waamba naa wacita cintu cimwi cimubisizya. (Ba-Roma 3:23) Siciiya Jakobo wakalemba mbozibede ncobeni zintu kuti: “Toonse tulalubya muziyanza zinji, pele, na kuti muntu uutalubya kukwaamba, oyo ngomuntu mulondosi.” (Jakobo 3:2) Ino muyootyani kuti kwaba muntu uumubisizya? Ikasimpi kamu Bbaibbele kaamba kuti: “Busongo bwamuntu bulamuumusya kukalala; ulayandisya kulekelela milandu.” (Tusimpi 19:11) Kubaa busongo caamba kutabona buyo zyaatala-tala mukaambo, nkuteelela zintu zini-zini zipa muntu kuti kaamba antela kacita zintu munzila imwi. Bunji bwesu tulabelesya kapati busongo mukulijatila notulubizya ilwesu. Ino tulekelenzi kububelesya mukuteelela akutabikkila maanu kukutalondoka kwabambi?—Matayo 7:1-5; Ba-Kolose 3:13.
13 Mutabi nomuluba kuti tweelede kulekelela bambi kuti naa swebo lwesu katuyanda kuti tutambule kulekelela kwa Jehova. (Matayo 6:9, 12, 14, 15) Kuti katuli tucita kasimpe, tuya kweendelezya bambi munzila yaluyando. (1 Johane 1:6, 7; 3:14-16; 4:20, 21) Aboobo kuti mwajana penzi mukati kambungano amuntu umwi, mutabikkilili. Kuti kamusamine luyando, mulasoleka kumana mapenzi, alimwi tamukeenkeli kulilekelela kuti kamuli mwabisizya bamwi.—Matayo 5:23, 24; 18:15-17.
14. Mbube nzi mbotweelede kulisamika?
14 Zyakusama zyesu zyakumuuya zyeelede kubikkilizya abube bumbi buswaangene loko aluyando. Paulo wakalemba ategwa: “Amulisamike moyo waluzyalo, buuya, lulifwiinsyo, lubombo, abusicamba.” Ibube oobu ibujatikizigwa aluyando, nzibeela zya“buntu bupya” bwabuna Leza. (Ba-Kolose 3:10, 12) Sena muyoosoleka kusama munzila eeyi? Ikapati kuti mwalisamika luyando lwabunyina nomuyoobaa citondezyo cizibya kuba basiciiya ba Jesu, nkaambo walo wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”—Johane 13:35.
BUSENA BWAKULIIBA
15. Mbuti imbungano mbocili ciyusilo?
15 Alimwi mbungano nciyusilo, icikwabililo cakutijila kwalo nkomukonzya kuliiba. Mulinjiyo muyoojana bantu basyomeka balo basoleka kucita ciluzi kumeso aa Leza. Ibanji akati kabo biileka micito amizeezo njiyona eeyo iinga inooli njomulwana lino kuti mwiizunde. (Tito 3:3) Balakonzya kumugwasya, nkaambo twaambilwa kuti: “Amugwasyanye mukunyamuna zimulemena.” (Bagalatiya 6:2, Ci) Mbuli mbokunga kwalangilwa, ikutobelezya nzila iitola kubuumi butamani kumamanino mmukuli wenu. (Bagalatiya 6:5, Ci; Ba-Filipi 2:12) Pesi Jehova wapa mbungano ya Bunakristo kuti kaili nzila mbotu yakugwasigwa akukwabililwa. Kufwumbwa mbwaanga amuyumina mapenzi eenu, mujisi cintu cigwasya cijanika afwi—imbungano yaluyando yalo iiyoomwiiminina kuziindi zyakupenga naa zyakusampulwa.—Amweezyanye a Luka 10:29-37; Incito 20:35.
16. Ndugwasyo nzi baalu mumbungano ndobapa?
16 Akati kabaabo balibambilide kumugwasya “[n]zipego kubantu”—ibaalu antela balangizi babikkidwe mumbungano, balo ibeembela butanga cakuliyandila acakusungwaala. (Ba-Efeso 4:8, 11, 12, Ci; Incito 20:28; 1 Petro 5:2, 3) Kujatikizya mbabo, Isaya wakasinsima ategwa: “Umwi aumwi uyooba mbuli macijilo aakulivuna kumuuwo aciyubilo cakucijila ciindi cakuwidwa imvula yamuyoba. Uyooba mbuli tulongalonga twamaanzi munkanda injumu, mbuli cenzule campangala impati munyika iikataazya.”—Isaya 32:2.
17. (a) Ndugwasyo lwamusyobo nzi Jesu ndwaakali kuyandisya kapati kupa? (b) Nzipo nzi Leza nzyaakasyomezya kupa bantu bakwe?
17 Ciindi Jesu naakali anyika, ibulangizi bwaluyando bwakalibulide cuusisya mubasololi babukombi. Ciimo cabantu cakamweetezya kapati, eelyo wakali kuyandisya kapati kuti abagwasye munzila yakumuuya. Jesu wakabafwida luse nkaambo “bakalikatede akumwaika mbuli imbelele zitakwe mweembezi.” (Matayo 9:36) Ino kaka eeci cilipandulula kabotu ipenzi lyasunu lyabanji aabo bainda mumapenzi aacisya moyo kakutakwe awakuunkila kuyoojana lugwasyo aluumbulizyo lwakumuuya! Pesi bantu ba Jehova balo balaa lugwasyo lwakumuuya, nkaambo wakasyomezya ategwa: “Nkabela njoozibikila beembeli bakuzyeembela, aboobo tazikoonooyoowa limbi nikuba kukankama nikuba kubulila.”—Jeremiya 23:4.
18. Nkaambo nzi ncotweelede kusika kumwaalu umwi kuti twayandika lugwasyo lwakumuuya?
18 Amuzibane abaalu babikkidwe mumbungano. Balizibide loko kubelesya luzibo lwa Leza, nkaambo balisikide azyeelelo zyabalangizi (babbishopo) izibikkidwe mu Bbaibbele. (1 Timoteo 3:1-7; Tito 1:5-9) Muteenkeli pe kusika kuli umwi wabo kuti kamuyandika lugwasyo lwakumuuya ilwakuleka cilengwa cibi antela kampenda kakutayanda kweendelana anzyayanda Leza. Mulajana kuti baalu batobela malailile aa Paulo aakuti: “Mubaumbulizye batyompedwe mumyoyo, mubatabe bakompeme, amube acamba cilemu kubantu boonse.”—1 Ba-Tesalonika 2:7, 8; 5:14.
AMULIIBE ANTOOMWE ABANTU BA JEHOVA
19. Nzilongezyo nzi Jehova nzyapede baabo bayandaula kuliiba mukati mumbungano yakwe?
19 Nokuba kuti lino tukkede bukkale butalondokede, Jehova ulatupa zilyo zyakumuuya, zyakusama, amayusilo. Aneeno tweelede kulindila nyika mpya njasyomezezye Leza kutegwa tukajane mpindu zyamuparadaiso yanyika. Pesi aabo basimbunga ya Jehova lino balaliiba muparadaiso yakumuuya. Kujatikizya mbabo Ezekiele wakasinsima ategwa: “Bayookala caluumuno, taakwe naba omwe uyoobayoosya.”—Ezekiele 34:28; Intembauzyo 4:8.
20. Mbuti Jehova mbwayootupilusizya kufwumbwa nzyotusweekelwa akaambo kakukomba nguwe?
20 Ino kaka tulamulumba Jehova nkaambo ulatwaabila zipo zyakumuuya caluyando kwiinda mu Jwi lyakwe amumbunga! Amuyanzane abantu ba Leza. Muteenkeli mukuyoowa mbobanga bamuyeeyela beenzinyoko naa basazinyoko akaambo kakujana luzibo lwa Leza. Bamwi inga bamutongooka nkaambo muswaangana aa Bakamboni ba Jehova akujanika kumiswaangano ku Ŋanda ya Bwami. Pesi Leza takagoleli buyo akumupilusizya nzyomwakasweekelwa akaambo kakukomba nguwe. (Malaki 3:10) Kunze lyaboobo Jesu wakaamba kuti: “Taakwe muntu iwakaleka iŋanda nibaba banabakwabo nibaba bacizi nibaba banyina naba wisi nibaba bana bakwe niiba myuunda nkaambo kandime aka-Makani Mabotu, anu ulijene kale kuciindi ecino buncilincili bwamaanda abanabakwabo abacizi abamanyina abana amyuunda, antoomwe amapenzi, elyo muciindi ciboola uyoojana buumi butamani.” (Marko 10:29, 30) Ee, kufwumbwa ncomusiide musule naa ncomukonzya kupenga, mulakonzya kujana bugwasilizi bukonda abwakuliiba kwakumuuya akati kabantu ba Leza.
AMULISUNKE LUZIBO LWENU
Nguni “muzike musyomesi uucenjede”?
Nzintu nzi Jehova nzyapede kutusanina munzila yakumuuya?
Mbuti aabo bali mumbungano ya Bunakristo mbobanga batugwasya?
[Mibuzyo yaciiyo]
[Cifwanikiso icili apeeji 165]
