Ciiyo 12

Kulemeka Buumi Abulowa

Mbuti mbotweelede kubulanga buumi? (1) kugwisya da? (1)

Mbuti Banakristo mbobatondezya kuti balasola kukasya kulicisa? (2)

Sena nkulubizya kujaya munyama? (3)

Mmicito nzi iitalemeki buumi? (4)

Mmulawo nzi Leza ngwabikkide uujatikizya bulowa? (5)

Sena oyu ulabikkilizya akubikkwa bulowa? (6)

1. Jehova Nkakasensa kabuumi. Zyoonse zintu zyuumi Leza nguuzipede buumi. (Intembauzyo 36:9) Buumi ncintu cilemu kuli Leza. Nobuba buumi bwamwana uuli muli banyina uutanazyalwa ncintu ciyandisi kuli Jehova. Kujaya mwana uli boobu acaali nkulubizya kumeso aa Leza.—Kulonga 21:22, 23; Intembauzyo 127:3.

2. Banakristo beni-beni balayeeya zyabukwabilizi. Balasinizya kuti myootokala yabo alimwi aminzi yabo zilikwabilidwe. (Deuteronomo 22:8) Babelesi ba Leza tababikki buumi bwabo muntenda akaambo buyo kakusobana naa kunoneezegwa. Aboobo tabatoli lubazu muzisobano izyakucisa bantu bambi acaali. Balazitantamuka zyakulikondelezya izilumbaizya kulwana.—Intembauzyo 11:5; Johane 13:35.

 3. Buumi bwabanyama abwalo ncintu cilemu ku Mulengi. Munakristo ulakonzya kujaya banyama kujana cakulya, azyakusama, alimwi akulikwabilila kumalwazi akuntenda. (Matalikilo 3:21; 9:3; Kulonga 21:28) Pesi nkulubizya ikupenzya banyama naa kubajaya mukusobana buyo naa kulikondelezya.—Tusimpi 12:10.

4. Kufweba, kunyeela nseke zya betel alimwi akubelesya mabanje kusola kulikondelezya tiili micito ya Banakristo pe. Kucita micito eyi nkulubizya nkaambo (1) itucita kuba bazike (2) inyonyoona mibili yesu, alimwi (3) ilisofweede. (Ba-Roma 6:19; 12:1; 2 Ba-Korinto 7:1) Cilakonzya kuyuma kapati ikuleka ziyanza eezi. Pesi tuleelede kucita oobu kutegwa tumukkomanisye Jehova.

5. Abwalo bulowa ncintu cilemu kumeso aa Leza. Leza waamba kuti soolu, naa buumi, ili mubulowa. Aboobo nkulubizya ikulya bulowa. Alimwi nkulubizya ikulya nyama yatagwisigwa kabotu bulowa. Kuti munyama wasinwa, naa wafwida mukooze, teelede kuligwa pe. Kuti wayaswa sumo naa ntobolo, weelede kutendwa cakufwambaana kutegwa ayelele kuyooligwa.—Matalikilo 9:3, 4; Levitiko 17:13, 14; Incito 15:28, 29.

6. Sena akwalo kuzumina kubikkwa bulowa nkulubizya? Amuyeeye kuti Jehova uyanda kuti tulikasye kubulowa. Eeci caamba kuti bulowa bwabantu bambi nobuba bwesu buyobwedwe tabweelede kubikkwa mumibili yesu munzila iili yoonse pe. (Incito 21:25) Aboobo Banakristo beni-beni tabakazumini kubikkwa bulowa pe. Bayoozumina misyobo imbi yakusilikwa, mbuli kubikkwa misamu imbi iitajatikizyi bulowa. Balayanda kupona, pesi tabakasoleki kufwutula buumi bwabo kwiinda mukutyola milawo ya Leza pe.—Matayo 16:25.

[Zifwanikiso izili apeeji 25]

Kutegwa tumukkomanisye Leza, tweelede kukaka kubikkwa bulowa, ziyanza zibi, alimwi akulibikka muntenda acaali