Ciiyo 5

Mmakanze Nzi Ngajisi Leza Kujatikizya Nyika?

Nkaambo nzi Jehova ncaakiilengela nyika? (1, 2)

Nkaambo nzi nyika nciitali paradaiso lino? (3)

Ncinzi ciyoocitika kubantu babi? (4)

Kumbele aamazuba ncinzi Jesu ncayoocitila baciswa? bacembeede? bafwide? (5, 6)

Ncinzi ncomweelede kucita kutegwa mukabe alubazu muzilongezyo zyakumbele? (7)

1. Jehova wakiilenga nyika kutegwa bantu bakonzye kukkala cakukkomana alinjiyo kusikila kukabe kutamani. Wakali kuyanda kuti nyika lyoonse kiikkedwe bantu balulami, bakkomene. (Intembauzyo 115:16; Isaya 45:18) Inyika tiikwe niiyoonyonyoonwa pe; inooliwo lyoonse.—Intembauzyo 104:5; Mukambausi 1:4.

2. Leza katana bamba muntu, Wakasala kabeela kasyoonto kanyika akukabamba kuba paradaiso yeebeka. Wakayiita kuti muunda wa Edeni. Momumo omu mwaa­kabikka mwaalumi amukaintu bakusaanguna, Adamu a Eva. Leza wakakanzide kuti bakabe abana akuzuzya nyika yoonse. Bucebuce bakali kunoobamba nyika yoonse kuba paradaiso.—Matalikilo 1:28; 2:8, 15.

3. Ba Adamu a Eva bakabisya kwiinda mukutyola mulawo wa Leza acaali. Aboobo Jehova wakabatanda mumuunda wa Edeni. Paradaiso yakasweeka. (Matalikilo 3:1-6, 23) Pesi Jehova takwe naaluba makanze ­aakwe aajatikizya nyika eeyi pe. Usyomezya kuyooicita kuba paradaiso, mwalo bantu ­mobayookkala kusikila kukabe kutamani. Mbuti mbwayoocicita eci?—Intembauzyo 37:29.

4. Niitana kuba paradaiso nyika eyi, bantu babi beelede kugwisigwa. (Intembauzyo 37:38) Eeci ciyoocitwa lya Amagedoni, inkondo ya Leza yakumanya bubi. Kwaakumana, Saatani uyooangwa kwamyaka iili 1000. Eeci caamba kuti kunyina babi banoociliwo kuti banyonganye nyika. Ibalo-balo bantu ba Leza mbabayoofwutuka.—Ciyubunuzyo 16:14, 16; 20:1-3.

 5. Mpoona Jesu Kristo uyooba ngo Mwami uulela nyika eyi kwamyaka iili 1,000. (Ciyubunuzyo 20:6) Bucebuce uyoogwisya cibi mumizeezo amumibili yesu. Tuyooba bantu balondokede mbubwena bwakali Adamu a Eva nobatakalina bisya. Mpoona kunoocinyina kuciswa, kucembaala, alimwi akufwa. Bantu baciswa bayoosilikwa, alimwi bantu bacembeede bayooba bana-bana alimwi.—Jobu 33:25; Isaya 33:24; Ciyubunuzyo 21:3, 4.

6. Mubulelo bwa Jesu Bwacuulu Camyaka, bantu basyomeka bayoobeleka kusandula nyika yoonse kuti ibe paradaiso. (Luka 23:43) Alimwi, mamiliyoni aabantu bafwide ayoobusigwa bakapone anyika. (Incito 24:15) Kuti bakacite ncayanda Leza, bayoozumanana kupona anyika kukabe kutamani. Bataakucita oobo bayoonyonyoonwa kukabe kutamani.—Johane 5:28, 29; Ciyubunuzyo 20:11-15.

7. Munzila eeyi makanze aa Leza aajatikizya nyika ayoozwidilila. Sena inga mwayanda kuyoobaa lubazu muzilongezyo eezi zyiza kumbele? Kuti kamuyanda, mweelede kuzumanana kwiiya zya Jehova alimwi akumumvwida nzyayanda. Kujanika kumiswaangano ku Ŋanda ya Bwami nyinzi ya Bakamboni ba Jehova kuyoomugwasya kucita boobu.—Isaya 11:9; Hebrayo 10:24, 25.

[Cifwanikiso icili apeeji 10]

Paradaiso yakasweeka

[Zifwanikiso izili apeeji 11]

Yaakwiinda Amagedoni, inyika iyoocitwa kuba paradaiso