CIBALO 8

Mbuti Mbondikonzya Kujana Balongwe Bali Kabotu?

“Ikuti naa ndanyema, inga ndiyanda muntu ngondikonzya kwaambila mbondilimvwide. Ikuti naa ndausa, inga ndiyanda muntu wakunduumbulizya. Ikuti naa ndakkomana, inga ndiyanda muntu ngotukonzya kukkomana limwi. Kulindime, balongwe ncintu ciyandika kapati.”​—Brittany.

KWAAMBWA kuti bana basyoonto bayandika bakusobana limwi, kakuli bakubusi bayandika balongwe. Ino nkwiindana nzi kuliko?

Wakusobana limwi muntu ngomuyanzana limwi.

Mulongwe muntu uubona zintu mbuli mbomuzibona.

Alimwi buya, Bbaibbele lyaamba kuti “mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.” (Tusimpi 17:17) Kweelede kuti eeci cipandulula cilongwe cini-cini iciinda ali ceeco ncomwakajisi nomwakacili bana, ooko nkomwakali kusobanina!

Kaambo kamasimpe: Mbomuyaabukomena, muyandika balongwe balo

1. Bajisi bube bubotu kapati

2. Bapona kweelana azyeelelo zibotu

3. Bakonzya kumukulwaizya kucita zintu zili kabotu

Mubuzyo: Ino inga mwabajana buti balongwe bali boobo? Atulange-lange kaambo kamwi akamwi.

Kaambo Kajatikizya Balongwe #1​—Bube Bubotu Kapati

Ncomweelede kuzyiba. Tabali boonse balyaamba kuti mbalongwe bakonzya kuba balongwe beni-beni. Bbaibbele mane buya lyaamba kuti “kuli balongwe bageme kuzazaulana.” (Tusimpi 18:24) Eeci inga calimvwisya mbuli kuti nkuciindizya. Pele amuyeeye: Sena kuli nomwakajisi kale “mulongwe” iwakali kumulida masuku amutwe? Mbuti kujatikizya iwakali kumwaamba zintu zibyaabi kuli bamwi naa kwaamba twaambo twakubeja kujatikizya ndinywe? Kucitikilwa cintu cili boobu kulakonzya kumupa kuleka kumusyoma molongwe. * Caboola kubalongwe, lyoonse kamuyeeya kuti ciyandika kapati, nkuba abalongwe bali kabotu kwiinda kuba abalongwe banji.

Ncomukonzya kucita. Kamusala bantu aabo bajisi bube bubotu mbomukonzya kwiiya kuba balongwe banu.

“Boonse bamubona kuti muntu uuli kabotu mulongwe wangu Fiona. Andime ndiyanda kuti kabandibona mbubo. Ndiyanda kuba ampuwo mbuli njajisi. Kulindime, oobu mbube bubotu kapati.”​—Yvette.

Amusole cakucita eeci.

1. Amubale Bagalatiya 5:​22, 23.

2. Amulibuzye kuti, ‘Sena balongwe bangu balatondezya bube oobo ibubikkilizyidwe ‘mumucelo wamuuya’?’

3. Amulembe mulongo wamazina aabalongwe banu mbomuyandisya. Munsi aazina limwi alimwi, amulembe bube bumupandulula mbwabede muntu ooyo.

Zina

․․․․․

Bube

․․․․․

Muzeezo: Ikuti naa mumizeezo kuli buyo bube bubi, ambweni eeci nciindi cakuyandaula balongwe bali kabotu!

Kaambo Kajatikizya Balongwe #2​—Zyeelelo Zibotu

Ncomweelede kuzyiba. Kuyandisya kapati kuba abalongwe, kulakonzya kumupa kusala balongwe batali kabotu. Bbaibbele lyaamba kuti: “Ooyo uuyanzana abafwubafwuba ulajana mapenzi.” (Tusimpi 13:20) Bbala lyakuti “bafwufwuba” talyaambi bantu bajana mamaakisi aali ansi naa batali basongo. Muciindi caboobo, lyaamba bantu aabo bataswiilili majwi aabusongo alimwi ibatobela bukkale bwakutalilemeka. Aabo mbabalongwe mbomutayandiki!

Ncomukonzya kucita. Muciindi cakupanga cilongwe amuntu uuli woonse, kamusala. (Intembauzyo 26:4) Pele eeci tacaambi kuti mweelede kuba alusalululo pe. Mucibalo eeci, kusala caamba kuti mulacikonzya “kubona lwiindano luliko akati kamuntu mululami amubi, akati kayooyo uubelekela Leza ayooyo uutamubelekeli.”​—Malaki 3:​18.

“Ndilalumba kuti bazyali bangu bakandigwasya kujana balongwe, ibantu bamusela wangu balo bapona kweelana zyeelelo zya Leza.”​—Christopher, uujisi myaka 13.

Amwiingule mibuzyo iitobela:

Ciindi nondili aabalongwe bangu, sena inga ndilalibilika kuti andiza balandisinikizya kucita cintu cimwi citali kabotu?

□ Inzya

□ Peepe

Sena ndilawayawaya kubazyibya balongwe bangu kubazyali bangu, kuyoowa kuti andiza tabakoobazunina?

□ Inzya

□ Peepe

Muzeezo: Ikuti mwaingula kuti inzya kumibuzyo iili aatala, amuyandaule balongwe bajisi zyeelelo zisumpukide, aabo ibajisi cikozyanyo cibotu mukupona buumi bwa Bunakristo.

Kaambo Kajatikizya Balongwe #3​—Kumukulwaizya Kucita Zintu Zili Kabotu

Ncomweelede kuzyiba. Bbaibbele lyaamba kuti: “Kuyanzana abantu babyaabi kunyonganya zilengwa zibotu.” (1 Bakorinto 15:33) Mukubusi wazina lya Lauren wakati: “Basicikoloma bakali kundizumina kufwumbwa buyo leelyo nondakali kucita ncobakali kucita balo. Ndakali kulendelelwa, aboobo ndakasala kucita mbuli mbobakali kucita kutegwa tweendelane.” Lauren wakabona kuti, ikuti watobela zyeelelo zyabamwi, uba mbuli kuti ncidooli ncobakonzya kunyonauna mbuli mbobayanda. Tamweelede kuba mbuli cidooli!

Ncomukonzya kucita. Amuzimanizye zilongwe abantu aabo bamusinikizya kuti mucince kutegwa kamupona mbuli mbabo. Ikuti mwabweza ntaamu eeyi, ambweni inga mwasyaala buyo abalongwe basyoonto; pele muyoolimvwa kabotu, alimwi muyoojalula nzila yakuba abalongwe bali kabotu, nkokuti aabo bakonzya kumukulwaizya kucita zintu zili kabotu.​—Baroma 12:2.

“Mulongwe wangu Clint uulibateme alimwi ulaaluzyalo, akaambo kaceeci, walikundiyumya-yumya kapati.”​—Jason uujisi myaka 21.

Amulibuzye mibuzyo eeyi iitobela:

Sena ndilacinca nsamino yangu, mbondaambaula, naa kucita zintu munzila mbyaabi akaambo buyo kakuyanda kukkomanisya balongwe bangu?

□ Inzya

□ Peepe

Sena ndilaakuunka kumasena aatali kabotu ngondatali kunga ndaunka kuti nobatali balongwe bangu?

□ Inzya

□ Peepe

Muzeezo: Ikuti naa mwaingula kuti inzya kumibuzyo yainda, amulombe bazyali banu naa mupati umwi uusimide kuti amugwasye. Ikuti naa muli umwi wa Bakamboni ba Jehova, mulakonzya kuunka kumwaalu umwi Munakristo akumuzyibya kuti muyanda kugwasyigwa kusala balongwe balo ibakonzya kumukulwaizya kucita zintu zili kabotu.

AMUBALE ZINJI KUJATIKIZYA MAKANI AAYA MU VOLYUMU 2, CIBALO 9

MU CIBALO CITOBELA

Sena ooyo ngomwaamba kuti mulongwe wanu, naa kalungu kanu kaamoyo, umusikizya kucita zintu zibi? Amuzyibe mbomukonzya kumuzunda!

[Bupanduluzi Buyungizidwe]

LUGWALO LUYANDIKA

“Kuli mulongwe uukakatila kwiinda mwanookwanu.”​—Tusimpi 18:24.

NZILA IIGWASYA

Amupone kweelana azyeelelo ziluleme, mpoonya aabo abalo ibasolekesya ikucita boobo bayoomukkomanina. Bayooba balongwe banu bali kabotu kapati!

SENA MULIZYI . . . ?

Leza tasalululi pe, pele ulasala caboola kubantu mbazumina kuba ‘beenzu mutente lyakwe.’—Intembauzyo 15:1-5.

NZYONDIYANDA KUCITA!

Kutegwa ndijane balongwe, ndila ․․․․․

Bamwi bapati kulindime mbondiyanda kuzyiba kabotu babikkilizya ba ․․․․․

Nzyondiyanda kubuzya bazyali bangu kujatikizya makani aaya nzeezyi ․․․․․

INO MUYEEYA BUTI?

● Ino mbube nzi mbomunga mwayanda kuti mulongwe wanu kabujisi, alimwi nkaambo nzi?

● Ino nkucinca nzi nkomweelede kucita kutegwa mube balongwe bali kabotu?

[Majwi aakwelelezya sikubala]

“Ciindi bazyali bangu nobakandikulwaizya kuleka kuyanzana akakamu kabalongwe kamwi, ndakalyaambauzya kuti aaba mbambabo balikke mbondali kuyanda kunooyanzana limwi. Pele lulayo lwabazyali bangu lwakali lubotu, alimwi ciindi nondakaluyeeyesya, ndakabona kuti kwakali balongwe bali kabotu banji bakaliko.”​—Cole

[Kabbokesi]

Amusole Nzila Eezyi

Amubandike abazyali banu kujatikizya balongwe. Amubabuzye kujatikizya musyobo wabalongwe ngobakajisi ciindi nobakali aciimo canu. Sena balausa akaambo kabalongwe mbobakali kusala? Ikuti naa mboobo, nkaambo nzi? Amubabuzye mbomukonzya kweeleba mapenzi amwi ngobakajana.

Amubazyibye balongwe banu kubazyali banu. Ikuti kamuwayawaya kucita oobo, amulibuzye kuti, ‘Nkaambo nzi ncocili boobu?’ Sena kuli cintu cimwi kujatikizya mulongwe wanu calo ncomuzyi kuti bazyali banu tabakonzyi kucikkomanina? Ikuti naa mboobo, mweelede kulangisisya caboola kukusala balongwe.

Amube baswiilizi babotu. Amubikkile maano kuzintu nzyobayandika beenzinyoko alimwi anzyobalibilika.—Bafilipi 2:4.

Kamulekelela. Mutalangili kulondoka. “Toonse tulalubizya ziindi zinji.”—Jakobo 3:2.

Kamumupa ciindi mweenzinyoko cakuba alikke. Tamuyandiki kuti mane buya ciindi coonse kamuli antoomwe amulongwe wanu. Balongwe beni-beni bayooba andinywe ciindi nomuyandika kuba ambabo.—Mukambausi 4:9, 10.

[Cifwanikiso]

Ikuti watobela zyeelelo zyabamwi kuyanda buyo kuti ubakkomanisye, uba mbuli kuti ncidooli ncobakonzya kunyonauna mbuli mbobayanda