1-3. Mbuti aabo ibakali basimukobonyina a Jesu musyule mbobakakubona kuyiisya kwakwe, alimwi ino ncinzi ncobakakakilwa kuzyiba kujatikizya nguwe?

 IBASWIILIZI bakagambwa kapati. Imulombwana Jesu wakaliimvwi kumbele lyabo mutempele kayiisya. Tanaakali mweenzu kulimbabo​—wakakomenede mumunzi wabo, alimwi kwamyaka iili mbwiibede wakali kubeleka ambabo kali mubezi. Ambweni bamwi bakali kukkala mumaanda Jesu ngaakagwasyilizya kuyaka, ambweni bakacita milimo minji-minji yakulima amaamba alimwi amajoko ngaakabezede. a Pele ino bakali kuyoozibona buti njiisyo zyamuntu ooyu iwakali mubezi musyule?

² Ibunji bwabaabo ibakali kuswiilila bakagambwa akubuzya kuti: “Ino muntu ooyu wakabujana kuli busongo oobu?” Pele alimwi bakaamba kuti: “Sena ooyu tali sikubeza mapulanga, imwana wa Mariya?” (Matayo 13:54-58; Marko 6:1-3) Cuusisya nsoni ncakuti, aabo ibakali basimukobonyina a Jesu cimwi ciindi bakati, ‘Ooyu sikubeza mapulanga muntu buyo mbubwenya mbuli ndiswe.’ Nokuba kuti bakabubona busongo mumakani ngaakali kwaamba, bakamukaka. Kunyina nobakazyiba kuti busongo ibwakali mumakani aayo tiibwakali bwakwe mwini.

³ Ino Jesu wakabujana kuli busongo oobu? Wakati:  “Nzyondiyiisya tazili zyangu pe, pele nzizya yooyo wakandituma.” (Johane 7:16) Imwaapostolo Paulo wakapandulula kuti Jesu “watubeda busongo buzwa kuli Leza.” (1 Bakorinto 1:30) Ibusongo bwa Jehova lwakwe bulatondezyegwa mu Mwanaakwe Jesu. Inzya, aaya akali masimpe cakuti mane Jesu wakali kukonzya kwaamba kuti: “Mebo a Taata tuli bamwi.” (Johane 10:30) Nkooko lino atulange-lange mbazu zyotatwe oomo Jesu mwaakatondezya “busongo buzwa kuli Leza.”

4. (a) Ino mulumbe wa Jesu wakajisi mutwe wamakani nzi, alimwi ino nkaambo nzi ncowakali kuyandika kapati? (b) Nkaambo nzi lulayo lwa Jesu lyoonse ncolwakali kugwasya alimwi akuyandika kubaswiilizi bakwe?

⁴ Kusaanguna, amulange-lange nzyaakayiisya Jesu. Imutwe wamulumbe wakwe wakali wakuti “makani mabotu aa Bwami.” (Luka 4:43) Akali kuyandika kapati makani aayo akaambo kalubazu ndobwakali kunoojisi Bwami mukusalazya zina lya Jehova​—calo cibikkilizya ampuwo yakwe yakuba Muleli mubotu​—alimwi akuleta zilongezyo zitamani kubantu. Munjiisyo zyakwe, Jesu alimwi wakapa lulayo lugwasya mubukkale bwabuzuba abuzuba. Wakalitondezya kuti ngonguwe “Sikulaya Uugambya” iwakasyomezyegwa. (Isaya 9:6) Aboobo, ino lulayo lwakwe inga lwalekela nzi kubota? Wakalijisi luzyibo lunji lwa Jwi lya Leza akuyanda kwakwe, ikumvwisya mbubalengedwe bantunsi alimwi wakali kubayanda kapati bantu. Aboobo, lulayo lwakwe lyoonse buyo lwakali kugwasya alimwi akutondezya kuti wakali kubabikkila maanu ibaswiilizi bakwe. Jesu wakali kwaamba “majwi aapa buumi butamani.” Masimpe, ikuti lwatobelwa, ilulayo lwakwe lusololela kulufwutuko.​—Johane 6:68.

5. Mitwe nzi imwi njaakabandika Jesu mu Mulumbe waa Cilundu?

 ⁵ Mulumbe waa Cilundu ncikozyanyo cilibedelede cabusongo butakonzyi kweezyanisyigwa ibujanika munjiisyo zya Jesu. Imulumbe ooyu, walo uulembedwe kuli Matayo 5:3–7:27, cakutadooneka inga watola buyo maminiti aali 20 kuubandika. Pele lulayo lwawo lulabeleka lyoonse​—lulayandika sunu mbubwenya buyo mbuli leelyo nolwakapegwa ciindi cakusaanguna. Jesu wakabandika zintu zinji kubikkilizya ambomukonzya kuba balongwe babotu abambi (5:23-26, 38-42; 7:1-5, 12), mbokuzumananwa kusalala mubukkale (5:27-32), alimwi ambokuponwa buumi bulaampindu (6:19-24; 7:24-27). Pele Jesu tanaakayiila buyo aakwaambila baswiilizi bakwe zintu zyabusongo; pele alimwi wakabatondezya kwiinda mukupandulula, ikubapa twaambo tusinizya alimwi abumboni.

6-8. (a) Ino Jesu upa twaambo nzi tukulwaizya ncotuteelede kulibilika? (b) Ncinzi citondezya kuti lulayo lwa Jesu lutondezya busongo buzwa kuli Leza?

⁶ Mucikozyanyo, amulange-lange lulayo lwa Jesu lwabusongo lwakuliyumya kujatikizya kulibilikila zintu zyakumubili, ilulembedwe kuli Matayo caandaano 6. Jesu utulaya kuti: “Amuleke kulibilika kujatikizya buumi bwanu kuti naa muyoolya nzi naa kuti muyoonywa nzi, noiba mibili yanu kuti muyoosama nzi?” (Kapango 25) Cakulya alimwi azyakusama nzintu ziyandika kapati, alimwi ncilengwa buya kulibilika mbotukonzya kuzijana. Pele Jesu utwaambila kuti “Amuleke kulibilika” kujatikizya zintu zili boobo. b Nkaambo nzi?

⁷ Amuswiilile Jesu napandulula cakubazula bantu. Mbwaanga Jehova nguupa buumi amubili, sena takonzyi  kwaabila zyakulya kutegwa buumi oobo buzumanane alimwi azyakusama zyakusamika mubili ooyo? (Kapango 25) Ikuti Leza ulaabila bayuni zyakulya alimwi ulasamika malubaluba aamisyobo yeebeka, nkokuti uyoocita ziinda waawo mukulanganya bakombi bakwe bantunsi! (Tupango 26, 28-30) Masimpe, kulibilika kwiindilide koonse kunyina mpindu iili yoonse. Kunyina abuniini nokunga kwalansya buumi bwesu naaceya. c (Kapango 27) Ino mbuti mbotunga twakweendelezya kulibilika? Jesu ulatulaya ategwa: Amuzumanane kubikka bukombi bwa Leza mubusena butaanzi mubuumi. Aabo ibacita boobo balakonzya kusyoma kuti zintu zyoonse nzyobayandika abuzuba ‘ziyooyungizyizigwa’ kulimbabo a Usyi wabo wakujulu. (Kapango 33) Kumamanino Jesu wakapa muzeezo uugwasya kapati​—amulanganye buyo nzyomuyandika abuzuba. Ino nkaambo nzi ncomuyungizya kulibilika zyajuunza kuli zeezyo zyasunu? (Kapango 34) Kunze lyaboobo, ino mulibilikila nzi zintu eezyo ambweni izitakooyoocitika akucitika? Ikutobela lulayo lwabusongo luli boobo kulakonzya kutugwasya ikutaba amacise aamumizeezo amoyo aali munyika eeyi iizwide mapenzi.

⁸ Cilasalala kuti lulayo ndwaakapa Jesu lulabeleka sunu mbubwenya mbolwakali kubeleka nolwakapegwa imyaka iitandila ku 2,000 yainda. Sena oobo tabuli bumboni bwabusongo buzwa kuli Leza? Noluba lulayo lupegwa abasikulaya bantunsi ilutegwa ndubotu kapati lulaleka kubeleka alimwi lulaindululwa nokuba kunjililwa mubusena alumbi. Pele nokuba kuti kwainda ciindi cilamfwu kapati, injiisyo zya Jesu zicibeleka alimwi zilagwasya. Pele eeco taceelede kutugambya pe nkaambo ooyu Sinkuta Uugambya wakaamba “majwi aa Leza.”​—Johane 3:34.

9. Ncinzi basikalumamba bamwi ncobakaamba kujatikizya kuyiisya kwa Jesu, alimwi ino nkaambo nzi ooko ncokwatakali kuyungizya amakani aaluzi?

⁹ Ilubazu lwabili oomo Jesu mwaakatondezya busongo bwa Leza lujatikizya mbwaakayiisya. Cimwi ciindi, basikalumamba ibakatumidwe kuti bakamwaange bakapiluka buyo cinkwamaanza balaamba: “Takunabede muntu waambaula bobuya.” (Johane 7:45, 46) Ooko tiikwakali kuyungizya amakani aaluzi pe. Akati kabantunsi boonse ibakaponede, Jesu ooyo wakazwide “kujulu,” wakalijisi luzyibo lunji kapati alwiiyo ndwaakali kunga wabelesya. (Johane 8:23) Masimpe wakayiisya kwiinda bwakali kunga bwayiisya muntunsi uumbi. Amulange-lange nzila zyakuyiisya zyobile buyo izyakabelesyegwa a Mwiiyi ooyu musongo.

10, 11. (a) Nkaambo nzi ncotugambwa twalanga mbwaakazibelesya zikozyanyo Jesu? (b) Ino twaano ninzi, alimwi ncikozyanyo nzi icitondezya kaambo twaano twa Jesu ncotubeleka kapati mukuyiisya?

¹⁰ Ikuzibelesya kabotu zikozyanyo. Twaambilwa kuti: “Jesu wakaambila makamu aabantu zintu zyoonse eezyi muzikozyanyo. Masimpe, taakwe naakali kwaambaula ambabo kakunyina kubelesya cikozyanyo.” (Matayo 13:34) Tulakulombozya kapati kuyiisya kwakwe ikutakonzyi kweelanisyigwa mukuyiisya makani aakasimpe aasitikide kwiinda mukubelesya zintu zyizizilwe kubantu boonse. Ibalimi ibaminza mbuto, bamakaintu balibambila kupanga cinkwa, ibana basobana kumusika, bazubi ibawaala nsabwe zyabo, beembezi ibayandaula mbelele yasweeka​—eezyi nzintu nzyobakali kubona kazicitwa ziindi zinji baswiilizi bakwe. Eelyo makani aakasimpe aayandika naaswaanganizyigwa azintu zyizizilwe, imakani aayo alafwambaana kumvwugwa akuyobolwa cakutalubwa mumizeezo amumyoyo.​—Matayo 11:16-19; 13:3-8, 33, 47-50; 18:12-14.

¹¹ Bunji bwaziindi Jesu wakali kubelesya twaano, nkokuti  mibandi mifwaafwi oomo mwakali kunga mwayiigwa makani aabukkale naa aakumuuya. Mbwaanga twaano tatukatazyi kumvwa alimwi akwiibaluka kwiinda mizeezo buyo, ooto twaano twakali kugwasya kwiibaluka njiisyo zya Jesu lyoonse. Mutwaano tunji, Jesu wakapandulula Usyi muzikozyanyo zyatakali kunga zyalubwa. Mucikozyanyo, nguni uutakonzyi kukamvwisya kaambo kacaano camwana mutaka​—kakuti eelyo muntu iwaleyede natondezya kweempwa kwini-kwini, Jehova uyoomweetelela alimwi akumutambula kabotu-kabotu?​—Luka 15:11-32.

12. (a) Ino Jesu wakaibelesya buti mibuzyo mukuyiisya kwakwe? (b) Mbuti Jesu mbwaakaumuzya baabo ibakali kudooneka nguzu nzyaakali kubelesya?

¹² Ikwiibelesya caluzyibo mibuzyo. Jesu wakabelesya mibuzyo ikutegwa agwasye baswiilizi bakwe kulikosweda makani alimwi akuti azyibe zyakali mumizeezo yabo naa ikutegwa balisalile cimwi. (Matayo 12:24-30; 17:24-27; 22:41-46) Eelyo basololi bazikombelo nobakadooneka naa ncobeni wakali kubelesya nguzu nzyaakapedwe a Leza, Jesu wakaingula kuti: “Sena lubbapatizyo lwa Johane lwakazwa kujulu naa kubantu?” Kabakankamene akaambo kamubuzyo ooyo, bakabuzyanya mulicabo balaamba: “Ikuti twaambe kuti, ‘Lwakazwa kujulu,’ ulaamba kuti, ‘Ino nkaambo nzi ncomwatakamusyoma?’ Pele sena twaambe kuti, ‘Lwakazwa kubantu’? Bakali kuyoowa kwaamba boobo nkaambo bantu boonse bakazyi kuti Johane wakali musinsimi ncobeni.” Kumamanino bakaingula kuti: “Tatuzyi pe.” (Marko 11:27-33; Matayo 21:23-27) Kwiinda mukubabuzya buyo mubuzyo omwe, Jesu wakabaumuzya zii akuyubulula bumpelenge bwakali mumyoyo yabo.

13-15. Mbuti caano camu Samariya mubotu mbocatondezya busongo bwa Jesu?

¹³ Zimwi ziindi Jesu wakali kubelesya nzila zinji aciindi comwe kwiinda mukubikkilizya mibuzyo iipa kuzinzibala  kuyeeya muzikozyanyo zyakwe. Similawo umwi mu Juda naakabuzya Jesu kujatikizya cakali kuyandika kutegwa akabe aabuumi butamani, Jesu wakamubuzya cakali kwaamba Mulawo wa Musa iwaamba kuti tweelede kuyanda Leza asimukoboma. Mbwaakali kuyanda kulilulamika, imwaalumi ooyo wakabuzya kuti: “Ino mubwini simukoboma nguni?” Jesu wakamwiingula kwiinda mukuluula caano. Imwaalumi umwi imu Juda wakali kweenda alikke eelyo wakafwumpwa ababbi ibakamuuma akumusiya ulinetukide. Kwakainda ba Juda bobile aawo mpaakabede, kusaanguna mupaizi mpoonya kwakatobela mu Levi. Boonse bobile bakamulanga buyo kakunyina kumugwasya. Pele mpoonya kwakasika mu Samariya aabusena oobo. Akaambo kakuti wakamufwida luzyalo, kabotu-kabotu wakabikka musamu azilonda zyakwe alimwi caluyando wakamuyumuna mwaalumi ooyo akumutola kubusena buli kabotu bwabeenzu ooko nkwaakali kunga wakkala kusikila wapona. Mukumanizya kaano kakwe, Jesu wakabuzya sikumubuzya kuti: “Ino uyeeya kuti nguni akati kabaaba botatwe wakaba simukobonyina wamuntu ooyu wakafwumpwa ababbi?” Imwaalumi ooyo wakanyina bwiinguzi bumbi pele kwaamba kuti: “Nguulya wakamufwida luzyalo.”​—Luka 10:25-37.

¹⁴ Mbuti caano eeci mbocitondezya busongo bwa Jesu? Kuciindi ca Jesu, iba Juda bakali kubelesya bbala lyakuti ‘simukoboma kubantu bakali kutobela zilengwa zyabo balikke​—aboobo ba Samariya tiibakali akati kabo pe. (Johane 4:9) Ikuti Jesu naakaluula caano cijatikizya mu Samariya wakafwumpwa ababbi asikugwasya imu Juda, sena eeco nocakakumanizya kulangana ziimo ikwakaliko? Cabusongo, Jesu wakasala caano icakatondezya kuti mu Samariya nguwakalanganya mu Juda calubomba. Alimwi amuulangisye mubuzyo ngwaakabuzya Jesu kumamanino aacaano. Tanaakabikkila maanu kapati abbala lyakuti ‘simukoboma.’ Mubwini, similawo wakabuzyide kuti: ‘Nguni ngondeelede  kutondezya luyando lwabusimukoboma?’ Pele Jesu wakabuzya kuti: “Ino uyeeya kuti nguni akati kabaaba botatwe wakaba simukobonyina?” Jesu tanaakabikkila maanu amuntu wakafwidwa luzyalo, nkokuti ooyo iwakafwumpwa ababbi, pele amu Samariya ooyo iwakafwida mweenzinyina luzyalo. Simukobonyina mwini-mwini nguusaanguna kubweza ntaamu yakutondezya luyando kuli bamwi kunyina makani aciinga mobazwa. Kunyina nzila iimbi Jesu njaakali kunga wabelesya ikumugwasya kumvwisya kaambo aaka kwiinda yeeyo njaakabelesya.

¹⁵ Sena cilagambya kuti bantu bakakankamana “ambwaakali kuyiisya” Jesu alimwi akuti bakamuyanda? (Matayo 7:28, 29) Cimwi ciindi “nkamu mpati yabantu” yakazumanana anguwe kwamazuba otatwe anzala, kabanyina cakulya!​—Marko 8:1, 2.

16. Muunzila nzi Jesu mwaakatondezya “bumboni bulibonya” bwakuti wakali kweendelezyegwa abusongo bwa Leza?

¹⁶ Lubazu lwatatu oomo Jesu mwaakatondezya busongo bwa Jehova muubukkale bwakwe. Busongo bulagwasya; bulazyala micelo iiyandika. Sikwiiya Jakobo wakabuzya kuti: “Ino nguni musongo akati kanu?” Mpoonya wakawiingula mubuzyo wakwe, ulaamba: “Ibukkale bwakwe buli kabotu abutondezye bumboni bulibonya kuti uli boobo.” (Jakobo 3:13, The New English Bible) Bukkale bwa Jesu bwakatondezya “bumboni bulibonya” kuti wakali kweendelezyegwa abusongo bwa Leza. Atulange-lange mbwaakatondezya bupampu mubukkale bwakwe alimwi ambwaakeendelezya bamwi.

17. Nzinzi zitondezya kuti Jesu wakacita zintu caakati-kati munzila iilondokede mubuumi bwakwe?

¹⁷ Sena mwakabona kale kuti ibantu ibanyina bupampu kanji-kanji balaciindizya? Inzya, kuyandika busongo  ikutegwa zintu zicitwe kakunyina kuciindizya. Katondezya busongo bwa Leza, Jesu wakacita zintu caakati-kati munzila iilondokede. Kwiinda zyoonse, wakabikka zintu zyakumuuya mubusena butaanzi mubuumi bwakwe. Wakajisi bubi kapati amulimo wakwaambilizya makani mabotu. Wakati: “Nkaambo eeci ncindakaboolela.” (Marko 1:38) Zintu zyakumubili kunyina nozyakali cintu cipati kulinguwe; kulibonya kuti zintu zyakumubili nzyaakajisi zyakali zisyoonto kapati. (Matayo 8:20) Nokuba boobo, tanaakali sikuliimya zintu uuli mubuumba. Mbubwenya mbuli Usyi, “Leza uukkomene,” Jesu wakali muntu uukondwa alimwi wakabakkomanisya abantu bambi. (1 Timoteyo 1:11; 6:15) Naakajanika kupobwe lyamucado​—iciindi nokulizigwa nyimbo, nokwiimbwa alimwi akukkomana​—tanaakasinkilila lukkomano lwakaliko. Waini nowakamana, wakasandula maanzi kuba waini mubotu, icakunywa ‘cikkomanisya moyo wamuntu.’ (Intembauzyo 104:15; Johane 2:1-11) Jesu wakali kuzumina kutambwa kucakulya mumasena manji, alimwi kanji-kanji ziindi eezyo wakali kuzibelesya kuyiisya bantu.​—Luka 10:38-42; 14:1-6.

18. Mbuti Jesu mbwaakatondezya bupampu butakwe kampenda mukweendelezya basikwiiya bakwe?

¹⁸ Jesu wakatondezya bupampu butakwe kampenda mukweendelezya bamwi. Ibupampu bwakwe mukumvwisya bulenge bwabantunsi bwakamupa kubabona munzila iigwasya basikwiiya bakwe. Wakalizyi kabotu-kabotu kuti tiibakalondokede. Nokuba boobo, wakabikkila maanu aabube bwabo bubotu. Wakabona kuti aaba baalumi mbaakakwelede Jehova bakali kukonzya kucita zintu zinji. (Johane 6:44) Nokuba kuti bakali kulubizya, Jesu wakatondezya kuti wakalilisungwide kubasyoma. Katondezya mbwaakali kubasyoma, wakabapa mukuli mupati basikwiiya bakwe. Wakabapa mukuli wakukambauka makani mabotu, alimwi wakali alusyomo lwakuti bakali kukonzya kuuzuzikizya  mulimo ooyo. (Matayo 28:19, 20) Ibbuku lya Milimo lipa bumboni bwakuti bakaucita cakusyomeka mulimo ngwaakabapede. (Milimo 2:41, 42; 4:33; 5:27-32) Aboobo cilasalala kuti Jesu wakatondezya busongo mukubasyoma.

19. Mbuti Jesu mbwaakatondezya kuti wakali ‘mubombe moyo alimwi uulicesya’?

¹⁹ Mbubwenya mbotwabona mu Cibalo 20, Ibbaibbele liswaanganya kulicesya akuteta moyo kubusongo. Ee, Jehova ncecikozyanyo ciinda kubota mumakani aaya. Pele ino mbuti walo Jesu? Cilakatalusya kapati ikubona kulicesya nkwaakatondezya Jesu naakali kweendelezya basikwiiya bakwe. Mbwaakali muntu uulondokede, wakalisumpukide kulimbabo. Nokuba boobo, tanaakabasampaula basikwiiya bakwe. Kunyina naakabapa kulimvwa kuti banyina mpindu naa kuti tabacibwene kubeleka milimo. Mukwiimpana, wakakubikkila maanu kulezya kwabo alimwi wakabakkazikila moyo kujatikizya kulubizya kwabo. (Marko 14:34-38; Johane 16:12) Sena tacili cintu cikulwaizya kuti nobaba bana basyoonto bakaliliibide nobakali a Jesu? Masimpe bakayandisya kuba balongwe bakwe akaambo kakuti wakali  ‘mubombe moyo alimwi uulicesya.’​—Matayo 11:29; Marko 10:13-16.

20. Mbuti Jesu mbwaakatondezya kuti ulanyoneka twalanga mbwakeendelezya mukaintu Wamasi wakali amwana musimbi wakanjidwe madaimona?

²⁰ Jesu wakatondezya kulicesya kwa Leza munzila ayimbi iiyandika. Wakali kunyoneka eelyo nokwakali kuyandika kufwida bamwi luzyalo. Mucikozyanyo, amuyeeye cakacitika eelyo mukaintu umwi Wamasi naakamukombelezya kuti aponye mwanaakwe musimbi wakali kupenzyegwa kapati amadaimona. Kumatalikilo, munzila zyotatwe Jesu wakatondezya kuti tanaakali kunga wamugwasya pe​—yakusaanguna kwiinda mukucita muuzyamvwide; yabili kwiinda mukumwaambila cakaanzambwene kuti tanaakatumidwe kuli Bamasi pe, pele kuba Juda; alimwi yatatu kwiinda mukupa cikozyanyo calo munzila yabulongwe icakatondezya kuti wakalikakide ncobeni. Nokuba boobo, mukaintu ooyo wakazumanana, kumwi katondezya abumboni bwakuti wakajisi lusyomo lugambya. Ino Jesu wakacita buti? Wakacicita nceena ncaakaambide kuti tanaakali kuyoocicita. Wakamuponya mwana musimbi wamukaintu ooyo. (Matayo 15:21-28) Sena takugambyi ikulicesya ooku? Alimwi amuyeeye kuti, kulicesya musemo wabusongo bwini-bwini.

21. Nkaambo nzi ncotweelede kusoleka kwiiya bube, ŋambawido alimwi ambwaakali kucita zintu Jesu?

²¹ Eelo tulalumba kapati kaka kuti Makani Mabotu alatuyubunwida majwi alimwi amilimo yamuntu musongo kwiinda boonse bakaponede! Katuyeeya kuti Jesu wakali citondezyo cilondokede cambwabede Usyi. Kwiinda mukwiiya bube, ŋambawido alimwi ambwaakali kucita zintu Jesu, tunooyiya busongo buzwa kuli Leza. Mucibalo citobela, tulabona mbotunga twabelesya busongo bwa Leza mubuumi bwesu.