1. Nkuyeeya kuli buti kutali kabotu bantu banji nkobajisi kubikkilizya a Banakristo bakasimpe bamwi?

 SENA Jehova Leza ulamuyanda nywebo lwanu kumugama? Ibantu bamwi balasyoma kuti kweelana acaamba bbuku lya Johane 3:16, Leza ulabayanda bantu boonse. Pele alimwi balimvwa kuti: ‘Kunyina Leza nanga wandiyanda mebo lwangu kundigama.’ Nobaba Banakristo bakasimpe, ciindi aciindi balakonzya kwaadooneka makani aayo. Katyompedwe, imwaalumi umwi wakati: “Cilandiyumina kapati kusyoma kuti Leza ulandilanganya mebo lwangu kundigama.” Sena andinywe kudooneka kuli boobu kulamuzyinga zimwi ziindi?

2, 3. Nguni uuyanda kuti katulimvwa kuti tunyina mpindu naa kuti kunyina natuyanda Jehova, alimwi ino inga twakuzunda buti kuyeeya ooko?

² Saatani uyanda kuti tusyome kuti Jehova Leza tatuyandi alimwi akuti tunyina mpindu kulinguwe. Masimpe, Saatani kanji-kanji weena bantu kwiinda mukubakulwaizya kuba amapuwo alimwi akubapa kulisumpula. (2 Bakorinto 11:3) Pele alimwi ulayandisya kutyompya batacenjede akubapa kulimvwa kuti banyina mpindu. (Johane 7:47-49; 8:13, 44) Ulacita oobo ikapati “kumazuba [aano] aakumamanino” aakatazya. Ibunji bwabantu mazuba aano bakomenena mumikwasyi imunyina “luyando lwakuzyalwa andulo.” Ibamwi bakkala abantu bakali, basikuliyanda alimwi batalaiki. (2 Timoteyo 3:1-5) Iciindi cilamfwu cakudyaamininwa, ikusalaulana musyobo naa kusulaikana cilakonzya  kupa bantu bali boobo kulimvwa kuti banyina mpindu iili yoonse naa kuti taakwe uukonzya kubayanda.

³ Mutatyompwi pe ikuti naa mbomulimvwa oobo. Zimwi ziindi bunji bwesu inga tulimvwa bubi. Pele kamuyeeya kuti, Jwi lya Leza lyakabambilwa “kululamika zintu” alimwi ‘akumwaya zintu zyoonse ziyumu nta.’ (2 Timoteyo 3:16; 2 Bakorinto 10:4) Ibbaibbele lyaamba kuti: “Tunoosyomezya myoyo yesu kumbele lyakwe kujatikizya cili coonse myoyo yesu mwiikonzya kutupa mulandu, nkaambo Leza mupati kwiinda myoyo yesu alimwi ulizyi zintu zyoonse.” (1 Johane 3:19, 20) Aboobo atulange-lange nzila zyone oomo Magwalo mwaatugwasya ‘kutontozya myoyo yesu’ kujatikizya luyando lwa Jehova.

4, 5. Mbuti cikozyanyo ca Jesu catutiiti mbocitondezya kuti tulaampindu kuli Jehova?

⁴ Inzila yakusaanguna njakuti, Ibbaibbele cakutainda mumbali liyiisya kuti umwi aumwi wababelesi bakwe ubonwa kuti ulaampindu kuli Leza. Mucikozyanyo, Jesu wakati: “Sena tutiiti tobilo tatusambalwi kakkobili komwe kajisi mpindu nsyoonto? Nokuba boobo, kunyina nokaba komwe kayoowida ansi Uso katakonzyi kuzyiba. Pele naaba masusu aakumutwe wanu alibalidwe oonse. Aboobo, mutayoowi pe; nywebo mulayandika kwiinda tutiiti tunji.” (Matayo 10:29-31) Amulange-lange ncaakali kwaamba majwi aayo kubaswiilizi ba Jesu bamumwaanda wamyaka wakusaanguna.

⁵ Tulakonzya kulibuzya kaambo kanga kapa kuti muntu aule katiiti. Kuciindi ca Jesu, ikatiiti nkekayuni ikatakali kudula akati kabayuni bakali kusambalilwa kuligwa. Amubone kuti mukkobili lyomwe linyina mpindu yini-yini, muntu wakali kuula tutiiti tobilo. Pele Jesu  kumbele wakazikwaamba kuti, ikuti muntu kajisi makkobili obilo, tanaakali kupegwa tutiiti tone pe, pele tosanswe. Ikayuni kabbansela kakali kuyungizyigwa nkaambo kakanyina mpindu iili yoonse. Ambweni tuyuni ooto twakanyina mpindu mumeso aabantu, pele ino walo Mulengi wakali kutubona buti? Jesu wakati: “Kunyina nokaba komwe [nekaba kaako ikayungizyigwa] kalubidwe kuli Leza.” (Luka 12:6, 7) Lino tulakonzya kuteelela ncaakali kwaamba Jesu. Ikuti kuli Jehova ikatiiti komwe kalaa mpindu iili boobo, nkokuti muntu walo ulayindaawo. Mbubwenya Jesu mbwaakapandulula, Jehova ulituzyi mumbazu zyoonse. Kayi mane amasusu oonse aali mumitwe yesu alibalidwe!

6. Nkaambo nzi ncotunga twasinizya kuti Jesu tanaakali kuciindizya buya eelyo naakaamba kuti masusu aamumitwe yesu alibalidwe?

⁶ Sena masusu eesu ncobeni alibalidwe? Bamwi balakonzya kuyeeya kuti aawa Jesu wakaciindizya. Pele amuyeeye buyo kujatikizya bulangizi bwabubuke. Weelede kuti Jehova ulituzyi kapati mbwaanga ulakonzya kutulengulula! Tulaampindu kapati kulinguwe cakuti ulayibaluka bupangopango boonse, kubikkilizya abulenge bwesu alimwi azintu zyakali mumizeezo yesu kwamyaka minji azeezyo zyakatucitikila. a Ikubala masusu eesu​—ikweezyegwa kuti mutwe aumwi ujisi masusu aasika ku 100,000​—ncintu cuuba-uba kapati ikuti twaceezyanisya azijatikizyidwe mububuke.

7, 8. (a) Mbube nzi bumwi Jehova mbwakkomanina ikuti wabujana mubantu eelyo nalingula myoyo yabo? (b) Ino milimo nzi imwi njotucita njakkomanina Jehova?

⁷ Yabili, Ibbaibbele lilatuyiisya kujatikizya nzyayandisya Jehova mubabelesi bakwe. Munzila nguba-uba, ulakkomana abube bwesu bubotu alimwi akusoleka nkotucita. Mwami Davida wakaambila mwanaakwe Solomoni kuti: “Jehova ulalingaula myoyo yoonse akuzyiba mizeezo yoonse muntu njajisi.” (1 Makani 28:9) Jehova mbwalingula myoyo yabantu batabaliki munyika eeyi iizwide mapenzi aakulwana akusulaikana, ulakkomana kapati kaka eelyo najana moyo uuyanda luumuno, kasimpe alimwi abululami! Ino ncinzi cicitika eelyo Leza najana muntu uulaamoyo uumuyanda, uuyandisisya kwiiya kujatikizya nguwe alimwi akwaambila bamwi luzyibo oolo? Jehova utwaambila kuti ulababikkila maanu aabo ibaambila bamwi kujatikizya nguwe. Alimwi mane ulijisi “ibbuku lyakwiibalusya” boonse “bamuyoowa Jehova alimwi abaabo bazinzibala  kuyeeya zina lyakwe.” (Malaki 3:16) Ulabuyandisya kapati ibube oobo.

⁸ Ino milimo nzi imwi mibotu njakkomanina Jehova? Takudoonekwi kuti ikusoleka nkotucita mukwiiya Mwanaakwe, Jesu Kristo kuli akati kamilimo eeyi. (1 Petro 2:21) Imulimo umwi uuyandika kapati ngwakkomanina Leza ngwakumwaya makani mabotu aa Bwami bwakwe. Ku Baroma 10:15 tubala kuti: “Taaliboteli kaka imaulu aabaabo baambilizya makani mabotu aazintu zibotu!” Teensi lyoonse notuyeeya kuti maulu eesu mabotu. Pele maulu aaya ayiminina kusoleka nkobacita babelesi ba Jehova mukukambauka makani mabotu. Ikusoleka kucitwa koonse nkubotu alimwi kulayandika kulinguwe.​—Matayo 24:14; 28:19, 20.

9, 10. (a) Nkaambo nzi ncotweelede kusyoma kuti Jehova ulakukkomanina kuliyumya nkotucita mumakatazyo aasiyene-siyene ngotuliyumya? (b) Nkuyeeya kuli buti ikutyompya nkwatajisi Jehova kujatikizya babelesi bakwe basyomeka?

⁹ Akwalo kuliyumya nkotucita ulakukkomanina Jehova. (Matayo 24:13) Kamuyeeya kuti Saatani uyanda kuti mumuzangile Jehova. Ibuzuba bumwi abumwi mbomusyomeka kuli Jehova, mugwasyilizya kupa bwiinguzi kumasampu aa Saatani. (Tusimpi 27:11) Zimwi ziindi cilakatazya kapati kuliyumya. Ikuciswa, mapenzi aakubula mali, kutyompwa alimwi amapenzi aambi zilakonzya kutubeda masunko abuzuba. Akwalo ikusumpizyigwa kwazintu nzyotwali kulangila kulakonzya kututyompya. (Tusimpi 13:12) Ikuzumanana kuliyumya mumapenzi aali boobu ncecintu ciinda zintu zimbi zyoonse kumukkomanisya Jehova. Nkakaambo kaako Mwami Davida ncaakalomba Jehova kuti ayobole misozi yakwe ‘munkomo yacikutu,’ alimwi cakusinizya wakayungizya kuti: “Sena tiilembedwe mubbuku lyako?” (Intembauzyo 56:8) Inzya, Jehova ulaikkomanina alimwi ulaiyeeya misozi yoonse alimwi akupenga nkotuliyumya notuzumanana kusyomeka kulinguwe.  Ayalo misozi akupenga nzintu ziyandika kapati kulinguwe.

¹⁰ Pele myoyo yesu ilakonzya kukazya bumboni buli boobo bwakuti tulaampindu kuli Leza. Ilakonzya kuzumanana kwaamba cakuvwiya-vwiya kuti: ‘Pele kuli bambi banji kapati ibali azitondezyo zibotu kwiinda ndime. Eelo kaka Jehova ulanyema kapati eelyo nandeezyanisya ambabo!’ Jehova kunyina neezyanisya pe; alimwi tali muntu uutanyoneki naa mukali mukuyeeya kwakwe. (Bagalatiya 6:4) Ulalingula myoyo yesu cabusongo aluzyibo lwakuzyiba zili mukati zyoonse alimwi ulazikkomanina zintu zibotu nzyajana, kunyina makani noziceya buti.

11. Ncinzi ncotunga twaiya kujatikizya Jehova kweelana ambwaakeendelezya makani aajatikizya Abija?

¹¹ Yatatu, Jehova natulingula ulatulangisya akuyandaula bubotu buli boonse buli mulindiswe. Mucikozyanyo, eelyo Jehova naakalailila kuti luzubo luzangi lwa Mwami Jeroboamu lunyonyoonwe loonse, wakalailila kuti omwe akati kabana bamwami balombe wazina lya Abija azikkwe kabotu. Ino nkaambo nzi? “Mulinguwe kuli bubotu bumwi mbwaajana Jehova Leza wa Israyeli.” (1 Bami 14:1, 10-13) Aboobo, Jehova wakaulingula moyo wamulombe ooyo eelyo wakajana cimwi ‘cakamubotezya.’ Kunyina makani akuceya kwabubotu oobo mbokwakabede, Jehova wakabubona kuti bulayandika kubulemba mu Jwi lyakwe. Alimwi mane wakabulumbula, wakatondezya lubomba munzila yeelede kuli yooyo omwe mumukwasyi muzangi.

12, 13. (a) Mbuti makani aajatikizya Mwami Jehosafati mbwaatondezya kuti Jehova uyandaula bubotu buli mulindiswe neliba leelyo notwabisya? (b) Mbuti Jehova mbwali mbuli Muzyali siluyando caboola kumilimo mibotu njotucita alimwi abube bwesu?

¹² Icikozyanyo cilibedelede cilakonzya kubonwa mu Mwami mubotu Jehosafati. Imwami ooyu naakacita cintu  cimwi cabufwubafwuba, musinsimi wa Jehova wakamwaambila kuti: “Akaambo kaceeci bukali bwa Jehova bwakusikila.” Eelo kaambo aaka keelede kubikkilwa maanu kapati kaka! Pele mulumbe wa Jehova tiiwakagolela waawo pe. Wakazumanana akuti: “Nokuba boobo, kuli bubotu bwajanwa mulinduwe.” (2 Makani 19:1-3) Aboobo ibukali bwa Jehova bululeme kunyina nobwakamusinkilila kubona bubotu mbwaakajisi Jehosafati. Eelo uliimpene kapati kaka abantunsi batalondokede! Eelyo notwanyemezyegwa abamwi, tulakonzya kubuluba bubotu buli mulimbabo. Alimwi notwabisya, ikutyompwa, kuusyigwa nsoni alimwi akulimvwa kuba amulandu kulakonzya kutusinkilila kububotu buli mulindiswe. Pele kamuyeeya kuti, ikuti tweempwa kujatikizya zibi zyesu alimwi akusolekesya kutaziinduluka, Jehova ulatulekelela.

¹³ Jehova namulingula, ulazisowa zibi zili boobo, mbubwenya buyo sikuseba musenga naa mavwu uuyandaula ngolida mbwasowa mabwe aanyina mpindu. Ino mbuti kujatikizya bube bwanu amilimo yanu mibotu? Inzya, eezyi “ngamabwe aajisi ngolida” ngayobola! Sena kuli nomwakabona kale bazyali basiluyando mbobazumanana kuzikkomanina zifwanikiso naa zintu zimwi nzyobapanga bana babo kucikolo, zimwi ziindi nokuba kuti kwainda makumi aamyaka ibana kabazilubide? Jehova Ngomuzyali siluyando wiinda boonse. Kufwumbwa kuti twazumanana kusyomeka kulinguwe, kunyina naluba milimo abube bwesu bubotu. Mubwini inga wacibona kuba kampenda ikuziluba eezyi, alimwi kunyina ciindi naba sikampenda naa uutaluleme. (Bahebrayo 6:10) Alimwi ulatulingula munzila iimbi.

14, 15. (a) Nkaambo nzi kutalondoka kwesu ncokutamusinkilili Jehova kubona bubotu mbotujisi? Amupe cikozyanyo. (b) Ncinzi Jehova ncayoocita abube bubotu mbwajana mulindiswe, alimwi ino ubabona buti bantu bakwe basyomeka?

¹⁴ Jehova takubikkili maanu kapati kutalondoka kwesu,  ubikkila buyo maanu kuzintu nzyotukonzya kucita. Mucikozyanyo: Ibantu bayandisya zintu zizekaudwe zyeebeka balasoleka munzila zyoonse ikubambulula cifwanikiso cimwi cinyonyookede naa kucita mulimo umwi. Mucikozyanyo, eelyo muntu umwi kubusena buyobwedwa zintu zyabasikuzekaula butegwa National Gallery ku London mucisi ca England naakanyonyoona cifwanikiso citondezya Leornardo da Vinci akatobolo kaniini calo icuulwa madola aaku Amelika aasika kutuulunzuma tuli 30, kunyina muntu wakapa muzeezo wakuti cifwanikiso eeco cisoogwe buyo mbwaanga lino cakalinyonyookede. Imulimo wakubukulusya cifwanikiso eeco cakazekawidwe kabotu kapati icakaliko kwamyaka iitandila ku 500 wakatalika ndilyona. Nkaambo nzi? Nkaambo cakali kubakkomanisya kapati ibayandisya milimo yakuzekaula. Sena nywebo tamuyandiki kapati kwiinda cifwanikiso cakaanzwa kwiinda mukubelesya penti? Kuli Leza masimpe mulayandika kapati nomunyonyookede buti akaambo kakutalondoka nkomwakakona. (Intembauzyo 72:12-14) Jehova Leza, Mulengi syaazibwene wabantu boonse  uyoocita kufwumbwa ciyandika ikutegwa aboozye baabo ibalisungwide kulanganizyigwa anguwe munzila yaluyando kuti bakalondoke.​—Milimo 3:21; Baroma 8:20-22.

¹⁵ Inzya, Jehova ulabubona bubotu mbotujisi ambweni mbotutakonzyi kubona swebo. Alimwi mbotumubelekela, uyoobuyungizya bubotu bwesu kusikila tukalondoke. Kunyina makani amboyatucita nyika ya Saatani, Jehova ulabakkomanina kapati babelesi bakwe basyomeka akubabona kuti mbayandisi.​—Hagai 2:7.

16. Ino mbumboni nzi ibwiinda boonse bwakuti Jehova ulatuyanda, alimwi ino tuzyi buti kuti cipego eeci cipedwe ndiswe kutugama?

¹⁶ Yane, nzinji kapati Jehova nzyacita ikusinizya luyando ndwajisi kulindiswe. Masimpe, icituuzyo cacinunuzyo ca Kristo mbwiinguzi bumaninide kububeji bwa Saatani bwakuti tunyina mpindu naa kuti tatuyandwi. Tatweelede kuluba kuti ilufwu lwalunya ndwaakafwa Jesu aacisamu cakupenzezya alimwi akupenga kwiinda waawo nkwaakaliyumya Jehova kalangilila Mwanaakwe ngwayandisya kafwa, mbumboni bwakuti balaaluyando kulindiswe. Mukubula coolwe, bantu banji cilabayumina kusyoma kuti cipego eeci cilakonzya kuba cabo kubagama. Balimvwa kuti tacibeeleli pe. Pele kamuyeeya kuti mwaapostolo Paulo wakali sikupenzya basikutobela Kristo. Nokuba boobo, wakalemba kuti: “Mwana wa Leza, . . . wakandiyanda akulyaaba akaambo kandime.”​—Bagalatiya 1:13; 2:20.

17. Ninzila nzi nzyabelesya Jehova kutugwasya kuba acilongwe anguwe alimwi a Mwanaakwe?

¹⁷ Jehova ulalutondezya luyando ndwajisi kulindiswe kwiinda mukugwasya umwi aumwi wandiswe kutugama ikuti tubikkile maanu kumpindu yacituuzyo ca Kristo. Jesu wakati: “Kunyina muntu uukonzya kuboola  kulindime ccita kuti wakwelwa a Taata wakandituma.” (Johane 6:44) Inzya, Jehova lwakwe utukwelela ku Mwanaakwe akutupa bulangizi bwabuumi butamani. Munzila nzi? Kwiinda mumulimo wakukambauka, walo uusikila umwi aumwi wandiswe kumugama, alimwi akwiinda mumuuya wakwe uusalala, ooyo Jehova ngwabelesya kutugwasya kuteelela akutobela makani aakumuuya aakasimpe nokuba kuti tatulondokede alimwi tulalezya lyoonse. Aboobo Jehova ulakonzya kutwaamba mbubwenya mbwaakaamba bana Israyeli kuti: “Ndalikukuyanda aluyando lutamani. Nkakaambo kaako ndakukwelela kulindime aluyando lutamani.”​—Jeremiya 31:3.

18, 19. (a) Ino ninzila nzi yabulongwe kwiinda zyoonse oomo Jehova mwatondezya luyando ndwajisi kulindiswe, alimwi ino ncinzi citondezya kuti ulacibikkila maanu kapati eeci? (b) Mbuti Jwi lya Leza mbolitusyomezya kuti Jehova ngusikuswiilila uujisi lweetelelo?

¹⁸ Kwiinda mumupailo, tulalibonena luyando lwa Jehova munzila yabulongwe kwiinda zyoonse. Ibbaibbele likulwaizya umwi aumwi wandiswe kuti “amupaile cakutaleka” kuli Leza. (1 Batesalonika 5:17) Ulateelela. Alimwi mane wiitwa kuti ‘Ngusikuswiilila mipailo.’ (Intembauzyo 65:2) Kunyina naacipa muntu uumbi cuuno cabweendelezi eeci, naba Mwanaakwe mwini kunyina naamupa pe. Amuyeeye buyo: Imulengi wajulu aansi utukulwaizya kuti tumusikile mumupailo cakulikwaya. Alimwi ino muswiilizi uuli buti? Sena ngooyo uutabikkili maanu, uunyina makani azicitika, uutalanganyi? Peepe.

¹⁹ Jehova ngusilweetelelo. Ino lweetelelo ninzi? Imunakristo uucembeede umwi uusyomeka wakati: “Lweetelelo nkucisa kwako nkondimvwa mumoyo wangu.” Sena ncobeni kuli mbwalimvwa Jehova akaambo kakucisa nkotujisi? Kujatikizya kupenga kwabantu bakwe bana Israyeli, tubala kuti: “Mumapenzi aabo oonse wakali kupenga mumoyo awalo.” (Isaya 63:9) Jehova tanaakaabona buyo pe  mapenzi ngobakajisi; pele wakabeetelela bantu aabo. Ikweetela ooku kulitondezyedwe amajwi aa Jehova mwini kubabelesi bakwe aakuti: “Kufwumbwa uumuguma nywebo uguma mboni yaliso lyangu.” b (Zekariya 2:8) Eelo eeco inga cacisa kapati kaka! Inzya, Jehova ulatweetelela. Notumvwa kucisa, awalo ulakumvwa mbubwenya.

20. Ino nkuyeeya kuli buti kutali kabotu nkotuteelede kubaankuko ikuti naa katuyanda kutobela lulayo luli ku Baroma 12:3?

²⁰ Kunyina Munakristo uuyeeya kabotu uunga wabelesya bumboni oobu bwaluyando lwa Leza alimwi abulemu mbwabapa babelesi bakwe ikutalika kulisumpwida mpawo naa kuliyanda. Imwaapostolo Paulo wakalemba kuti: “Kwiinda muluzyalo lwa Leza ndondakapegwa, ndaambila nyoonse ooko kuti mutayeeyi kuti mulayandika kapati kwiinda bwini mbomubede, pele kamuyeeya kabotu kweelana alusyomo umwi aumwi wanu ndwaakamupa Leza.” (Baroma 12:3) Ibusanduluzi bumbi aawa bwaamba kuti: “Andimwaambile nyoonse kuti mutalitukumuni akulibikka aciimo ncomutajisi, pele amulilangisye bwini mbomubede cakulitesya.” (A Translation in the Language of the People, ilyakasandululwaa Charles B. Williams) Aboobo nokuba kuti tulalukkomanina kapati luyando lwa Taateesu wakujulu, atube bantu basitikide akwiibaluka kuti luzyalo lwa Leza tatukonzyi kuluula amali alimwi talutweeleli pe.​—Luka 17:10.

21. Nkubeja nzi kwa Saatani nkotweelede kuzumanana kukaka, alimwi ino nkasimpe nzi kamu Bbaibbele nkotweelede kuzumanana kusinizya mumyoyo yesu?

²¹ Umwi aumwi wandiswe, weelede kusolekesya kutegwa  abukake bubeji bwa Saatani boonse kubikkilizya abwakuti tunyina mpindu naa tatuyandiki pe. Ikuti zimucitikila mubuumi zimupa kulimvwa kuti muli sizibi uutakonzyi kugwasyigwa aluyando lwa Leza lutalivwulili, naa zipa kuti milimo yanu mibotu ilibonye kuti inyina mpindu alimwi tiikonzyi kubonwa ameso aakwe aabona zyoonse, naa zipa kuti izibi zyanu zilibonye kuti nzipati cakuti tazikonzyi kuzimanizyigwa alufwu lwa Mwanaakwe ngwayandisya, nkokuti mwakacengwa. Amwaakake makani aakubeja aayo camoyo woonse! Atuzumanane kusyomezya myoyo yesu amakani aakasimpe aambwa mumajwi aa Paulo aakasololelwa amuuya uusalala aakuti: “Ndilisinizyide kuti lube lufwu, naa buumi, naa bangelo, naa mfwulumende, naa zintu ziliko lino, naa zilangilwa kumbele, naa nguzu, naa zintu zili mujulu, naa zili ansi, naa cilenge cimbi cili coonse tazikonzyi pe kutwaandaanya kuluyando lwa Leza luli muli Kristo Jesu Mwami wesu.”​—Baroma 8:38, 39.