1, 2. (a) Ncinzi cinga calibonya kuti tacikonzyeki kubantu banji, pele ino Bbaibbele litusyomezya nzi? (b) Ino Abrahamu wakajisi cilongwe cili buti, alimwi nkaambo nzi?

 INO inga mwalimvwa buti, ikuti Mulengi wajulu anyika wamwaamba kuti, “Ooyu mulongwe wangu”? Bantu banji balakonzya kwaamba kuti, eeco inga tacikonzyeki. Ino muntu uulya maila inga wapanga buti cilongwe a Jehova Leza? Pele Ibbaibbele litusyomezya kuti ncobeni tulakonzya kuba acilongwe a Leza.

² Abrahamu iwakapona ciindi cansiku ngumwi wabaabo ibakajisi cilongwe cili boobo. Jehova wakamwaamba kuti “mulongwe wangu.” (Isaya 41:8) Inzya, kuli Jehova, Abrahamu wakali mulongwe wakwe mwini-mwini. Abrahamu wakaba acilongwe cibotu cili boobo akaambo kakuti “wakasyoma Jehova.” (Jakobo 2:23) Mbubwenya buyo amazuba aano, Jehova uyandaula nzila zyakupanga cilongwe abaabo ibamubelekela alimwi ‘akubayanda.’ (Deuteronomo 10:15) Ijwi lyakwe likulwaizya kuti: “Amuswene kuli Leza, eelyo awalo ulaswena kulindinywe.” (Jakobo 4:8) Mumajwi aaya muli zintu zyobilo, ikutamba alimwi acisyomezyo.

3. Nkutamba kuli buti nkwacita Jehova kulindiswe, alimwi ino ncisyomezyo nzi ciswaangene ankuko?

³ Jehova ututamba kuti tuswene kulinguwe. Ulilibambilide alimwi ulilisungwide kututambula camaanza obile katuli balongwe bakwe. Alimwi utusyomezya kuti, ikuti twabweza ntaamu zyakuba acilongwe anguwe, awalo uyoocita mbubwena oobo. Uyooswena kulindiswe. Aboobo tulakonzya kuba muciimo citaliboteli,  kuba “acilongwe cini-cini a Jehova.” (Intembauzyo 25:14) “Cilongwe cini-cini” ndibbala lijisi muzeezo wakubandika makani aamaseseke amulongwe uulibedelede.

4. Ino mulongwe mwini-mwini inga mwamupandulula buti, alimwi muunzila nzi Jehova mwaatondezya kuti mulongwe uuli boobo kulibaabo ibaba acilongwe anguwe?

⁴ Sena mulijisi mulongwe ngomuyandisya walo ngomukonzya kwaambila makani aamaseseke? Mulongwe uuli boobo ngooyo uumubikkila maano. Mulamusyoma nkaambo watondezya kuti ulasyomeka. Mulakkomana kapati nomumwaambila zintu nzyomukkomanina. Mulakonzya kuliyumya mumapenzi nkaambo ulamuswiilila camoyo woonse alimwi acalweetelelo. Neliba leelyo nokuboneka kuti kunyina uumumvwisya, walo ulacita oobo. Mbubwenya buyo, ciindi nomuba acilongwe a Leza, muba a Mulongwe uulibedelede uumubona kuti mulayandika, uumubikkila maanu kapati alimwi uumumvwisya kabotu-kabotu. (Intembauzyo 103:14; 1 Petro 5:7) Mulamusyoma camoyo woonse, nkaambo mulizyi kuti ulasyomeka kulibaabo ibasyomeka kulinguwe. (Intembauzyo 18:25) Pele eeci coolwe cakuba acilongwe a Leza tulakonzya kuba ancico akaambo kakuti walo mwini nguwapa kuti cikonzyeke.

5. Ncinzi ncaakacita Jehova kutegwa tucikonzye kuba acilongwe anguwe?

⁵ Ikuti tiitwagwasyigwa, tatukonzyi kuba acilongwe a Leza swebo tobasizibi. (Intembauzyo 5:4) Imwaapostolo Paulo wakalemba kuti: “Pele Leza watutondezya luyando lwakwe mwini mukuti notwakacili basizibi, Kristo wakatufwida.” (Baroma 5:8) Inzya, Jehova wakabikka bubambe bwakuti Jesu ‘ape buumi bwakwe kuti bube  cinunuzyo cakununuzya banji.’ (Matayo 20:28) Ilusyomo ndotujisi mucipaizyo cacinunuzyo eeco lupa kuti tucikonzye kuba acilongwe a Leza. Mbwaanga Leza “nguwakasaanguna kutuyanda,” wakatubikkila ntalisyo yakuba acilongwe anguwe.—1 Johane 4:19.

6, 7. (a) Ino tuzyi buti kuti Jehova tali Leza uusisidwe, uutakonzyi kuzyibwa? (b) Muunzila nzi Jehova mwaaliyubununa?

⁶ Jehova wakabweza ntaamu iimbi: Wakaliyubununa kulindiswe. Mucilongwe cili coonse, kumvwana inga kuyeeme aakumuzyiba kabotu-kabotu muntu ooyo, ikulombozya bube bwakwe anzila zyakwe. Aboobo ikuti Jehova naali Leza uusisidwe, uutakonzyi kuzyibwa, kunyina notunga twaba acilongwe anguwe pe. Pele muciindi cakulisisa kulindiswe, uyanda kuti tumuzyibe. (Isaya 45:19) Kunze lyaboobo, nzyayubununa kujatikizya nguwe zilajanwa abantu boonse, nobaba baabo akati kesu ibanga babonwa kuti mbacete kweelana azyeelelo zyamunyika.​—Matayo 11:25.

⁷ Ino mbuti Jehova mbwaaliyubununa kulindiswe? Izintu nzyalengede zitondezya mbazu zimwi zyabube bwakwe nkokuti, mbozili zinji nguzu zyakwe, ikuvwula kwabusongo mbwajisi alimwi aluyando lwakwe. (Baroma 1:20) Pele ikuliyubununa kwa Jehova takugoleli buyo azintu nzyalengede. Mbwali cikozyanyo cibotu cakubandika, wakaliyubununa mbwabede mu Jwi lyakwe, Ibbaibbele.

8. Nkaambo nzi ncokunga kwaambwa kuti Bbaibbele lini mbumboni bwaluyando ndwajisi Jehova kulindiswe?

⁸ Ibbaibbele lini mbumboni bwaluyando ndwajisi Jehova kulindiswe. Mu Jwi lyakwe, ulaliyubununa munzila nzyotukonzya kumvwisya, oobu tabuli buyo bumboni bwakuti ulatuyanda, pele akuti uyanda  kuti tumuzyibe alimwi akumuyanda. Nzyotubala mubbuku eeli litaliboteli zitugwasya kuba acilongwe anguwe. (Intembauzyo 1:1-3) Nkooko atubandike nzila zimwi izibotu kapati oomo Jehova mwaliyubununa mu Jwi lyakwe.

9. Ntwaambo nzi tumwi itwaamba bube bwa Leza itwaambidwe mu Bbaibbele?

⁹ Magwalo ajisi twaambo tunji tugaminide itwaamba bube bwa Leza. Amubone zikozyanyo zimwi. “Jehova uyandisya bululami.” (Intembauzyo 37:28) Leza “ulaanguzu zinji kapati.” (Jobu 37:23) “‘Ndilasyomeka,’ mbwaamba Jehova.” (Jeremiya 3:12) “Musongo mumoyo.” (Jobu 9:4) Ngu “Leza siluse alimwi silweetelelo, uutafwambaani kukalala alimwi uuzwide luyando lutamani akasimpe.” (Kulonga 34:6) “O Jehova uli mubotu alimwi ulilibambilide kulekelela zibi.” (Intembauzyo 86:5) Alimwi mbubwenya mbokwaambwa mucibalo cainda, ibube bomwe bulibonya kapati mboobo bwakuti: “Leza nduyando.” (1 Johane 4:8) Nomuzinzibala kuyeeya kujatikizya bube oobu bubotu, sena tamukulwaizyigwi kuyanda kuba acilongwe a Leza ooyu uutakonzyi kweelanisyigwa amuntu uumbi uuli woonse?

10, 11. (a) Ncinzi Jehova ncaakabikkilizya mu Jwi lyakwe ikutegwa atugwasye kubuzyiba kabotu bube bwakwe? (b) Ncikozyanyo nzi camu Bbaibbele icitugwasya kubona mbwaakazibelesya nguzu zyakwe Leza kugwasya bantu?

¹⁰ Kunze lyakutwaambila buyo bube bwakwe, caluyando Jehova wakabikkilizya zikozyanyo mu Jwi lyakwe  izitondezya bube bwakwe muzintu nzyaakacita. Izibalo zili boobu zilatugwasya kuzibona kabotu mbazu ziindene-indene zyabube bwakwe. Mpoonya eeco citugwasya kuba acilongwe anguwe. Amulange-lange cikozyanyo cimwi.

¹¹ Tulakonzya kubala kuti Leza ulijisi nguzu “zigambya.” (Isaya 40:26) Pele eeco ciliimpene kapati akubala makani aajatikizya mbwaakafwutula bana Israyeli mu Lwizi Lusalala akubalanganya munkanda kwamyaka iili 40. Mulakonzya kweezeezya kuti mulaabwene meenda kaandaana. Akubabona bana Israyeli ambweni ibali 3,000,000 boonse antoomwe, kabeenda anyika njumu mulwizi, meenda kaayimvwi mbuli bwaanda bupati kululyo akulumwensyi lwabo. (Kulonga 14:21; 15:8) Mulakonzya kubona bumboni bwakulanganya kwa Leza munkanda. Imeenda akazwa mundomba yabbwe. Icakulya cikozyenye atunseke tutuba cakalibonya ansi. (Kulonga 16:31; Myeelwe 20:11) Aawa Jehova tatondezyi buyo nguzu nzyajisi pe, pele akuti ulazibelesya kugwasya bantu bakwe. Sena tacikkaziki moyo kuzyiba kuti, mipailo yesu yuunka kuli Leza singuzu ooyo uuli “mayubilo eesu alimwi ninguzu zyesu, mugwasyi ngotukonzya kujana lyoonse muziindi zyamapenzi”?​—Intembauzyo 46:1.

12. Mbuti Jehova mbwatugwasya “kumuzyiba” munzila nzyotukonzya kumvwisya?

¹² Jehova, walo uuli muciimo ca Muuya wacita zintu zinji kutugwasya kuti tumuzyibe. Mbotuli bantunsi, tubona buyo zintu zilibonya ameso, aboobo tatukonzyi kubona zintu zyamuuya. Ikuti Leza watupandulwida mbwabede muciimo camuuya, inga caba buyo mbuli kuti musola kupandulula mbomuboneka, mubala wameso aanu naa tubata tuli kubusyu bwanu kumuntu  wakazyalwa kali moofwu. Muciindi caboobo, Jehova calubomba ulatugwasya “kumuzyiba” munzila nzyotukonzya kumvwisya kabotu. Zimwi ziindi ubelesya mwaambo wakukozyanisya zintu zimwi kuzintu zimbi zikozyenye anzizyo naa zikozyanyo, kalikozyanisya kuzintu nzyotuzyi. Alimwi mane ulalipandulula kuti ujisi zizo zimwi mbuli zeezyo zijisi bantu. a

13. Ncikozyanyo nzi ibbuku lya Isaya 40:11 ncolitupa, alimwi ino cimupa kulimvwa buti?

¹³ Amubone mbwapandululwa Jehova kubbuku lya Isaya 40:11 kuti: “Mbubonya mbuli mweembezi, uyoolanganya butanga bwakwe. Ajanza lyakwe uyoobunganya twana twambelele antoomwe, alimwi uyootunyamuna acamba cakwe.” Aawa Jehova ukozyanisyigwa kumweembezi uunyamuna twana twambelele “ajanza lyakwe.” Eeci citondezya nguzu nzyajisi Leza zyakukwabilila bantu bakwe akubagwasya, nobaba baabo bapengede. Tulakonzya kuliiba mumaboko aakwe aalaanguzu kapati, nkaambo ikuti katusyomeka kulinguwe, kunyina nayootulekelezya pe. (Baroma 8:38, 39) Mweembezi Mupati ulanyamuna twana twambelele “acamba cakwe.” Majwi aaya aamba cibeela cacisani mpocili acamba cili mbuli nkomo, oomo mweembezi zimwi ziindi mwaakali kunyamwida kana kambelele kazwa akuzyalwa. Aboobo tulaalusyomo lwakuti Jehova ulatukkomanina alimwi ulatulanganya munzila yalubomba kapati.  Aboobo ncilengwa cesu buya ikuyanda kuba acilongwe anguwe.

14. Nkaambo nzi ncokunga kwaambwa kuti Jehova ulaliyubununa kujatikizya mbwabede kwiinda muli Jesu?

¹⁴ Mujwi lyakwe, Jehova ulaliyubununa kujatikizya mbwabede kwiinda mu Mwanaakwe ngwayandisya, Jesu. Kunyina muntu wakali kukonzya kutondezya mizeezo ya Leza ambwalimvwa kujatikizya zintu cakulondoka naa kumupandulula munzila iisalede kapati kwiinda mbwaakacita Jesu. Kayi ooyo Mwana mutaanzi kuzyalwa wakaliko antoomwe a Bausyi izilenge zyamuuya zimbi kazitanabako abubumbo bulibonya kabutana akulengwa. (Bakolose 1:15) Jesu wakalimuzyi kabotu-kabotu Jehova. Nkakaambo kaako ncaakali kukonzya kwaamba kuti: “Kunyina uumuzyi kabotu Mwana ccita Taata alikke, alimwi kunyina uumuzyi kabotu Taata ccita Mwana alikke, alimwi ayooyo kufwumbwa Mwana ngwaayanda kuyubunwida.” (Luka 10:22) Naakali anyika kali muntu, Jesu wakamuyubununa Usyi munzila zyobile ziyandika kapati.

15, 16. Muunzila nzi zyobilo Jesu mwaakamuyubununa Usyi?

¹⁵ Cakusaanguna, njiisyo zya Jesu zilatugwasya kumuzyiba Usyi. Jesu wakamupandulula Jehova munzila iitukulwaizya kapati. Mucikozyanyo, mukupandulula Leza siluzyalo uutambula basizibi ibeempwa, Jesu wakakozyanisya Jehova kumuzyali uulekelela, uufwida luzyalo naabona mwanaakwe mutaka iwapiluka, eelyo wamubalikila akumukumbata mpoonya akumumyonta. (Luka 15:11-24) Alimwi Jesu wakatondezya kuti Jehova ngu Leza ‘uukwela’ bantu babombe myoyo akaambo kakuti ulabayanda umwi aumwi wabo. (Johane  6:44) Alimwi buya ulazyiba neliba leelyo nokawida ansi katiiti. Jesu wakapandulula kuti: “Mutayoowi pe; nywebo mulayandika kwiinda tutiiti tunji.” (Matayo 10:29, 31) Masimpe tuyandisya kuba acilongwe a Leza uulanganya kapati boobo.

¹⁶ Cabili, icikozyanyo ca Jesu citutondezya mbwabede Jehova. Jesu wakamwiiya cakulondoka Usyi cakuti wakali kukonzya kwaamba kuti: “Kufwumbwa ooyo wandibona wamubona awalo Taata.” (Johane 14:9) Aboobo notubala mumabbuku aa Makani Mabotu kujatikizya Jesu mbwaakali kulimvwa kujatikizya bamwi, ambwaakali kubeendelezya inga cili mbuli kuti tulimubwene ncobeni Usyi. Kunyina nzila mbotu iimbi njaakali kunga wabelesya Jehova kuyubununa bube bwakwe kwiinda yeeyi. Nkaambo nzi?

17. Amupe cikozyanyo kujatikizya ncaacita Jehova kutegwa atugwasye kumvwisya mbwabede.

¹⁷ Mucikozyanyo: Amweezeezye kusola kupandulula  luzyalo mbolubede. Mulakonzya kulupandulula kwiinda mukubelesya mabala. Pele ikuti mwapa cikozyanyo camuntu uuli mukucita cintu cimwi munzila yaluzyalo akwaamba kuti, “Eeciya ncecikozyanyo caluzyalo,” ibbala lyakuti “luzyalo” liba abupanduluzi buyungizyidwe alimwi lilauba-uba kulimvwisya. Jehova wacita cintu cikozyenye aceeco kutegwa atugwasye kumvwisya mbwabede. Kunze lyakulipandulula kwiinda mukubelesya buyo mabala, watupa cikozyanyo cini-cini ca Mwanaakwe. Tulabubona bube bwa Leza kabutondezyegwa muli Jesu. Kwiinda muzibalo zyamu Mabbuku aa Makani Mabotu izipandulula Jesu, cili mbuli kuti Jehova waamba kuti: “Oobo mbondibede mebo.” Ino makani aayo aakasololelwa amuuya amupandulula buti Jesu ciindi naakali anyika?

18. Mbuti Jesu mbwaakatondezya nguzu, bululami alimwi abusongo?

¹⁸ Ibube bwa Leza buyandika bone bwakatondezyegwa kabotu-kabotu muli Jesu. Wakalijisi nguzu zyakuponya malwazi, kumana nzala alimwi mane alufwu. Nokuba boobo, mukwiimpana abantu basyaacivwulemwangu ibazibelesya bubi nguzu nzyobajisi, kunyina naakabelesya nguzu zyamaleele kuligwasya mwini naa kucisa bamwi. (Matayo 4:2-4) Wakali kubuyanda bululami. Akaambo kabululami, wakanyema naakabona basambazi bampelenge nkobakali kubbida bantu. (Matayo 21:12, 13) Ibacete abapengede wakabalanganya boonse cakutasalulula, wakabagwasya ‘kukatalusyigwa.’ (Matayo 11:4, 5, 28-30) Munjiisyo zya Jesu mwakali busongo butakonzyi kweezyanisyigwa, nkaambo wakali “kwiinda Solomoni.” (Matayo 12:42) Pele Jesu kunyina naakalitukumuna akaambo kabusongo mbwaakajisi. Imajwi aakwe akali kubakulwaizya nobaba bantu buyo,  nkaambo njiisyo zyakwe zyakali kulimvwisya, izyuuba-uba kumvwa alimwi zyakali kugwasya.

19, 20. (a) Mbuti Jesu mbwaakali cikozyanyo cilibedelede caluyando? (b) Ncinzi ncotweelede kuyeeya lyoonse notubala akuzinzibala kuyeeya cikozyanyo ca Jesu?

¹⁹ Jesu wakali cikozyanyo cilibedelede mukutondezya luyando. Mumulimo wakwe woonse, wakatondezya luyando mumbazu zyoonse, kubikkilizya alweetelelo alimwi aluzyalo. Kunyina naakali kwiile kubona kupenga kwabamwi kakunyina kweetezyegwa. Bunji bwaziindi, iluzyalo ndwaakajisi kuli bamwi lwakamukulwaizya kubweza ntaamu yakucita cintu cimwi. (Matayo 14:14) Nokuba kuti wakaponya baciswa akubapa cakulya bakafwide nzala, Jesu wakatondezya luzyalo munzila iiyandika kapati. Wakagwasya bantu kukazyiba, kukazumina alimwi akukayanda kasimpe kajatikizya Bwami bwa Leza bwalo ibuyoogwasya bantu mane kukabe kutamani. (Marko 6:34; Luka 4:43) Kwiinda zyoonse, Jesu wakatondezya luyando lwakulyaaba kwiinda mukulisungula kufwida bamwi.​—Johane 15:13.

²⁰ Aboobo, tacigambyi pe kuti bantu bamisela yoonse abukkale bwiindene-indene bakayanda kuba acilongwe amuntu ooyu wakali kusangaalizya akubalanganya caluzyalo kapati. (Marko 10:13-16) Pele, mbotuyaabubala akuzinzibala kuyeeya cikozyanyo ca Jesu, lyoonse katuyeeya kuti mu Mwana ooyu tubona bwini mbwabede Usyi.​—Bahebrayo 1:3.

21, 22. Ncinzi cijatikizyidwe mukuyandaula Jehova, alimwi ino bbuku eeli ligwasya kwiiya lijisi makani nzi aakutugwasya kucita boobo?

²¹ Kwiinda mukuliyubununa kabotu-kabotu mu Jwi lyakwe, Jehova ulacisalazya kuti uyanda kuti tube  acilongwe anguwe. Pele kunyina natusinikizya buya kuba acilongwe cibotu anguwe. Mukuli waumwi aumwi wesu ikuyandaula Jehova “nacijanika.” (Isaya 55:6) Ikuyandaula Jehova kubikkilizya kuzyiba bube bwakwe ambwacita zintu mbubwenya mbokutondezyedwe mu Bbaibbele. Eeli bbuku ndyomuli mukubala lino lyakabambilwa kuti limugwasye kucita ceeci.

²² Mulabona kuti ibbuku eeli, lili muzibeela ziswaangene abube bwa Jehova buyandika kapati bone, nkokuti: nguzu, bululami, busongo alimwi aluyando. Cibeela cimwi acimwi cilatalika abupanduluzi bufwaafwi bwabube oobo. Mpoonya zibalo zitobela mucibeela eeco zibandika mbwabutondezya bube oobo Jehova mumbazu ziindene-indene. Alimwi cibeela cimwi acimwi cilijisi cibalo citondezya mbuli mbwaakabutondezya bube oobo Jesu mpoonya cibalo cimbi citondezya mbotunga twabutondezya bube oobo mubuumi bwesu.

23, 24. (a) Amucipandulule cibeela cilibedelede cakuti “Mibuzyo Yakuzinzibala Kuyeeya.” (b) Mbuti kuzinzibala kuyeeya mbokutugwasya kuzumanana kuba acilongwe a Leza?

²³ Kutalikila mucibalo eeci, kuli cibeela cilibedelede  citegwa “Mibuzyo Yakuzinzibala Kuyeeya.” Mucikozyanyo, amubone  kabbokesi ikali apeeji 28. Magwalo alimwi amibuzyo tiizyakabikkilwa kwiinduluka cibalo pe. Muciindi caboobo, zyakabikkilwa kuti zimugwasye kumvwisya mbazu zimbi ziyandika kapati kujatikizya kaambo aako kabandikwa. Ino inga mwacibelesya buti cibeela eeci munzila iigwasya? Amwaabale magwalo oonse aabikkidwe alimwi akutubala kabotu-kabotu tupango. Mpoonya amulange mubuzyo uutobelwa alugwalo alumwi. Amuzinzibale kuyeeya bwiinguzi. Mulakonzya kuvwuntauzya. Amulibuzye mibuzyo iimbi mbuli yakuti: ‘Ino makani aaya andaambila nzi kujatikizya Jehova? Ino abujatikizya buti buumi bwangu? Ino inga ndaabelesya buti kugwasya bambi?’

²⁴ Ikuzinzibala kuyeeya kuli boobo kulakonzya kutugwasya kuzumanana kuyumya cilongwe cesu a Jehova. Nkaambo nzi? Bbaibbele liswaanganya kuzinzibala kuyeeya amoyo. (Intembauzyo 19:14) Notuzinzibala kuyeeya aali zeezyo nzyotwiiya kujatikizya Leza, imakani alanjila mumyoyo yesu yacikozyanyo, oomo mwaayendelezya kuyeeya kwesu, kutukulwaizya akutupa kubweza ntaamu. Iluyando ndotujisi kuli Leza lulakomena, alimwi luyando oolo lutukulwaizya kuyanda kumukkomanisya mbwali Mulongwe wesu ngotuyandisya. (1 Johane 5:3) Ikutegwa tube acilongwe cili boobo, tweelede kubuzyiba bube bwa Jehova alimwi anzila zyakwe. Pele cakusaanguna, atubandike lubazu lwaamba mbwabede Leza lwalo lupa kaambo ikayandika kapati ncotweelede kuba acilongwe anguwe, nkokuti ibusalali bwakwe.