HENA ulicizyi cintu cakutaanguna Nowa ncaakacita amukwasyi wakwe naakazwa mubwato? Wakapa cituuzyo naa cipego kuli Leza. Ulakonzya kumubona kacita cintu eeci acifwanikiso aawa. Nowa wapa cipego cabanyama kulumba Leza akaambo kakufwutula mukwasyi wakwe kuzambangulwe.

Hena uyeeya kuti Jehova wakacikkomanina cipego eeco? Inzya wakacikkomanina. Aboobo wakamusyomezya Nowa kuti taku kabili naya kwiinyonyoona nyika azambangulwe.

Tiicakatola ciindi nyika yoonse yakayuma, aboobo Nowa amukwasyi wakwe nobakazwa mubwato, bakatalika kupona buumi bupya. Leza wakabaleleka, alimwi wakabaambila kuti: ‘Mweelede kuba abana banji. Mweelede kuti muvwule kusikila nyika yoonse ikakkalwe bantu.’

Pele kumpela bantu baakumvwa zyazambangulwe balakonzya kuyoowa kuti zambangulwe iili mbuli yakacitika ilakonzya kucitika alimwi. Aboobo Leza wakapa cintu cimwi cakali kubayeekezya bantu kujatikizya cisyomezyo cakwe cakuti taku naya kuleta zambangulwe alimwi. Hena ulicizyi ncaakapa kuti kacibayeekezya? Wakali fulicoongo bamwi ngobati pilicoongo.

Ziindi zinji fulicoongo ulalibonya kujulu ikuti zuba lyabala mvwula niyamana kuwa. Bafulicoongo balakonzya kabajisi misyobo minji alimwi mibotu. Hena kuli ngowakabona kale? Hena waubona ooyu uuli acifwanikiso?

Mboobu Leza mbwaakaamba, wakati: ‘Ndasyomezya kuti taku nelilampa nindiya kunyonyoona bantu abanyama azambangulwe. Ndabikka fulicoongo wangu mumakumbi. Ikuti fulicoongo walibonya, ndiya kuubona alimwi ndiya kuyeeya cisyomezyo cangu.’

Aboobo nobona fulicoongo, ino ncinzi ncoukuyeekezya? Ee, ncisyomezyo ca Leza cakuti takainyonyooni kabili nyika azambangulwe.

Matalikilo 8:18-22; 9:9-17.