Makani 14: Leza Wamusunka Abbulahamu Kuti Abone Lusyomo Ndwajisi
HENA wacibona Abbulahamu ncacita aawa? Ulijisi cipeni, alimwi kulibonya kuti uyanda kumujaya mwana wakwe. Ino nkaambo nzi ncanga wacita cintu eeci? Cakutaanguna, atubone Abbulahamu a Sala mbobakaba amwana.
Koyeeya kuti Leza wakabasyomezya kuti baya kuba amwana musankwa. Pele eeco cakali kulibonya kuti nciyumu nkaambo Abbulahamu a Sala bakali cembade kapati. Nokuba boobo, Abbulahamu wakalisyomede kuti Leza ulakonzya kucita cintu cilibonya kuyuma. Aboobo, ino ncinzi cakacitika?
Leza naakamana kumusyomezya, kwakainda mwaka omwe. Aboobo Abbulahamu naakaba amyaka iili 100 a Sala iili 90, bakaba amwana musankwa wazina lya Izaka. Leza wakasyomeka kucisyomezyo cakwe!
Pele Izaka naakakomena, Jehova wakamusunka Abbulahamu kuti abone lusyomo ndwajisi. Wakaita kuti: ‘Abbulahamu!’ Abbulahamu wakavwiila kuti: ‘Mpendi!’ Kumane Leza wakati: ‘Bweza mwana wako omwe buyo Izaka, uunke kucilundu ncendilaakutondezye. Waakusika ooko, ukamujaye mwana wako kuti cikabe cipaizyo.’
Elo Abbulahamu wakausa kumakani aayo, nkaambo wakali kumuyanda kapati kaka mwana wakwe! Koyeeya buyo kuti Leza wakasyomezyede kuti bana ba Abbulahamu baya kukkala munyika ya Kenani. Pele ino mbuti eeco mbocakali kukonzya kucitika ikuti Izaka kafwide? Abbulahamu cakamukatazya kucimvwisya, pele wakaccilila ncaakaamba Leza.
Naakasika kucilundu, Abbulahamu wakamwaanga Izaka akumulazika acipaililo ncaakapanga. Kumane, wakabweza cipeni kuti ajaye mwana wakwe. Pele aciindi nceena eeco, mungelo wa Leza wakaita kuti: ‘Abbulahamu! Abbulahamu!’ Abbulahamu wakavwiila kuti: ‘Mpendi!’
Leza wakati: ‘Utamucisi mwana wako nikuba kucita cimwi cintu kuli nguwe. Lino ndazyiba kuti ulijisi lusyomo muli ndime nkaambo tiiwandikasya mwana wako omwe buyo.’
Ma! elo nkukomena lusyomo Abbulahamu ndwaakajisi kuli Leza! Wakasyoma kuti taku cintu cakali ciyumu kuli Jehova akuti Jehova wakali kukonzya kumubusya Izaka. Pele tiikwakali kuyanda kwa Leza kuti Abbulahamu amujaye Izaka. Aboobo Leza wakapa kuti mbelele ipatile muzyitewu-tewu zyakali afwiifwi, aboobo wakaambila Abbulahamu kuti apaizye njiyo ikutali mwana wakwe.
Matalikilo 21:1-7; 22:1-18.
Mibuzyo
- Ncisyomezyo nzi Leza ncaakamusyomezya Abbulahamu, alimwi mbuti Leza mbwaakasyomeka kucisyomezyo cakwe?
- Mbuli mbokutondezyedwe acifwanikiso, mbuti Leza mbwaakamusunka Abbulahamu kuti abone lusyomo ndwajisi?
- Ncinzi Abbulahamu ncaakacita nikuba kuti tanaakamvwisya cakapa kuti Leza amulailile kucita cintu eeci?
- Ncinzi cakacitika Abbulahamu naakabweza cipeni kuti ajaye mwana wakwe?
- Ino lwakali luyumu buti lusyomo lwa Abbulahamu muli Leza?
- Mbuti Leza mbwaakamupa Abbulahamu cakupaizya, alimwi nkaambo nzi?
Mibuzyo aimwi
- Bala Matalikilo 21:1-7.
Nkaambo nzi Abbulahamu ncaakamupalula mwana wakwe mubuzuba bwalusele? (Matl. 17:10-12; 21:4)
- Bala Matalikilo 22:1-18.
Mbuti Izaka mbwaakalibombya kuli baswaabo ba Abbulahamu, alimwi ino eeci cakali kwiiminina kaambo nzi kayandika kapati kumpela? (Matl. 22:7-9; 1 Kor. 5:7; Flp. 2:8, 9)
Andiza Inga Mwaakkomanina Ayaaya
AMWIIYE LUSYOMO LWABO
Abrahamu—“Usyi Wabaabo Boonse Bajisi Lusyomo”
Mbuti Abrahamu mbwaakatondezya lusyomo? Muunzila nzi momuyanda kwiiya lusyomo lwa Abrahamu?
