Makani 62: Mapenzi Muŋanda ya Davida
DAVIDA mbwaakatalikila buyo kulela mu Jelusalemu, Jehova wabagwasya basikalumamba bakwe kuzunda basinkondonyina munkondo zinji. Jehova wakasyomezya kupa nyika ya Kenani kubana Isilayeli. Ikwiinda mulugwasyo lwa Jehova, nyika yoonse njaakabasyomezya yaba yabo.
Davida muleli mubotu. Ulamuyanda Jehova. Cintu cakutaanguna ncaacita naamana kuzunda munzi wa Jelusalemu, nkuleta bbokesi lyacizuminano lya Jehova. Alimwi uyanda kuyaka tempele mwakulibikka.
Davida naakakomena, wakalubizya kapati. Davida ulizyi kuti tacili kabotu kubweza cintu camuntu. Pele buzuba bumwi mangolezya kali aciluli caŋanda yakwe yabwami, wakalanga ansi wabona mukaintu mubotu kapati. Zina lyakwe ngu Bateseba, eelyo munyokwabo ngumwi wabasikalumamba bakwe wazina lya Uliya.
Davida ulamuyanda kapati Bateseba cakunga wamuleta kuŋanda yakwe yabwami. Munyokwabo uli kunkondo. Aboobo Davida woona anguwe, eelyo kumpela wazyiba kuti ulaba amwana. Davida walibilika eelyo watumya mulomo kuli Jowabu mupati wabasikalumamba bakwe kuti Uliya abikkwe kumpela kutegwa ajaigwe. Afwe buyo Uliya, Davida wamukwata Bateseba.
Jehova wamukalalila kapati Davida. Aboobo watuma Natani mubelesi wakwe kuti akamwaambile cibi ncaakacita. Ulakonzya kumubona Natani aawa kaambaula kuli Davida. Davida wausa kapati kukaambo aaka, aboobo Jehova tanaamujaya. Pele Jehova ulati: ‘Akaambo kakuti wacita zibi eezyi, ulaba amapenzi manji muŋanda yako.’ Elo nkukomena mapenzi Davida ngajisi!
Cakutaanguna, mwana wa Bateseba wafwa. Kumane mwana wa Davida mutaanzi Aminoni bacaale buyo balikke nkujata mucizyi wakwe Tamala. Abisalomu mwana wa Davida wakalala kapati cakuti wamujaya Aminoni. Kumane Abisalomu bantu banji bamuyanda, aboobo walibikka abwami. Kumamanino, Davida wamuzunda Abisalomu munkondo akumujaya. Masimpe, Davida ulijisi mapenzi manji.
Muciindi nceena eeci camapenzi, Bateseba watumbuka mwana wazina lya Solomoni. Acembale Davida akutalika kuciswa-ciswa, mwana wakwe Adonija watalika kulyeenzyeka acuuno cabwami. Aciindi aawo Davida waambila mupaizi Zadoki kutila mafwuta amutwe wa Solomoni kutondezya kuti Solomoni nguulaabe mwami. Mumazuba buyo masyoonto Davida wafwa kajisi myaka iili 70. Wakalela kwamyaka iili 40, pele lino Solomoni ngomwami wa Isilayeli.
2 Samuyele 11:1-27; 12:1-18; 1 Bami 1:1-48.
Mibuzyo
- Kwiinda munguzu zya Jehova, ncinzi limwi cacitika munyika ya Kenani?
- Ncinzi cakacitika buzuba bumwi mangolezya Davida kali aciluli caŋanda yakwe yabwami?
- Nkaambo nzi Jehova ncaamukalalila Davida?
- Ngwani acifwanikiso Jehova ngwaatuma kuti akamwaambile Davida cibi ncaacita, alimwi ncinzi muntu ooyo ncaamba ciya kucitika kuli Davida?
- Mapenzi nzi Davida ngajisi?
- Naakazwa Davida, ngwani wakaba mwami wa Isilayeli?
Mibuzyo aimwi
- Bala 2 Samuyele 11:1-27.
Nkaambo nzi kujata bubi mumulimo wa Jehova ncocigwasya?
Mbuti Davida mbwaakanjila mucibi, alimwi mbuti cakacitika mboili ncenjezyo kubabelesi ba Jehova sunu? (2 Sam. 11:2; Mt. 5:27-29; 1 Kor. 10:12; Jak. 1:14, 15)
- Bala 2 Samuyele 12:1-18.
Nciiyo nzi baalu abazyali ncobakonzya kwiiya munzila Natani mbwaakamusikila Davida kuti amupe lulayo? (2 Sam. 12:1-4; Tus. 12:18; Mt. 13:34)
Nkaambo nzi Jehova ncaakamufwida luzyalo Davida? (2 Sam. 12:13; Int. 32:5; 2 Kor. 7:9, 10)
