Makani 70: Jona Answi Mpati
LANGA muntu mumeenda. Uli mumapenzi mapati. Hena tabusyi? Inswi eeyo iyanda kumumena! Hena ulimuzyi muntu ooyu? Zina lyakwe ngu Jona. Atubone mbwaakanjila mumapenzi mapati boobu.
Jona musinsimi wa Jehova. Kwakainda buyo mazuba masyoonto musinsimi Elisya naakafwa, eelyo Jehova waambila Jona kuti: ‘Koya kumunzi mupati wa Nineve. Bubi bwabantu kuya bwaindilila, alimwi ndiyanda kuti iwe ukabaambile.’
Pele Jona tayandi kuunka. Aboobo wakkwela bwato butaunki ku Nineve. Jehova tanaakkomana akaambo kakuti Jona waccija. Aboobo wacita kuti kubbubbule muwo. Wabbubbula cakuti bwato buyanda kubbila. Bali mubwato bayoowa kapati, aboobo batalika kulilila baleza babo kuti babagwasye.
Limwi Jona wabaambila kuti: ‘Mebo ndikomba Jehova, Leza wakalenga julu anyika. Ndiccija mulimo Jehova ngwaakandituma kuti ndicite.’ Aboobo basibwato babuzya kuti: ‘Ino ncinzi ncotweelede kukucita kutegwa muwo uleke kubbubbula?’
Jona wati: ‘Amundisowele mulwizi, eelyo lwizi lulatontomana alimwi.’ Basibwato tabayandi kucita oobo, pele muwo nowaindilila kubbubbula, limwi baile kumuwaala Jona mumeenda. Mpamunya lwizi lwatontomana alimwi.
Jona wabbila mumeenda kumane nswi mpati yamumena. Pele tanaafwa pe. Kwamazuba otatwe masiku amasyikati uli mwida lyanswi. Jona wakausa kapati akaambo kakutaswiilila Jehova kuunka ku Nineve. Hena ulicizyi ncaacita?
Jona wapaila kuli Jehova kuti amugwasye. Kumane Jehova wapa kuti nswi imuluke anyika njumu. Kumane Jona waunka ku Nineve. Hena eeci tacituyiisyi kuti tweelede kucita kufwumbwa Jehova ncaamba?
Bbuku lya Bbaibbele lya Jona.
Mibuzyo
- Ngwani Jona, alimwi ncinzi Jehova ncaamwaambila kuti acite?
- Ncinzi Jona ncaacita akaambo kakutayanda kuunka kooko Jehova nkwaakamwaambila kuti aunke?
- Ncinzi Jona ncaabaambila basibwato kucita kutegwa muwo uleke kubbubbula?
- Kweelana ambobona acifwanikiso, ncinzi cacitika Jona naabbila mumeenda?
- Ino Jona wakkala mazuba ongaye kali mwida lyanswi mpati, alimwi ncinzi ncacita kali mwida?
- Nkuli Jona nkwaaunka naazwa mwida lyanswi mpati, alimwi ncinzi ncocituyiisya eeci?
Mibuzyo aimwi
- Bala Jona 1:1-17.
Mbuti Jona mbwaakaubona mulimo wakwe wakukambauka kubana Nineve? (Jon. 1:2, 3; Tus. 3:7; Muk. 8:12)
- Bala Jona 2:1, 2, 10.
Mbuti cakamucitikila Jona mbocitupa camba kuti Jehova uya kuyiingula mipailo yesu? (Int. 22:24; 34:6; 1 Joh. 5:14)
- Bala Jona 3:1-10.
Nkukulwaizyigwa kuli nkotujana twalanga Jehova mbwaakazumanana kumubelesya Jona nokuba kuti wakazelauka kumatalikilo kuzuzikizya mulimo wakwe? (Int. 103:14; 1 Pita 5:10)
Mbuti cakacitika kuli Jona kubana Nineve mbocituyiisya kutasalulula bantu bali mucilawo ncotukambaukila? (Jon. 3:6-9; Muk. 11:6; Inc.13:48)
