HENA kuli noyeeya kumvwa zyabasankwa aaba botatwe? Ee, mbeenzyinyina Daniyeli bakakaka kulya zilyo nzyobakabona kuti tazyili kabotu kuli mbabo. Bana Bbabbuloni bakabaulika mazina aakuti, Syadileki, Misyeki a Abedinego. Pele lino kobalanga. Ino nkaambo nzi ncobatavwuntamini kucibumbwa eeci cipati mbuli mbobacita bamwi? Nkooko atubone.

Hena ulayeeya milawo Jehova lwakwe mwini njaakalemba iitwa kuti Milawo iili Kkumi? Wakutaanguna wamilawo eeyi ngwakuti: ‘Utakombi baleza bambi kunze lyangu.’ Basankwa aaba balauccilila mulawo ooyu nokuba kuti tacili cintu cuuba-uba kucicita.

Nebukadineza mwami wa Bbabbuloni waita balupati-pati banji kuzyi kupa bulemu cibumbwa eeci ncaabamba. Nceciindi ncaamanizya kwaambila bantu boonse kuti: ‘Mwamvwa kulila kwamyeembo, tuntimbwa azyakwiimbya, mweelede kuvwuntama kukomba cibumbwa eeci cangolida. Kufwumbwa ooyo uutako kuvwuntama kukomba, ulawaalwa mubbibi lyamulilo kakunyina akusowa ciindi.’

Nebukadineza amvwe kuti Syadileki, Misyeki a Abedinego tiibavwuntama, wakalala kapati. Wati, amubalete kuno! Wabapa ciindi alimwi cakuti bavwuntame kukomba. Pele basankwa basyoma muli Jehova. Bati kuli Nebukadineza: ‘Leza wesu ngotukomba ulakonzya kutuvwuna. Pele nikuba kuti tako kutuvwuna, tatuko kuvwuntama kucibumbwa cako eeci cangolida.’

Aciindi aawa Nebukadineza wakalala cakuti boola ubone. Kuli bbibi lyamulilo afwiifwi, eelyo walailila kuti: ‘Bbibi lyamulilo lisoselwe ziindi zili ciloba kutegwa lipye kapati!’ Kumane waambila basikalumamba bakwe basinguzu kwaanga Syadileki, Misyeki a Abedinego akubawaala mubbibi lyamulilo. Bbibi lyamulilo lyapya kapati cakuti basinguzu mbobasikila munsi-munsi bapya akufwa. Pele ino mbuti basankwa botatwe mbobawaala mumulilo?

Mwami walanga mubbibi lyamulilo, eelyo wayoowa kapati. Wabuzya kuti: ‘Hena tiitwaanga bantu botatwe akubawaala mubbibi lyamulilo lipya kapati?’

Babelesi bakwe bavwiila kuti: ‘Inzya twabaanga!’

Mwami wati: ‘Pele ndibona bantu bone beendeenda mumulilo. Tabaangidwe alimwi mulilo tuubaumpi. Alimwi wane ulibonya mbuli kuti nkaleza. Mwami waunka afwiifwi amulyango wabbibi lyamulilo woongolola wati: ‘Syadileki! Misyeki! Abedinego! Amuzwe nobabelesi ba Leza Mupatikampatila!’

Bazwe, bantu boonse babona kuti tiibapya alimwi tiibalicisa. Kumane mwami wati: ‘Leza wa Syadileki, Misyeki a Abedinego, aatembaulwe! Watuma mungelo wakwe kubavwuna nkaambo tiibavwuntama kukomba leza uumbi kuleka buyo wabo.’

Hena eeci tacili cikozyanyo cibotu calusyomo kuli Jehova ncotweelede kuccilila?

Kulonga 20:3; Daniyeli 3:1-30.