Makani 83: Bwaanda bwa Munzi wa Jelusalemu
LANGA mulimo uucitwa aawa. Bana Isilayeli bajisi bubi kuyaka bwaanda bwamunzi wa Jelusalemu. Nebukadineza naakanyonyoona Jelusalemu kwamyaka yainda iili 152, wakausya bwaanda akuumpa milyango yamunzi. Bana Isilayeli tiibakayaka bwaanda ciindi nibakasika kuzwa ku Bbabbuloni.
Ino uyeeya kuti bantu bakalimvwa buti kukkala mumunzi kwamyaka yoonse eeyi kakutako abwaanda buzingulukide munzi wabo? Tiibakalimvwa kucingililwa pe. Basinkondonyina bakali kukonzya kunjila kubalwana kufwumbwa ciindi. Pele lino muntu ooyu Nehemiya ugwasya bantu kuyaka bwaanda bwamunzi alimwi. Hena ulimuzyi Nehemiya?
Nehemiya muna Isilayeli uuzwa mumunzi wa Susani ooko kukkala Modekayi a Esita. Nehemiya wakali kubeleka muŋanda yamwami, aboobo kweelede kuti wakali mulongwe mubotu wa Modekayi a Mwami mukaintu Esita. Pele Bbaibbele talyaambi kuti Nehemiya wakamubelekela munyokwabo Esita wazina lya Ahasuera. Pele wakabelekela Mwami Atakisesi wakaccilila mubwami.
Koyeeya kuti, Atakisesi mwami mubotu moyo wakamupa Ezara mali oonse aakuti atole ku Jelusalemu kwaakuyaka tempele lya Jehova. Pele Ezara tanaakayaka bwaanda bwakawa bwamunzi. Atubone mbuli mbocakaba kuti Nehemiya abeleke mulimo ooyu.
Kwainda myaka iili 13 kuzwa Atakisesi naakapa Ezara mali aakuyasya tempele. Nehemiya lino ngomupati wabasikumupa zyakunywa Mwami Atakisesi. Nkokuti upa mwami wani akubona kwaamba kuti taku muntu uubikkila mwami musamu muli cakulya. Ooyu mulimo uuyandika kapati.
Buzuba bumwi Hamani imunyina Nehemiya abantu bamwi kuzwa kunyika ya Isilayeli baboola kuswaya Nehemiya. Bamwaambila mapenzi bana Isilayeli ngobajisi, alimwi abwaanda bwa Jelusalemu mbobuciwide. Eeci camupa kuusa kapati Nehemiya. Aboobo wapaila kuli Jehova kujatikizya makani aaya.
Buzuba bumwi mwami wabona kuti Nehemiya uluuside, amane wamubuzya kuti: ‘Nkaambo nzi ncolibonya kuusa?’ Nehemiya wamwaambila kuti nkaambo kakuti Jelusalemu talibonyi kabotu alimwi bwaanda bwamunzi buliwide. Mwami wabuzya kuti: ‘Ino ncinzi ncoyanda?’
Nehemiya wati: ‘Leka nduunke ku Jelusalemu kutegwa nkayake bwaanda bwamunzi.’ Mwami Atakisesi ulilomenyi kapati. Wati: Nehemiya inga waunka, pele alimwi wamugwasya kugonka ziyako. Mbwaasikila Nehemiya ku Jelusalemu, wabaambila bantu muzeezo ngwajisi. Eelyo wabakonda muzeezo ooyo, aboobo bantu bati: ‘Basa atutalike kuyaka.’
Basinkondo balwana bana Isilayeli nibabona kuti bwaanda bwamunzi bwaima, eelyo bati: ‘Tulaunka tubajaye akulesya mulimo wakuyaka.’ Pele Nehemiya wamvwa makani aaya, eelyo wabapa babelesi zipeni amasumo. Amane wati: ‘Mutabayoowi basinkondoma. Amulwanine ibanyoko, bana banu, bamakaintu banu aminzi yanu.’
Bantu mbaasicamba kapati. Balilibambide azilwanyo zyabo masiku amasyikati kumwi baluujisi kuyaka. Aboobo mumazuba aali buyo 52 bwaanda bwamunzi bwamana. Lino bantu balakonzya kulimvwa kucingililwa mumunzi. Nehemiya a Ezara babayiisya bantu mulawo wa Leza, aboobo bantu bakkomana.
Pele zintu tazyicili mbuli mbozyakabede bana Isilayeli kabatanatolwa mubuzike ku Bbabbuloni. Bantu balelwa amwami waku Persia, alimwi beelede kumubelekela. Pele Jehova wasyomezya kuti uya kutumizya mwami mupya, alimwi mwami ooyu uya kuleta luumuno kubantu. Ino mwami nzi ooyu? Ino mbuti mbwakonzya kuleta luumuno anyika? Kwamyaka iili 450 yainda, taku cintu cayiigwa caamba mwami ooyu. Lino kuli kuzyalwa kwamwana kuyandika kapati. Pele aalo aayo makani nsini.
Nehemiya caandaano 1 kusikila ku 6.
Mibuzyo
- Mbuti bana Isilayeli mbobakalimvwa akaambo kakutaba abwaanda bwakazingulukide munzi wa Jelusalemu?
- Ngwani Nehemiya?
- Mulimo nzi wa Nehemiya, alimwi nkaambo nzi ncouyandika kapati?
- Makani nzi aamupa kuusa Nehemiya, alimwi ncinzi ncaacita?
- Mbuti Mwami Atakisesi mbwaatondezya luyando kuli Nehemiya?
- Mbuti Nehemiya mbwaakali bambila mulimo wakuyaka kutegwa basinkondo babana Isilayeli bataulesyi?
Mibuzyo aimwi
- Nehemiya 1:4-6 a 2:1-20.
Mbuti Nehemiya mbwaakalangaula busolozi bwa Jehova? (Neh. 2:4, 5; Balo. 12:12; 1 Pita. 4:7)
- Bala Nehemiya 3:3-5.
Ncinzi baalu abakutausi ncobakonzya kwiiya akati kaba Tekowa alimwi a “bapati babo”? (Neh. 3:5, 27; 2 Tes. 3:7-10; 1 Pita 5:5)
- Bala Nehemiya 4:1-23.
Ncinzi cakabayumya-yumya bana Isilayeli kuya ampela kuyaka nokuba kuti kwakali kukazyigwa kutaambiki? (Neh. 4:6, 8, 9; Int. 50:15; Is. 65:13, 14)
Muunzila nzi cikozyanyo cabana Isilayeli mbocituyumya-yumya mazuba aano?
- Bala Nehemiya 6:15.
Mbuti kaambo kakuti bwaanda bwamunzi wa Jelusalemu bwakamana kuyakwa mumyezi yobilo mbokatondezya nguzu zyalusyomo? (Int. 56:3, 4; Mt. 17:20; 19:26)
