Makani 100: Jesu Mumuunda
NIBAZWA muŋanda yamujulu, Jesu abaapositolo bakwe baunka kumuunda wa Getesemane. Bali kuboola kuno ziindi zinji. Jesu lino wabaambila kuti kabalanga kumwi kabapaila. Kumane waunka alamfwu-lamfwu wakotama wapaila.
Kumane Jesu wajokela nkobabede baapositolo bakwe. Ino uyeeya kuti bacita nzi? Baloona! Kwaziindi zyotatwe Jesu wabaambila kuti bataoni, pele kufwumbwa ciindi najoka ulajana baloona. Jesu naajoka wababuzya wati: ‘Mbuti mbomukonzya koona aciindi cili boobu?’ Jesu wabaambila ciindi camamanino naajoka wati: ‘Casika ciindi cakuti nditolwe kuli basinkondoma.’
Mpamunya aciindi nceena eeco, kuyobeka kwabantu banji kwamvwugwa. Langa! Bantu baboola kabajisi zipeni ankoli. Alimwi balijisi amulilo kutegwa kababona nkobaya. Basike aafwiifwi, muntu umwi wazwa munkamu wamululama Jesu. Wamumyonta mbweena mbobona waawa. Muntu ooyu ngu Judasi Isikaliyoti. Ino ncinzi ncaamumyontela Jesu?
Jesu wabuzya kuti: ‘Judasi, hena ulandaaba kwiinda mukundimyonta?’ Ee, kumyonta ncitondezyo. Cilabagwasya bantu mbocili a Judasi kuzyiba kuti ooyu ngo Jesu muntu ngobayanda. Aboobo basinkondonyina a Jesu baswena aafwiifwi kuti bamujate. Pele Pita tako kubalanga buyo kuti bamujate Jesu kakunyina kubusya nkondo. Wafwumuna mupeni ngwaakaleteezya akumugonka muntu uuli munsi lyakwe. Wamwiinzya mutwe, pele waile kukwezyula buyo kutwi kwalulyo. Pele Jesu wabweza kutwi kwamuntu ooyo akukujokezya mpokwabede.
Jesu waambila Pita kuti: ‘Jokezya mupeni muukkala. Hena tozyi kuti ndilakonzya kulomba kuli Taata zyuulu-zyuulu zyabangelo kuti bandivwune?’ Inzya Jesu ulakonzya! Pele talombi Leza kuti amutumine mungelo naba omwe, nkaambo ulizyi kuti casika ciindi cakuti basinkondonyina bamujate. Aboobo wabaleka bamujata. Atubone lino cicitika kuli Jesu.
Matayo 26:36-56; Luka 22:39-53; Johane 18:1-12.
Mibuzyo
- Nkuli Jesu abaapositolo bakwe nkobaya nibazwa muŋanda yamujulu, alimwi ncinzi ncaabaambila kuti bacite?
- Ncinzi Jesu ncaakajana naakajoka nkobakabede baapositolo, alimwi ino eeci cakacitika ziindi zyongaye?
- Mbabaani banjila mumuunda, alimwi ncinzi Judasi Isikaliyoti ncaacita kweelana acifwanikiso mbocitondezya?
- Nkaambo nzi Judasi wamumyonta Jesu, alimwi ncinzi Pita ncaacita?
- Ncinzi Jesu ncaamba kuli Pita, pele nkaambo nzi Jesu ncaatamulombela Leza kuti amutumine mungelo naba omwe?
Mibuzyo aimwi
- Bala Matayo 26:36-56.
Mbuti Jesu mbwaakabalaya basikwiiya bakwe mboili nzila mbotu kubaalu Banakristo mazuba aano? (Mt. 20:25-28; 26:40, 41; Gal. 5:17; Ef. 4:29, 31, 32)
Mbuti Jesu mbwaakacibona kubelesya panga kumuntunyina? (Mt. 26:52; Lk. 6:27, 28; Joh. 18:36)
- Bala Luka 22:39-53.
Mungelo naakasika kuli Jesu mumuunda wa Getesemane kumuyumya-yumya, hena eeci caamba kuti lusyomo lwakwe Jesu lwakali kuya ansi? Pandulula. (Lk. 22:41-43; Is. 49:8; Mt. 4:10, 11; Heb. 5:7)
- Bala Johane 18:1-12.
Mbuti Jesu mbwaakakwabilila basikwiiya bakwe kuli basikubakazya, alimwi ncinzi ncotukonzya kwiiya kucikozyanyo eeci? (Joh. 10:11, 12; 18:1, 6-9; Heb. 13:6; Jak. 2:25)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Wapaila Kapengede Kapati Mumoyo
Nkaambo nzi Jesu ncaapaila kuti: “Koigusya nkapu eeyi kulindime”? Sena nkokuti uyanda kutija mukuli ngwajisi wakufwa kali cinunuzyo?
JESU—NENZILA, NGOKASIMPE, MBOBUUMI
Kristo Waabwa Alimwi Akwaangwa
Judasi wacikonzya kumujana Jesu nokuba kuti mpaakati kabusiku.
