Cibeela 7: Kubusyigwa kwa Jesu Kusikila Kukwaangwa kwa Paulu
Mubuzuba bwatatu kafwide, Jesu wakabusyigwa. Mubuzuba oobo wakalibonya kuli basikwiiya bakwe ziindi zili musanu. Jesu wakazumanana kulibonya kuli mbabo kwamazuba aali 40. Kumane basikwiiya bakwe bamwi kabalangilila, Jesu wakaunka kujulu. Kwiinde mazuba aali kkumi, Leza wakatila muuya uusalala kuli basikwiiya ba Jesu bakali kulindila mu Jelusalemu.
Kumpela, basinkondonyina a Leza bakabikka baapositolo muntolongo, pele mungelo wakabaangulula. Sikwiiya Sitivini wakapwaigwa mabwe abasikumukazya. Pele tulaiya Jesu mbwaakasala umwi wabasikukazya kuba mubelesi uuyandwa kapati, alimwi wakaba mwaapositolo Paulu. Kwiinde myaka yotatwe acisela kuzwa Jesu naakafwa, Leza wakatuma mwaapositolo Pita kukambaukila Koneliyo amukwasyi wakwe watakali mu Juda.
Nokwakainda myaka iitandila ku 13, Paulu wakatalika lweendo lwakwe lwakutaanguna lwakukambauka. Mulweendo lwakwe lwabili Timoti bakaunka limwi a Paulu. Tulaiya Paulu asilweendonyina mbobakaba aziindi zinji zikkomanisya mukubelekela Leza. Kumamanino, Paulu wakaangwa akubikkwa muntolongo mu Loma. Kwiinde myaka yobilo wakaangululwa, pele alimwi wakaangwa akujaigwa. Izintu zyakacitika mu CIBEELA 7 zyakatola myaka iibalilwa kuma 32.
