Makani 116: Mbotukonzya Kupona Kukabe Akutamani
HENA ulakonzya kulizyiba bbuku ndyabala mwana ooyu alimwi amweenzyinyina? Ndibbuku ndyeena eeli ndyobala lyakuti: Bbuku Lyangu lya Makani Aamu Bbaibbele. Alimwi babala makani ngeena ngobala aakuti: “Mbotukonzya Kupona Kukabe Akutamani.”
Hena ulicizyi ncibaiya? Cakutaanguna tweelede kumuzyiba Jehova a Mwana wakwe Jesu ikuti katuyanda kupona kukabe akutamani. Ibbaibbele lyaamba kuti: ‘Mboobu mbomukonzya kupona kukabe akutamani. Amwiiye Leza mwini-mwini alikke a Mwana ngwaakatuma anyika, Jesu Kristo.’
Ino mbuti mbotukonzya kwiiya Jehova Leza a Mwana wakwe Jesu? Inzila iimwi nkubala Bbuku Lyangu lya Makani Aamu Bbaibbele kuzwa kumatalikilo kusikila kumamanino. Lilamwaamba kapati Jehova a Jesu, hena tabusyi? Alimwi lilaamba zintu zinji zibakacita azyeezyo zibaya kucita kumpela. Pele kuyandika kucita zinji ikutali buyo kubala bbuku eeli.
Hena walibona bbuku alimbi lili waawa? Ndi Bbaibbele. Leka umwi akubalile zibeela zyamu Bbaibbele kwalo makani aabbuku eeli nkwaakajanwa. Ibbaibbele lilatwaambila makani oonse ngotuyanda kutegwa toonse tukonzye kumubelekela Jehova munzila mbotu akujana buumi butamani. Aboobo tweelede kuba acilengwa cakubala Bbaibbele alimwi akuliiya.
Pele kwiile kwiiya buyo Jehova Leza a Jesu Kristo takali nkakaambo kalikke kayandika. Tulakonzya kuba aluzyibo lunji kapati lwakuzyiba mbabo akuyiisya kwabo, pele kakunyina akujana buumi butamani. Hena ulicizyi acimwi ciyandika?
Alimwi tweelede kupona kweelana azintu nzyotwiiya. Hena ulamuyeeya Judasi Isikaliyoti? Wakali umwi wabaabo bali 12 Jesu mbaakasala kuba baapositolo bakwe. Judasi wakalijisi luzyibo lunji lwakuzyiba Jehova a Jesu. Pele ino ncinzi cakacitika kuli nguwe? Kwiinde mazuba, wakatalika kulisumpula alimwi wakamwaaba Jesu kuli basinkondonyina amali aansiliva aali 30. Aboobo Judasi takatambuli buumi butamani.
Hena uli muyeeyede Gehazi, muntu ngotwakaiya mu Makani 69? Wakali kunyonekela zisani amali zintu zyatakali zyaakwe. Aboobo wakabelesya mpyata kubweza zintu eezyi. Pele Jehova wakamujaya. Alimwi uya kutunyonyoona andiswe ikuti katutaccilili milawo yakwe.
Pele kuli bantu abamwi banji bali kabotu bakamubelekela lyoonse Jehova cakusyomeka. Tuyanda kuti tube mbuli mbabo, tee mbombubo? Imwana Samuyele ncikozyanyo cibotu cakwiiya. Koyeeya mbuli mbotwakabona mu Makani 55, wakajisi buyo myaka iili yone naa osanwe naakatalika kubelekela Jehova acikombelo. Aboobo kufwumbwa naa uli muniini buti, toli muniini kapati cakuti tokonzyi kubelekela Jehova.
Inzya, imuntu ngotuyanda toonse kuccilila ngu Jesu Kristo. Kufwumbwa naakacili muniini mbuli mbwaatondezya Makani 87, wakali kujanika mutempele kaambaula kubantu makani aamba zyaba Wisi bakujulu. Aboobo atuccilile cikozyanyo cakwe. Atwaambile bantu banji mbuli mbotukonzya kujatikizya bubotu bwa Jehova Leza a Mwana wakwe Jesu Kristo. Ikuti twacita zintu eezyi, nkokuti tuya kukonzya kupona kukabe akutamani mupaladaiso mpya ya Leza ano anyika.
Johane 17:3; Intembauzyo 145:1-21.
Mibuzyo
- Ncinzi ncotweelede kuzyiba kutegwa tukakonzye kupona kukabe akutamani?
- Mbuti mbotukonzya kumwiiya Jehova Leza a Jesu kweelana ambokwatondezyegwa acifwanikiso camwana musimbi alimwi abeenzyinyina?
- Ndibbuku nzi limwi ndobona acifwanikiso, alimwi nkaambo nzi ncotweelede kulibala ciindi aciindi?
- Kunze lyakwiile kwiiya buyo Jehova alimwi a Jesu, ncinzi acimwi ciyandika kutegwa tujane buumi butamani?
- Nciiyo nzi ncotwiiya mu Makani 69?
- Ino cikozyanyo cibotu camwana Samuyele mu Makani 55 citondezya nzi?
- Mbuti mbotukonzya kuccilila cikozyanyo ca Jesu Kristo, alimwi naa twaccilila, ncinzi ncotuya kukonzya kucita kumpela?
Mibuzyo aimwi
- Bala Johane 17:3.
Mbuti Magwalo mbwaatondezya kuti, ikuzyiba Jehova Leza a Jesu Kristo takuli buyo kwiile kuzyiba twaambo akutubikka mumoyo? (Mt. 7:21; Jak. 2:18-20; 1 Joh. 2:17)
- Bala Intembauzyo 145:1-21.
Ntwaambo nzi ntotujisi ntotumutembauda Jehova? (Int. 145:8-11; Ciy. 4:11)
Mbuti Jehova mbwali “mubotu kuliboonse,” alimwi mbuti eeci mboceelede kutuswenya kuli nguwe? (Int. 145:9; Mt. 5:43-45)
Ikuti katumuyanda ncobeni Jehova, ncinzi ncotuya kuyandisyisya kucita? (Int. 119:171, 172, 175; 145:11, 12, 21)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Nenzila, Ngokasimpe, Mbobuumi
Njiisyo alimwi amicito ya Jesu, izijanika mumabbuku aa Makani Mabotu, zilakonzya kubucinca buumi bwanu.
NGAZI YAMULINDIZI
Jesu Wakaiya Kumvwida
ZIBALO ZIGWASYA KWIIYA
Ino Leza Ujisi Makanze Nzi Kujatikizya Nyika? (Cibeela 1)
Sena akali makanze aakwe aakuti zintu kazili mbozibede sunu?
