Ziindi zimwi, tulakonzya kulibilika kapati akaambo kamapenzi alimwi abuyumuyumu mubuumi bwesu cakuti tulatyompwa, alimwi cilatuyumina kuti tuzumanane. Nokuba boobo, muziindi zili boobo, tulakonzya kuyumizyigwa ikuti twazinzibala kuyeeya bupanduluzi bulimvwisya ibuli mucilengaano ca Ezekieli cakubukulusya. Ino nkaambo nzi? Tulakonzya kwiiya kubusinsimi oobu kuti Leza ooyo uujisi nguzu zyakufwulida buumi mumafwuwa aafwide ulakonzya kutupa nguzu nzyotuyandika kutegwa tuzunde mapenzi, nkokuti naaba yaayo bantu ngobabona kuti taakonzyi kumana.—Amubale Intembauzyo 18:29; Flp. 4:13.

Tulakonzya kuyeeya kuti myaanda yamyaka minji kacitanasika ciindi ncaakapona Ezekieli, musinsimi Musa wakaamba kuti Jehova ulijisi, ikutali buyo nguzu pele alimwi aluyandisisyo lwakubelesya nguzu zyakwe kubantu bakwe. Musa wakalemba kuti: “Leza mayubilo kuzwa kaindi, maanza aakwe aatamani ali kunsi lyako.” (Dt. 33:27) Inzya, tulakonzya kuba masimpe kuti, ikuti naa twamusikila Leza wesu muziindi zyamapenzi, Jehova uyoobikka maanza aakwe aatondezya kubikkila maano kunsi lyesu, kutunyamuna kabotu-kabotu, akutugwasya kuti twiimikile alimwi.—Ezk. 37:10.