1, 2. (a) Mbumboni nzi butondezya kuti Mwami wesu wali kulela kuzwa mu 1914? (b) Ncinzi ncotutiilange-lange mucibalo eeci?

EELO kaka cali cintu ciyumya lusyomo kapati kulanga-langa zintu Bwami bwa Leza nzyobwazuzikizya akati kabasinkondo ba Bwami. (Int. 110:2) Mwami wesu wabikka nkamu mpati yabakambausi balyaabide. Wabasalazya basikumutobela kumuuya alimwi amukulilemeka. Alimwi nokuba kuti basinkondo ba Bwami basoleka kutwaandaanya, tulikamantene alimwi tulikkomene nyika yoonse mbwiizulwa mazuba aano. Zintu eezyi alimwi azimbi nzyotwalanga-langa nzyobwazuzikizya Bwami mbumboni butazumbauzyigwi bwakuti kuzwa mu 1914, Mwami wesu wali kulela akati kabasinkondo ba Bwami.

² Bwami buyakucita zintu azimbi zinji zigambya caino-ino kumbele. ‘Buyakuboola kupwayaula akumanisya’ basinkondo bambubo. (Mt. 6:10; Dan. 2:44) Pele kacitanasika ciindi eeco, kuli zintu zimwi zipati izyeelede kucitika. Ino nzintu nzi eezyo? Businsimi buli mbobubede bwamu Bbaibbele bulawiingula mubuzyo ooyu. Atulange-lange businsimi bumwi kutegwa tubone zintu zilangilwa kucitika ambele aawa.

3. Ncintu nzi cakusaanguna ncotulangila kucitika?

³ Kwaambilizyigwa kwaluumuno. Naakalembela bana Tesalonika, mwaapostolo Paulo wakaamba cintu cimwi cakusaanguna ncotulindila kuti cicitike. (Amubale 1 Batesalonika 5:2, 3.) Mulugwalo oolu, Paulo wakaamba kujatikizya “buzuba bwa Jehova,” bwalo ibuyakutalika akunyonyoonwa kwa “Babuloni Mupati.” (Ciy. 17:5) Nokuba boobo, kabutanatalika buyo buzuba bwa Jehova, zisi zinakwaamba kuti “Luumuno akuliiba!” Majwi aaya alakonzya kwaamba kwaambilizya buyo ciindi comwe naa kwaambilizya kutobelene kwaziindi zili mbozibede. Sena basololi bazikombelo bayakujatikizyigwa? Mbwaanga abalo ncibeela canyika, kulangilwa kuti bayakuzisangana zisi mukwaamba kuti “Muli aluumuno!” (Jer. 6:14; 23:16, 17; Ciy. 17:1, 2) Kwaambilizyigwa kwaluumuno akuliiba ooku kuyakutondezya kuti buzuba bwa Jehova buli afwaafwi  kusika. Basinkondo ba Bwami bwa Leza “tabakafwutuki abuniini pe.”

4. Ino tugwasyigwa buti akaambo kakumvwisya ncobwaamba businsimi bwa Paulo bujatikizya kwaambilizyigwa kwaluumuno akuliiba?

⁴ Ino tugwasyigwa buti akaambo kakumvwisya businsimi oobu buyandika kapati? Paulo wakaamba kuti: “Tamuli mumudima pe, kuti buzuba oobo bukamusikile cakutayeeyela mbuli mbobukonzya kusikila babbi.” (1 Te. 5:3, 4) Tuliindene abantu buyo, nkaambo tulizyi nkozisololela zintu eezyi zicitika mazuba aano. Ino muunzila nzi iilimvwisya mobuyakuzuzikizyigwa businsimi oobu bujatikizya luumuno alimwi akuliiba? Tweelede kulindila akubona iziyakucitika. Aboobo, “atupakamane akubatama.”—1 Te. 5:6; Zef. 3:8.

5. Ncinzi ciyakuba matalikilo ‘aamapenzi mapati’?

⁵ Kunyonyoonwa kwabukombi. Mutalubi kuti Paulo wakalemba kuti: “Kufwumbwa leelyo banooamba kuti: ‘Luumuno akuliiba!’ Aciindi nciconya eeco lunyonyooko luyoobasikila cakufwambaana.” Mbubwenya buyo mbuli mumuni wakalabo cakufwambaana mboutobelwa akuzuma kupati, acalo ciindi cakwaamba kuti “Luumuno akuliiba,” ciyootobelwa “alunyonyooko iluyoobasikila cakufwambaana.” Ncinzi ciyakunyonyoonwa? Cakusaanguna ngu “Babuloni Mupati,” bukombi bwakubeja bwanyika yoonse, alimwi iwiitwa kuti ‘muvwuule.’ (Ciy. 17:5, 6, 15) Kunyonyoonwa ooku kwa Bunakristo Bwanyika alimwi atubunga toonse twabukombi bwakubeja, ayakuba matalikilo ‘aamapenzi mapati.’ (Mt. 24:21; 2 Te. 2:8) Bantu banji bayakugambwa caakucitika eeci. Ino nkaambo nzi? Nkaambo kusikila ciindi eeco, muvwuule unakulibona kuba “mwami mukaintu” walo ‘uutakoomoki kulila.’ Pele cakutayeeyela alimwi cakufwambaana uyakubona kuti lusyomo lwakwe lwakalilubide. Uyakugwisyigwa cakufwambaana, mbuli kuti “mubuzuba bomwe buyo.”—Ciy. 18:7, 8.

6. Ino mbaani naa ncinzi iciyakunyonyoona “Babuloni Mupati”?

⁶ Ino mbaani naa ncinzi iciyakunyonyoona “Babuloni Mupati”? ‘Ncinyama’ icijisi “meja aali kkumi.” Bbuku lya Ciyubunuzyo litondezya kuti cinyama eeci ciiminina mbunga ya United Nations (Lukamantano Lwazisi). Meja aali kkumi aiminina malelo aayendelezya nyika aatwaambo twacisi alo aagwasyilizya ‘cinyama cisalala pyu.’ (Ciy. 17:3, 5, 11, 12) Ino lunyonyooko lunakuli lupati buti? Masi aapanga mbunga ya Lukamantano Lwazisi ayakulunyonyoona lubono lwamuvwuule, kumulya, mpoonya “akumuumpa amulilo mane akalote.”—Amubale Ciyubunuzyo 17:16. *

7. Mbuti majwi aa Jesu aajanika mulugwalo lwa Matayo 24:21, 22 mbwaakazuzikizyigwa mumwaanda wamyaka wakusaanguna C.E., alimwi ino ayakuzuzikizyigwa buti kumbele?

⁷ Kufwiinsyigwa kwamazuba. Mwami wesu wakayubununa iciyakucitika aciindi eeci lyamapenzi mapati. Jesu wakaamba kuti: “Akaambo kabasale imazuba aayo ayoofwiinsyigwa.” (Amubale Matayo 24:21, 22.) Majwi aa Jesu akazuzikizyigwa munzila nsyoonto mu 66 C.E. ciindi Jehova ‘nakafwiinsya’ kulwanwa kwa Jerusalemu abasikalumamba bana Roma.  (Mk. 13:20) Eeci cakapa kuti Banakristo ibakali mu Jerusalemu amu Judaya bafwutuke. Pele ino ncinzi ciyakucitika munyika yoonse lyamapenzi mapati? Kwiinda mu Mwami wesu, Jehova ‘uyakufwiinsya’ kulwanwa kwabukombi ikuyakucitwa ambunga ya Lukamantano Lwazisi kutegwa bakombi bakasimpe batakanyonyoonwi antoomwe abukombi bwakubeja. Aboobo, nokuba kuti mbunga zyabukombi bwakubeja zyoonse ziyakunyonyoonwa, bakombi bakasimpe bayakufwutuka. (Int. 96:5) Aboobo, lino atulange-lange zintu iziyakucitika cakwiinda cibeela eeci camapenzi mapati.

8, 9. Ino Jesu wakali kwaamba nzi ciindi naakali kwaamba kujatikizya zilenge zyakujulu, alimwi ino bantu bayakucita buti kujatikizya zintu nzyobayakubona?

⁸ Businsimi bwa Jesu ibujatikizya mazuba aamamanino butondezya kuti kuli zintu zipati-pati izilimbozibede iziyakucitika kuciindi eeco iziyakusololela ku Amagedoni. Zintu zyobilo zyakusaanguna nzyotutiilange-lange zilaambidwe mu Mabbuku aa Makani Mabotu aa Matayo, Maako, alimwi a Luka.—Amubale Matayo 24:29-31; Mk. 13:23-27; Lk. 21:25-28.

⁹ Zintu zijatikizya zilenge zyakujulu. Jesu wakasinsima kuti: “Izuba liyoosizyigwa amwezi taukamuniki alimwi nyenyeezi ziyooloka kuzwa kujulu.” Bwini mbwakuti, taakwe bantu bayakulanga kubasololi bazikombelo kuti babasololele—bantu tabacinoobaboni kuba basololi. Sena Jesu alimwi wakali kwaamba kujatikizya zintu zigambya iziyakulibonya kujulu? Ambweni. (Is. 13:9-11; Joel 2:1, 30, 31) Ino bantu bayakucita buti baakubona zintu eezyo iziyakucitika? ‘Bayoopenga’ akaambo ‘kakubula cakucita.’ (Lk. 21:25; Zef. 1:17) Inzya, basinkondo ba Bwami bwa Leza—kutalikila ‘kubami kusikila kubazike’—“bayoonetuka akaambo kakuyoowa akulibilika zyintu zilangilwa kucitika” alimwi bayakutalika kuyandaula kwakuyubila. Pele taakwe nobayakujana busena ibukonzya kubakwabilila kuzwa kubukali bwa Mwami wesu.—Lk. 21:26; 23:30; Ciy. 6:15-17.

10. Ndubeta nzi Jesu ndwayakwaambilizya, alimwi ncinzi basikugwasyilizya alimwi abasikukazya Bwami bwa Leza ncobayakucita?

¹⁰ Lubeta. Basinkondo ba Bwami bwa Leza boonse bayakulibonena cintu cimwi ciyakucitika calo iciyakupa kuti banyongane naa bapenge kapati. Jesu wakaamba kuti: “Bayoobona Mwana wamuntu kaboola mumakumbi kajisi nguzu zinji abulemu.” (Mk. 13:26) Zitondezyo zyanguzu zipati eezyi ziyakutondezya kuti Jesu waboola kuzoobeteka. Mucibeela acimbi cabusinsimi oobu bujatikizya mazuba aamamanino, Jesu waamba twaambo atumbi tujatikizya lubeta iluyoocitika aciindi eeci. Makani aaya tulaajana mucikozyanyo cambelele ampongo. (Amubale Matayo 25:31-33, 46.) Basikugwasyilizya basyomeka ba Bwami bwa Leza bayakubetekwa kuba “mbelele” alimwi ‘bayakulungumana,’ akaambo kakuzyiba kuti ‘lufwutuko lwabo lwaswena afwaafwi.’ (Lk. 21:28) Nokuba boobo, basikukazya Bwami bayakubetekwa kuba “mpongo” alimwi “bayoolyuuma  acamba akulila” akaambo kakuzyiba kuti balindila ‘kunyonyoonwa kukabe kutamani.’—Mt. 24:30; Ciy. 1:7.

11. Ncinzi ncotweelede kuyeeya ciindi notulanga-langa zintu ziboola kumbele?

¹¹ Jesu aakumana kubeteka “masi oonse,” kunakucili zintu zimwi zipati ziyakucitika kaitanatalika nkondo ya Amagedoni. (Mt. 25:32) Tulalanga-langa zintu zyobilo akati kazyeezyi: kunyonyoonwa kwa Gogo alimwi akubunganya bananike. Notulanga-langa zintu eezyi zyobilo, tweelede kuzyiba kuti Jwi lya Leza taliyubununi ciindi cini noziyakucitika. Alimwi buya, kuboneka kuti cintu cimwi iciyakucitika ciyakucitikila antoomwe acintu cimbi kwaciindi cili mbocibede.

12. Ino Saatani uyakubulwana buti Bwami?

¹² Kulwanwa. Gogo wa Magogo uyakulwana bananike basyeede alimwi abeenzinyina bambelele zimbi. (Amubale Ezekieli 38:2, 11.) Kulwanwa ooku kwa Bwami bulela kuyakuba kulwana kwa Saatani kwamamanino munkondo njaali kulwana bananike kuzwa ciindi naakatandwa kujulu. (Ciy. 12:7-9, 17) Kwaambisya kuzwa ciindi bananike nobakatalika kuyobololwa mumbungano ya Banakristo, Saatani wasola kulwana kuzwidilila kwabo kumuuya—pele tanaazwidilila pe. (Mt. 13:30) Nokuba boobo, aciindi bukombi ambunga zyabukombi bwakubeja zyaakunyonyoonwa alimwi bantu ba Leza kabalibonya kuti tabakwabilidwe ‘amalambo naaba mankolo neziba zitendele,’ Saatani uyakucibona kuba coolwe cibotu kapati. Uyakuyunga impi zyakwe zibyaabi kuti zinyonyoone basikugwasyilizya Bwami.

13. Mbuti Jehova mbwayakukwabilila bantu bakwe?

¹³ Ezekieli ulaamba ciyakucitika. Kujatikizya Gogo, businsimi bwaamba kuti: ‘Uyakuboola kuzwa kucisi cako cakumagolelo aakunyika, yebo abantu banji mboli abo, boonse balitantide ambizi, makamu makamu aabantu, impi impati loko. Uyoosika kukulwisya bantu bangu mbuli ijoba livumba nyika.’ (Ezk. 38:15, 16) Ino Jehova uyakucita buti kukulwanwa ooku kulibonya mbuli kuti inga tiikwakazyigwa? Jehova waamba kuti: “Bukali bwangu buyoobuka.” Mpoonya wakati “njoomuletela ziyoosyo zyamisyobo misyobo.” (Ezk. 38:18, 21; amubale Zekariya 2:8.) Jehova uyakubweza ntaamu kutegwa akwabilile babelesi bakwe anyika. Ntaamu eeyi njayakubweza yaamba nkondo ya Amagedoni.

14, 15. Nzintu nzi zimwi iziyakucitika aciindi cimwi Saatani aakutalika kulwana?

¹⁴ Katutanazumanana kulanga-langa Jehova mbwayakubavwuna bantu bakwe lyankondo ya Amagedoni, atwiime asyoonto akulanga-langa cintu acimbi cipati iciyakucitika. Eeci cintu ciyakucitika akati kamatalikilo aakulwanwa kwababelesi ba Leza aa Saatani alimwi akumatalikilo aantaamu njayakubweza Jehova lya Amagedoni. Mbubwenya mbokwaambwa mumuncali 11, cintu eeci cabili iciyakucitika nkubunganya ciinga cabananike basyeede.

¹⁵ Kubunganizyigwa kwabananike. Mubbuku lya Matayo alimwi a Maako kulembedwe ncaakaamba Jesu kujatikizya  “basale”—Banakristo bananikidwe amuuya—kuti ncibeela cazintu iziyakucitika kaitanatalika nkondo ya Amagedoni. (Amubone muncali 7.) Kalyaamba lwakwe mwini kujatikizya ciindi aakuba Mwami, Jesu wakasinsima kuti: “Aboobo uyootuma bangelo alimwi bayoobunganya basale bakwe antoomwe kuzwa kumbazu zyone, kuzwa kumagolelo aanyika kusikila kumagolelo aajulu.” (Mk. 13:27; Mt. 24:31) Nkubunganya kuli buti Jesu nkwaamba? Taambi kujatikizya kugantwa kwamamanino kwa Banakristo bananike basyeede, kwalo ikuyakucitika kaatanatalika mapenzi mapati. (Ciy. 7:1-3) Muciindi caboobo, Jesu waamba cintu ciyakucitika ciindi camapenzi mapati. Aboobo, kuboneka kuti aciindi cimwi Saatani aakutalika kulwana bantu ba Leza, bananike ibanakucili anyika bayakutolwa kujulu.

16. Ino bananike ibanakuli babusyigwa kale aciindi eeco banakujisi lubazu nzi munkondo ya Amagedoni?

¹⁶ Mbuti kubunganizyigwa kwabananike basyeede mbokucijatikizya cintu ciyakutobela kucitika, nkokuti nkondo ya Amagedoni? Ciindi cakubunganya citondezya kuti bananike boonse banakuli kujulu kaitanatalika nkondo ya Leza ya Amagedoni. Kujulu, iba 144,000 basikulelanyina a Kristo bayakupegwa nguzu zyakubelesya “nkoli yabutale” antoomwe a Jesu kunyonyoona basinkondo ba Bwami bwa Leza. (Ciy. 2:26, 27) Kuzwa waawo, bananike kabali babusyigwa kale aciindi eeco, antoomwe abangelo basinguzu, bayakutobela Kristo, Mwami Sikalumamba, aakwiilwana “impi impati loko” yabasinkondonyina iilwana bantu ba Jehova bakamantene kutegwa abakwabilile kuli sinkondonyina. (Ezk. 38:15) Ntaamu eeyi yaakubwezegwa, nkondo ya Amagedoni iyakutalika!—Ciy. 16:16.

17. Ncinzi ciyakucitikila “mpongo” lyankondo ya Amagedoni?

¹⁷ Kunyonyoona basizibi. Nkondo ya Amagedoni iyakuba cibeela camamanino camapenzi mapati. Aciindi eeco, Jesu uyakubeleka mulimo aumbi. Kunze lyakuba Mubetesi ‘wamasi oonse,’ uyakuba Sikunyonyoona masi—nkokuti, bantu boonse mbaakabeteka kuba “mpongo” musyule. (Mt. 25:32, 33) Mwami wesu ‘uyakwaawuma masi’ ‘apanga damfwu libosya.’ Inzya, boonse ibali mbuli mpongo—kutalikila ‘kubami’ kusikila ‘kubazike’—“bayoonyonyoonwa kukabe kutamani.”—Ciy. 19:15, 18; Mt. 25:46.

18. (a) Ino zintu ziyakucinca buti kujatikizya “mbelele”? (b) Mbuti Jesu mbwayakumaninizya kuzunda?

¹⁸ Eelo kaka zintu ziyakucinca akubabotela aabo ibayakubetekwa a Jesu kuba “mbelele!” Muciindi cakunyonyoonwa ampi mpati loko ya Saatani ‘yampongo,’ ‘bankamu mpati’ ibakali kulibonya mbuli kuti ‘nimbelele’ zitakwabilidwe bayakufwutuka kukulwanwa aasinkondo alimwi ‘bayakuzwa mumapenzi mapati.’ (Ciy. 7:9, 14) Mpoonya, Jesu aakumana kuzunda akugwisya basinkondo ba Bwami bwa Leza uyakwaanga Saatani amadaimona aakwe akubasowela mumulindi uutagoli. Mumulindi oomo bayakuba mbuli kuti balifwide, tabakacikonzyi kucita  cintu cilicoonse kwamyaka iili 1,000.—Amubale Ciyubunuzyo 6:2; 20:1-3.

19, 20. Mbuti mbotukonzya kutobela majwi aajanika mubbuku lya Isaya 26:20 alimwi a 30:21?

¹⁹ Mbuti mbotukonzya kulibambila zintu ziboola kumbele iziyakuzungaanya nyika? Myaka iili mbwiibede yainda, Ngazi Yamulindizi imwi yakaamba kuti: ‘Lufwutuko lunooyeeme aakutobela zintu ziyandika.’ Ino nkaambo nzi ncocili boobo? Bwiinguzi bulajanika mumajwi aakucenjezya Jehova ngakaambila ba Juda ibakali mubuzike mu Babuloni yansiku. Jehova wakaambila limwi kuti Babuloni wakali kuyakuzundwa, pele ino bantu ba Leza bakeelede kucita nzi kulibambila cintu eeci icakali kuyakucitika? Jehova wakaamba kuti: “Amuboole nubantu bangu, munjile mumaanda aanu aamukati, mulijalile milyango yako, muyube kaindi kaniini, mane bukali bukamane.” (Is. 26:20) Amubone mabala aakuti: “amuboole,” “munjile,” “mulijalile,” “muyube”—oonse malailile aamba cintu ciyandika kapati iceelede kucitwa. Ba Juda ibakamvwida malailile aaya bakali kuyakukkala mumaanda aabo, kule abasikalumamba basikusaala ibakali kweenda mumigwagwa. Aboobo, lufwutuko lwabo lwakayeeme aakumvwida malailile aa Jehova. *

²⁰ Nciiyo nzi ncotwiiya kuzwa kumakani aaya? Mbubwenya mbocakabede kubabelesi ba Leza kaindi, lufwutuko lwesu kuzintu ziboola lunakuyeeme aakumvwida malailile aa Jehova. (Is. 30:21) Malailile aali boobo tulaatambula kwiinda mumbungano. Aboobo, tuyanda kuba bantu bamvwida busolozi mbotutambula kuzwa ansi aamoyo. (1 Jo. 5:3) Ikuti twacita oobo mazuba aano, tuyakuba bantu balibambilide kumvwida kumbele, mpoonya akukwabililwa a Taateesu, Jehova, alimwi a Mwami wesu Jesu. (Zef. 2:3) Kukwabililwa kumuuya ooko kuyakutupa kuti tukalibonene ameso Bwami bwa Leza mbobuyakugwisya basinkondo cakumaninina. Eelo kaka eeco ciyakuba cintu ncotutakalubi!