1. Ncinzi ncaakabona Ezekieli icitupa kugambwa akuyoowa?

MBUTI kuti mwacitikilwa cintu mbuli cakacitikila musinsimi Ezekieli myaanda yamyaka iili 25 yainda? Amweezyeezye kuti muli mubukkale buli boobu: Mwasika kutempele lipati, liŋaima alimwi ligambya. Mungelo singuzu nkwali kutegwa amutondezye busena oobu bugambya akuyoosya! Mwakkwela kubelesya matantilo ntaamu zili ciloba kuya mujulu kumulyango umwi wamilyango yotatwe yatempele. Milyango eeyi yamuyoosya kapati. Milyango eeyi ilampa mamita aasika ku 30 kuyamujulu. Kamucili munzila yamilyango eeyi, mwabona kuti kuli twaanda twabalindizi. Misemu iili mukati iboneka mbuli tusamu twatukunka tweebeka.—Ezk. 40:1-4, 10, 14, 16, 22; 41:20.

2. (a) Ino tempele lyamucilengaano liiminina nzi? (Amubone amajwi aamunsi.) (b) Ncinzi ncotukonzya kwiiya notulanga mboyakabede milyango yatempele?

² Eeci ncilengaano catempele lyakumuuya. Ezekieli wakalipandulula kabotu-kabotu tempele eeli cakuti nzyaakalemba kujatikizya ndilyo zitalikila mucaandaano 40 kusikila mucaandaano 48 cabbuku lyakwe lyabusinsimi. Tempele eeli liiminina bubambe bwa Jehova bwabukombi busalala. Cibeela cimwi acimwi kuli ncociiminina mubukombi bwesu mumazuba aano aakumamanino. * Ino milyango eeyi milamfwu yiiminina nzi? Milyango eeyi ituyeezya kuti aabo ibanjila mububambe bwabukombi busalala beelede kupona kweelana azyeelelo zya Leza ziluleme alimwi zisumpukide. Azyalo zisamu zyatukunka zibezedwe kabotu zilakatondezya kaambo nkamunya aaka, nkaambo tukunka zimwi ziindi tulabelesyegwa mu Bbaibbele kwiiminina kululama. (Int. 92:12) Mbuti kujatikizya twaanda twabalindizi? Cilisalede kuti, aabo baalilwa kutobela zyeelelo zya Leza, tabazumizyigwi kunjila munzila eeyi mbotu iipa buumi yabukombi busalala.—Ezk. 44:9.

3. Nkaambo nzi basikutobela Kristo ncobali kuyandika kuzumanana kusalazyigwa?

³ Mbuti mbocazuzikizyigwa cilengaano ca Ezekieli? Mbubwenya mbotwakabona mu Cibalo 2 cabbuku eeli, Jehova wakabelesya Kristo kusalazya bantu bakwe kuzwa mumwaka wa 1914 kusikila kumatalikilo aamwaka wa 1919. Sena mulimo wakusalazya wakamana mpoonya aawo? Peepe! Mumyaka iili 100 yainda, Kristo wazumanana kusumpula zyeelelo zya Jehova zisalala izijatikizya kulilemeka. Aboobo, basikumutobela bali kuyandika kuzumanana kusalazyigwa. Ino nkaambo nzi? Nkaambo Kristo wali kubunganya basikumutobela kuzwa munyika eeyi iinyongene  bantu mobatalilemeki alimwi Saatani taleki kukwela bantu kuti banjile mubukkale bukatazya bwakutalilemeka. (Amubale 2 Petulo 2:20-22.) Lino atulange-lange mbazu zyotatwe mwalo Banakristo mobali kuyaabusalazyigwa kabotu-kabotu. Cakusaanguna, tulalanga-langa mbobasalazyigwa mukulilemeka, mpoonya bubambe buyandika kapati bwakusalazya mbungano alimwi camamanino, bubambe bwamumukwasyi.

4, 5. Ninzila nzi yabucenjezu njaalikubelesya Saatani kuzwa kaindi, alimwi ino wazwidilila buti?

⁴ Bantu ba Jehova lyoonse balikwaabikkila maano makani aakulilemeka, kuba aabukkale bululeme. Nkakaambo kaako balaatambula malailile ngobapegwa aajatikizya makani aaya alo aazumanana kupandululwa munzila iilimvwisya. Atulange-lange zikozyanyo zisyoonto buyo.

⁵ Bwaamu. Jehova wakabikka bubambe bwakoonana akati kabantu bakwetene kuti kakusalala alimwi kakukkomanisya kapati. Saatani ulakkomana kunyonganya cipego eeci citaliboteli kwiinda mukupa kuti kaciboneka kuba cintu citasalede alimwi akucibelesya kusunka bantu ba Jehova kutegwa banyonganye cilongwe cabo a Leza. Saatani wakazwidilila naakaibelesya nzila eeyi cabucenjezu mumazuba aa Balamu, alimwi kwiinda kaindi ulaibelesya mumazuba aano aakumamanino.—My. 25:1-3, 9; Ciy. 2:14.

6. Ncikonke nzi cakali kumwaigwa mu Ngazi Yamulindizi, ino cakali kubelesyegwa buti, alimwi nkaambo nzi ncobakalekela kucibelesya? (Amubone amajwi aamunsi.)

⁶ Kutegwa sunko lya Saatani lilwanwe, Ngazi Yamulindizi yamu Chingisi ya June 15, 1908, yakabikkilizya cikonke eeci icakali kwaamba kuti: “Ciindi coonse alimwi kufwumbwa kubusena nkondibede, ndinakulilemeka kabotu kubantu mbotwiindene zizo notuli tolikke mubusena busisikide mbubwenya mbondikonzya kulilemeka kuti kandili ambabo kubuleya.” * Nokuba kuti cikonke eeci tiicakali ceelelo pe, banji cakuliyandila bakatuma mazina aabo kuti alembwe mumagazini ya Zion’s Watch Tower. Nokwakainda myaka, cakalibonya kuti nokuba kuti cikonke eeci cakabagwasya banji muciindi eeco, cakazikuba buyo mbuli cilengwa, aboobo bakaleka kucibelesya. Nokuba boobo, zyeelelo zyakulilemeka zisumpukide nzyocakali kwiiminina zyakali kutobelwa lyoonse.

7. Ino magazini ya Ngazi Yamulindizi yakalanganya penzi nzi mumwaka wa 1935, alimwi nceelelo nzi cakakankaizyigwa?

⁷ Kulwanwa a Saatani kwakaindila. Magazini ya Ngazi Yamulindizi yamu Chingisi ya March 1, 1935, cakutainda mumbali, yakaamba kujatikizya penzi lyakadumide akati kabantu ba Leza. Bamwi bakali kuyeeya kuti kutola lubazu mumulimo wakukambauka munzila imwi kwakali kupa kuti batabi amulandu nobatatobeli zyeelelo zya Jehova zyakulilemeka mubuumi bwabo. Ngazi Yamulindizi eeyi yakaamba kuti: “Umwi aumwi weelede kuyeeya kuti, kutola buyo lubazu mumulimo wakukambauka tacili ncecintu ciyandika cilikke. Bakamboni ba Jehova mbaiminizi bakwe, alimwi mukuli wabo ikwiiminina Jehova abwami bwakwe munzila iili kabotu.” Mpoonya cibalo eeco cakapa lulayo lujatikizya cikwati alimwi akulilemeka mumakani aakoonana, calo cakagwasya bantu ba Leza ‘kutija bwaamu.’—1 Ko. 6:18.

8. Nkaambo nzi Ngazi Yamulindizi cakwiinduluka-induluka ncoyali kukankaizya bupanduluzi bwini bwabbala lya Chigiriki ilyaamba koonana kutali kwamumulawo?

⁸ Mumyaka minji yainda, cakwiinduluka-induluka, magazini ya Ngazi Yamulindizi yakakankaizya bupanduluzi bwini bwabbala libelesyedwe mu Magwalo aa Chigiriki kwaamba koonana  ikutali kwamumulawo—por·neiʹa. Ibbala eeli talyaambi buyo koonana. Muciindi caboobo, ibbala lyakuti por·neiʹa lilabikkilizya amicito yakutalilemeka iindene-indene, micito yoonse iitondwa iicitwa mumaanda aakucitila buvwuule. Aboobo, basikutobela Kristo balikwabilidwe kumapenzi aboola akaambo kakutalilemeka, alo aapenzya bantu banji ibali munyika mazuba aano.—Amubale Baefeso 4:17-19.

9, 10. (a) Makani nzi aajatikizya kulilemeka ngoyakapandulula Ngazi Yamulindizi mumwaka wa 1935? (b) Kweelana a Bbaibbele ncoliyiisya, ino bukoko tweelede kububona munzila nzi yeelede?

⁹ Kuciindizya kunywa bukoko. Ngazi Yamulindizi yamu Chingisi ya March 1, 1935, yakaamba kaambo kamwi kajatikizya kulilemeka kuti: “Calibonya kuti bamwi balatola lubazu mumulimo wakukambauka alimwi akucita milimo imwi mumbunga kabakoledwe. Muubukkale buli buti Magwalo mwaazumizya kunywa bukoko? Sena inga ceelela kunywa bukoko cakuti mulimo ngwabeleka umwi mumbunga ya Mwami wasika mpounyongana?”

¹⁰ Bwiinguzi bwakapandulula kububona munzila iili kabotu bukoko kweelana abwaamba Jwi lya Leza. Bbaibbele talikasyi kunywa bukoko cakutaciindizya, pele lilakasya kukolwa. (Int. 104:14, 15; 1 Ko. 6:9, 10) Kujatikizya makani aakubeleka mulimo uusetekene kumwi muntu kakoledwe, kuzwa kaindi babelesi ba Leza balayeezyegwa kujatikizya cibalo cabana ba Aroni, balo Leza mbaakajaya ciindi nobakapa zipaizyo kubelesya mulilo uutazumizyidwe acipaililo ca Leza. Kumane, cibalo cilayubununa icakapa kuti baalumi aabo bacite cintu citeelede, nkaambo Leza wakapede mulawo wakali kukasya bapaizi kunywa bukoko ciindi nobabeleka milimo iisetekene. (Lev. 10:1, 2, 8-11) Kwiinda mukutobela njiisyo eeyi mazuba aano, basikutobela Kristo balabikkila maano kapati kulikasya kunywa bukoko ciindi nobatola lubazu mumilimo iisetekene.

11. Nkaambo nzi ncocili cilongezyo kutambula bupanduluzi buyungizyidwe kujatikizya makani aakuciindizya kunywa bukoko?

¹¹ Mumyaka yainda, basikutobela Kristo balongezyegwa kapati kumvwisya makani aajatikizya bukolwi, bukkale ibwaamba kuzumanana alimwi kuba acizibilizi cakunywa bukoko. Tulalumba akaambo kacakulya cakumuuya cipegwa aciindi ceelede, calo icapa kuti banji bagwasyigwe kulwana bukkale oobu munzila iili kabotu akutalika kweendelezya kabotu buumi bwabo alimwi. Banji bagwasyigwa kweeleba penzi eeli. Taakwe weelede kulekela kuciindizya kunywa bukoko kumupa kuti abe muntu uutajisi bulemu, kuti mukwasyi wakwe unyongane alimwi kwiinda zyoonse, kuti coolwe cakwe cakutola lubazu mubukombi bwa Jehova busalala cinyongane.

12. Mbuti babelesi ba Kristo mbobakali kwaabona makani aakubelesya tombwe kaatanatalika mazuba aakumamanino?

¹² Kubelesya tombwe. Babelesi ba Kristo bakatalikide kale kukasya kufweba tombwe mazuba aamamanino kaatanatalika. Myaka iili mboibede yainda, mukwesu uucembeede wazina lya Charles Capen, ulayeeya ciindi cakusaanguna kubonana amukwesu Charles Taze Russell kumamanino aamwaanda wamyaka wa 19. Ba Capen, ibakajisi myaka yakuzyalwa iili 13, alimwi abanabokwabo basankwa botatwe, bakali amatantilo aaŋanda yakali kwiitwa kuti Bible House mu Allegheny, Pennsylvania. Russell naakainda mpobakabede, wakababuzya kuti: “Sena nobasankwa nywebo mulafweba? Kuli kununka tombwe.” Pele bakamwaambila kuti tabafwebi. Masimpe, bakazyiba mbwaakali kulimvwa kujatikizya tombwe. Mu Ngazi Yamulindizi yamu Chingisi ya August 1, 1895, Mukwesu  Russell wakaamba kujatikizya lugwalo lwa 2 Bakolinto 7:1, naakati: “Tandizyi mbwakonzya kulemekwa Leza, naa mbocikonzya kumujatikizya ikuti Munakristo umwi kabelesya tombwe munzila iili yoonse. . . . Tatukonzyi kweezyeezya Mwami mbwakonzya kubijilwa akununka kwabusi bwatombwe naa kubikka cintu cimwi cisofwaazya mukanwa lyakwe.”

13. Nkucinca kuli buti ikwakali kujatikizya makani aakulilemeka ikwakacitika mumwaka wa 1973?

¹³ Mu 1935, magazini ya Ngazi Yamulindizi yakaamba tombwe kuti “ninsaku iilaatombe” alimwi yakaamba kuti taakwe muntu uunyeela naa uufweba tombwe uukonzya kuzumanana kukkala a Bbeteli naa kubeleka kali mwiiminizi wambunga ya Leza mumulimo wabupainiya naa mumulimo wakweendeenda. Mu 1973, kwakali kusalazyigwa akumbi mumakani aakulilemeka. Ngazi Yamulindizi yamu Chingisi ya June 1, yakapandulula kuti taakwe Kamboni wa Jehova uukonzya kuba amikuli mumbungano kumwi kazumanana acilengwa eeci cijaya, cisofwaazya, alimwi icitondezya kutayanda bamwi. Boonse ibatakali kuyanda kuleka kubelesya tombwe bakeelede kugwisyigwa mumbungano. * Kristo wakabweza ntaamu aimbi yakusalazya basikumutobela.

14. Ino Leza ujisi ceelelo nzi icijatikizya bulowa, alimwi mbuti makani aakusilika kwiinda mukubikkwa bulowa mbwaakazikuduma?

¹⁴ Kubelesya bulowa munzila iiteelede. Mumazuba aa Nowa, Leza wakaamba kuti nkulubizya kulya bulowa. Wakakainduluka kaambo aaka akukabikkilizya mu Mulawo ngwaakapede bana Israyeli, alimwi wakalailila ambungano ya Banakristo kuti ‘batantamuke bulowa.’ (Mil. 15:20, 29; Matl. 9:4; Lev. 7:26) Nokuba boobo, tacigambyi pe kuti Saatani mazuba aano wajana nzila yakubelesya kutegwa bantu banji kabatacitobeli ceelelo ca Leza eeci. Mumwaanda wamyaka wa 19 bamadokota bakali kusola nzila zyabusilisi zyakubelesya bulowa, pele kuzwa ciindi nobakazyiba kuti kuli misyobo iindene-indene yabulowa, cilengwa eeci cakaduma kapati. Mu 1937, bulowa bwakatalika kuyobolwa, mpoonya cilengwa eeci cakaindila lya Nkondo Yakusaanguna Yanyika Yoonse. Tiilyakalampa pe, kubikkwa bulowa kwakaduma kapati munyika yoonse.

15, 16. (a) Ino Bakamboni ba Jehova bakabweza ntaamu nzi mumakani aajatikizya kubikkwa bulowa? (b) Ndugwasyo nzi ndobapegwa basikutobela Kristo kujatikizya makani aakubikkwa bulowa abusilisi butabelesyi bulowa, alimwi mbubotu nzi bwajanika?

¹⁵ Kumatalikilo aamwaka wa 1944, magazini ya Ngazi Yamulindizi yakatondezya kuti kubikkwa bulowa ncimwi buyo akulya bulowa. Mwaka wakatobela, ncaamba Magwalo kujatikizya makani aaya cakakankaizyigwa alimwi akupandululwa kabotu. Kuzikusika mu 1951, kwakasimbwa mulongo wamibuzyo abwiinguzi kugwasya bantu ba Leza mumakani aabusilisi ciindi nobabandika abamadokota. Nyika yoonse mbwiizulwa, basikutobela Kristo basyomeka bakakakatila kumakani aaya, kumwi kabafwubaazyigwa, kukalalilwa alimwi buya akupenzyegwa. Pele Kristo wakazumanana kusololela mbunga yakwe kutegwa ipe lugwasyo luyandika. Kwakamwaigwa zibalo amabroshuwa aajisi bupanduluzi bumvwika.

¹⁶ Mu 1979, baalu bamwi bakatalika kuswaya zibbadela alimwi akugwasya madokota kumvwisya kaambo kajatikizya bulowa, kubatondezya twaambo twamu Magwalo ncotutazumini kubikkwa bulowa, alimwi akubatondezya nzila zyabusilisi zitayandiki kubelesya bulowa. Mu 1980, baalu mumadolopo aali 39 mucisi ca United States, bakayiisyigwa lwiiyo lwaalubazu ilujatikizya mulimo ooyu.  Mukuya kwaciindi, Kabunga Keendelezya kakazumizya tubunga twa Hospital Liaison Committees kuti tutalisyigwe munyika yoonse. Sena kusoleka ooku kwazwidilila mumyaka minji yainda? Mazuba aano, basyaazibwene banji mumakani aabusilisi—kubikkilizya abamadokota—balabagwasya Bakamboni bacisidwe, balalemeka nguzu nzyotujisi zyakulisalila busilisi butajatikizyi kubelesya bulowa. Zibbadela zinji zilasilika kakunyina kubelesya bulowa, alimwi zibbadela zimwi zibona nzila eeyi yabusilisi kuba nzila iisumpukide kapati. Sena tacikkomanisyi kubona nzila nzyaabelesya Jesu kukwabilila basikumutobela kutegwa batasofwaazyigwi anzila zya Saatani?—Amubale Baefeso 5:25-27.

17. Mbuti mbotukonzya kutondezya kuti tulalumba akaambo kanzila Kristo njaalikubelesya kusalazya basikumutobela?

¹⁷ Inga cainda kubota kulibuzya kuti: ‘Sena tulamulumba Kristo akaambo kanzila mbwaalikubasalazya basikumutobela, kutuyiisya kuti katutobela zyeelelo zya Jehova zyakulilemeka zisumpukide?’ Ikuti naa tulacita oobo, atuzumanane kuyeeya kuti Saatani ulikanzide kutwaandaanya a Jehova alimwi a Jesu kwiinda mukupa kuti tutatobeli zyeelelo zya Leza zyakulilemeka. Kutegwa tukulwane kuyungwa kuli boobu, mbunga ya Jehova yazumanana kutucenjezya munzila yaluyando alimwi akutuyeezya kujatikizya kutalilemeka kuli munyika. Atupakamane, alimwi atumvwide akulutobela lulayo luli boobu ilugwasya.—Tus. 19:20.

18. Kujatikizya bantu aabo ibazangila zyeelelo zya Leza acaali, ino nciyeekezyo nzi cilimvwisya ncotujana mucilengaano ca Ezekieli?

¹⁸ Mbazu yabili yakusalazyigwa mukulilemeka ijatikizya ntaamu zibwezyegwa kutegwa mbungano izumanane kusalala. Cuusisya ncakuti tabali boonse bantu ibasala kutobela zyeelelo zya Jehova zyakulilemeka alimwi ibalyaaba kuli Leza, ibakakatila cakusyomeka kukusala kwabo. Bamwi myoyo yabo ilacinca alimwi balazanga akuleka kutobela zyeelelo eezyo acaali. Ino beelede kucitwa buti bantu bali boobo? Bwiinguzi bumwi inga twabujana mucilengaano ca Ezekieli catempele lyakumuuya ncotwabandika kumatalikilo aacibalo eeci. Amuyeeye milyango eeyo milamfwu. Kumanjililo kumwi akumwi, kwakali twaanda twabalindizi. Balindizi bakali kukwabilila tempele kutegwa muntu uuliwoonse “uutapalwidwe mumoyo” atanjili mukati. (Ezk. 44:9) Eeci nciyeekezyo cilimvwisya cakuti bukombi busalala tabuli bwamuntu buyo uuliwoonse; ncoolwe cipegwa buyo baabo basoleka kupona kweelana azyeelelo zya Jehova zisalala zyakulilemeka. Mbubwenya buyo, coolwe cakuyanzana mukukomba a Banakristoma tacili camuntu buyo uuliwoonse mazuba aano.

19, 20. (a) Mbuti Kristo mbwaabagwasya asyoonto-syoonto basikumutobela kubambulula nzila zyakubamba milandu iijatikizya zibi zipati? (b) Ntwaambo nzi totatwe itupa kuti basimucita zibi ibateempwi kabagwisyigwa mumbungano?

¹⁹ Musyule mumwaka wa 1892, Ngazi Yamulindizi yakaamba kuti, ‘mbotuli Banakristo, mukuli wesu ikubagwisya mumbungano bantu ibakakaka cacigaminina naa munzila iitali yacigaminina kuti Kristo wakalyaaba kali cinunuzyo cabantu boonse ceelene aceeco ncobakasweekelwa.’ (Amubale 2 Johane 10.) Mu 1904, bbuku litegwa The New Creation lyakatondezya kuti, bantu bazumanana kucita zibi balakonzya kupa kuti mbungano ileke kubeleka cabusungu. Musyule, bantu boonse mumbungano bakali kutola lubazu ‘mukubeteka’ kutegwa balange-lange milandu mipati yakacitwa. Nokuba boobo, zintu zili boobu tiizyakali kuvwula kucitika. Mu 1944, magazini ya Ngazi Yamulindizi yakatondezya kuti balikke bakwesu beelela mbobakeelede kubamba twaambo twamusyobo ooyu. Mu 1952, malailile aatondezya mbotweelede kweendelezyegwa twaambo twalubeta, aakamwaigwa mu Ngazi Yamulindizi, akatondezya kaambo kapati bantu bateempwi ncobeelede kugwisyigwa mumbungano—kutegwa mbungano izumanane kusalala.

²⁰ Mumyaka minji yakatobela kuzwa ciindi eeco, Kristo wabagwasya basikumutobela kubambulula nzila zijatikizya mbotweelede kubambwa twaambo tujatikizya milandu mipati. Baalu Banakristo balayiisyigwa kabotu mbobakonzya kubamba twaambo itujatikizya lubeta munzila ya Jehova, balacita oobo munzila iitondezya bululami aluzyalo. Mazuba aano, tulabona twaambo totatwe itupa kuti ibacita zibi ibateempwi kabagwisyigwa mumbungano: (1) kutegwa zina lya Jehova litasampaulwi, (2) kutegwa mbungano itasofwaazyigwi acibi eeco cacitwa, alimwi (3) kutegwa muntu wacita cibi akonzye kweempwa kuti kacikonzyeka.

21. Muunzila nzi mobalongezyegwa bantu ba Leza kwiinda mububambe bwakugwisya mumbungano?

²¹ Sena mulabona mbobalongezyegwa basikutobela Kristo mazuba aano kwiinda mububambe oobu bwakugwisya mumbungano? Mu Israyeli yansiku, kanji-kanji basimucita zibi bakali kuyunga cisi, zimwi ziindi mweelwe wabo wakali kwiinda mweelwe  wabantu ibakali kuyanda Jehova akuyanda kucita ciluleme. Akaambo kaceeci, kanji-kanji cisi cabana Israyeli cakali kupa kuti zina lya Jehova lisampaulwe mpoonya bakali kusweekelwa cilongwe cabo a Leza. (Jer. 7:23-28) Pele mazuba aano, Jehova ujisi baalumi abamakaintu bakumuuya. Akaambo kakuti bantu bacita zibi ibateempwi balagwisyigwa akati kesu, tabalekelwi kuti bazumanane kubelesyegwa a Saatani kusofwaazya mbungano calo icipa kuti mbungano izumanane kusalala. Aboobo, mbungano taijatikizyigwi kapati amuuya wabo mubi. Mbuli nkamu tulisinizyide kuti Jehova unakutukkomanina lyoonse. Mutalubi kuti Jehova wakasyomezya kuti: “Pele taakwe cilwisyo niciba comwe cibumbwa kukulwisya nduwe cikonzya kujana coolwe.” (Is. 54:17) Sena cakusyomeka tulabagwasyilizya baalu, ibajisi mukuli mulemu wakulanganya twaambo twalubeta?

22, 23. Nkaambo nzi ncotubalumba kapati Banakristo ibakali kubeleka kumatalikilo aamwaanda wamyaka wa 20, pele mbumboni nzi ibutondezya kuti makani aajatikizya mukwasyi bakeelede kwaabona munzila yeelede?

²² Mbazu yatatu mwalo basikutobela Kristo mobagwasyigwa akusalazyigwa ikwazumanana kucitika, ijatikizya cikwati alimwi abuumi bwamumukwasyi. Sena kuli notwacinca akutalika kuulanga munzila yeelede mukwasyi mumyaka yainda? Inzya. Mucikozyanyo, ciindi notubala kujatikizya bantu ba Leza kumatalikilo aamwaanda wamyaka wa 20, tulakkomana akugambwa amuuya wakulyaaba ngobakali kutondezya. Tulakkomana kapati kubona mbobakali kubikka milimo iisetekene mubusena bwakusaanguna kwiinda zintu zyoonse mubuumi bwabo. Nokuba boobo, aciindi ncimunya, tulakonzya kubona kuti bakeelede kulanga zintu munzila yeelede. Nkaambo nzi ncotwaambila boobo?

²³ Cakalidumide kapati kubakwesu kuzumina mikuli iyakali kujatikizya mulimo wakukambauka naa mulimo wakweendeenda yalo yakali kubapa kuti baandaane amikwasyi yabo kwamyezi minji. Zimwi ziindi, bakali kuciindizya kukulwaizya kutakwata naa kutakwatwa kwiinda Magwalo mbwaamba, alimwi twaambo tujatikizya kuyumya zikwati zya Banakristo, kanji-kanji tiitwakali kwaambwa. Sena mbozicibede zintu asunu akati kabasikutobela Kristo? Peepe.

24. Mbuti Kristo mbwaakabagwasya bantu bakwe basyomeka kwaabona munzila yeelede makani aajatikizya cikwati alimwi amukwasyi?

²⁴ Mazuba aano, milimo ya Bunakristo tayeelede kupa kuti umwi aleke kuzuzikizya mikuli njajisi mumukwasyi. (Amubale 1 Timoteyo 5:8.) Kuyungizya waawo, Kristo wasinizya kuti basikumutobela basyomeka ibali anyika balatambula lulayo lubotu lwamu Magwalo ilugwasya ilujatikizya cikwati abuumi bwamumukwasyi. (Ef. 3:14, 15) Mu 1978, bbuku litegwa Making Your Family Life Happy, lyakamwaigwa. Nokwakainda myaka iili 18, bbuku litegwa Inzila Yakujana Lukkomano Mumukwasyi, lyakamwaigwa. Kuyungizya waawo, zibalo zigwasya banabukwetene kutobela njiisyo zyamu Magwalo mucikwati cabo zilabikkilizyigwa mumamagazini aa Ngazi Yamulindizi.

25-27. Mbuti bana baziimo ziindene-indene mbobabikkilwa maano kapati mumyaka minji yainda?

²⁵ Mbuti kujatikizya bakubusi? Kwamyaka minji, abalo bakubusi babikkilwa maano muzintu nzyobayandika. Mbunga ya  Jehova yazumanana kupa bana bamisela yiindene-indene zintu zibotu, cakuti icakali buyo mbuli dosi lyameenda lino waba mulonga uutayuminini. Mucikozyanyo, cibalo cabakubusi citegwa “Juvenile Bible Study” (Ciiyo ca Bbaibbele Cabana), cakali kumwaigwa mumagazini ya The Golden Age kuzwa mumwaka wa 1919 kusikila mu 1921. Kuzwa waawo, broshuwa yakuti The Golden Age ABC yakamwaigwa mumwaka wa 1920 alimwi bbuku lyakuti Children mumwaka wa 1941. Mumyaka yamuma 1970, mabbuku aaya akamwaigwa: Listening to the Great Teacher, Your Youth, Getting the Best out of It, alimwi abbuku lyakuti Bbuku Lyangu Lya Makani Aamu Bbaibbele. Mu 1982, zibalo zyakuti “Bakubusi Balabuzya,” zyakatalika kusimbwa mumamagazini aa Sinsimuka!, calo cakapa kuti mu 1989 kusimbwe bbuku lyakuti Young People Ask—Answers That Work.

²⁶ Mazuba aano, tulijisi mabbuku obilo aa Young People Ask, alimwi zibalo eezyi zyazumanana kumwaigwa ciindi aciindi aa Web site ya jw.org. Alimwi tulijisi bbuku lyakuti Amwiiye Ku Mwiiyi Mupati. Web site yesu ilijisi makani manji aajatikizya bakubusi, kubikkilizya atukkaadi twamuntu waambwa mu Bbaibbele, cibeela cijatikizya kwiiya Bbaibbele icibambilidwe bana bapati-pati abaniini,  mavidiyo, makani aamu Bbaibbele aajisi zifwanikiso, ziiyo kuzwa mu Bbaibbele izibambilidwe bana bajisi myaka yakuzyalwa yotatwe kuyaansi. Cilisalede kuti Kristo tanaacinca mbwababona bana kuzwa mumwaanda wamyaka wakusaanguna ciindi naakabatamba bana kuti baboole kulinguwe akubafwukata. (Mk. 10:13-16) Uyanda kuti bana akati kesu kabalimvwa kuti balayandwa alimwi balasaninwa kabotu kumuuya.

²⁷ Jesu alimwi uyanda kuti bana bakwabililwe kuntenda. Nyika iino iizwide kutalilemeka noiyaabuzumanana kubija, cilengwa cakutundulula bana ciyaabuvwula. Aboobo, makani aatakatazyi kumvwa alimwi aataindi mumbali amwaigwa kutegwa agwasye bazyali kukwabilila bana babo kucilengwa eeci calunya. *

28. (a) Ncinzi ciyandika ikuti katuyanda kukomba Leza munzila iisalala, mbuli mbokutondezyedwe mucilengaano ca Ezekieli catempele? (b) Ino mukanzide kucita nzi?

²⁸ Eelo kaka cilakkomanisya kubona Kristo mbwaazumanana kubasalazya basikumutobela, kubayiisya kulemeka zyeelelo zisumpukide zya Jehova, kuzitobela alimwi akugwasyigwa anzizyo! Amuyeeye alimwi kujatikizya tempele ndyaakabona Ezekieli mucilengaano. Amuyeeye milyango milamfwu. Masimpe kuti tempele eeliya talili lini-lini pe, pele ndyakumuuya. Nokuba boobo, sena tulalibona kuba lyancobeni? Tulanjila mulindilyo, kutali buyo notuunka ku Ŋanda ya Bwami naa notujalula Bbaibbele naa notukonkomona amulyango ciindi notuli mumulimo wakukambauka. Zintu zili boobu zilabonwa ameso. Muntu sikuupaupa ameso ulakonzya kucita zintu zili boobu pele kakunyina kunjila mutempele lya Jehova. Nokuba boobo, ikuti katucita zintu eezyi alimwi katupona kweelana azyeelelo zisumpukide zya Jehova akutola lubazu mubukombi busalala katujisi makanze mabotu, nkokuti twanjila alimwi tubelekela mubusena busalalisya—bubambe bwa Jehova Leza bwabukombi busalala! Aboobo, lyoonse atucibikkile maano coolwe eeci citaliboteli. Alimwi atuzumanane kubeleka canguzu kusikila mpotugolela kutegwa katutondezya kusalala kwa Jehova kwiinda mukubamba zyeelelo zyakwe ziluleme!