1, 2. Ncinzi cakacinca kujatikizya magazini ya Zion’s Watch Tower ya January 1895, alimwi ino bakwesu bakalimvwa buti?

CIINDI Sikwiiya Bbaibbele musungu utegwa John A. Bohnet naakatambula magazini ya Zion’s Watch Tower ya January 1895, ncaakabona cakamukkomanisya kapati. Magazini yakajisi civwumbyo cipya cilemu-lemu—yakajisi cifwanikiso cangazi iijisi lampi atala kayiimvwi mulwizi lujisi mayuwe kumwi kailibonya atala, lampi lyakali kumunika mumudima. Cakwaambilizya icakali kujatikizya civwumbyo cipya eeci icakali mumagazini cakajisi mutwe wakuti: “Our New Dress” (Civwumbyo Cesu Cipya).

² Akaambo kakukkomana, Mukwesu Bohnet wakalembela Mukwesu Russell lugwalo. Wakalemba kuti: “Ndilikkomene kubona NGAZI kaiboneka kabotu. Ilibonya kabotu ncobeni.” Aumbi Sikwiiya Bbaibbele uusyomeka wiitwa kuti John H. Brown, wakalemba boobu kujatikizya civwumbyo, wakati: “Cileebeka ncobeni. Ntalisyo yangazi ilibonya kuti ninjumu loko twalanga mayuwe aguwo mbozilipwaila kulinjiyo.” Civwumbyo cipya eeciya kwakali kucinca kwakusaanguna nkobakabona bakwesu mumwaka uulya—pele tiikwakali kucinca kwamamanino. Mumwezi wa November bakabona kucinca kumbi kupati. Cikkomanisya ncakuti, kucinca ooko alimwi kwakali kujatikizya lwizi lwamayuwe aaguwo.

3, 4. Ndipenzi nzi lyakabandikwa mumagazini ya Ngazi Yamulindizi yamu Chingisi ya November 15, 1895, alimwi nkucinca nzi kwakaambilizyigwa?

³ Cibalo icakazwa mu Ngazi Yamulindizi yamu Chingisi ya November 15, 1895, cakapandulula kabotu-kabotu penzi lyakaliko: Mayuwe aaguwo lyamanyongwe akali kunyonganya luumuno mumbunga ya Basikwiiya Bbaibbele. Bakwesu bakali kukazyanya kujatikizya iwakeelede kuba musololi mumbungano. Kutegwa bakwesu bagwasyigwe kubona cakeelede kucitwa kugwisya muuya wakuzundana, cibalo cakakozyanisya mbunga kubwato. Mpoonya cakutainda mumbali cakatondezya kuti aabo ibakali kusololela bakaalilwa kugwasya mbunga iili mbuli bwato kuti ilibambile guwo. Ncinzi cakeelede kucitwa?

⁴ Cibalo cakatondezya kuti mweendelezi mubotu mubwato ulabikkila maano kubona kuti zibelesyo zikonzya kufwutula bantu nkozili mubwato alimwi ciindi nokulangilwa kuba ntenda babelesi bamubwato balalibambila kujatikizya ntenda eeyo. Mbubwenya buyo, aabo ibasololela mumbunga bakeelede kubikkila maano kubona kuti mbungano zyoonse zyagwasyigwa kulwana mapenzi aali mbuli guwo. Kutegwa eeci cicitike, cibalo eeciya cakaambilizya kucinca  kupati ikwakali kuyandika. Cibalo cakalailila kuti cakufwambaana, “mumbungano iili yoonse, baalu bakeelede kusalwa” kutegwa “‘balanganye’ butanga.”—Mil. 20:28.

5. (a) Nkaambo nzi bubambe bwakusaanguna bwakusala baalu ncoyakali ntaamu iiyandika aciindi ceelede mukubambulula zintu? (b) Ino mibuzyo nzi njotutiilange-lange?

⁵ Bubambe oobu bwakusaanguna yakali ntaamu iiyandika aciindi ceelede mukubambulula zintu kutegwa kube bubambe busitikide ibujatikizya kweendelezya mbungano. Bubambe oobu bwakagwasya bakwesu kuliyumya mumayuwe aakatalisyigwa a Nkondo Yakusaanguna Yanyika Yoonse. Mumyaka yakatobela, kucinca ikujatikizya mboyeelede kweendelezyegwa mbunga kwakabagwasya bantu ba Leza kutegwa balibambile kubelekela Jehova. Ino mbusinsimi buli bwamu Bbaibbele ibwakaambila limwi kucinca ooku? Nkucinca kuli buti ikwacitika mumbunga nkomwabona? Mbuti mbomwagwasyigwa akucinca ooko?

6, 7. (a) Ino lugwalo lwa Isaya 60:17 lupandulula nzi? (b) Ino kwaambwa kwa “simutwe” a “sikukubelesya” kutondezya nzi?

⁶ Mbubwenya mbotwakabandika mu Cibalo 9, Isaya wakasinsima kuti Jehova wakali kuyakubalongezya bantu bakwe kwiinda mukubavwuzya. (Is. 60:22) Nokuba boobo, Jehova wakasyomezya kubalongezya kwiinda waawo. Mubusinsimi mbubwenya oobu, wakaamba kuti: “Mucibaka camukuba njooleta ingolida, amucibaka cabutale njooleta insiliva; mucibaka cazisamu muzooba mukuba, amucibaka camabwe muzooba butale. Njoobika luumuno lube simutwe wako, abululami bube sikukubelesya.” (Is. 60:17) Ino businsimi oobu bwaamba nzi? Ino butujatikizya buti mazuba aano?

⁷ Isaya waamba kuti cintu cimwi ciyakunjililwa busena acintu cimbi. Pele amubone kuti zintu zinjila mubusena bwazibelesyo zimbi tazyaambi kucinca kuzwa kucintu cibi kuya kucibotu, pele kuzwa kucintu cibotu kuya kucintu cibotu kwiinda. Kugwisya mukuba akubikka ngolida nkubambulula, alimwi mbubwenya oobu mbocibede akuzintu zimbi zyaambidwe. Aboobo, kwiinda mucikozyanyo eeci, Jehova wakasinsima kuti bukkale bwabantu bakwe bwakali kuyakucinca asyoonto-syoonto. Nkubambulula kwamusyobo nzi kwaambwa mubusinsimi oobu? Kwiinda mukwaamba kuti “simutwe” alimwi akuti “sikukubelesya,” Jehova wakatondezya kuti nzila njobalanganizyigwa akweendelezyegwa bantu bakwe yakali kunooyaabucinca buce-buce.

8. (a) Ino nguni ubambulula zintu kweelana acaambidwe mubusinsimi bwa Isaya? (b) Ino tugwasyigwa buti kukubambulula ooku? (Amubone akabbokesi kakuti “ Cakulibombya Wakazumina Kululamikwa.”)

⁸ Nguni uupa kuti kube kuyaambele ooku mumbunga? Jehova waamba kuti: “Njooleta ingolida, . . . Njooleta insiliva,” alimwi “Njoobika luumuno.” Masimpe, Jehova nguwapa kuti kube kucinca kubotu ikujatikizya mboyeendelezyegwa mbungano, ikutali muntu pe. Alimwi kuzwa ciindi Jesu naakabikkwa kuba Mwami, Jehova wabambulula zintu kwiinda mu Mwanaakwe. Mbuti mbotugwasyigwa akucinca ooku? Lugwalo ndomunya oolu lwaamba kuti kubambulula ooku kuya kupa kuti kube “luumuno” ‘abululami.’ Ciindi notuzumina busolozi bwa Leza alimwi akucinca aawo mpotweelede kucinca, kulaba luumuno akati kesu alimwi luyando lwakuyanda kucita ciluleme lutukulwaizya kuti tubelekele Jehova, walo mwaapostolo Paulo ngwaakaamba kuti ngu “Leza waluumuno.”—Flp. 4:9.

9. Ino nintalisyo nzi imbotu yakucita zintu mumbungano kweelana abubambe alimwi alukamantano, alimwi nkaambo nzi?

 ⁹ Kujatikizya Jehova, Paulo wakalemba kuti: “Leza tali Leza walupyopyongano pe, pele ngwaluumuno.” (1 Ko. 14:33) Amubone kuti Paulo taakwe naakaindanya lupyopyongano kukucita zintu kweelana abubambe, pele wakaindanya lupyopyongano kuluumuno. Ino nkaambo nzi? Amubone ncocaamba eeci: Kwiile kucita zintu kweelana abubambe tacaambi kuti inga kwaba luumuno. Mucikozyanyo, basikalumamba inga kabeenda kweelana abubambe ciindi nobali kunkondo, pele kweenda kwabo cakuccilila bubambe kupa kuti kube nkondo kutali luumuno pe. Nkakaambo kaako swebo mbotuli Banakristo, tuyanda kuti lyoonse katuyeeya kaambo aaka kamasimpe kakuti: Kufwumbwa bubambe bwakweendelezya mbunga butajisi luumuno mbuli ntalisyo yambubo bulawa. Mukwiimpana, luumuno lwa Leza lupa kuti kakuli bubambe bukkalilila. Eelo kaka tulalumba kuzyiba kuti mbunga yesu ilasololelwa akusalazyigwa a “Leza uupa luumuno”! (Lom. 15:33) Luumuno ndwapa Leza lupa kuti kube ntalisyo iigwasya yabubambe bubotu alukamantano lukkomanisya alimwi lubotu kapati mumbungano nyika yoonse mbwiizulwa.—Int. 29:11.

10. (a) Nkubambulula zintu kuli buti kwakacitika mumbunga yesu mumyaka yakumatalikilo? (Amubone kabbokesi kakuti “ Nzila Yabweendelezi Mboyakabambululwa.”) (b) Mibuzyo nzi njotutiilange-lange lino?

¹⁰ Kabbokesi kakuti “ Nzila Yabweendelezi Mboyakabambululwa” katondezya kucinca kugwasya ikwakacitika mumbunga yesu mumyaka yakumatalikilo. Pele nkucinca nzi ‘kuzwa kumukuba kuya ku ngolida’ Jehova nkwaacita caino-ino kwiinda mu Mwami wesu? Mbuti kucinca ooko mubweendelezi mbokwapa kuti kube luumuno alukamantano mumbungano nyika yoonse mbwiizulwa? Ino kucinca ooku kumugwasya buti lwanu kumugama kuti mubelekele “Leza waluumuno”?

11. (a) Ino kuvwuntauzya ncaamba Magwalo kwakapa kuti kube kucinca kuli buti mukumvwisya twaambo? (b) Ino bakwesu bamukabunga keendelezya bakakanzide kucita nzi?

¹¹ Kuzwa mumwaka wa 1964 kusikila mumwaka wa 1971, kabunga keendelezya kakali kweendelezya mulimo mupati wakuyiisya Bbaibbele, alimwi kakalanga-langa mboyakali kweendelezyegwa mbungano ya Bunakristo mumwaanda wamyaka wakusaanguna. * Kuvwuntauzya ooku ikujatikizya bweendelezi bwambungano, kwakatondezya kuti mbungano zyamumwaanda wamyaka wakusaanguna zyakali kweendelezyegwa akabunga kabaalu muciindi cakweendelezyegwa amwaalu naa mulangizi omwe buyo. (Amubale Bafilipi 1:1; 1 Timoteyo 4:14.) Kaambo aaka nobakakamvwisya, bamukabunga keendelezya bakazyiba kuti Mwami wabo, Jesu, wakali kubasololela kutegwa kube kucinca kubotu mubweendelezi bwa mbunga yabantu ba Leza—alimwi bakwesu bamukabunga keendelezya bakalikanzide kubutobela busolozi bwa Mwami. Cakutasowa ciindi, bakacinca kutegwa mbunga kayeendelezyegwa abubambe bwabaalu bwaambidwe mu Magwalo. Nkucinca nzi kwakacitika kumatalikilo aamyaka yamuma 1970?

12. (a) Nkucinca kuli buti kwakacitwa mukabunga keendelezya? (b) Amupandulule mbokabambidwe lino Kabunga Keendelezya. (Amubone kabbokesi kakuti “ Kabunga Keendelezya Mbokalanganya Ziyandika zya Bwami,” apeeji 130.)

¹² Kucinca kwakusaanguna kwakali kujatikizya kabunga keendelezya kukagama. Kuzwa kaindi kusikila kuciindi eeco, kabunga aaka kakali kupangwa abeendelezi bambunga ya Watch Tower Bible and Tract Society of Pennsylvania ibali ciloba. Nokuba boobo, mumwaka wa 1971, kabunga keendelezya kakakomezyegwa  kuzwa kubantu ibali 7 kusika kubantu ibali 11 alimwi kuzwa leelyo bakaziba kuti kuli kwiindana kuliko akati kabeendelezi bambunga ya Watch Tower Bible and Tract Society of Pennsylvania abamukabunga keendelezya. Bamukabunga aaka bakabona kuti baleelene boonse alimwi mwaka amwaka bakali kucincana kubeleka mulimo wabusicuuno kwiinda mukutobela mbwaakali kuccililana mazina aabo mu alufabbeti.

13. (a) Mbubambe nzi ibwakali kubeleka kwamyaka iili 40? (b) Ino Kabunga Keendelezya kakacita nzi mumwaka wa 1972?

¹³ Kucinca kwakatobela kwakajatikizya mbungano imwi aimwi. Munzila nzi? Kuzwa mumwaka wa 1932, kusika mumwaka wa 1972, kanji-kanji mbungano yakali kweendelezyegwa amukwesu omwe. Kuzikusika mumwaka wa 1936, mukwesu iwakali kweendelezya mbungano wakali kwiitwa kuti mweendelezi wamulimo. Kuzwa waawo, izina lyakacincwa akuba mubelesi wambungano, mpoonya kumamanino wakatalika kwiitwa kuti mulangizi wambungano. Bakwesu aabo basalidwe bakabikkila maano kulanganya nzyobwakali kuyandika butanga kumuuya. Mulangizi wambungano kanji-kanji wakali kusala zyakucita izijatikizya mbungano kakunyina kubuzya bamwi beelela mumbungano. Nokuba boobo, mumwaka wa 1972, Kabunga Keendelezya kakabikka bubambe bwakucinca kumwi kutakalubwi. Ino kucinca ooko kwakali kubikkilizya nzi?

14. (a) Mbubambe nzi bupya bwakatalika kubeleka mu October 1, 1972? (b) Mbuti sicuuno wakabunga kabaalu mbwalutobela lulayo lujanika mulugwalo lwa Bafilipi 2:3?

¹⁴ Muciindi cakuba amukwesu omwe kuba mulangizi wambungano mumbungano imwi aimwi, bakwesu bamwi ibakali kweelela  kweelana azyeelelo zyamu Magwalo bakali kukonzya kusalwa kuti babe baalu Banakristo mumbungano. Boonse antoomwe bakali kunoopanga kabunga kabaalu kutegwa kakalanganya mbungano yabo. Bubambe oobu bupya bwakusala baalu bwakatalika kubeleka mu October 1, 1972. Mazuba aano, sicuuno wakabunga kabaalu taliboni kuba muntu uuyandika kapati kwiinda baalunyina, pele ulibona “mbuli muniini.” (Lk. 9:48) Eelo kaka ncilongezyo kubunyina bwanyika yoonse kuba abakwesu aaba ibalibombya!—Flp. 2:3.

15. (a) Mbubotu nzi bwajanika kwiinda mububambe bwakuti mbungano kazyeendelezyegwa atubunga twabaalu? (b) Ncinzi citondezya kuti Mwami wesu wakacita cabusongo?

¹⁵ Bubambe bwakwaabana mikuli iijatikizya kulanganya mbungano mukabunga kabaalu nkucinca kupati. Amubone munzila eezyi zyotatwe mbobwagwasya bubambe oobu: Cakusaanguna, bubambe oobu bwabagwasya baalu kunyamuna mikuli yambungano iiminya kapati kumwi kabazyi kuti Jesu ngo Mutwe wambungano, tacikwe makani naa mikuli yambungano njobajisi milemu naa pe. (Ef. 5:23) Cabili, cijatikizya kaambo kaambidwe mulugwalo lwa Tusimpi 11:14 kakuti: “Mubunji bwabasinkuta molujanwa lufutuko.” Ciindi baalu nobalanga-langa antoomwe twaambo itujatikizya mboicita mbungano kumuuya alimwi anobaibikkila maano mizeezo yaumwi aumwi uuli mukabunga, balagwasyigwa kusala zintu zyeendelana anjiisyo zyamu Bbaibbele. (Tus. 27:17) Jehova ulakuleleka kusala kuli boobo alimwi kupa kuti kube kuzwidilila. Catatu, kwiinda mukuba abakwesu banji beelela kubeleka kabali baalu,  capa kuti mbunga icikonzye kuba abantu banji bayandika kubeleka mulimo wabulangizi awabweembezi mumbungano mobazulilwa. (Is. 60:3-5) Amuyeeye buyo—mweelwe wambungano nyika yoonse mbwiizulwa wakayungizyika kuzwa ku 27,000 mu 1971 kusika kumweelwe iwiinda ku 113,000 mu 2013! Cilalibonya kuti kwiinda mubusongo mbwajisi, Mwami wesu wapa basikumutobela beembezi ibayandika aciindi ceelede.—Mik. 5:5.

16. (a) Mukuli nzi ngobajisi baalu? (b) Ino Basikwiiya Bbaibbele bakali kulubona buti lulayo lwa Jesu ‘lwakweembela butanga’?

¹⁶ Musyule mumazuba aakumatalikilo aa Basikwiiya Bbaibbele, baalu bakalizyi kale kuti bakajisi mukuli wakugwasya basyominyina kuti bazumanane kubelekela Leza. (Amubale Bagalatiya 6:10.) Cibalo cimwi mu Ngazi Yamulindizi yamu Chingisi yamu 1908 cakapandulula ncaakaamba Jesu naakati: “Koembela tubelele twangu.” (Joh. 21:15-17) Cibalo eeci cakaambila baalu kuti: “Cilayandika kuti mulimo wa Simalelo kujatikizya butanga kauli mubusena bwakusaanguna mumyoyo yesu, akuti tweelede kucibona kuba coolwe cipati kapati kubasanina alimwi akubeembela basikutobela Mwami.” Mumwaka wa 1925, Ngazi Yamulindizi alimwi yakakankaizya mbociyandika kubeleka mulimo wabweembezi kwiinda mukwaambila baalu kuti: “Mbungano njiya Leza, . . . alimwi uyakubapa mulandu aabo ibajisi mukuli wakulanganya basyominyina kuti naa baalilwa kuuzuzikizya mukuli wabo.”

17. Ino balangizi bagwasyigwa buti kutegwa bacikonzye kuba beembezi beelela?

¹⁷ Mbuti mbunga ya Jehova mboyabagwasya baalu kucinca luzyibo lwabo lwabweembezi ‘kuzwa kubutale kuya kunsiliva’? Yacita oobo kwiinda mukubayiisya. Mumwaka wa 1959, Cikolo ca Mulimo wa Bwami cakusaanguna cakuyiisya balangizi, cakacitwa. Cibeela cimwi cacikolo cakalanga-langa makani aakuti: “Giving Personal Attention” (Kumubikkila Maano Muntu Umwi Aumwi). Bakwesu bali mumikuli bakakulwaizyigwa “kuba amulongo wakuswaya basikumwaya mumaanda aabo.” Cibeela eeci cakabandika  nzila zisiyene-siyene nzyobakonzya kubelesya beembezi kutegwa kuswaya kwabo kakugwasya. Mumwaka wa 1966, Cikolo ca Mulimo wa Bwami icakabambululwa cakatalika. Cakabandika kaambo kakuti: “Importance of the Shepherding Work” (Mulimo wa Bweembezi Ncouyandika Kapati). Ino nkaambo nzi kapati ikakali mucibeela eeci? Aabo ibasololela “beelede kulanganya butanga bwa Leza caluyando, pele tabeelede kwaalilwa kubikkila maano kumikwasyi yabo alimwi akumulimo wakukambauka.” Myaka iili mbwiibede yainda, kwacitwa zikolo zyabaalu zinji. Ncinzi cacitika akaambo kalwiiyo ilwazumanana kupegwa ambunga ya Jehova? Mazuba aano, mbungano ya Bunakristo ilijisi bakwesu banji kapati beelela kubeleka mulimo wakumuuya wabweembezi.

18. (a) Mukuli nzi mulemu ngobapedwe baalu? (b) Nkaambo nzi Jehova a Jesu ncobabayanda kapati baalu babeleka canguzu?

¹⁸ Baalu Banakristo babikkwa a Jehova kwiinda mu Mwami, Jesu, kutegwa banyamune mukuli mulemu. Ino mukuli nzi ooyo? Nkusololela mbelele zya Leza mumazuba aano aakatazya kapati. (Ef. 4:11, 12; 2 Ti. 3:1) Jehova a Jesu balabayanda kapati baalu ibabeleka canguzu nkaambo bakwesu aaba batobela lulayo lwamu Magwalo lwakuti: ‘Amweembele butanga bwa Leza ibuli mumaanza aanu, cakuliyandila, caluyandisisyo, akuba zikozyanyo kubutanga.’ (1 Pe. 5:2, 3) Atulange-lange nzila zyobilo buyo akati kanzila zinji mwalo beembezi Banakristo mobali zikozyanyo zibotu kubutanga alimwi ambobapa kuti kube luumuno alukkomano mumbungano.

19. Ino tulimvwa buti kujatikizya baalu ibabeleka andiswe mumulimo wakukambauka?

¹⁹ Nzila yakusaanguna njakuti, baalu balabeleka abasikumwaya ibali mumbungano. Mulembi wa Makani Mabotu Luka wakaamba boobu kujatikizya Jesu, wakati: “Wakatalika kuyaabweenda muminzi amutunzi kakambauka akwaambilizya makani mabotu aa Bwami bwa Leza. Alimwi bali kkumi ababili bakali anguwe.” (Lk. 8:1) Mbubwenya Jesu mbwaakali kukambauka antoomwe  abaapostolo bakwe, abalo baalu ibajisi zikozyanyo zibotu balabeleka antoomwe abasyominyina mumulimo wakukambauka. Balizyi kuti kucita boobo kupa kuti kakuli muuya mubotu mumbungano. Ino basimbungano balimvwa buti kujatikizya baalu bali boobo? Mucizyi umwi utegwa Jeannine, uujisi myaka yakuzyalwa iili kuma 80, wakaamba kuti: “Kubeleka antoomwe amwaalu mumulimo wakukambauka kundipa coolwe cibotu cakubandika anguwe alimwi akumuzyiba kabotu.” Mukwesu umwi utegwa Steven, uujisi myaka yakuzyalwa iili kuma 30, wakaamba kuti: “Ciindi mwaalu nabeleka andime mumulimo wakukambauka kuŋanda aŋanda, ndilimvwa kuti uyanda kundigwasya. Kutambula lugwasyo luli boobo cindipa kukkomana kapati.”

20, 21. Mbuti baalu mbobakonzya kwiiya mweembezi wamucikozyanyo ncaakaamba Jesu? Amupe cikozyanyo. (Amubone akabbokesi kakuti: “ Kuswaya Kwansondo Ansondo Ikugwasya.”)

²⁰ Nzila yabili njakuti, mbunga ya Jehova yabayiisya baalu kuti kabababikkila maano aabo ibakacileka kuyanzana ambungano. (Heb. 12:12) Nkaambo nzi baalu ncobeelede kubagwasya bantu bali boobu ibatali bayumu kumuuya, alimwi mbuti mbobeelede kubagwasya? Bwiinguzi tulabujana mucikozyanyo ca Jesu camweembezi alimwi ambelele isweekede. (Amubale Luka 15:4-7.) Ciindi mweembezi wamucikozyanyo naabona kuti mbelele yomwe taiko, watalika kwiiyandaula mbuli kuti nembelele ilikke njajisi. Mbuti baalu Banakristo mazuba aano mbobatobela cikozyanyo camweembezi uulya? Mbubwenya mbelele iisweekede mboiyandika kapati kumweembezi, abalo bantu ibakacileka kuyanzana abantu ba Leza mbobeelede kuyandwa abaalu. Muntu uutali muyumu kumuuya bamubona kuti nimbelele iisweekede—kutali kubona kuti kugwasya muntu uuli boobu nkusowa buyo ciindi. Kuyungizya waawo, mbubwenya mweembezi mbwaasala “kwiinka kuyooyandaula eeyo yasweeka kusikila aijane,” abalo baalu balasola nzila iili yoonse kutegwa babajane alimwi akubagwasya aabo ibatali bayumu kumuuya.

²¹ Ncinzi mweembezi wamucikozyanyo ncacita naamana kwiijana mbelele? Ulainyamuna kabotu-kabotu, “ulaibikka aziwezyo zyakwe,” akwiitola kubeenzyinyina. Mbubwenya buyo, luyando akubikkila maano nkwatondezya mwaalu kulakonzya kupa kuti muntu iwatyompedwe kumuuya atalike kuyanzana ambungano alimwi. Eeci ncocakacitika kumukwesu Victor wamu Africa walo iwakacilekede kuyanzana ambungano. Wakaamba kuti: “Mumyaka iili lusele njondatakali kucita kabotu kumuuya, baalu bakazumanana kundiswaya.” Ino ncinzi cakamukulwaizya kapati? Wakaamba kuti: “Bumwi buzuba, mukwesu John, mwaalu walo ngotwakali limwi ku Cikolo Camulimo Wabupainiya, wakandiswaya akunditondezya zifwoto nzyaakatufwotola katuli kucikolo. Zifwoto eezyi zyakandipa kuti nditalike kuyeeya mbondakali kucita kaindi cakuti ndakatalika kulombozya lukkomano ndondakajisi ciindi nondakali kubelekela Jehova.” Nokwakainda buyo ciindi cisyoonto kuzwa ciindi ba John nobakabaswaya, ba Victor bakatalika kuyanzana ambungano alimwi. Sunu balabeleka alimwi mulimo wabupainiya. Masimpe, baalu Banakristo ibabikkila maano bapa kuti katuli bantu bakkomene kapati.—2 Ko. 1:24. *

22. Mbuti bululami aluumuno mbozikulwaizya lukamantano mumbunga ya Bunakristo? (Amubone akabbokesi kakuti “ Twakagambwa Kapati.”)

²² Mbubwenya mbokwaambwa kale musyule oomu, Jehova wakasinsima kuti bululami aluumuno zyakali kuyakuvwula akati kabantu ba Leza. (Is. 60:17) Bube oobu bobilo bupa kuti mbungano zikamantane. Munzila nzi? Kujatikizya bululami, “Jehova ngumwi.” (Dt. 6:4) Mbungano zyamucisi cimwi tazitobeli zyeelelo zyabululami ziindene azyeezyo zitobelwa ambungano zyamucisi cimbi. Zyeelelo zyakwe zyacibi acibotu nzimwi buyo, alimwi zilikozyene “mumbungano zyoonse zyabasalali.” (1 Ko. 14:33) Aboobo, mbungano ilakonzya kuzwidilila lilikke zyeelelo zya Leza nozitobelwa. Kujatikizya luumuno, Mwami wesu tayandi buyo kuti katukkomene akaambo kakuba aaluumuno, pele alimwi uyanda kuti katuli bantu “baleta luumuno.” (Mt. 5:9) Aboobo, ‘tulacita zyintu ziletela luumuno.’ Tulasolekesya kubweza ntaamu zyakumana mapenzi ikuti naa twaimpana aumwi akati kesu. (Lom. 14:19) Kwiinda mukucita boobu, tupa kuti kakuli luumuno alukamantano mumbungano yesu.—Is. 60:18.

23. Nzintu nzi zitupa kukkomana mazuba aano mbotuli babelesi ba Jehova?

²³ Musyule, mu November 1895, ciindi Ngazi Yamulindizi noyakaambilizya ciindi cakusaanguna bubambe bwakusala baalu, bakwesu ibali mumikuli bakatondezya luyandisisyo lwabo. Ino lwakali luyandisisyo nzi oolo? Bakali kulombozya akupailila kuti bubambe bwambunga oobu bupya bwakali kuyakugwasya bantu ba Leza “kufwambaana kukamantana mulusyomo.” Notulanga musyule myaka minji yainda, tulikkomene kuzyiba kuti kubambulula ooku ikwali kucitika buce-buce mumakani aabweendelezi kwacitwa a Jehova kwiinda mu Mwami wesu, alimwi kwapa kuti kube lukamantano luyumu ncobeni mubukombi bwesu. (Int. 99:4) Akaambo kaceeci, bantu ba Jehova nyika yoonse mbwiizulwa balikkomene kuti ‘tulikamantene mumizeezo ambabo,’ “akweenda mumukondo omwe anguwe,” alimwi akubelekela “Leza waluumuno.”—2 Ko. 12:18; amubale Zefaniya 3:9.