Jesu wapa baapostolo bakwe malailile aagwasya kujatikizya mbobeelede kuubeleka mulimo wakukambauka eelyo nobeenda bobilo-bobilo. Pele tanaagolela buyo waawo pe. Wabacenjezya kujatikizya basikukazya kuti: “Amubone! Ndamutuma mbuli mbelele akati kabaumpe . . . Amukabacenjelele bantu, nkaambo bayoomutola kunkuta akumukwibbaula muzikombelo zyabo. Muyootolwa kubeendelezi abami akaambo kandime.”—Matayo 10:16-18.

Ncobeni basikutobela Jesu bayoopenzyegwa kapati, pele wabakkazika moyo kwiinda mukubasyomezya kuti: “Ciindi nobamutola, mutalibiliki kuti muyakwaamba buti naa muyakwaamba nzi, nkaambo nzyomweelede kwaamba muyoopegwa aciindi eeco; nkaambo tamuli ndinywe nomwaambaula, pele muuya wa Uso nguwaambaula kwiinda mulindinywe.” Jesu wazumanana kuti: “Munyina uyakwaaba munyina kulufwu, ausyi uyakwaaba mwanaakwe, abana bayoobukila bazyali akubapa kuti bajaigwe. Alimwi muyoosulwa abantu boonse akaambo kazina lyangu, pele ooyo uuliyumya kusikila kumamanino uyoofwutulwa.”—Matayo 10:19-22.

Akaambo kakuti mulimo wakukambauka ulayandika kapati, Jesu wakankaizya kuti basikumutobela bayandika kucenjela kutegwa bazumanane kucita mulimo ooyu kabaangulukide. Waamba kuti: “Ciindi nobamupenzya mumunzi umwi, amutijile kuli umbi; nkaambo ncobeni ndimwaambila kuti, tamukamanizyi kuzinguluka minzi ya Israyeli katanasika Mwanaamuntu.”—Matayo 10:23.

Eelo kaka alagwasya majwi ngaamba Jesu ciindi naali kulailila, kucenjezya alimwi akukulwaizya baapostolo bakwe bali 12! Pele mulakonzya kubona kuti majwi aaya alabeleka akuli baabo ibayakutola lubazu mumulimo wakukambauka kuzwa ciindi Jesu aakufwa akubusyigwa. Eeci cilalibonya mumajwi ngaamba aakuti basikwiiya bakwe ‘bayoosulwa abantu boonse,’ ikutali buyo abantu aabo baapostolo nkobatumwa kuyookambauka. Kunze lyaboobo, kunyina nkotubala kuti ibaapostolo bakatolwa kubeendelezi abami muciindi eeci cisyoonto nobakali kucita mulimo wakukambauka mu Galilaya naa kuti bakaabwa abanamukwasyi kuti bajaigwe.

Cilisalede kuti Jesu waamba zyakumbele naambila baapostolo makani aaya. Amuyeeye majwi ngaamba aakuti basikwiiya bakwe tabakamanizyi kuzinguluka minzi yoonse kabayaabukambauka “katanasika Mwanaamuntu.” Jesu utondezya kuti basikwiiya bakwe tabakamanizyi kukambauka Bwami bwa Leza katanasika Mwami uulemekwa Jesu Kristo kali mubetesi uubikkidwe aa Leza.

Nobabeleka mulimo wakukambauka, baapostolo  tabeelede kunyandwa nobakazyigwa, nkaambo Jesu waamba kuti: “Sikwiiya tali mupati kwiinda mwiiyi wakwe, amuzike tali mupati kwiinda simalelaakwe.” Cilisalede ncaamba Jesu aawa. Walo bantu tabamucitili kabotu alimwi balamupenzya akaambo kakukambauka Bwami bwa Leza, aboobo mbociyakuba akuli basikwiiya bakwe. Pele Jesu wakulwaizya kuti: “Mutabayoowi aabo bajaya mubili pele batakonzyi kujaya buumi; pele kamuyoowa yooyo uukonzya kujaya buumi amubili mu Gehena.”—Matayo 10:24, 28.

Jesu wapa cikozyanyo mumakani aaya. Cakutayoowa wakaliyumya mane kulufwu muciindi cakuleka kusyomeka kuli singuzuzyoonse, Jehova. Ngu Leza Singuzuzyoonse uukonzya kunyonyoona “buumi” bwamuntu (nkokwaamba kuti ibulangizi bwakwe bwakupona alimwi kumbele) naa uukonzya kubusya muntu kuti abe abuumi butamani. Eelo kaka eeci ceelede kuti cabakkazika moyo kapati baapostolo!

Jesu wapa cikozyanyo citondezya Leza mbwabalanganya caluyando basikumutobela kwiinda mukwaamba kuti: “Sena tutiiti tobilo tatusambalwi kakkobili komwe kajisi mpindu nsyoonto? Nokuba boobo, kunyina nokaba komwe kayoowida ansi Uso katakonzyi kuzyiba. . . . Aboobo, mutayoowi pe; nywebo mulayandika kwiinda tutiiti tunji.”—Matayo 10:29, 31.

Mulumbe ngobakambauka basikwiiya ba Jesu uyakwaandaanya mikwasyi, banamukwasyi bamwi bayakuuzumina kakuli bamwi bayakuukaka. Jesu wapandulula kuti: “Mutayeeyi kuti ndakaboola kuleta luumuno anyika.” Inzya, munamukwasyi uyandika kuba sicamba kutegwa akatambule kasimpe kamu Bbaibbele. Jesu waamba kuti: “Kufwumbwa muntu uuyandisya bausyi naa banyina kwiinda ndime teelede kuba wangu; alimwi kufwumbwa muntu uuyandisya mwanaakwe musankwa naa musimbi kwiinda ndime teelede kuba wangu.”—Matayo 10:34, 37.

Nokuba boobo, bamwi bayakubatambula kabotu basikwiiya bakwe. Waamba kuti: “Kufwumbwa uupa nkapu yamaanzi aakunywa kuli umwi wabaniini aaba akaambo kakuti ngusikwiiya, ndimwaambila masimpe kuti, kunyina nayoosweekelwa bulumbu bwakwe pe.”—Matayo 10:42.

Jesu naamana kubalailila, kubacenjezya alimwi akubakulwaizya, baapostolo baunka kabalibambilide kubeleka mulimo “mucilawo coonse munzi amunzi, kabayaabwaambilizya makani mabotu akuponya bantu koonse-koonse.”—Luka 9:6.