Petro wazwa akumvwa Jesu kapa lulayo lujatikizya banabunyina bobilo mbobakonzya kubamba twaambo akati kabo kwiinda mukusola kubandika balikke kumbali. Nokuba boobo, kuboneka kuti Petro uyanda kuzyiba kuti naa muntu weelede kusola kucita boobo ziindi zyongaye.

Petro wabuzya kuti: “Mwami, ino mukwesu weelede kundibisyila ziindi zyongaye kandimulekelela? Sena nkusikila kuziindi zili ciloba?” Bamayi babukombi bamwi bayiisya kuti muntu weelede kulekelela mweenzinyina ziindi zyotatwe buyo. Aboobo ambweni Petro uyeeya kuti inga watondezya luzyalo kapati ikuti naa walekelela munyina “kusikila kuziindi zili ciloba.”—Matayo 18:21.

Pele ooyu muuya wakubikkilila zibi taweendelani anzyayiisya Jesu. Aboobo Jesu wamululamika Petro ategwa: “Tandikwaambili kuti ziindi zili ciloba pe, pele nkusikila kuziindi zili 77.” (Matayo 18:22) Munzila imwi, eeci caamba kulekelela bamwi lyoonse. Takweelede kubikkwa mweelwe uugaminide waziindi Petro nzyayelede kulekelela munyina.

Mpoonya Jesu waambila Petro abeenzinyina cikozyanyo icikankaizya kuti beelede kulekelela bamwi. Ncikozyanyo camuzike iwaalilwa kwiiya simalelaakwe siluse. Mwami uyanda kuti bazike bakwe bapilusye zikwelete kulinguwe. Muzike umwi uujisi cikwelete cipati kapati camatalenta aali 10,000 [madinari aali 60,000,000] waletwa kulinguwe. Kunyina mbwakonzya kubbadela cikwelete eeci. Aboobo mwami walailila kuti muzike ooyu, mukaintu wakwe, alimwi abana bakwe basambalwe akujola cikwelete. Amvwe boobo muzike ooyu wamufwugamina simalelaakwe, akumukombelezya kuti: “Akaka kondeengelela, ndiyookupilusizya zyoonse.”—Matayo 18:26.

Mwami weetezyegwa, wamufwida luse akumulekelela cikwelete cipati muzike wakwe. Mwami mbwaamanina buyo kucita boobo, ooyu muzike waunka akujana muzikenyina uujisi cikwelete camadinari aali 100 kulinguwe. Muzike ooyu wamujata muzikenyina akutalika kumusina, ulaamba: “Ndipe mali aangu oonse ngookakweleta.” Pele ooyo muzikenyina wamufwugamina mweenzinyina  nkwaakakweleta mali, akumukombelezya kuti: “Akaka kondeengelela, ndiyookujolela mali aako.” (Matayo 18:28, 29) Nokuba boobo, muzike ooyo mwami ngwaakalekelela cikwelete tanaamwiiya pe simalelaakwe. Wabweza muzikenyina ooyo uujisi cikwelete ciniini kulinguwe akumubikka muntolongo kusikila mane akabbadele cikwelete.

Mpoonya Jesu waamba kuti bazike bamwi ibabona ncaacita muzike ooyu uutakwe luse baunka baakwaambila simalelaabo, ooyo cabukali iwaita muzike ooyu akumwaambila kuti: “Omuzike mubi, ndakakulekelela cikwelete coonse eeciya nookandikombelezya. Sena ayebo tonooyelede kumufwida luse muzikenyoko mbubonya mbundakakufwida luse?” Mwami ooyu wanyema kapati eelyo wamutola kuli basintolongo muzike ooyu uutakwe luse kusikila mane akajole cikwelete coonse. Jesu wamanizya amajwi aakuti: “Mbubonya buyo Taata uuli kujulu awalo mbwayoomucitila ikuti umwi aumwi wanu katalekeleli munyina camoyo woonse.”—Matayo 18:32-35.

Eelo kaka ncibotu ciiyo eeci iceelede kutuyiisya kulekelela bamwi! Leza watulekelela zibi zinji izili mbuli cikwelete cipati kapati. Kufwumbwa cibi mukwesu Munakristo ncakonzya kutucitila nciniini kapati twaceelanya azyeezyo nzyotubisyila Leza. Kunze lyaboobo, Jehova tatulekeleli buyo ciindi comwe, pele ulacita oobo ziindi zinji kapati. Sena andiswe tatweelede kulekelela mukwesu ziindi zinji, nokuba kuti tulijisi kaambo kakumutongooka? Mbubonya Jesu mbwaakayiisya mu Mulumbe Waacilundu, Leza ‘uyootulekelela zibi zyesu, mbubonya andiswe mbotubalekelela batubisyila.’—Matayo 6:12.