Lino Jesu abasikwiiya bakwe bagama kunyika ku Galilaya. Nciindi cacilimo, eelyo mumyuunda kuli maila kumyaangala. Mbwaanga bafwide nzala, basikwiiya bapulula myaangala yamaila akulya. Pele oobu mbuzuba bwa Sabata, alimwi ba Farisi babona nzyobacita.

Ambweni muliyeeyede kuti caino-ino aawa ba Juda bamwi mu Jerusalemu bakali kuyanda kumujaya Jesu, kabamutamikizya kuti utyola mulawo wa Sabata. Lino ba Farisi bamupa mulandu akaambo kaceeco ncobacita basikwiiya bakwe. Bamwaambila kuti: “Bona! Basikwiiya bako bacita cintu citazumizyidwe mu Sabata.”—Matayo 12:2.

Ba Farisi baamba kuti kupulula maila akwaapuka mumaanza kutegwa aligwe, nkutebula akupupulula. (Kulonga 34:21) Akaambo kakuti balaciindizya kupandulula ncocaamba kubeleka, bapa kuti buzuba bwa Sabata bube mukuli uuminya, kakuli kumatalikilo bwakabambilwa kuti kabuli buzuba bwakukondwa, bwakuyumizyigwa kumuuya. Aboobo Jesu waingula akutondezya kuti mizeezo yabo tiiluzi kwiinda mukubelesya zikozyanyo izitondezya kuti Jehova Leza kunyina naakajisi makanze aakuti mulawo wakwe wa Sabata kautobelwa boobu.

Cikozyanyo cimwi ncaapa Jesu ncica Davida abaalumi bakwe. Nobakafwa nzala, bakaleya atente lyakukombela akulya zinkwa zyacituuzyo. Zinkwa eezyo, aciindi eeco izyakagusyidwe kale kumbele lya Jehova akubikkilwa zinkwa zipya mubusena bwanzizyo, mubwini zyakeelede kuligwa buyo abapaizi. Pele, mubukkale oobu, Davida abaalumi bakwe tiibakapegwa mulandu akaambo kakuzilya.—Levitiko 24:5-9; 1 Samuele 21:1-6.

Kapa cikozyanyo cabili, Jesu waamba kuti: “Sena tiimwakabala mu Mulawo kuti mu Sabata, bapaizi  mutempele balausotoka mulawo wa Sabata pele balazumanana kubula mulandu?” Ncapandulula ncakuti nomuba mu Sabata, bapaizi balajaya banyama bakupaizya akucita milimo iimbi kutempele. Jesu wati: “Pele ndimwaambila kuti imupati kwiinda tempele nkwali aano.”—Matayo 12:5, 6; Myeelwe 28:9.

Jesu alimwi wabelesya Magwalo kusalazya kaambo nkaamba, ulaamba: “Ikuti nimwalizyi ncaamba majwi aaya aakuti, ‘Ncendiyanda nduse ikutali cipaizyo,’ nomwatababeteka bantu batakwe mulandu.” Mpoonya wamanizya amajwi aakuti: “Nkaambo Mwanaamuntu ngo Mwami wa Sabata.” Jesu waamba bulelo bwaluumuno bwamyaka iili cuulu buboola kumbele mu Bwami bwakwe.—Matayo 12:7, 8; Hosea 6:6.

Bantu bapenga kwaciindi cilamfwu mubuzike bwa Saatani, mwalo muzwide manyongwe alimwi ankondo. Eelo kaka eeci ciyakwiindana akuba mubuzuba bupati bwa Sabata yabulelo bwa Kristo, walo uuyakutupa ciindi cakulyookezya ncotulombozya alimwi ncotupengede!