Nokwainda buyo ciindi cisyoonto kuzwa leelyo naamba zyakulekelela cibi kuŋanda ya Simoni mu Farisi, Jesu watalika lweendo alumbi lwakukambauka mu Galilaya. Lino uli mumwaka wabili wamulimo wakwe, alimwi tali alikke mulweendo oolu. Ulaantoomwe abaapostolo bali 12, kubikkilizya abamakaintu bamwi ‘mbaakaponya kumyuuya mibi akumalwazi.’ (Luka 8:2) Akati kabo kuli Mariya Magadalene, Susana alimwi a Joana ooyo uukwetwe kumwaalumi uubeleka ku Mwami Heroda Antipa.

Mbobayaabuvwula bantu ibamvwa makani aajatikizya Jesu, akwalo kukazyanya kwaindila kujatikizya mulimo wakwe. Eeci calibonya ciindi mwaalumi umwi uunjidwe daimona, imoofwu alimwi syaataambi, naaletwa kuli Jesu akuponesyegwa. Mwaalumi ooyu lino wagusyigwa daimona ilyali kumweendelezya, aboobo watalika kubona akwaambaula. Bantu boonse bagambwa akutalika kwaamba kuti: “Sena ooyu inga katali ngo Mwana wa Davida?”—Matayo 12:23.

Makamu aabantu aabungene kuŋanda nkwabede Jesu mapati cakuti walo abasikwiiya bakwe tabajisi aciindi cakuti balye cakulya. Pele tabali boonse bayeeya kuti Jesu “Mwana wa Davida” ooyo iwakasyomezyegwa. Balembi aba Farisi bamwi baboola kuzwa ku Jerusalemu ooko kulamfwu pe, ikutali kuti baboolela kuzyikwiiya kuli Jesu naa kubelekela antoomwe anguwe. Baambila bantu kuti: “Unjidwe Belezebule” aboobo ubelekelaamwi “amweendelezi wamadaimona.” (Marko 3:22) Babbululu ba Jesu nobamvwa manyongwe, baboola kuti bamujate Jesu. Ino bayanda kumujatila nzi?

Kayi aciindi eeci banabokwabo Jesu tabasyomi kuti Jesu Mwana wa Leza. (Johane 7:5) Jesu ooyu uuboneka kuti nguuleta manyongwe aaya akati kabanamaleya tali ngo Jesu ngobazyi kuzwa kaindi ngobakali kukomena limwi mu Nazareta. Kabayeeya  kuti kuli calubila mubongo bwa Jesu, baamba kuti: “Wasondoka.”—Marko 3:21.

Pele, ino bumboni butondezya nzi? Jesu wazwa aakuponya muntu iwakanjidwe daimona, ooyo lino iwatalika kubona akwaambaula. Taaku uukonzya kwaakazya makani aaya. Aboobo balembi aba Farisi basola kumuubula Jesu kwiinda mukumwaamba zintu zyakubeja. Baamba kuti: “Muntu ooyu utanda madaimona kwiinda munguzu zya Belezebule, imweendelezi wamadaimona.”—Matayo 12:24.

Jesu ulizyizyi nzyobayeeya balembi aba Farisi, aboobo waamba kuti: “Bwami buli boonse bwaandeene bulanyonyooka, amunzi naa ŋanda iili yoonse yaandeene ilawa. Ncimwi buyo, ikuti Saatani utanda Saatani, nkokuti waandaana mwini; aboobo ino bwami bwakwe bulaima buti?”—Matayo 12:25, 26.

Eelo kaka bulisalede bupanduluzi oobu! Ba Farisi balizyi kuti ba Juda bamwi balatanda madaimona. (Milimo 19:13) Aboobo Jesu wabuzya kuti: “Ikuti mebo nditanda madaimona munguzu zya Belezebule, ino bana banu baatanda munguzu zyani?” Munzila imwi, mulandu ngobapa Jesu weelede kupegwa akulimbabo. Mpoonya Jesu wayaambele kubasalazyila makani, wati: “Pele ikuti naa nditanda madaimona munguzu zyamuuya wa Leza, nkokuti Bwami bwa Leza ncobeni bwamusikila kamutabuyeeyeli.”—Matayo 12:27, 28.

Ikutondezya kuti ikutanda madaimona nkwacita kupa bumboni bwakuti ulaanguzu kwiinda Saatani, Jesu waamba kuti: “Ino mbuti umwi mbwakonzya kunjila muŋanda yamuntu singuzu akubweza zintu zyakwe? Ccita kuti wasaanguna kumwaanga muntu ooyo singuzu, ndendilyo nakonzya kusaala ŋanda yakwe. Kufwumbwa ooyo uutali kulubazu lwangu mulwani wangu, alimwi kufwumbwa ooyo uutabunganyi antoomwe andime ulamwaya.” (Matayo 12:29, 30) Cilisalede kuti balembi aba Farisi balwana Jesu, aboobo balitondezya kuti mbabelesi ba Saatani. Bamwaya bantu kuzwa ku Mwana wa Leza, ooyo uucita milimo yakwe kwiinda mukugwasyigwa aa Jehova.

Jesu wacenjezya basikukazya aaba ibabelesyegwa a Saatani kuti: “Bantu bayoolekelelwa zintu zyoonse, kufwumbwa naa nzibi zili buti nzyobacita amasampu aali buti ngobaamba. Pele kufwumbwa uusampaula muuya uusalala takalekelelwi mane kukabe kutamani, pele ulijisi mulandu wacibi citamani.” (Marko 3:28, 29) Amuyeeye buyo ncocaamba eeci kuli baabo baamba kuti zintu zicitwa kwiinda mumuuya wa Leza zicitwa munguzu zya Saatani!