Jesu abasikwiiya bakwe bone nobayaabukambauka ‘muzikombelo zyamu Galilaya moonse,’ mpuwo iijatikizya zintu zibotu kapati nzyacita Jesu yamwaika koonse-koonse. (Marko 1:39) Makani aajatikizya zintu nzyacita asakana mane asika kumunzi umwi ikuli mwaalumi uuciswa cinsenda. Musilisi Luka umupandulula kuti “wakazwide cinsenda mubili woonse.” (Luka 5:12) Ikuti cakomena cilwazi eeci cibyaabi, asyoonto-syoonto cilalya zizo zyamubili.

Aboobo ooyu sicinsenda uli mubukkale bweetezya kapati alimwi uyandika kukkalila kulamfwu abantu. Kuyungizya waawo, weelede koompolola kuti “Ndilisofweede, ndilisofweede!” ciindi bantu nobaswena munsi-munsi, aboobo ubakwabilila kuti batasiki afwaafwi anguwe kutegwa batayambukilwi. (Levitiko 13:45, 46) Pele ino sicinsenda ooyu wacita buti lino? Waboola kuli Jesu, wamukotamina akumulomba kuti: “Mwami, ikuti koyanda, ulakonzya kundisalazya.”—Matayo 8:2.

Eelo kaka muntu ooyu ulaalusyomo muli Jesu! Alimwi uleetezya kapati mbwalibonya akaambo kacilwazi eeci! Ino Jesu ulacita buti? Ino nywebo nomwakacita buti ikuti nomwakaliko? Akaambo kakweetezyegwa, Jesu watambika janza lyakwe akujata muntu ooyu. Jesu wati: “Ndilayanda! Kosalazyigwa.” (Matayo 8:3) Nokuba kuti bamwi cilakonzya kubayumina kusyoma, cinsenda camulwazi ooyu camana mpoonya aawo.

Sena inga tiimwayanda kuba amwami silubomba alimwi iweelela mbubonya mbwabede Jesu? Mbwaamucitila sicinsenda ooyu citupa kusyoma kuti Jesu aakuba Mwami weendelezya nyika yoonse, buyoozuzikizyigwa businsimi oobu bwamu Bbaibbele bwakuti: “Muntu uupengede alimwi amucete uyoobafwida lubomba, alimwi uyoofwutula buumi bwabacete.” (Intembauzyo 72:13) Inzya, ciindi eeco Jesu uyoozuzikizya makanze ngajisi mumoyo aakugwasya bantu boonse bapengede.

Mulakonzya kuyeeya kuti noliba leelyo katanaponya sicinsenda ooyu, mulimo wa Jesu walikubapa kukkomana kapati bantu. Lino bantu balatiimvwe makani aacintu eeci citaliboteli ncaacita. Nokuba boobo, Jesu tayandi kuti bantu bamusyome akaambo buyo kakumvwa mamvwaamvwa pe. Ulibuzyi businsimi ibwaamba kuti “takalekeli kuti jwi lyakwe limvwugwe munzila,” nkokuti, kwiinda mumakani aambwa munzila iinyamuna moyo. (Isaya 42:1, 2) Aboobo, Jesu walailila sicinsenda ooyo iwaponesyegwa kuti: “Utaambili muntu naba omwe, pele koya ukalitondezye kumupaizi akupa cipego eeco Musa ncaakaamba.”—Matayo 8:4.

Pele, mbubonya mbomuzyi, muntu ooyu wakkomana kapati akaambo kakuponesyegwa cakunga camwaalila kuumuna buyo kujatikizya ceeci camucitikila. Waunka akumwaya makani aaya koonse-koonse. Eeci capa kuti bantu babe aluyandisyo kapati akuyanda kulibonena ameso aabo. Limwi zintu zyasika aakuti Jesu takonzyi pe kunjila mumunzi caantangalala, aboobo kwalino watalika kukkala mumasena aakulamfwu ooko kutakkali bantu. Nokuba boobo, bantu ibazwa kumasena oonse baboola kulinguwe kuzyikuyiisyigwa akuponesyegwa.