Jesu wapandulula kuti balikke aabo bali mu “katanga kaniini” mbabayoopegwa busena bwakulela mu Bwami bwakujulu. (Luka 12:32) Pele kupegwa bulumbu oobu butaliboteli makani mapati. Mubwini, Jesu wayaambele ikukankaizya muntu mbwayandika kuba amizeezo mibotu ikuti kayanda kuba akati kabaabo bayakuba mu Bwami.

Aboobo, Jesu walailila basikwiiya bakwe kuti lyoonse beelede kulibambila kuboola kwakwe. Waamba kuti: “Amusame akulibambila, aalo malambe aanu kaayaka lyoonse, alimwi nywebo amube mbuli babelesi balindila simalelaabo uupiluka kuzwa kupobwe lyabwiinga, kutegwa mbwatiisikile buyo akukonkomona, bamujalwide. Balikkomene babelesi aabo simalelo asika mbatiijane balalindila!”—Luka 12:35-37.

Kakunyina buyumuyumu, basikwiiya bazyiba mizeezo njakulwaizya Jesu mucikozyanyo eeci. Babelesi mbaamba balilibambilide, balindila kumutambula simalelaabo asika. Jesu wapandulula kuti: “Ikuti [simalelo] wasika aciindi cakulinda cabili [kuzwa kuma 9 kiloko yamasiku kusikila akaandabwe kabusiku] naa aciindi cakulinda catatu [kuzwa akaandabwe kabusiku kusikila kuma 3 kiloko yamasiku], akubajana kabalibambilide, balikkomene kapati!”—Luka 12:38.

Lulayo oolu lwaamba zinji, talujatikizyi buyo kuba babelesi baaŋanda bankutwe pe. Eeci cilalibonya twalanga Jesu, Mwanaamuntu, mbwaalibikkilizya mucikozyanyo eeci. Waambila basikwiiya bakwe kuti: “Kamulibambilide lyoonse andinywe, nkaambo aciindi ncomutayeeyeli, Mwanaamuntu ulaboola.” (Luka 12:40) Aboobo aciindi cimwi kumbele, Jesu uyakuboola. Uyanda kuti basikumutobela kabalibambilide—ikwaambisya aabo bali mu “katanga kaniini.”

Petro uyanda kumvwisya ncapandulula Jesu, aboobo wabuzya kuti: “O Mwami, sena waambila buyo ndiswe cikozyanyo eeci naa boonse?” Muciindi cakuvwiila Petro cacigaminina, Jesu wapa cikozyanyo acimbi ceendelana amakani aaya, wati: “Ino mubwini nguni mubanzi uusyomeka, uucenjede, ooyo Simalelaakwe ngwayoosala kulanganya babelesi bakwe ikuti lyoonse kabapa cakulya cikkwene aciindi ceelede? Ulikkomene muzike ooyo ikuti Simalelaakwe aakusika akamujane kacita oobo! Ndimwaambila masimpe kuti, uyoomusala kulanganya lubono lwakwe loonse.”—Luka 12:41-44.

Cakutadooneka, mucikozyanyo cakusaanguna, “simalelo” ngu Jesu, Mwanaamuntu. Aboobo cililuzi kwaamba kuti “mubanzi uusyomeka” mbaalumi ibali akati kabaabo bali mu “katanga kaniini” alimwi ibayakupegwa Bwami. (Luka 12:32) Aawa Jesu waamba kuti bamwi bamukakamu aaka banoosanina “babelesi bakwe,” kubapa “cakulya cikkwene aciindi ceelede.” Aboobo, Petro abasikwiiya bambi aabo Jesu mbali mukuyiisya akusanina munzila yakumuuya beelede kuti babona kuti kumbele kuyakuba ciindi eelyo Mwanaamuntu nayakuboola. Alimwi kuciindi eeco, kunooli bubambe bubeleka bwakubasanina munzila yakumuuya basikutobela Jesu, nkokuti “babelesi” ba Simalelo.

Munzila aimbi, Jesu wakankaizya kaambo basikwiiya bakwe ncobeelede kupakamana akubikkila maano kujatikizya mbobayeeya ambobalimvwa. Cili boobo akaambo kakuti muntu ulakonzya kuliiba mane buya akutalika kukazya beenzinyina, aboobo Jesu wati: “Pele ikuti muzike ooyo mumoyo wakwe waamba kuti, ‘Simalelaangu wamuka kuboola,’ kumane watalika kuuma bazikenyina baalumi abamakaintu, alimwi akulya, kunywa akukolwa, simalelo wamuzike ooyo uyooboola mubuzuba mbwatamulangili alimwi aaciindi ncatazyi, eelyo uyoomusubula acisubulo cipati alimwi akumubikka antoomwe abantu batasyomeki.”—Luka 12:45, 46.

Jesu waamba kuti wakaboolela “kukunka mulilo  anyika.” Masimpe waukunka, wabusya makani aabapa kukazyanya kapati bantu alimwi aanyonyoona njiisyo zyakubeja alimwi atunsiyansiya. Eeci mane capa kuti bantu ibeelede kukamantana baandaane, caandaanya “bausyi amwana wabo musankwa, mwana musankwa abausyi, banyina amwana wabo musimbi, mwana musimbi abanyina, banyinazyala amukamwana, amukamwana abanyinazyala.”—Luka 12:49, 53.

Makani aaya ngaali kwaamba ikapati ageme basikwiiya bakwe. Mpoonya Jesu wagama makamu aabantu. Ibunji bwabantu mbaasicinguni, bakaka kuzumina bumboni bwakuti walo ngo Mesiya, aboobo wabaambila kuti: “Mwabona kkumbi linyamuka kumbo ndilyonya mwaamba kuti, ‘Kuboola mvwula yaguwo,’ eelyo ncobeni ilaboola. Alimwi muwo nowuunga kuzwa kumusanza, mwaamba kuti, ‘Kunoopya sunu,’ eelyo ncobeni kulapya. Nywebo nobasikuupaupa ameso, mulizyi kupandulula mbokuboneka anyika akujulu, pele ino nkaambo nzi ncomutacizyi kupandulula ncocaamba ciindi ecino?” (Luka 12:54-56) Cilisalede kuti bantu aaba tabalibambilide pe.