Kumatalikilo aamangolezya sunu, Jesu wayiisya basikwiiya bakwe ciiyo cijatikizya kulicesya kwiinda mukubasanzya kumaulu. Lino, ambweni nobamana kulya Pobwe Lyakwiindilila, Jesu wazubulula majwi aa Davida aabusinsimi aakuti: “Naba mweenzuma mwini-mwini, ooyo ngondakali kusyoma, iwakali kulya cinkwa cangu, wandibukila.” Kumane waamba kuti: “Umwi akati kanu ulandaaba.”—Intembauzyo 41:9; Johane 13:18, 21.

Baapostolo balangana, eelyo umwi aumwi wabo wabuzya kuti: “Mwami, sena ndime?” Naba Judasi Isikariote awalo wabuzya mbubonya. Petro waambila Johane, ooyo uubambene a Jesu kutebulu, kuti amubuzye naa kuti nguni. Aboobo Johane waswena afwaafwi a Jesu akubuzya kuti: “O Mwami, ino nguni?”—Matayo 26:22; Johane 13:25.

Jesu wavwiila kuti: “Ngooyo ngonditiipe kankwa nkondisunsa.” Mpoonya Jesu wasunsa kankwa mumbale iili atebulu, akutambika Judasi ulaamba: “Mwanaamuntu ulamusiya nyoonse, mbubonya mbokulembedwe kujatikizya nguwe, pele maawe kumuntu ooyo iwaaba Mwanaamuntu! Nocakainda kubota ikuti muntu ooyo naatakazyalwa buyo.” (Johane 13:26; Matayo 26:24) Kumane Saatani wamunjila Judasi. Mwaalumi ooyu imubi, lino walyaaba kucita kuyanda kwa Diabolosi, aboobo waba “mwana walunyonyooko”—Johane 6:64, 70; 12:4; 17:12.

Jesu waambila Judasi kuti: “Eeco ncocita kofwambaana kucicita.” Ibaapostolo bamwi bayeeya kuti Judasi, mbwali ngonguwe uujisi ciyobwedo camali, waambilwa kuti: ‘Kaule zintu nzyotuyandika kupobwe, naa kuti weelede kubapa cintu cimwi bacete.’ (Johane 13:27-30) Muciindi caboobo, Judasi waunka kuyakwaaba Jesu.

Mangolezya ngamunya aaya aa Pobwe Lyakwiindilila, Jesu watalisya pobwe limbi lipya. Wabweza cinkwa, wapa mupailo wakulumba, wacikomoona, akupa baapostolo bakwe kuti balye. Waamba  kuti: “Eeci ciiminina mubili wangu uupegwa akaambo kandinywe. Kamucita oobu lyoonse kutegwa kamundiyeeya.” (Luka 22:19) Baciinzya cinkwa akati kabo, alimwi baapostolo bacilya.

Lino Jesu wabweza nkapu yawaini, wapa mupailo wakulumba, mpoonya wabatambika. Umwi aumwi wabo wanywa waini uuli munkapu eeyi Jesu njaamba kuti: “Inkapu eeyi yiiminina cizuminano cipya iciyeeme abulowa bwangu ibuyootilwa akaambo kandinywe.”—Luka 22:20.

Aboobo Jesu watalisya bubambe bwaciibalusyo calufwu lwakwe eeco basikumutobela ncobeelede kucita amwaka mubuzuba bwa Nisani 14. Cinoobayeekezya ceeco Jesu alimwi a Bausyi ncobakacita kutegwa bantu ibasyoma banununwe kukusinganizyigwa kucibi alufwu. Citondezya lwaanguluko lwini-lwini lwabantu ibasyoma ilupati kwiinda lwaanguluko lwakaletwa a Pobwe Lyakwiindilila lyaba Juda.

Jesu waamba kuti bulowa bwakwe “buyootilwa kutegwa zibi zyabantu banji zilekelelwe.” Baapostolo bakwe ibasyomeka alimwi abantu bambi ibali mbuli mbabo bali akati kabantu banji ibayakulekelelwa zibi zyabo. Mbambabo ibanooli anguwe mu Bwami bwa Bausyi.—Matayo 26:28, 29.