Ibuzuba butobela, mu Nsondo, Nisani 9, Jesu wazwa ku Betaniya abasikwiiya bakwe akugama ku Jerusalemu. Nobalondelela kusika ku Betefage, aa Cilundu ca Maolifa, Jesu waambila basikwiiya bakwe bobilo kuti:

“Kamuya mumunzi uulya uulibonya, eelyo muyoojana mbongolo yaangidwe antoomwe amwana wanjiyo. Mukazyaangunune akuzileta kulindime. Ikuti umwi amubuzye, mumwaambile kuti, ‘Mwami ulaziyanda.’ Ndilyonya uyoomupa.”—Matayo 21:2, 3.

Basikwiiya baalilwa kubona kuti malailile ngaabapa Jesu ajatikizya businsimi bwamu Bbaibbele. Pele kumbele, bazyiba kuti malailile aaya azuzikizya businsimi bwa Zekariya. Wakasinsima kuti Mwami wakasyomezyegwa a Leza uyakunjila mu Jerusalemu ‘cakulicesya, alimwi katantide ambongolo, amwana wambongolo, inzya, imwana wambongolo nzyazi.’—Zekariya 9:9.

Basikwiiya nobasika ku Betefage akubweza mwana wambongolo alimwi ambongolo nzyazi, bantu ibaimvwi afwaafwi babuzya kuti: “Ino mumwaangunwida nzi mwana wambongolo ooyo?” (Marko 11:5) Pele nobamvwa kuti Mwami nguubayanda banyama aaba, babaleka basikwiiya kuti bababweze banyama akubatola kuli Jesu. Basikwiiya babikka zisani zyabo zyaatala ambongolo alimwi aamwana wanjiyo, pele Jesu watanta aamwana wambongolo.

Nkamu yabantu yakomena eelyo Jesu nayaabweenda kuunka ku Jerusalemu. Bantu banji bayala zisani zyabo munzila. Bambi batyola mitabi yazisamu naa “tutabi mumbali aanzila” akutuyala ansi. Boongolola kuti: “Amumufwutule! Ulilelekedwe ooyo uuboola muzina lya Jehova! Bulilelekedwe Bwami buboola bwataateesu Davida!” (Marko 11:8-10) Ba Farisi ibali munkamu yabantu banyema nobamvwa koompolola ooku. Baambila Jesu kuti: “Omwiiyi, kobakalalila basikwiiya bako.” Jesu wabavwiila kuti: “Ndimwaambila kuti, ikuti aaba baumuna, mabwe alakonzya koompolola.”—Luka 19:39, 40.

Jesu naalanga munzi wa Jerusalemu, watalika kulila akwaamba kuti: “Eelo kaka nocainda kubota ikuti yebo omwini nowalizizyi mubuzuba obuno zintu zikonzya kukuletela luumuno—pele lino zyasiswa kumeso aako!” Jerusalemu uyakusubulwa akaambo kakutamvwida acaali. Jesu wasinsima kuti: ‘Basinkondonyoko bayookuyakila lubaya lwazisamu zibosya kukuzinguluka alimwi bayookubikka akati akukusinkila kumabazu oonse. Bayookuumputila ansi yebo abana bako bali mulinduwe, alimwi tabakasiyi bbwe atala aabbwenyina mulinduwe.’ (Luka 19:42-44) Masimpe, mbubonya mbwaakaamba Jesu, Jerusalemu wakanyonyoonwa mumwaka wa 70 C.E.

Jesu naanjila mu Jerusalemu, ‘bantu boonse mumunzi babilingana kabaamba kuti: “Ino nguni ooyu?”’ Alimwi makamu aabantu aluujisi kwaamba kuti: “Ooyu ngomusinsimi Jesu, uuzwa ku Nazareta mu Galilaya!” (Matayo 21:10, 11) Aabo ibali munkamu ibakamubona Jesu naakabusya Lazaro baambila beenzinyina kujatikizya maleele aayo. Ba Farisi batongooka, balibona kuti tabakoozwidilila pe. Balyaambauzya mulicabo kuti: “Nyika yoonse yamutobela.”—Johane 12:18, 19.

Mbuli cilengwa cakwe naswaya mu Jerusalemu, Jesu waunka kutempele kuyakuyiisya. Ookuya waponya boofwu alimwi abalema. Ciindi basilutwe babapaizi alimwi abalembi nobabona nzyacita alimwi akumvwa balombe mutempele kaboompolola kuti, “Amumufwutule Mwana wa Davida!” banyema. Basololi babukombi bamubuzya Jesu kuti: “Sena ulimvwide ncobaamba aaba?” Wabavwiila kuti: “Sena tiimwakabala kuti, ‘Yebo wapa kuti milomo yabana baniini abavwanda ikutembaule’?”—Matayo 21:15, 16.

Jesu walanga-langa zintu zili mutempele. Lino kwasiya, aboobo wazwa akuunka abaapostolo bakwe. Kabutanatalika buzuba bwa Nisani 10, wajokela ku Betaniya, ooko nkwaakoonena mubusiku bwamu Nsondo.