Mbuli mbomwaiya mubroshuwa eeyi, Bbaibbele lilijisi njiisyo zinji zikonzya kumugwasya nywebo amukwasyi wanu. Jehova uyanda kuti kamukkomana. Usyomezya kuti, ikuti mwabikka bukombi bwakwe mubusena bwakusaanguna “zyintu zimbi zyoonse eezyi ziyooyungizyigwa kulindinywe”. (Matayo 6:33) Ulayandisisya kuti abe mulongwe wanu. Amucite zyoonse nzyomukonzya kutegwa muyumye cilongwe canu a Leza. Eeci ncecoolwe cipati ciinda zyoonse muntu ncakonzya kuba ancico.—Matayo 22:37, 38.

NCOLYAAMBA BBAIBBELE: “‘Ndiyooba bauso, eelyo nywebo muyooba bana bangu basankwa abasimbi,’ mbwaamba Jehova.” (2 Bakolinto 6:18) Leza uyanda kuti mube mulongwe wakwe mwini-mwini. Mupailo ninzila imwi iikonzya kumugwasya kucita oobo. Jehova umutamba kuti ‘kamupaila cakutaleka.’ (1 Batesalonika 5:17) Uliyandide kapati kuzyiba mbomulimvwa alimwi anzyomuyeeya. (Bafilipi 4:6) Ikuti kamupaila antoomwe amukwasyi wanu, ciyoopa bamukwasyi wanu kubona Leza mbwali mwini-mwini kulindinywe.

Kunze lyakupaila kuli Leza, muyandika kumuswiilila. Inga mwacita oobo kwiinda mukwiiya Jwi lyakwe alimwi akubala mabbuku aamba zyamu Bbaibbele. (Intembauzyo 1:1, 2) Amuzinzibale kuyeeya zintu nzyomwiiya. (Intembauzyo 77:11, 12) Alimwi kumuswiilila Leza caamba kuti mweelede kujanika kumiswaangano ya Bunakristo lyoonse.—Intembauzyo 122:1-4.

Kwaambila bamwi kujatikizya Jehova ninzila imwi iiyandika kapati mbomukonzya kuyumya cilongwe canu anguwe. Kuti mwazumanana kucita boobo nkokuti muyoozumanana kuswena kulinguwe.—Matayo 28:19, 20.

NCOMUKONZYA KUCITA:

• Buzuba abuzuba amujane ciindi cakubala Bbaibbele alimwi akupaila

• Nyoonse mumukwasyi, amubikke milimo yakumuuya mubusena butaanzi muciindi cazintu zyakulikondelezya

NCOLYAAMBA BBAIBBELE: “Amuswene kuli Leza, eelyo awalo uyooswena kulindinywe.” (Jakobo 4:8) Mweelede kuba apulogilamu yakukomba mumukwasyi alimwi akwiitobela lyoonse. (Matalikilo 18:19) Pele kuli azimwi ziyandika. Mweelede kumubikkilizya Leza muzintu zyoonse nzyomucita abuzuba. Amuyumye cilongwe camukwasyi wanu a Jehova kwiinda mukubandika kujatikizya nguwe “ciindi cakukala muŋanda aciindi cakweenda munzila, ciindi cakoona aciindi cakubuka.” (Deuteronomo 6:6, 7) Amube amakanze aakuba mbuli Joshua iwakaamba kuti: “Pele mebo abasiŋanda bangu tulabelekela Jehova.”—Joshua 24:15.

NCOMUKONZYA KUCITA:

• Amube apulogilamu yakuyiisya iibikkilizya zintu nzyayandika umwi aumwi mumukwasyi wanu