1-3. Ncinzi ncaakabona Petro buzuba oobo, alimwi ncinzi cakacitika masiku?

PETRO wakali kugwasyilizya mukukwasula bwato masiku alimwi wakali kucita oobo canguzu. Sena ooyu wakali mumuni ngwaakabwene kujwe, kutondezya kuti bwaca? Milambi yakwe yakumusana alimwi amumakkuko yakali kucisa akaambo kakukwasula bwato kwaciindi cilamfwu. Muwo iwakali kupepelula masusu aakwe wakapa kuti mu Lwizi lwa Galilaya kube mayuwe kapati. Mayuwe akali kuuma kumbele aabwato alimwi wakalitetede akaambo kamaanzi aakali kumukupila. Wakazumanana kukwasula bwato.

² Amwi abusena kunkomwe yalwizi, Petro abeenzinyina bakalimusiide alikke Jesu. Buzuba oobu, bakalibonena ciindi Jesu naakasanina zyuulu-zyuulu zyabantu azinkwa zisyoonto buyo answi. Akaambo kaceeci, bantu bakali kuyanda kumubikka Jesu kuti abe mwami, pele taakwe naakali kuyanda kujatikizyigwa amfwulumende yabo. Alimwi tanaakali kuyanda kuti basikumutobela batole lubazu mutwaambo twacisi. Kutegwa bantu aaba batamujati, wakaambila basikwiiya bakwe kuti batante bwato akuunka mutala aalwizi kumane walo wakatanta cilundu alikke kuyakupaila.—Mk. 6:35-45; amubale Johane 6:14-17.

³ Ciindi basikwiiya nobakanyamuka mulweendo lwabo mwezi wakali acilungulungu, pele lino wakali kuyanda kubbila. Nokuba boobo, bakacikonzya buyo kweenda makkilomita masyoonto. Muwo iwakali kuzumanana kubbubbula alimwi amayuwe akapa kuti kumvwana mukwaambaula cikatazye. Kweelede kuti kuli zyintu Petro nzyaakali kuyeeya.

4. Nkaambo nzi Petro ncali cikozyanyo cibotu kulindiswe?

⁴ Eelo kaka kweelede kuti kwakali zyintu zinji nzyaakali kuyeeya! Kwakaindide myaka yobilo kuzwa ciindi Petro naakaswaangana a Jesu waku Nazareta ciindi cakusaanguna. Wakayiide zyintu zinji, pele alimwi  kwakacili zinji nzyaakeelede kwiiya. Wakalilibambilide kutazumizya cintu cilicoonse kumupa kuyoowa akudooneka Jehova alimwi a Jesu, alimwi mazuba aano tuyeezyegwa kuti ncikozyanyo cibotu kapati kulindiswe. Atubone naa nkaambo nzi.

5, 6. Ino Petro wakali kupona buumi buli buti?

⁵ Petro taakwe naakabuluba buzuba naakaswaanganya Jesu. Mwanookwabo, Andreya ngowakamuletela mulumbe mubotu ooyu ciindi cakusaanguna, wakuti: “Twamujana Mesiya.” Kwiinda mumajwi aayo, buumi bwa Petro bwakatalika kucinca. Taakwe nobwakali kuyakuba mbobwakabede kaindi.—Joh. 1:41.

⁶ Petro wakali kukkala ku Kapernauma, munzi iwakali kunkomwe yakunyika ya Lwizi lwa Galilaya. Walo a Andreya bakali kubelekela antoomwe a Jakobo alimwi a Johane, bana basankwa ba Zebedayo mumulimo wakuzuba nswi. Petro wakali kukkala amukaakwe, banyinazyala alimwi amwanookwabo, Andreya. Kutegwa ajane ziyandika zyakumubili zyamukwasyi uuli boobu kwiinda mukuzuba nswi, masimpe kwakali kuyandika kubeleka canguzu alimwi akucizyiba mulimo. Amweezeezye mazuba manji aakubeleka masiku, baalumi aaba kabawaala tunsabwe akati kamato obilo alimwi akuwaala mubwato kufwumbwa nswi nzyobakali kukonzya kujata mulwizi. Tulakonzya kweezeezya alimwi mbobakali kubeleka canguzu masyikati ciindi nobakali kusalaula nswi alimwi akusambala, kusuma alimwi akusalazya tunsabwe.

7. Ncinzi Petro ncaakamvwa kujatikizya Jesu, alimwi nkaambo nzi aaya ncaakali makani aakkomanisya?

⁷ Ibbaibbele litwaambila kuti Andreya wakali sikwiiya wa Johane Mubbapatizi. Tacidoonekwi buya kuti Petro wakali kuswiilila akubikkila maano mwanookwabo naakali kumwaambila makani aajatikizya milumbe ya Johane. Bumwi buzuba, Andreya wakabona Johane katondeka Jesu waku Nazareta akwaamba kuti: “Amubone, Mwanaambelele wa Leza!” Mpoonya aawo, Andreya wakaba sikwiiya wa Jesu alimwi wakaambila Petro makani aaya aakuti: Mesiya wasika! (Joh. 1:35-40) Kakwiindide myaka iibalilwa ku 4,000 kuzwa ciindi bantu nobakazanga mumuunda wa Edeni, Jehova Leza wakasyomezya kuti kuyakuboola muntu waalubazu uuyakupa bulangizi bwini-bwini kubantu. (Matl. 3:15) Andreya wakamuswaanganya muntu ooyu Sikufwutula bantu, Mesiya. Petro awalo wakafwambaana kuti akabone Jesu.

8. Ino zyina Jesu ndyaakaulika Petro lyakali kwaamba nzi, alimwi nkaambo nzi bamwi kusikila sunu bacidooneka kuti naa lyakali kumweelela?

⁸ Kusikila buzuba oobo, Petro wakali kwiitwa kuti Simoni. Pele Jesu wakamulanga akumwaambila kuti: “‘Nduwe Simoni mwana wa Johane; unooitwa kuti Kefa’ (izyina lisandululwa kuti Petulo).” (Joh. 1:42) Zyina lyakuti “Kefa” lyaamba “bbwe.” Cakutadooneka majwi aa Jesu akali aabusinsimi. Wakabonena limwi kuti Petro wakali kuyakuba mbuli bbwe—uukkalikene, muyumu alimwi uusyomeka akati kabasikwiiya boonse.  Sena Petro mbwaakali kulibona oobo? Kulibonya kuti wakali kudooneka kuti lusyomo lwakwe lwakali mbuli bbwe. Nobaba basikubala ba Makani Mabotu bamwi bamazuba aano tabazumini kuti Petro wakalikkalikene alimwi akusyomeka mbuli bbwe. Bamwi baamba kuti bube bwakwe kweelana ambobutondezyedwe mu Bbaibbele buboneka kuti bwakali kucinca-cinca alimwi tanaakakkalikene.

9. Ncinzi Jehova a Mwanaakwe ncobayandaula, alimwi nkaambo nzi ncomuyeeya kuti tweelede kusyoma mbobazyibona zyintu?

⁹ Petro wakali kulezya awalo, alimwi Jesu wakalikuzyi kulezya kwakwe. Pele Jesu mbubwenya mbuli Bausyi, Jehova, lyoonse wakali kuyandaula bubotu mubantu. Jesu wakalizyi kuti Petro wakajisi bube bunji bubotu, alimwi wakali kuyanda kuti amugwasye kubutondezya kapati bube oobo. Mbubwenya mbuli kaindi, Jehova a Mwanaakwe bayandaula bubotu mulindiswe mazuba aano. Ambweni tatusyomi kuti inga kakuli bubotu buliko mulindiswe mbobakonzya kujana. Nokuba boobo, tweelede kusyoma mbobazyibona zyintu alimwi akuba bantu balibambilide kuyiisyigwa, mbubwenya mbuli Petro.—Amubale 1 Johane 3:19, 20.

10. Kweelede kuti ncinzi Petro ncaakabona, nokuba boobo wakapiluka kuya kuli?

¹⁰ Kweelede kuti Petro wakamusangana Jesu mulweendo lwakuya kukukambauka ilwakatobela. Kweelede kuti wakabona Jesu naakacita maleele aakusaanguna, aakusandula maanzi kuba waini kubwiinga bwaku Kana. Ciyandika kapati ncakuti, wakamvwa mulumbe wa Jesu mubotu alimwi uupa bulangizi uujatikizya Bwami bwa Leza. Nokuba kuti wakamvwa alimwi akubona zyintu zyoonse eezyi, Petro taakwe naakazumanana kweenda a Jesu, wakapiluka kumulimo wakwe wakuzuba nswi. Nokwakainda myezi iili mbwiibede, Petro a Jesu bakaswaangana alimwi, aciindi eeci Jesu wakatamba Petro kuti katola ciindi cinji mumulimo wakukambauka a Jesu.

11, 12. (a) Ino Petro wakaliyumya kumulimo uuli buti ngwaakali kubeleka masiku aakaindide? (b) Ino mibuzyo nzi yeelede kuti yakaboola mumizeezo ya Petro ciindi naakali kuswiilila Jesu kayiisya?

¹¹ Busiku bwakaindide Petro wakaliyumya kumulimo uutyompya. Cakwiinduluka-induluka, bazubi banswi aaba bakafwusa tunsabwe twabo mumaanzi, pele taakwe nobakajata nswi zili zyoonse. Masimpe ngakuti, Petro wakabelesya luzyibo lwakwe loonse kutegwa ajane nswi, wakasola mumasena asiyene-siyene aalwizi kutegwa ajane nswi nkozyibede. Cakutadooneka, kuli ciindi Petro mbubwenya mbuli bazubi banswi banji, naakali kulombozya kusika aansi eeni aamaanzi akujana nswi nkozili zinji naa munzila imwi akuzipa kunjila mutunsabwe twakwe. Kweelede kuti Petro wakatyompwa kapati nkaambo taakwe ncaakali kukonzya kucita kuti nswi zinjile mutunsabwe twakwe. Petro wakali kuzuba nswi kutali akaambo kakuyanda kulikondelezya; bantu bakali kusyoma nguwe kukuzuba nswi. Kumamanino wakazwa mumaanzi cinkwamaanza.  Tunsabwe twakali kuyandika kusalazya. Aboobo, ciindi Jesu naakasika, Petro wakajisi bubi kusalazya tunsabwe.

¹² Kwakali bantu banji ibakazingulukide Jesu alimwi bakali kuswiililisya nzyaakali kwaamba. Akaambo kakuti kwakali bantu banji, Jesu wakanjila mubwato bwa Petro akumulomba kuti akwasule asyoonto kutegwa bazwe kunkomwe. Ijwi lyakwe kalilimvwisya kabotu, Jesu wakayiisya nkamu yabantu. Petro wakaswiililisya kapati, mbubwenya mbuli baabo bakali kunkomwe. Taakwe naakakatala kuswiilila Jesu kayiisya mutwe wamakani mapati wabukambausi bwakwe—Bwami bwa Leza. Kweelede kuti Petro wakali kuyeeya mbocakali kuyakuba coolwe cipati kugwasya Kristo kumwaya mulumbe ooyu uupa bulangizi munyika yoonse. Pele sena cakali kweelela kuyeeya kuti wakali kukonzya kumugwasya Kristo kukambauka mulumbe ooyu? Mbuti Petro mbwaakali kuya kujanina mukwasyi wakwe ziyandika? Andiza Petro wakayeeya alimwi kujatikizya mulimo wakuzuba nswi mbowakali kuyandika ciindi alimwi akubeleka canguzu. Kweelede kuti wakayeeya kuti cilakatazya kukambauka a Jesu kumwi kabeleka canguzu mumulimo wakwe.—Lk. 5:1-3.

13, 14. Ino maleele nzi Jesu ngaakacitila Petro, alimwi ino Petro wakacita nzi?

¹³ Ciindi Jesu naakamanizya kwaambaula, wakaambila Petro kuti: “Katuya akati kazyiba, eelyo nywebo nobaalumi muwaale tunsabwe twanu kutegwa mujaye nswi zinji.” Petro wakali kudooneka. Wakaamba kuti: “Mufwundisi, masiku oonse twalikubeleka kakunyina ncotwajaya, pele akaambo kakuti nduwe waamba ndilatuwaala tunsabwe.” Petro wakazwa aakumanizya kusanzya tunsabwe. Kwiinda mumajwi aakwe kulibonya kuti Petro tanaakali kuyanda kuwaala tunsabwe twakwe alimwi pe—kwaambisya aciindi eeci nkaambo nswi taakwe nozyakali kucela. Nokuba boobo, wakamvwida, kweelede kuti wakaambila abeenzyinyina bakali mubwato bumbi kuti babatobele.—Lk. 5:4, 5.

¹⁴ Cakutayeeyela ciindi Petro naakatalika kukwela tunsabwe kuzwa mumaanzi wakamvwa kuti twakali kulema. Kagambidwe wakakwela canguzu, kakutanainda ciindi wakabona nswi zinji zyakali kwiile kubbubba mukansabwe. Kayoowede, wakaunka kubaalumi bakali mubwato bumbi kuti bazikumugwasye. Nobakaboola, cakalibonya kuti bwato bomwe tiibwakali kukonzya kunyamuna zyoonse nswi. Bakazuzya mato woonse obilo, pele zyakali zinji cakuti mato akatalika kubbila akaambo kakulema kwanswi. Petro wakagambwa kapati. Wakabwene kale Kristo kabelesya nguzu zyakwe, pele cintu eeci icakacitika cakamugwasya amukwasyi wakwe. Mukwiimpana a Petro, Jesu wakajisi nguzu zyakupa kuti nswi zinjile mutunsabwe. Petro wakatalika kuyoowa. Wakafwugama akwaamba kuti: “Tantamuka kulindime O Mwami, nkaambo ndimuntu sizibi.” Mbuti mbwaakali kukonzya kweelela kuyanzana amuntu wakali kubelesya nguzu zya Leza munzila iili boobu?—Amubale Luka 5:6-9.

15. Mbuti Jesu mbwaakayiisya Petro kuti tanaakali kuyandika kudooneka alimwi akuyoowa?

 ¹⁵ Caluzyalo Jesu wakaamba kuti: “Utayoowi. Kuzwa lino unoozuba bantu baumi.” (Lk. 5:10, 11) Eeci tiicakali ciindi cakudooneka naa kuyoowa. Petro wakeelede kubikkila maano kumulimo wakali kuyandika wakukambauka muciindi cakudooneka kuti naa inga wacikonzya kulanganya mukwasyi wakwe naa kuti wakali kuyakucikonzya kukambauka. Jesu wakajisi mulimo mupati wakucita, mulimo iwakali kuyakucinca buumi bwakumbele bwabantu. Wakali kubelekela Leza “uuinda kulekelela.” (Is. 55:7) Jehova wakali kuyakumupa nzyayandika Petro kumubili akumuuya.—Mt. 6:33.

16. Ncinzi Petro, Jakobo alimwi a Johane ncobakacita Jesu naakabaita, alimwi nkaambo nzi kucita boobo ncokwakali kusala kubotu kapati?

¹⁶ Cakufwambaana Petro wakamumvwida Jesu mbubwenya mbuli Jakobo alimwi a Johane. “Bakatola mato aabo kucito akusiya zyoonse  akumutobela.” (Lk. 5:11) Kwiinda mukucita boobo, Petro wakatondezya lusyomo muli Jesu alimwi akuli yooyo wakamutuma. Kucita boobo, kwakali kusala kubotu kapati. Banakristo mazuba aano ibazunda kudooneka alimwi akuyoowa akaambo kakuyanda kubelekela Leza abalo batondezya lusyomo. Jehova lyoonse ulababikkila maano aabo bamusyoma.—Int. 22:4, 5.

17. Ncinzi Petro ncaakali kuyeeya kujatikizya zyakacitika mumyaka yobilo kuzwa ciindi naakaswaanganya Jesu?

¹⁷ Kakwiindide myaka yobilo kuzwa ciindi naakaswaangana a Jesu, Petro wakeenda abwato masiku kakubbubbula muuwo mu Lwizi lwa Galilaya, mbubwenya mbokwaambidwe kumatalikilo aacibalo eeci. Masimpe kuti tatukonzyi kuzyiba ncaakali kuyeeya. Kwakali zyintu zinji nzyaakeelede kuyeeya. Jesu wakazwa aakuponya banyinazyala Petro. Wakapede Mulumbe waa Cilundu. Cakwiinduluka-induluka, kwiinda mukuyiisya kwakwe alimwi amumilimo yakwe iigambya, wakatondezya kuti wakali Uusalidwe wa Jehova, Mesiya. Nokwakainda myezi, Petro wakaiya kweendelezya kuyoowa alimwi akudooneka kwakwe. Mane buya Jesu wakasala Petro kuba umwi wabaapostolo bali 12. Nokuba boobo, kakutanainda ciindi Petro wakazyiba kuti wakacili kuyoowa alimwi akudooneka.

18, 19. (a) Amupandulule Petro ncaakabona mu Lwizi lwa Galilaya? (b) Ncinzi Jesu ncaakacita kukulomba kwa Petro?

¹⁸ Kubucedo, akati kaciindi ca 03:00 hrs aciindi zuba nolyakali kupola, Petro wakaleka kukwasula bwato mpoonya wakakkala buyo mubwato. Akati kamayuwe kwakali cintu cakali kweenda. Sena mayuwe aakali kumweka akaambo kamwezi? Peepe, tiicakali kuputauka, cakaliimvwi. Wakali muntu. Inzya, wakali muntu alimwi muntu ooyu wakali kweenda atala aamaanzi mulwizi. Muntu ooyu naakali kuyaabuswena, wakali kulibonya mbuli kuti ulabwiindilila bwato. Kabayoowede, basikwiiya bakali kuyeeya kuti ncilengaano. Muntu ooyu wakati: “Amukkazyike myoyo! Ndime; mutayoowi pe.” Muntu ooyu wakali Jesu.—Mt. 14:25-28.

¹⁹ Petro wakaingula wati: “Mwami, ikuti naa nduwe ncobeni, kondaambila ndiboole kulinduwe kandeenda atala aamaanzi.” Kusaanguna Petro wakali sicamba. Kakkomene kapati amaleele aaya aalibedelede, Petro wakali kuyanda kusinizya lusyomo lwakwe alimwi. Wakali kuyanda kucita mbubwenya mbuli Jesu kutegwa ayumye lusyomo lwakwe. Calubomba, Jesu wakamwaambila kuti aboole kulinguwe. Petro wakazwa mubwato akuya mulwizi. Amuyeeye buyo mbwaakalimvwa Petro ciindi naakalyata acintu ciyumu alimwi akwiima atala aamaanzi. Kweelede kuti wakagambwa naakali kuya kuli Jesu. Nokuba boobo, tiilyakalampa kulimvwa boobo kwakamana.—Amubale Matayo 14:29.

20. (a) Mbuti Petro mbwaakaleka kubikkila maano, alimwi ncinzi cakacitika? (b) Nciiyo nzi Jesu ncaakamuyiisya Petro?

 ²⁰ Petro wakeelede kubikkila maano kuli Jesu. Ngu Jesu iwakali kubelesya nguzu zya Jehova, iwakali kupa kuti Petro atabbili mumayuwe. Alimwi Jesu wakali kucita oobo akaambo kalusyomo Petro ndwaakajisi mulinguwe. Pele Petro wakanyonganizyigwa. Tubala kuti: “Naakabona guwo wakayoowa.” Petro wakatalika kulanga mayuwe kauma kubwato akufwusa maanzi alimwi accovwu mumuwo, kumane wakanyongana. Ambweni wakali kweezeezya kuti wabbila mulwizi akunyikila. Ciindi naakayoowa kapati, lusyomo lwakwe alwalo lwakaya ansi. Mwaalumi wakapegwa zyina lyakuti Bbwe akaambo kakuti wakali kulibonya kuti ulikkalikene wakatalika kubbila cakufwambaana akaambo kakuzungaana kwalusyomo. Petro wakalicibwene kusaya, pele taakwe naakasyoma munguzu zyakwe aciindi eeci. Wakoongolola kuti: “Mwami, kondivwuna!” Jesu wakamujata kujanza akumukwela. Kumane, kacili atala aamaanzi, wakakankaizya ciiyo eeci ciyandika kuli Petro naakati: “Yebo osilusyomo luniini, nkaambo nzi ncoodooneka?”—Mt. 14:30, 31.

21. Nkaambo nzi kudooneka ncokuli kubyaabi, alimwi mbuti mbotukonzya kukulwana?

²¹ ‘Kudooneka’—eelo kaka lileelela bbala eelyo! Kudooneka kulijisi nguzu zyakunyonyoona kapati. Ikuti twazumanana kudooneka, lusyomo lwesu lulakonzya kuceya alimwi akumana. Tweelede kukweendelezya kudooneka kwesu. Munzila nzi? Kwiinda mukubikkila maano kuzyintu ziluzi. Ikuti twabikkila maano kuzyintu zituyoosya, zitutyompya, zitusinkila kuli Jehova alimwi a Mwanaakwe, kudooneka kwesu kuyakukomena. Ikuti twabikkila maano kuli Jehova alimwi a Mwanaakwe, azyintu nzyobakacita kale, nzyobacita lino, alimwi anzyobayakucita kuli baabo babayanda, tuyakucikonzya kweendelezya kudooneka kukonzya kunyonyoona lusyomo lwesu.

22. Nkaambo nzi lusyomo lwa Petro ncoluyandika kwiiya?

²² Petro naakali kuyaabutobela Jesu kusikila kubwato, wakalibona guwo kalimana. Kumane kwakaumuna mu Lwizi lwa Galilaya. Petro wakabasangana basikwiiyanyina mukwaamba kuti: “Masimpe uli Mwana wa Leza.” (Mt. 14:33) Nobwakaca, cakutadooneka Petro wakalumba. Wakaiya kutalekela kuyoowa kumupa kudooneka Jehova alimwi a Jesu. Masimpe kuti kwakacili zyintu zinji nzyaakeelede kucinca katanaba Munakristo uuli mbuli bbwe Jesu ngwaakali kwaamba. Pele wakalikanzide kuzumanana kusola, akuzumanana kukomena. Sena ngamakanze ngomujisi andinywe? Muyakujana kuti lusyomo lwa Petro luyandika kwiiya.