1, 2. Ino Balamu wakacita buti kutegwa abaletele mapenzi bantu ba Jehova?

SIKUZUBA nswi waunka kubusena nkwazyibide kuloba nswi zinji. Kuli musyobo wanswi nzyayanda kuloba. Wasala cakulya ncozilida kapati nswi eezyo, mpoonya wawaala kalobyo mumeenda. Mukaindi buyo kasyoonto nkujana mbilibila naa ntumpu yabbila akalo kasamu kakalobyo katalika kunyanyaala, mpoonya walobola nswi njaajata. Wakkomana akaambo kakuti wasala cakulya ceelede ncozilida kapati nswi.

² Mumwaka wa 1473 B.C.E., mwaalumi umwi wazina lyakuti Balamu wakakkala ansi kuyeeya cintu cili mbuli cakulya ncozilida kapati nswi ncaakali kukonzya kubelesya kutegwa aongelezye bantu. Bantu mbaakali kuyanda koongelezya, mbantu ba Leza ibakali mu Zibanda zya Moabu kumunyinza wa Nyika Yakasyomezyegwa. Balamu wakali kulyaamba kuti musinsimi wa Jehova, pele mubwini wakali syaacivwulemwangu iwakatumwa kuti asinganye bana Israyeli. Nokuba boobo, akaambo kakuti Jehova wakabweza ntaamu, Balamu wakabaleleka bana Israyeli muciindi cakubasinganya. Akaambo kakuyanda kubbadelwa, Balamu wakabona kuti ambweni inga wapa kuti Leza abasinganye bantu bakwe mwini, ikuti basunkwa kucita cibi cipati. Kajisi makanze aaya, Balamu wakabelesya bana basimbi bana Moabu ibakacibwene koongelezya.—Myeelwe 22:1-7; 31:15, 16; Ciyubunuzyo 2:14.

3. Sena nzila njaakabelesya Balamu yakabeleka? Amupandulule.

 ³ Sena nzila eeyi yakabeleka? Inzya yakabeleka kuli bamwi. Makumi-makumi aazyuulu zyabaalumi bana Israyeli bakayungwa, “bakatalika kuvwuula abana basimbi baku Moabu.” Mane buya bakatalika kukomba baleza baba Moabu kubikkilizya aleza uusesemya uutegwa Baala waku Peori, leza wabuzyazyi, naa wakoonana. Akaambo kaceeci, bana Israyeli bali 24,000 bakafwa kabasikide kale kumunyinza wa Nyika Yakasyomezyegwa. Eelo kaka eeci cakali kweetezya!—Myeelwe 25:1-9.

4. Ino ncinzi cakapa kuti bana Israyeli banji bacite bwaamu?

⁴ Ino ncinzi cakapa kuti kube penzi eeli? Bantu banji bakaba amoyo mubi kwiinda mukulizandula kuli Jehova, Leza ngumunya iwakabagusya mucisi ca Egepita, kubasanina nibakali munkanda alimwi akubeenzya kabotu kuya kunyika yakasyomezyegwa. (Bahebrayo 3:12) Kayeeya makani aaya, mwaapostolo Paulo wakalemba kuti: “Alimwi tutaciti bwaamu, mbubonya bamwi babo mbobakacita bwaamu, cakuti kwakafwa bantu bali 23,000 akati kabo mubuzuba bomwe.” *—1 Bakorinto 10:8.

5, 6. Ino nkaambo nzi makani aamba cibi ncibakacita bana Israyeli mu Zibanda zya Moabu ncaayandika mazuba aano?

⁵ Makani aali mulugwalo lwa Myeelwe ajisi ziiyo zinji ziyandika  kapati kubantu ba Leza ibalaafwaafwi kunjila munyika yakasyomezyegwa yiinda kubota. (1 Bakorinto 10:11) Mucikozyanyo, mbubonya mbuli bana Moabu bansiku, mazuba aano bantu bamunyika babikkila maano kapati kukoonana, alimwi balo baliindide kucita oobo. Kuyungizya waawo, Banakristo banji balacegwa mukakole kakucita bwaamu, nzila yakoongelezya njimunya iyakaca bana Israyeli. (2 Bakorinto 2:11) Alimwi mbubonya mbuli Zimuri iwatakalisenda kuleta mukaintu munkambi yabana Israyeli kalitwa mwaaba akumutola mutente lyakwe, bantu bamwi ibayanzana abantu ba Leza mazuba aano bayunga beenzinyina kucita zibi mumbungano ya Bunakristo.—Myeelwe 25:6, 14; Juda 4.

⁶ Sena mulibona kuti muli mubukkale mbuli bwabana Israyeli ibakali mu Zibanda zya Moabu? Sena mulibubwene bulumbu bwanu, nkokuti nyika mpya njomwali kulindila kwaciindi cilamfwu? Ikuti naa mboobo, amubeleke canguzu kutegwa muzumanane kukkala muluyando lwa Leza kwiinda mukutobela mulawo wakuti: “Amubutije bwaamu!”—1 Bakorinto 6:18.

7, 8. Ino “bwaamu” ninzi, alimwi ino mbuti aabo bacita bwaamu mbobatebula nzyobasyanga?

⁷ Ibbala lyakuti “bwaamu” (mu Chigiriki, por·neiʹa), kweelana ambolibelesyegwa mu Bbaibbele lyaamba koonana ikutali kwamumulawo kwabantu batakwetene kweelana a Magwalo. Bubikkilizya bumambe, buvwuule, koonana kwabantu batakwetene, kubikka cinswe caumwi kumulomo naa kumatako alimwi akusobanya naa kusyoba cinswe camuntu ngomutakwetene limwi. Alimwi bubikkilizya koonana kwabaalumi naa bamakaintu mulicabo-cabo alimwi akoonana amunyama. *

⁸ Magwalo taayindi mumbali pe: Aabo ibacita bwaamu tabakonzyi kuzumanana kukkala mumbungano ya Banakristo alimwi tabakajani buumi butamani pe. (1 Bakorinto 6:9;  Ciyubunuzyo 22:15) Kuyungizya waawo, noliba lino aabo bacita bwaamu balaliletela mapenzi mbuli kutalemekwa, kutamvwana angobakwetene limwi, kupenga mumizeezo, kuba abana bamusyokwe, malwazi, mane buya akufwa. (Amubale Bagalatiya 6:7, 8.) Sena ncamaano kucita cintu ciletela mapenzi aali boobo? Cuusisya ncakuti, bantu banji tabayeeyi mapenzi ngobakonzya kuliletela ciindi nobabweza ntaamu yakusaanguna iisololela kukucita bwaamu, kanji-kanji iijatikizya kubala, kuswiilila naa kweebelela zintu ziletela muzeezo wakoonana.

9. Sena masimpe kuti kunyina ntenda iiliko muzintu ziletela muzeezo wakoonana kweelana ambobaamba bamwi? Amupandulule.

⁹ Muzisi zinji zintu ziletelela muzeezo wakoonana zilajanika mutuntoolo, munyimbo, muzipekupeku alimwi aa Intaneti aawo mpozivwulide kapati. * Sena masimpe kuti kunyina ntenda iiliko muzintu eezyi kweelana ambobaamba bamwi? Peepe! Mukuya kwaciindi, aabo beebelela zintu ziletela muzeezo wakoonana balaba acilengwa cibi cakulyoomba naa kulisobanya kubusankwa naa kubukaintu, balaba ‘azisusi zyakoonana zijazya nsoni’ zyalo zikonzya kubapa kutalijata caboola kumakani aakoonana, alimwi balaba azisusi zitondwa, mapenzi mapati mucikwati mane buya akulekana. * (Baroma 1:24-27; Baefeso 4:19) Sikuvwuntauzya busilisi umwi wakakozyanisya ikutalijata mumakani aakoonana kubulwazi bwakkansa. Wakaamba kuti: “Cilengwa eeci ncilwazi cizumanana kukomena akuyandilila. Tacivwuli kumana cilikke pe, alimwi cilakatazya kusilika.”

10. Ino mbuti mbotukonzya kubelesya njiisyo iili kulugwalo lwa Jakobo 1:14, 15? (Alimwi amubone kabbokesi kakuti “ Mbondakacikonzya Kutalika Kulilemeka Kabotu.”)

¹⁰ Amulange-lange majwi aali kulugwalo lwa Jakobo 1:14, 15  aamba kuti: “Umwi aumwi ulasunkwa kwiinda mukoongelezyegwa akucegwa azisusi zyakwe mwini. Lino zisusi eezyo zyamita, zizyala cibi; mpoonya cibi eeco cacitwa, cileta lufwu.” Aboobo ikuti mwatalika kuyeeya zintu zibi, mweelede kubweza ntaamu yakuugusya muzeezo ooyo mpoonya aawo! Mucikozyanyo, ikuti naa cakutayeeyela mwabona zifwanikiso ziletela muzeezo wakoonana, cakufwambaana amulange kumbi, naa kuzima kkompyuta naa kucinca ccanelo yaacipekupeku. Amucite kufwumbwa ciyandika kucitwa kutegwa muzeezo uutaluzi utakomeni akumuzunda!—Amubale Matayo 5:29, 30.

11. Ciindi notulwana mizeezo yakuyanda zintu zibi, ino mbuti mbotukonzya kutondezya kuti tulamusyoma Jehova?

¹¹ Nkakaambo kaako Ooyo uutuzyi kabotu utwaambila kuti: “Aboobo, amujaye zizo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya,  kunyomenena zintu zibi, alimwi abusyaacivwulemwangu kwalo kuli nkukomba mituni.” (Bakolose 3:5) Masimpe, cilakonzya kumuyumina kucita boobo. Pele kamuyeeya kuti tujisi Taata wakujulu siluyando alimwi uukkazika moyo ngotukonzya kulomba kuti atugwasye. (Intembauzyo 68:19) Aboobo, mbomwatalikila buyo kuyeeya zintu zibi, amumulombe kutegwa amugwasye. Amupailile “nguzu zigambya” mpoonya amusoleke canguzu kugamika mizeezo yanu kuzintu zili kabotu.—2 Bakorinto 4:7; 1 Bakorinto 9:27; Amubone kabbokesi kakuti “ Ino Mbuti Mbondikonzya Kuleka Cilengwa Cibi?”

12. Ino “moyo” wesu ninzi, alimwi nkaambo nzi ncotweelede kuukwabilila?

¹² Mwaalumi musongo Solomoni wakalemba kuti: “Akati kazintu zyoonse nzyokwabilila, kokwabilila kapati moyo wako, nkaambo mulinguwo momuli tusensa twabuumi.” (Tusimpi 4:23) “Moyo” caamba buntu bwesu bwamukati, ibwini mbotubede kweelana ambwatubona Leza. Kunze lyaboobo, Leza uyakutupa buumi butamani naa pe kweelana anzyabona ‘mumoyo’ ikutali nzyobabona bantu. Oobo mbocibede buya. Alimwi makani aaya mapati. Kutegwa atamumeneni mate musimbi uutali mukaintu wakwe, mwaalumi uusyomeka Jobu wakapanga cizuminano naa wakamvwana ameso aakwe. (Jobu 31:1) Eeci ncikozyanyo cibotu kulindiswe! Kajisi muzeezo ngomunya ooyu, sintembauzyo wakapaila kuti: “Kogwisya meso aangu kukulangilila cintu cabuyo.”—Intembauzyo 119:37.

13. Ino Dina wakali ni, alimwi nkaambo nzi ncotukonzya kwaamba kuti tanaakabasala camaano balongwe?

¹³ Mbubonya mbotwakabona mu Cibalo 3, balongwe besu balakonzya kutugwasya kucita cibotu naa kutuyunga kucita cibi. (Tusimpi 13:20; amubale 1 Bakorinto 15:33.) Amulange-lange cikozyanyo ca Dina mwana musimbi wasikale Jakobo. Nokuba kuti wakakomezyegwa kabotu, Dina tanaakasala camaano, wakatalika kumvwana abasimbi bamu Kanana. Mbubonya mbuli bana Moabu, bana Kanana tiibakali kulilemeka pe. (Levitiko 18:6-25) Mumeso aabaalumi bana Kanana, kubikkilizya a Sekemu ooyo iwakali “kulemekwa kapati” kwiinda boonse bamuŋanda  yabausyi, Dina wakali kulibonya kuti musimbi uutakatazyi koongelezya naa kulya nkwela.—Matalikilo 34:18, 19.

14. Ino mbuti balongwe mbaakasala Dina mbobakaleta mapenzi?

¹⁴ Kweelede kuti Dina tanaakali kuyeeya zyakoonana ciindi naakamubona Sekemu. Pele, Sekemu wakacita kweelana ambobakali kucita bana Kanana banji ikuti banyomenena musimbi. Kufwumbwa naa Dina wakasola kukaka, tiicakagwasya pe, nkaambo Sekemu “wakamujata akoona anguwe.” Kuboneka kuti kumbele, Sekemu “wakamuyanda kapati” Dina, pele eeco tiicakacinca ncaakacita kumusimbi ooyu. (Amubale Matalikilo 34:1-4.) Alimwi Dina tali nguwe alikke wakapenga akaambo kacibi eeci. Balongwe mbaakasala bakapa kuti kucitike zintu izyakaleta mause amasampu kumukwasyi wakwe woonse.—Matalikilo 34:7, 25-31; Bagalatiya 6:7, 8.

15, 16. Ino mbuti mbotukonzya kujana busongo bwini-bwini? (Amubone kabbokesi kakuti “ Magwalo Aayelede Kukkalilwa Ansi Kuyeeya.”)

¹⁵ Ikuti naa kuli ncaakaiya Dina kumakani aaya, wakacita oobo kwiinda mukusubuka naa kweempa. Aabo ibamuyanda  akumumvwida Jehova tabeelede kucitikilwa zintu zibi buya nobaya baiye ciiyo pe. Akaambo kakuti balamumvwida Leza, basala ‘kweenda abasongo.’ (Tusimpi 13:20a) Aboobo, balazyiba “bukkale boonse bubotu” akuleya mapenzi alimwi amacise aakuliyandila.—Tusimpi 2:6-9; Intembauzyo 1:1-3.

¹⁶ Bantu boonse ibayanda kuba abusongo bwa Leza balakonzya kubujana kwiinda mukuzumanana kubupailila akwiiya Jwi lya Leza alimwi amabbuku aamwaigwa amuzike uusyomeka  alimwi uucenjede. (Matayo 24:45; Jakobo 1:5) Acimbi ciyandika nkulicesya, nkotukonzya kutondezya kwiinda mukuzumina kutobela lulayo lwamu Magwalo camoyo woonse. (2 Bami 22:18, 19) Mucikozyanyo, Munakristo inga kazyi kuti moyo wakwe uleena alimwi ulapenzya kapati. (Jeremiya 17:9) Pele ikuti wajanika kuti tanaasala camaano, sena ulakonzya kulicesya akutambula lulayo alugwasyo ndwakonzya kupegwa cacigaminina alimwi caluyando?

17. Amupandulule bukkale bukonzya kuba mumukwasyi, alimwi amwaambe ncobakonzya kucita bausyi nobabandika makani aayo amwanaabo musimbi.

¹⁷ Amulange-lange cikozyanyo eeci. Bausyi bamukasya mwanaabo musimbi kuunka balikke amusankwa uuyanda kumukwata. Mwanaabo waamba kuti: “Taata, sena tamundisyomi? Kunyina cibi ncotukonzya kucita.” Nokuba kuti musimbi ooyu ulamuyanda Jehova alimwi uyanda kucita zintu zibotu, sena ‘weenda mubusongo bwa Leza’? Sena ‘ulabutija bwaamu’? Naa sena cabufwubafwuba “usyoma moyo wakwe mwini”? (Tusimpi 28:26) Ambweni kuli njiisyo azimbi nzyomukonzya kuyeeya izikonzya kubagwasya bausyi amwanaabo kubandika makani aaya.—Amubone Tusimpi 22:3; Matayo 6:13; 26:41.

18, 19. Ino mbuti mbwaakasunkwa Josefa, alimwi ino wakacita buti?

¹⁸ Musankwa mubotu iwakali kumuyanda Leza alimwi iwakabutija bwaamu ngu Josefa munyina Dina wamuda limbi. (Matalikilo 30:20-24) Kacili mwana muniini, Josefa wakalibonena mapenzi aakacitika akaambo kamucizyi wakwe watakasala kabotu. Cakutadooneka ikuyeeya mapenzi aaya alimwi amakanze ngaakajisi Josefa aakuti azumanane kuba muluyando lwa Leza, kumbele akamukwabilila naakali mucisi ca Egepita ciindi mukaintu wasimalelaakwe naakali kusola kumoongelezya “buzuba abuzuba.” Masimpe, mbwaanga Josefa wakali muzike, tanaakali kukonzya kwiile kuleka mulimo akuunka kwabo! Mubukkale oobu wakeelede kubelesya busongo alimwi akuba sicamba. Oobo mbwaakacita Josefa kwiinda mukuzumanana kumukakila  mukaintu wa Potifara limwi wakatija buya.—Amubale Matalikilo 39:7-12.

¹⁹ Amuyeeye kaambo aaka: Sena Josefa naakacikonzya kusyomeka nokwali kunga lyoonse wakali kuyeeya mukaintu ooyu naa makani aakoonana? Kweelede kuti naatakacita oobo. Muciindi cakuzumanana kuyeeya zintu zibi, Josefa wakali kucibikkila maano kapati cilongwe ncaakajisi a Jehova kweelana ambotubona mumajwi ngaakaambila mukaintu wa Potifara. Wakali kumwaambila kuti: “Simalelaangu . . . ulindipede zintu zyoonse ccita buyo nduwe olikke, nkaambo uli mukaintu wakwe. Aboobo, ino inga ndacitila nzi cibi cipati cili boobu akubisizya Leza?”—Matalikilo 39:8, 9.

20. Ino mbuti Jehova mbwaakazicinca zintu mumakani aajatikizya Josefa?

²⁰ Amweezyeezye buyo Jehova mbwaakakkomana naakabona kuti buzuba abuzuba ooyu mwana musankwa Josefa wakali kusyomeka nokuba kuti wakali kulamfwu abamukwasyi wakwe. (Tusimpi 27:11) Mukuya kwaciindi, Jehova wakapa kuti zintu zicince cakuti Josefa tanaakazwa buyo muntolongo pele alimwi wakaba mweendelezi wabili wacisi ca Egepita alimwi sikulanganya matala aazyakulya! (Matalikilo 41:39-49) Eelo kaka ngamasimpe majwi aalembedwe kulugwalo lwa Intembauzyo 97:10 aakuti: “Nywebo nomuyandisya Jehova, amusulaike bubi. Walo ulalinda buumi bwabantu bakwe basyomeka; ulabavwuna kuzwa mumaanza aababi”!

21. Ino mbuti mukwesu umwi mukubusi wamucisi camu Africa mbwaakatondezya kutazungaana mumakani aakulilemeka?

 ²¹ Mbubonya buyo, mazuba aano babelesi ba Jehova banji batondezya kuti ‘balibusulaikide bubi, bayanda bubotu.’ (Amosi 5:15) Mucikozyanyo, mucisi cimwi camu Africa, mukwesu umwi mukubusi wakaamba kuti sicikolonyina musimbi cakutainda mumbali wakamwaambila kuti ikuti naa wamugwasya kulemba musunko wanamba ulamulumbula kwiinda mukoonana anguwe. Mukwesu ooyu wakaamba kuti: “Ndakakaka mpoonya aawo. Aboobo, kwiinda mukuzumanana kusyomeka ndilikkomene alimwi bantu balandilemeka, alimwi eeci ndicibona kuti cilayandika kapati kwiinda ngolida ansiliva.” Masimpe, cibi cilakonzya ‘kukkomanisya kwakaindi kaniini buyo,’ pele bunji bwaziindi lukkomano oolu lwakaindi kaniini buyo luleta macise manji. (Bahebrayo 11:25) Kuyungizya waawo, lukkomano oolu ndwabuyo twalweelanya alukkomano lutamani iluboola akaambo kakumumvwida Jehova.—Tusimpi 10:22.

22, 23. (a) Ikuti Munakristo wacita cibi cipati, ino nkaambo nzi ncotukonzya kwaamba kuti ulakonzya kugwasyigwa? (b) Ino mbuti mbwakonzya kugwasyigwa muntu wacita cibi?

²² Akaambo kakutalondoka, toonse tujisi nkondo yakulwana zisusi zyanyama alimwi akucita zintu zibotu mumeso aa Jehova. (Baroma 7:21-25) Jehova ulizyi oobo, “ulaibaluka kuti tuli bulongo buyo.” (Intembauzyo 103:14) Pele zimwi ziindi, Munakristo ulakonzya kucita cibi cipati. Sena eeci caamba kuti takonzyi kugwasyigwa? Peepe! Masimpe, sizibi ooyo ulakonzya kuliletela mapenzi akaambo kacibi cakwe mbubonya mbwaakacita Mwami Davida. Nokuba boobo, ciindi coonse Leza ‘ulilibambilide kubalekelela’ aabo beempwa ‘akulyaambilila caantangalala’ zibi zyabo.—Intembauzyo 86:5; Jakobo 5:16; amubale Tusimpi 28:13.

²³ Kuyungizya waawo, caluyando Leza wapa mbungano ya Bunakristo “zipego mubantu”—beembezi bakumuuya basimide ibeelela alimwi balibambilide kutugwasya. (Baefeso 4:8, 12; Jakobo 5:14, 15) Makanze aabo ngakugwasya sizibi kuti atalike  alimwi kumvwana a Leza, alimwi kweelana ambwaakaamba mwaalumi musongo, bayanda kuti sizibi alijanine “maano” kutegwa atakaciinduluki cibi cakwe.—Tusimpi 15:32.

24, 25. (a) Ino mbuti mulombwana waambidwe kulugwalo lwa Tusimpi 7:6-23 mbwaakatondezya kuti “takwe maano”? (b) Ino mbuti mbotukonzya ‘kulijanina maano’?

²⁴ Bbaibbele lilaamba kujatikizya muntu “uutakwe maano” alimwi ayooyo “uulijanina maano.” (Tusimpi 7:7) Akaambo kakutasima kumuuya alimwi akubula luzyibo lunji mumulimo wa Leza, muntu “uutakwe maano” ulakonzya kwaalilwa kubona zili kumbele alimwi akutasala kabotu zintu. Mbubonya mbuli mulombwana waambidwe kulugwalo lwa Tusimpi 7:6-23, ulakonzya kucegwa cakufwambaana mucibi cipati. Pele, “kufwumbwa ooyo uujana maano” ulaubikkila maano kapati moyo wakwe kwiinda mukwiiya Jwi lya Leza akupaila lyoonse. Alimwi nokuba kuti talondokede, ulasoleka kweendelanya mizeezo yakwe, nzyalombozya, mbwalimvwa mumoyo alimwi amakanze aakwe kweelana ancayanda Leza. Aboobo “ulaliyanda mwini” naa ulalijanina zileleko, alimwi “ulazwidilila.”—Tusimpi 19:8.

²⁵ Amulibuzye kuti: ‘Sena ndilasyoma cakumaninina kuti zyeelelo zya Leza zililuzi? Sena ndilasyoma camoyo woonse kuti kuzitobela kulakonzya kundipa kukkomana kapati?’ (Intembauzyo 19:7-10; Isaya 48:17, 18) Ikuti naa kamudooneka nokuceya, amwaalanganye makani aayo. Amukkale ansi kuyeeya zintu zicitikila bantu batabikkili maano kumilawo ya Leza. Kuyungizya waawo, “amulabile mubone kuti Jehova mubotu” kwiinda mukupona kweelana akasimpe alimwi akuba amizeezo mibotu, nkokuti kuyeeya zintu zyamasimpe, ziluleme, zisalala, ziyandwa alimwi azili kabotu. (Intembauzyo 34:8; Bafilipi 4:8, 9) Ikuti mwacita oobo, mulakonzya kuba masimpe kuti mulazumanana kumuyanda kapati Leza, kuyanda zintu nzyayanda akusulaika zintu nzyasulide. Josefa tanaakalondokede pe. Nokuba boobo, wakacikonzya ‘kubutija bwaamu’ akaambo kakuti wakalibikka mumaanza aa Jehova kuti amubumbe kwamyaka minji, kuti amupe maano. Andinywe amucite mbuli nguwe.—Isaya 64:8.

26. Ino makani nzi aayandika kapati atiibandikwe muzibalo zitobela?

 ²⁶ Mulengi wesu wakalenga zizo zyesu zyabuzyazyi ikutali kuti zibe zyakwiile kusobanya, pele wakacita oobo kutegwa katukonzya kuzyalana akukkomana mucikwati camumulawo. (Tusimpi 5:18) Zibalo zyobilo zitobela zijisi makani aajatikizya mbwacibona cikwati Leza.