Paradaiso taikabi mbuli nyika eyi mpotukkede lino. Leza kunyina naakayandide kuti inyika kaizwide mapenzi amause alimwi amacise akupengana. Kumbele Leza uyoocita kuti nyika ikabe paradaiso. Ino eyo Paradaiso inooli buti? Nkooko atubone ncolyaamba Bbaibbele:

Bantu babotu. Paradaiso iyooba munzi wabalongwe ba Leza. Banooyoocitilana zintu zibotu. Banooyootobela inzila zya Leza ziluleme.—Tusimpi 2:21.

Cakulya cinji. Mu Paradaiso munoonyina nzala. Ibbaibbele lyaamba kuti: “Maila [naa cakulya] avule ansi.”—Intembauzyo 72:16.

Imaanda mabotu amilimo iikondelezya. Anyika ya Paradaiso, imukwasyi umwi aumwi unoojisi munzi uubagamide. Boonse bayoocita milimo iibakondelezya ncobeni.—Isaya 65:21-23.

 Luumuno nyika yoonse mbwiizulwa. Ibantu tabacinooyoolwani akufwa munkondo. Ijwi lya Leza lyaamba kuti: “[Leza] ulalesya inkondo.”—Intembauzyo 46:8, 9.

Buumi bubotu. Ibbaibbele lisyomezya kuti: “Lino takukooyooba naba omwe akati kabantu banyika [mu Paradaiso] uuamba kuti, Ndaciswa.” (Isaya 33:24) Alimwi kunyina muntu uunooli mulema naa moofwu naa sicuulutwi naa syaataambi.—Isaya 35:5, 6.

Imamanino aamacise, mause alufwu. Ijwi lya Leza lyaamba kuti: “Takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4.

Ibantu babi tabacinooyooliko. Jehova usyomezya kuti: “Basizibi bayoonyonyoonwa munyika, abasilweeno bayoogwisigwa.”—Tusimpi 2:22.

Bantu banooyandana akulemekana. Ikutalulama abudyaaminizi abulyatu alimwi alusulano tazicinooyooliko pe. Ibantu banoyookamantene alimwi banooyootobela nzila zya Leza izyabukkale ziluleme.—Isaya 26:9.