Leza uyanda kuti mube balongwe bakwe. Sena kuli nomwakayeeyede kuba mulongwe wa Muntu mupati kwiinda iwakujulu aansi? Abrahamu, iwakali kupona kaindi loko wakaambwa kuti mulongwe wa Leza. (Jakobo 2:23) Ibamwi ibaambwa mu Bbaibbele abalo bakalijisi cilongwe a Leza elyo bakalongezyegwa kapati. Sunu, ibantu kuzwa kuzyooko zyoonse zyanyika baba balongwe ba Leza. Anywebo mulakonzya kuba balongwe ba Leza.

Ncibotu kuba mulongwe wa Leza kwiinda kuba mulongwe wamuntunsi. Leza kunyina nabatyompya balongwe bakwe basyomeka. (Intembauzyo 18:25) Ikuba mulongwe wa Leza ncibotu kwiinda kubaa lubono. Imuntu muvwubi nafwa, imbono zyakwe zyuunka kubantu bambi. Pele aabo ibajisi cilongwe a Leza bajisi lubono ndobatakonzyi kunyangwaa muntu uuli woonse.—Matayo 6:19.

Bantu bamwi balakonzya kusola kumukasya kwiiya makani aajatikizya Leza. Nobaba bamwi akati kabalongwe banu abanamukwasyi balakonzya kucicita eci. (Matayo 10:36, 37) Ikuti naa bamwi bamuseka naa kumukonga, amulibuzye kuti, ‘Ino nguni ngundiyanda kukkomanisya—sena mbantu naa ngu Leza?’ Amuciyeeyele eci: Ikuti muntu umwi wamwaambila kuti muleke kulya, sena inga mwazumina? Peepe! Ikutegwa kamupona muyandika cakulya. Pele Leza ulakonzya kucita kuti kamupona kukabe kutamani! Aboobo mutazumizyi muntu uuli woonse ikumulesya kwiiya mbomunga mwaba balongwe ba Leza.—Johane 17:3.