Ikuba balongwe ba Leza ncintu ciinda kubota icinga camucitikila. Leza uyoomuyiisya mbomukonzya kuba bantu bakondwa alimwi baliibide; uyoomwaangulula kunjiisyo zinji zitaluzi akuzilengwa zibyaabi. Uyooiteelela mipailo yanu. Uyoomugwasya kuti mube bantu batalibiliki alimwi ibasyoma. (Intembauzyo 71:5; 73:28) Leza uyoomugwasilizya ciindi camapenzi. (Intembauzyo 18:18) Alimwi Leza wamwaabila cipego cakwe cakuti mube abuumi butamani.—Ba-Roma 6:23.

Mbomuya buswena kuli Leza, muyooswena akubalongwe ba Leza. Abalo abo bayooba balongwe banu. Atwaambe kuti, bayooba mbuli ibanyoko abacizi. Bayooyandisisya kumuyiisya makani aajatikizya Leza alimwi bayoomugwasya akumukulwaizya.

Tatweelene pe a Leza. Nomuyandaula cilongwe a Leza, mweelede kuteelelesya kaambo kamwi kapati. Icilongwe a Leza tacili cilongwe akati kabantu beelene pe. Mmupati kapati, mmusongo loko alimwi ulaanguzu kapati kwiinda ndiswe. Leza ngo Mweendelezi wesu weelede. Aboobo ikuti katuyanda kuba balongwe bakwe, tweelede kumumvwida alimwi akucita zyoonse nzyatwaambila kuti tucite. Lyoonse notucita boobo tuyoogwasigwa.—Isaya 48:18.