1, 2. Ino ncinzi ncotweelede kuzyiba kujatikizya Saatani amadaimona?

BUUMI munyika mpya ya Jehova bunookkomanisya kapati. Inzya, tuyoopona kweelana ambwaakali kuyanda Leza kuti katupona. Pele calino tupona munyika yeendelezyegwa a Saatani Diabolosi alimwi amadaimona aakwe. (2 Bakorinto 4:4) Nokuba kuti tatukonzyi kubabona, masimpe ngakuti nkobali alimwi balaanguzu kapati.

² Mucibalo eeci, tulabandika mbotukonzya kukakatila kuli Jehova alimwi akulikwabilila kuzwa kuli Saatani. Jehova utusyomezya kuti uyootugwasya. Pele tweelede kuzizyiba nzila Saatani amadaimona nzyobabelesya kutegwa batucenge akutulwana.

3. Ino ncinzi Diabolosi ncayanda kucita kulindiswe?

³ Saatani waamba kuti bantu bakomba Jehova akaambo kazintu nzyobajana alimwi akuti inga baleka kumubelekela ikuti zintu zyaleka kubeendela kabotu. (Amubale Jobu 2:4, 5.) Ciindi muntu natondezya kuti uyanda kwiiya kujatikizya Jehova, Saatani amadaimona aakwe balazyiba, aboobo balasola kumusinkila. Balanyema ciindi muntu nalyaaba kuli Jehova akubbapatizyigwa. Bbaibbele lyaamba kuti Daibolosi uli mbuli “syuumbwa wabutambo  uuvwuluma, uyandaula muntu ngwatiimene buumbulu.” (1 Petro 5:8) Saatani uyanda kunyonganya cilongwe cesu a Jehova.—Intembauzyo 7:1, 2; 2 Timoteyo 3:12.

4, 5. (a) Ino ncinzi Saatani ncatakonzyi kucita? (b) Ino ‘kukazya Diabolosi’ caamba nzi?

⁴ Nokuba boobo, tatweelede kumuyoowa Saatani alimwi amadaimona aakwe, nkaambo Jehova wapa kuti batacikonzyi kucita kufwumbwa ncobayanda kucita kulindiswe. Jehova usyomezya kuti “nkamu mpati” ya Banakristo bakasimpe iyoofwutuka “mapenzi mapati.”  (Ciyubunuzyo 7:9, 14) Kunyina Diabolosi ncakonzya kucita kutegwa eeci citacitiki, nkaambo Jehova ulabakwabilila bantu bakwe.

⁵ Ikuti twakakatila kuli Jehova, Saatani takonzyi kucinyonganya cilongwe cesu anguwe. Ijwi lya Leza litusyomezya kuti: “Jehova unooli andinywe kufwumbwa buyo kuti andinywe mwazumanana kuba anguwe.” (2 Makani 15:2; amubale 1 Bakorinto 10:13.) Bamaalumi abamakaintu banji ibakali kusyomeka kaindi, mbuli Abelo, Enoki, Nowa, Sara, alimwi a Musa, bakamukazya Diabolosi kwiinda mukukakatila kuli Jehova. (Bahebrayo 11:4-40) Andiswe tulakonzya kucita mbubonya oobo. Ijwi lya Leza lisyomezya kuti: “Amumukazye Diabolosi eelyo ulamutija.”—Jakobo 4:7.

6. Ino Saatani utulwana buti?

⁶ Nokuba kuti Saatani ulizyi kuti Jehova kuli zintu nzyatamuzumizyide kucita kulindiswe, ulasola kucita kufwumbwa ncakonzya kutegwa anyonganye cilongwe cesu a Leza. Mazuba aano, Diabolosi ulatulwana munzila zisiyene-siyene alimwi ubelesya nzila nzyaali kubelesya kwamyaka minji. Ino ninzila nzi zimwi eezyi?

7. Nkaambo nzi Saatani ncabalwana bantu ba Jehova?

⁷ Mwaapostolo Johane wakalemba kuti: “Nyika yoonse ili mumaanza aamubi.” (1 Johane 5:19) Nyika yoonse eeyi mbyaabi ili mumaanza aa Saatani alimwi uyanda kuti kabeendelezya abantu ba Jehova. (Mika 4:1; Johane 15:19; Ciyubunuzyo 12:12, 17) Diabolosi ulizyi kuti ciindi ncajisi ncisyoonto, aboobo uluujisi kumulwana umwi aumwi wesu kutegwa aleke kusyomeka kuli Leza. Zimwi ziindi Diabolosi ulatulwana cacigaminina, pele zimwi ziindi nzila nzyabelesya inga tazilibonyi.

8. Ino ncinzi Munakristo umwi aumwi ncayelede kuzyiba?

 ⁸ Mulugwalo lwa Baefeso 6:12 tubala kuti: “Tujisi nkondo yakutingana, . . . amyuuya mibi iili mumasena aakujulu.” Munakristo umwi aumwi ujisi nkondo yakulwana a Saatani alimwi amadaimona aakwe. Tweelede kuzyiba kuti boonse aabo ibalyaaba kuli Jehova, bali munkondo eeyi. Mulugwalo ndwaakalembela Banakristo baku Efeso, mwaapostolo Paulo ziindi zyotatwe wakabakulwaizya “kwiima nji.”—Baefeso 6:11, 13, 14.

9. Ino ncinzi Saatani amadaimona aakwe ncobasola kucita kulindiswe?

⁹ Saatani amadaimona aakwe balasola kutucenga munzila ziindene-indene. Nokuba kuti twacikonzya kumukazya Saatani musunko limwi, eeci tacaambi kuti tatukonzyi kucegwa asunko limbi. Diabolosi ulasola kuzyiba kulezya kwesu kutegwa asale tukole tukonzya kutuca. Pele tatweelede kucegwa pe, nkaambo Bbaibbele lilatuyiisya kujatikizya tukole twa Diabolosi. (2 Bakorinto 2:11; amubone Bupanduluzi Buyungizyidwe 31.) Kakole kamwi nkabelesya, nkusyoma mizimo.

10. (a) Ino kusyoma mizimo caamba nzi? (b) Ino Jehova ukubona buti kusyoma mizimo?

¹⁰ Ikusyoma mizimo kujatikizya zintu zimwi zyamasalamuzi zyalo zipa kuti muntu abe mumaanza aamadaimona, zintu mbuli kusonda, bulozi, kubelesya ziposo alimwi akubuzya makani kubafwu. Bbaibbele litwaambila kuti kusyoma mizimo “ncisesemyo” akuti tatukonzyi kunoosyoma mizimo akukomba Jehova aciindi comwe. (Deuteronomo 18:10-12; Ciyubunuzyo 21:8) Banakristo beelede kwiitantamuka misyobo yoonse yakusyoma mizimo.—Baroma 12:9.

11. Ino kuyandisya zintu zyamasalamuzi inga kwatusololela kunzi?

 ¹¹ Saatani ulizyi kuti ikuti naa twakwelelezyegwa anguzu zyamasalamuzi, cilakonzya kuuba-uba kutalika kusyoma mizimo. Musyobo uuli woonse wakusyoma mizimo ulakonzya kunyonganya cilongwe cesu a Jehova.

12. Ino Saatani uyanda kuti katuyeeya buti?

¹² Saatani ulasola kunyonganya mbobayeeya bantu. Asyoonto-syoonto upa bantu kutalika kudooneka, kusikila bantu batalika kuyeeya kuti “bubotu mbubi abubi kuti mbubotu.” (Isaya 5:20) Diabolosi usumpula muzeezo wakuti lulayo lwamu Bbaibbele talubeleki akuti inga twakkomana ikuti katutazitobeli zyeelelo zya Leza.

13. Mbuti Saatani mbwaakasola kupa bantu kudooneka?

¹³ Kupa bantu kutalika kudooneka nkakole kamwi nkabelesya kapati Saatani. Wali kukabelesya kakole aaka kwaciindi cilamfwu. Mumuunda wa Edeni, wakasola kukabelesya kakole aaka ciindi naakabuzya Eva kuti: “Sena ncobeni Leza wakaamba kuti tamweelede kulya kuzisamu zyoonse zyamumuunda?” (Matalikilo 3:1) Kumbele, mumazuba aa Jobu, Saatani wakabuzya Jehova kumbele lyabangelo kuti: “Sena Jobu uyoowa Leza kakunyina kaambo?” (Jobu 1:9) Jesu naakamana kubbapatizyigwa, Saatani wakamusunka kwiinda mukwaamba kuti: “Ikuti naa uli mwana wa Leza, ambila mabwe aaya kuti abe zinkwa.”—Matayo 4:3.

14. Mbuti Saatani mbwakonzya kupa bantu kuyeeya kuti kusyoma mizimo takuli kubi?

¹⁴ Mazuba aano, Diabolosi wazumanana kupa bantu kudooneka. Ulasola kupa bantu kuyeeya kuti kusyoma mizimo takuli kubi boobo. Ulacita oobo kwiinda mukupa kuti zibeela zimwi kazilibonya kuti zili buyo kabotu. Nobaba Banakristo bamwi tabaiboni ntenda eeyi.  (2 Bakorinto 11:3) Aboobo, ncinzi ncotukonzya kucita kutegwa tulikwabilile? Mbuti mbotukonzya kuba masimpe kuti tatoongelezyegwi abucenjezu bwa Saatani? Atulange-lange mbazu zyobilo motukonzya kucengwa: zyakulikondelezya alimwi abusilisi.

15. Mbuti mbotukonzya kujatikizyigwa mukusyoma mizimo kwiinda muzyakulikondelezya?

¹⁵ Mazuba aano, mafilimu manji, mavidiyo, mapulogilamu aa TV, zisobano zyaakkompyuta, alimwi amawebbusaiti zitondezya makani aajatikizya madaimona alimwi amasalamuzi. Banji babona zintu eezyi kuti zili buyo kabotu alimwi tabaizyi ntenda iikonzya kuboola akaambo kakweendelezyegwa amadaimona mubuumi bwabo. Alimwi muntu ulakonzya kujatikizyigwa mukusyoma mizimo kwiinda muzintu mbuli kulanga nyenyeezi ikusola kuzyiba zyakumbele, ikupandulula tweengo twamumaanza, kubelesya nkakata alimwi acimbonimboni. Diabolosi ulaisisa ntenda alimwi ulapa kuti zintu zili boobu zilibonye mbuli kuti zilagambya alimwi zilakkomanisya. Alimwi buya muntu ulakonzya kuyeeya kuti kunyina bubi buliko mukweebelela zintu zijatikizya madaimona naa masalamuzi kufwumbwa buyo kuti walo katatoli lubazu. Nkaambo nzi kuyeeya kuli boobu ncokutali kabotu?—1 Bakorinto 10:12.

16. Nkaambo nzi ncotweelede kuzitantamuka zyakulikondelezya zijatikizya masalamuzi?

¹⁶ Saatani amadaimona aakwe tabakonzyi kuzyiba ncotuyeeya. Pele balakonzya kuzyiba nzyotulombozya alimwi ambotuyeeya kwiinda mukulangilila zintu nzyotulisalila tobeni anzyotusalila banamukwasyi, kubikkilizya azyakulikondelezya nzyotusala. Ikuti katusala mafilimu,  nyimbo, naa mabbuku aajatikizya mizimo, masalamuzi, kweebelela bantu banjidwe madaimona, bulozi, zyeelo naa zintu zimwi zikozyenye azeezyi, Saatani amadaimona balazyiba kuti tulazilombozya zintu eezyi. Mpoonya balakonzya kutusunka kutegwa tujatikizyigwe kapati mumakani aajatikizya madaimona.—Amubale Bagalatiya 6:7.

17. Mbuti Saatani mbwakonzya kubelesya kulombozya kwesu kwakuyanda kuba abuumi buli kabotu?

¹⁷ Kuyungizya waawo, Saatani ulakonzya kubelesya kulombozya kwesu kwakuyanda kuba abuumi buli kabotu. Mazuba aano, bantu banji balaciswa-ciswa. Muntu ulakonzya kuti wakasola kale busilisi busiyene-siyene, pele  taponi pe. (Marko 5:25, 26) Mane buya ulakonzya kunyongana kapati cakuti inga wayanda kusola nzila yabusilisi iili yoonse. Pele mbotuli Banakristo, tweelede kucenjela kutegwa tutasali nzila zyabusilisi zijatikizya “masalamuzi.”—Isaya 1:13.

18. Ino mbusilisi buli buti Munakristo mbwayelede kutantamuka?

¹⁸ Muciindi cabana Israyeli, kwakali bantu bamwi ibakabelesya “masalamuzi.” Jehova wakabaambila kuti: “Nomutambika maanza aanu, tandimulangi pe. Nokuba kuti mupaile mipailo minji buti, mebo tandiswiilili pe.” (Isaya 1:15) Amuciyeeyele buyo, Jehova kunyina anaakali kwiiswiilila mipailo yabo! Tatweelede kucita cintu cili coonse cikonzya kunyonganya cilongwe cesu a Jehova akupa kuti aleke kutugwasya kwaambisya ciindi notucisidwe. (Intembauzyo 41:3) Aboobo tweelede kuvwuntauzya kutegwa tuzyibe naa busilisi mbotuyanda buliswaangene munzila iili yoonse amadaimona naa masalamuzi. (Matayo 6:13) Ikuti kabulibonya kuti buliswaangene amadaimona munzila iili yoonse, tweelede kubutantamuka!—Amubone Bupanduluzi Buyungizyidwe 32.

19. Ino ncinzi capa kuti bantu banji kabamuyoowa Diabolosi?

¹⁹ Nokuba kuti bantu bamwi bayeeya kuti Diabolosi amadaimona mbakuyeeyela buyo, bamwi balizyi kuti nkobali ncobeni akaambo kazintu izyakabacitikila. Bantu banji balaiyoowa myuuya mibi alimwi mbazike kuzilengwa zyamasalamuzi. Bamwi bapa kuti bantu kabaayoowa madaimona akaambo kakubaambila zintu ziyoosya nzyaacita madaimona kubantu. Kanji-kanji bantu balaakkomanina makani aali boobu alimwi inga bayanda kwaambila abamwi. Bunji bwaziindi makani aali boobu apa bantu kumuyoowa Diabolosi.

20. Mbuti mbotukonzya kumwaya bubeji bwa Saatani?

 ²⁰ Amuyeeye kaambo aaka, Saatani uyanda kuti bantu kabamuyoowa. (2 Batesalonika 2:9, 10) Mubeji walo uuzyi mbwakonzya kubayunga aabo bayandisya makani aajatikizya madaimona alimwi akubapa kusyoma zintu zitali zyamasimpe. Bantu aabo balakonzya kwaamba zintu nzyobayeeya kuti bakazibona akuzimvwa. Bantu nobaamba makani aali boobo ziindi zinji, balakonzya kuyungizya twaambo atumwi twakunoneezya buyo musalo. Tatweelede kugwasya Saatani kutegwa bantu kabamuyoowa kwiinda mukumwaya makani aali boobu.—Johane 8:44; 2 Timoteyo 2:16.

21. Muciindi cakubandika makani aajatikizya madaimona, ncinzi ncotukonzya kubandika?

²¹ Ikuti mubelesi wa Jehova umwi wakapenzyegwa amadaimona, teelede kwaabandika makani aayo kuli bamwi kutegwa abakkomanisye. Bantu ba Jehova tabeelede kuyoowa zintu Diabolosi amadaimona aakwe nzyobakonzya kucita. Muciindi caboobo, tweelede kubikkila maano kuli Jesu anguzu Jehova nzyamupede. (Bahebrayo 12:2) Jesu kunyina naakali kukkomanisya basikwiiya bakwe amakani aajatikizya madaimona. Wakali kubikkila maano kumulumbe wa Bwami ‘amilimo mipati ya Leza.’—Milimo 2:11; Luka 8:1; Baroma 1:11, 12.

22. Ino ncinzi ncomukanzide kucita?

²² Tutalubi kuti makanze aa Saatani ngakunyonyoona cilongwe cesu a Jehova. Ulacita kufwumbwa ncakonzya kutegwa eeci cicitike. Nokuba boobo, tulizizyi nzila Diabolosi nzyabelesya alimwi tulikanzide kutantamuka nzila zili zyoonse zijatikizya madaimona. Alimwi tatweelede ‘kumupa coolwe Diabolosi’ kuti anyonganye makanze eesu. (Amubale Baefeso 4:27.) Inzya, ikuti twamukazya Diabolosi, tatukacegwi mutukole twakwe alimwi Jehova uyootukwabilila.—Baefeso 6:11.