1-3. (a) Ino ncinzi ncotwiiya kulugwalo lwa Tusimpi 13:20? (b) Ino nkaambo nzi ncotuyandika kucenjela kapati notusala balongwe?

SENA mwakamubona kale mwana muvwanda mbwabalanga bazyali bakwe? Noliba leelyo katanatalika kwaambaula, ulaiya zintu nzyabona akumvwa. Mbwayaabukomena, ulatalika kucita nzyabona kubazyali bakwe kakunyina akusaanguna kusola. Tacigambyi kuti abalo bapati balakonzya kutalika kuyeeya akucita zintu mbuli mbobacita bantu mbobajanika limwi kwaciindi cilamfwu.

² Kulugwalo lwa Tusimpi 13:20, twiiya kuti: “Ooyo weenda abasongo ulaba musongo.” Aawa, ikaambo kakuti ‘kweenda’ amuntu umwi kalabikkilizya akujana ciindi cakuba anguwe. Eeci tacaambi buyo kwiile kuba amuntu ooyo. Sikwiiya zyamu Bbaibbele umwi wakaamba kuti kweenda amuntu umwi kulabikkilizya amuzeezo wakumuyanda alimwi akuba mulongwe wakwe kapati. Kanji-kanji tulayungwa abantu mbotuba ambabo kwaciindi cilamfwu, kwaambisya kuti katulimvwa kuti mbalongwe besu kapati.

³ Balongwe besu balakonzya kupa kuti katucita zintu zili kabotu naa zintu zitali kabotu. Lugwalo lwa Tusimpi 13:20 lulazumanana kwaamba kuti: “Ooyo uuyanzana  abafwubafwuba ulajana mapenzi.” Mumwaambo wa Chihebrayo, ‘kuyanzana’ amuntu umwi cilakonzya kwaamba ‘kumvwana’ amuntu ooyo, nkokuti kuba mulongwe wakwe. (Tusimpi 22:24; Babetesi 14:20) Balongwe ibamuyanda Leza, bayootukulwaizya kuzumanana kusyomeka kulinguwe. Kutegwa tugwasyigwe kusala balongwe cabusongo, atubandike bantu Jehova mbasala kuba balongwe bakwe.

4. Ino nkaambo nzi ncocili coolwe cipati kuba mulongwe wa Leza? Ino nkaambo nzi Jehova ncaakaitila Abrahamu kuti “imulongwe wangu”?

⁴ Jehova, Mwami Wabubumbo Boonse, ulatupa coolwe cakuba balongwe bakwe. Eeci ncoolwe cipati. Jehova ulabikkila maano nasala balongwe bakwe. Usala baabo ibamuyanda alimwi ibasyomeka kulinguwe. Amuyeeye kujatikizya Abrahamu. Wakalilibambilide kucita cintu cili coonse ncaakamwaambila Leza. Cakwiinduluka-induluka, Abrahamu wakatondezya kuti wakali kusyomeka alimwi akumvwida. Mane buya wakalilibambilide nokuba kwaaba mwanaakwe Izaka. Abrahamu wakalijisi lusyomo lwakuti “Leza wakali kukonzya kumubusya nokuba kuzwa kubafwu.” (Bahebrayo 11:17-19; Matalikilo 22:1, 2, 9-13) Abrahamu wakali kusyomeka akumvwida, alimwi Jehova wakamwiita kuti “imulongwe wangu.”—Isaya 41:8; Jakobo 2:21-23.

5. Ino Jehova ulimvwa buti kujatikizya baabo ibasyomeka kulinguwe?

⁵ Balongwe ba Jehova balakubikkila maano kapati kusyomeka kulinguwe kwiinda kusyomeka kucintu cili coonse. Aboobo Jehova ubabona kuti balayandika kapati. (Amubale 2 Samuele 22:26.) Balasyomeka alimwi balamumvwida akaambo kakuti balamuyanda. Ibbaibbele  lyaamba kuti “balulami mbabajisi cilongwe ciyumu” a Leza, nkokuti aabo ibamumvwida. (Tusimpi 3:32) Jehova ulabatamba balongwe bakwe kuti babe beenzu baalubazu “mutente” lyakwe. Ulabatamba kuti kabakomba nguwe alimwi akupaila kulinguwe aciindi cili coonse.—Intembauzyo 15:1-5.

6. Ino inga twatondezya buti kuti tulamuyanda Jesu?

⁶ Jesu wakaamba kuti: “Ikuti muntu kandiyanda, unoobamba majwi aangu, eelyo Taata uyoomuyanda.” (Johane 14:23) Aboobo kutegwa tube mulongwe wa Jehova, tweelede kumuyanda awalo Jesu akucita nzyaakatuyiisya kuti katucita. Mucikozyanyo, tulaatobela malailile aa Jesu aakukambauka makani mabotu akugwasya bantu kuba basikwiiya. (Matayo 28:19, 20; Johane 14:15, 21) Akaambo kakuti tulamuyanda Jesu, ‘tulaitobelesya mikondo yakwe.’ (1 Petro 2:21) Jehova ulakkomana ciindi nabona kusolekesya kwesu ikwiiya Mwanaakwe muzintu zyoonse nzyotwaamba akucita.

7. Ino nkaambo nzi ncotweelede kusinizya kuti balongwe besu mbalongwe ba Jehova?

⁷ Balongwe ba Jehova balasyomeka, balamvwida, alimwi balamuyanda Mwanaakwe. Sena tusala balongwe ibali mbuli baabo Jehova mbasala? Ikuti balongwe banu kabamwiiya Jesu alimwi kabajisi bubi kuyiisya bamwi kujatikizya Bwami bwa Leza, balakonzya kumugwasya kuba muntu uuli kabotu alimwi uuzumanana kusyomeka kuli Jehova.

8. Ncinzi cimukkomanisya kujatikizya cilongwe icakaliko akati ka Rute alimwi a Naomi?

⁸ Mu Bbaibbele, tulabala kujatikizya zilongwe zinji, mbuli cilongwe cakaliko akati ka Rute abanyinazyala ba  Naomi. Bamakaintu aaba bakali kuzwa kumasi aayindene alimwi abukkale, alimwi Naomi wakali mupati kwiinda Rute. Nokuba boobo, bakaba balongwe beni-beni nkaambo boonse bobilo bakali kumuyanda Jehova. Ciindi Naomi naakali kuyanda kuzwa kunyika ya Moabu akupiluka ku Israyeli, ‘Rute wakakakatila kulinguwe.’ Wakaambila Naomi kuti: “Bantu bako bayooba bantu bangu, alimwi Leza wako uyooba Leza wangu.” (Rute 1:14, 16) Rute wakali siluzyalo kuli Naomi. Ciindi nobakasika ku Israyeli, Rute wakabeleka canguzu kutegwa agwasye mulongwe wakwe. Naomi wakali kumuyanda kapati Rute alimwi wakamupa lulayo lubotu. Rute wakamuswiilila, aboobo boonse bobilo bakatambula zilongezyo zinji.—Rute 3:6.

9. Ncinzi cimukkomanisya kujatikizya cilongwe icakaliko akati ka Davida a Jonatani?

⁹ Cilongwe icakaliko akati ka Davida a Jonatani ncikozyanyo cimbi cabalongwe beni-beni balo ibakali kusyomeka kuli Jehova. Jonatani wakali mupati kuli Davida amyaka iibalilwa ku 30 alimwi Davida ngowakali kutobela mumulongo wakuba mwami wa Israyeli. (1 Samuele 17:33; 2 Samuele 5:4) Pele Jonatani naakazyiba kuti Jehova wasala Davida kuba mwami, tanaakaba amunyono naa kuzundana anguwe. Muciindi caboobo, Jonatani wakacita zyoonse nzyaakali kukonzya kutegwa amugwasyilizye Davida. Mucikozyanyo, ciindi Davida naakali muntenda, Jonatani wakamugwasya “kuti ayume muli Jehova.” Mane buya wakabikka buumi bwakwe muntenda akaambo ka Davida. (1 Samuele 23:16, 17) Davida awalo wakali kusyomeka kumulongwe wakwe. Wakasyomezya kulanganya mukwasyi wa Jonatani, alimwi wakacizuzikizya cisyomezyo eeco noliba leelyo Jonatani  naakafwa.—1 Samuele 18:1; 20:15-17, 30-34; 2 Samuele 9:1-7.

10. Ino ncinzi ncomwiiya kujatikizya cilongwe kuzwa kucikozyanyo cabana Hebrayo botatwe?

¹⁰ Ba Sadirake, Mesaki alimwi a Abedinego bakali bakubusi bana Hebrayo botatwe ibakabwezyegwa kuzwa kumunzi wabo kabacili baniini akutolwa ku Babuloni. Nokuba kuti bakali kulamfwu amikwasyi yabo, bakali kugwasyanya kutegwa bazumanane kusyomeka kuli Jehova. Mukuya kwaciindi, nobakakomena, lusyomo lwabo lwakasunkwa ciindi Mwami Nebukadinezara naakabalailila kuti bakombe cibumbwa cangolida. Ba Sadirake, Mesaki alimwi a Abedinego bakakaka kucikomba cibumbwa akwaambila mwami kuti: “Swebo tatukoobelekela baleza bako nokuba kukomba cibumbwa cangolida ncowaimika.” Ciindi lusyomo lwabo nolwakasunkwa, aaba balongwe botatwe bakazumanana kusyomeka kuli Leza wabo.—Daniele 1:1-17; 3:12, 16-28.

11. Ino Paulo a Timoteyo bakaba buti balongwe beni-beni?

¹¹ Ciindi mwaapostolo Paulo naakaswaangana amukubusi Timoteyo, wakali kukonzya kubona kuti Timoteyo wakali kumuyanda Jehova alimwi wakali kwiibikkila maano ncobeni mbungano. Aboobo Paulo wakamuyiisya Timoteyo mbwaakeelede kugwasya bakwesu abacizyi mumasena manji aayindene-indene. (Milimo 16:1-8; 17:10-14) Timoteyo wakabeleka canguzu kapati cakuti Paulo wakati: “Wakabeleka cabusungu andime mukutola ambele makani mabotu.” Paulo wakalizyi kuti Timoteyo wakali ‘kuyoobalanganya bweelede’ bakwesu abacizyi. Ciindi nobakali kubelekela Jehova canguzu antoomwe, Paulo a Timoteyo bakaba balongwe beni-beni.—Bafilipi 2:20-22; 1 Bakorinto 4:17.

12, 13. (a) Ino nkaambo nzi ncotweelede kucenjela kapati notusala balongwe nomuba mumbungano? (b) Nkaambo nzi mwaapostolo Paulo ncaakaambila majwi aakucenjezya aali mulugwalo lwa 1 Bakorinto 15:33?

¹² Mumbungano, tulakonzya kwiiya kubakwesu abacizyi alimwi akugwasyanya kutegwa tuzumanane kusyomeka. (Amubale Baroma 1:11, 12.) Pele nomuba mumbungano, tweelede kucenjela kujatikizya baabo mbotusala kuti babe balongwe besu beni-beni. Tulijisi bakwesu abacizyi ibazwa mubukkale bwiindene-indene alimwi azilengwa. Bamwi mbapya mumbungano, mpoonya bamwi bali kumubelekela Jehova kwamyaka minji.  Citola ciindi kuti cilongwe cikomene akati kamuntu a Jehova, mbubwenya mbocitola ciindi kuti mucelo ubizidwe. Aboobo tweelede kukkazikilana moyo akutondezya luyando kuli umwi amweenzinyina alimwi akusala balongwe besu cabusongo.—Baroma 14:1; 15:1; Bahebrayo 5:12–6:3.

¹³ Zimwi ziindi, kulakonzya kuba bukkale bukatazya mumbungano, aboobo inga kwayandika kuti tucenjele kapati. Cilakonzya kuba kuti mukwesu naa mucizyi ucita zintu Bbaibbele nzyolyaamba kuti taziluzi. Naa ambweni umwi ulakonzya kuba amuuya wakutongooka walo uukonzya kunyonyoona mbungano. Eeci tacigambyi pe, nkaambo nomuba mumwaanda wamyaka wakusaanguna, zimwi ziindi kwakali kuba mapenzi mumbungano. Mane buya, mwaapostolo Paulo wakacenjezya Banakristo bakuciindi eeco kuti: “Muteenwi pe. Kuyanzana abantu babyaabi kunyonganya zilengwa zibotu.” (1 Bakorinto 15:12, 33) Paulo alimwi wakacenjezya Timoteyo kuti acenjele kujatikizya baabo mbaakali kusala kuti babe balongwe bakwe beni-beni. Andiswe tweelede kucita mbubwenya oobo mazuba aano.—Amubale 2 Timoteyo 2:20-22.

14. Ino balongwe mbotusala inga bacijatikizya buti cilongwe cesu a Jehova?

¹⁴ Tweelede kucikwabilila cilongwe cesu a Jehova. Ncecintu ciyandika kapati ciinda zyoonse ncotujisi. Aboobo tweelede kutantamuka kuba acilongwe ciyumu amuntu uuli woonse uukonzya kupa kuti lusyomo lwesu luceye alimwi akunyonganya cilongwe eeco. Mbubonya mbotutakonzyi kunyika cisani mumaanzi aalaatombe akulangila kuti cilanywida maanzi mabotu, tatukonzyi kuba abalongwe bacita zitaluzi akuyeeya kuti balakonzya kutugwasya kucita zintu zili kabotu. Tweelede kucenjela  kapati notusala balongwe besu.—1 Bakorinto 5:6; 2 Batesalonika 3:6, 7, 14.

15. Ino ncinzi ncomukonzya kucita kutegwa mube abalongwe beni-beni mumbungano?

¹⁵ Mumbungano, mulakonzya kujana bantu ibamuyanda ncobeni Jehova. Balakonzya kuba balongwe banu beni-beni. (Intembauzyo 133:1) Mutani kuyanzani buyo abaabo bamusela wanu naa mbomwakakomena limwi. Amuyeeye kuti Jonatani wakali mupati kapati kuli Davida, alimwi Rute wakali muniini kapati kuli Naomi. Tweelede kutobela lulayo lwamu Bbaibbele oolu lwakuti: “Amujalule myoyo yanu.” Nkokuti tweelede ‘kuba aluyando kuciinga coonse cabakwesu.’ (2 Bakorinto 6:13; amubale 1 Petro 2:17.) Ikuti naa mwazumanana kumwiiya Jehova, bantu banji bayooyanda kuba balongwe banu.

16, 17. Ikuti umwi mumbungano watunyemya, ncinzi ncotuteelede kucita?

¹⁶ Mumukwasyi uuli woonse, kuli kwiindana kwabube, aumwi mbwazibona zintu alimwi anzila zyakucita zintu. Oobu mbombubo mbocibede amumbungano. Kwiindana-indana ooku kupa kuti buumi kabukkomanisya, alimwi tulakonzya kwiiya zinji kuli umwi amweenzinyina. Pele zimwi ziindi kwiindana nkotujisi kulakonzya kupa kuti bakwesu naa bacizyi katubabona munzila iitali kabotu alimwi akucimwa buya kujatikizya mbabo. Zimwi ziindi tulakonzya kunyema naa kulimvwa bubi. (Tusimpi 12:18) Sena tweelede kulekela mapenzi aali boobu kututyompya naa kupa kuti tuleke kuyanzana ambungano?

¹⁷ Peepe. Nokuba kuti umwi watutyompya munzila imwi, tatweelede kuleka kuyanzana ambungano. Tali Jehova iwatunyemya pe. Wakatupa buumi alimwi azintu zimbi zyoonse. Tweelede kumuyanda alimwi akusyomeka  kulinguwe. (Ciyubunuzyo 4:11) Mbungano ncipego kuzwa kuli Jehova yalo iitugwasya kuba alusyomo luyumu. (Bahebrayo 13:17) Inga tiitwacikaka cipego cakwe akaambo buyo kakuti umwi watutyompya.—Amubale Intembauzyo 119:165.

18. (a) Ino ncinzi cikonzya kutugwasya kuti katumvwana abakwesu abacizyi? (b) Nkaambo nzi ncotweelede kubalekelela bamwi?

¹⁸ Tulabayanda bakwesu abacizyi alimwi tuyanda kuti katumvwana ambabo. Jehova talangili kuti muntu uuli woonse alondoke, andiswe mbotweelede kuba oobo. (Tusimpi 17:9; 1 Petro 4:8) Toonse tulalubizya, pele luyando luyootugwasya kuzumanana ‘kulekelelana camoyo woonse.’ (Bakolose 3:13) Luyando luyootugwasya kutalekela kwiimpana kusyoonto kuti libe penzi pati. Masimpe, ikuti muntu umwi watunyemya, cilakonzya kukatazya kuleka kukayeeya kaambo. Ncuuba-uba kunyema alimwi akuba amfwundiilili kumuntu ooyo. Pele eeci ciyoopa buyo kuti katuuside alimwi akuzumanana katunyemede. Pele ikuti naa twamulekelela muntu iwakatunyemya, tulakonzya kuliiba mumizeezo, kuba aluumuno mumbungano, alimwi icipati kwiinda zyoonse, kuba acilongwe cibotu a Jehova.—Matayo 6:14, 15; Luka 17:3, 4; Baroma 14:19.

19. Ino ndilili notweelede kucileka kuyanzana amuntu umwi mumbungano?

¹⁹ Mumukwasyi imuli luyando, munamukwasyi umwi aumwi ulacita lubazu lwakwe kutegwa akkomanisye bamwi. Pele amweezyeezye kuti muntu omwe wazanga. Umwi aumwi mumukwasyi wasoleka cakwiinduluka-induluka kumugwasya, pele walukaka lugwasyo. Ulakonzya kusala kuzwa aŋanda, naa mutwe wamukwasyi ulakonzya kumutanda aŋanda. Bukkale bukozyene aboobo  bulakonzya kucitika mumbungano. Muntu ulakonzya kusala kuzumanana kucita zintu zitamukkomanisyi Jehova akuleta mapenzi kumbungano. Ulakonzya kulukaka lugwasyo ndwapegwa akutondezya kwiinda mumicito yakwe iitondezya kuti taciyandi kuzulilwa mumbungano. Ulakonzya kusala kuzwa mumbungano alikke, naa kugusyigwa buya. Ikuti cili boobo cacitika, Bbaibbele cakusalazya lyaamba kuti tweelede ‘kuleka kuyanzana’ anguwe. (Amubale 1 Bakorinto 5:11-13; 2 Johane 9-11) Eeci cilakonzya kutuyumina kapati ikuti muntu ooyo kali mulongwe wesu naa munamukwasyi. Pele mubukkale buli boobu, tweelede kusyomeka kapati kuli Jehova kwiinda kusyomeka kumuntu uuli woonse.—Amubone Bupanduluzi Buyungizyidwe 8.

20, 21. (a) Ino mbuti bubambe bwakugwisya muntu mumbungano mbobutondezya luyando? (b) Ino nkaambo nzi ncociyandika kapati kusala kabotu balongwe besu?

²⁰ Bubambe bwakugwisya muntu mumbungano mbubambe bwaluyando kuzwa kuli Jehova. Bulaikwabilila mbungano kuli baabo batazibikkili maano zyeelelo zya Jehova. (1 Bakorinto 5:7; Bahebrayo 12:15, 16) Bulatugwasya kutondezya luyando kuzina lya Jehova lisalala, zyeelelo zyakwe zisumpukide alimwi a Jehova mwini. (1 Petro 1:15, 16) Alimwi bubambe bwakugwisya muntu mumbungano butondezya luyando kumuntu ooyo iwagwisyigwa. Cisubulo eeci cilakonzya kumugwasya kuyeeya kuti ncacita ncibi akumukulwaizya kuti acince. Banji ibakagwisyidwe mumbungano bakajokela kuli Jehova alimwi bakatambulwa caluyando.—Bahebrayo 12:11.

²¹ Balongwe besu balakonzya kutuyunga naa kutugwasya. Aboobo cilayandika kapati kusala kabotu. Ikuti katuyanda baabo Jehova mbayanda, tuyoozingulukwa abantu ibakonzya kutugwasya kuzumanana kusyomeka kulinguwe lyoonse.