1-3. (a) Ino bantu banji balimvwa buti kujatikizya milimo yabo? (b) Ino mibuzyo nzi njotutiilange-lange mucibalo eeci?

BANTU munyika yoonse balabeleka canguzu kutegwa kabaligwasya alimwi akugwasya mikwasyi yabo. Bantu banji tabaikkomanini milimo yabo alimwi bamwi balalibilika kuunka kumilimo buzuba abuzuba. Ikuti naa mbomulimvwa oobo, ino ncinzi ncomukonzya kucita kutegwa kamuukkomanina mulimo wanu? Ino mbuti mbomukonzya kulimvwa kabotu kujatikizya mulimo wanu?

² Jehova utwaambila kuti: “Muntu woonse kalya, kanywa alimwi akukkomana akaambo kamilimo yakwe yoonse njabeleka canguzu. Eeci ncipego ca Leza.” (Mukambausi 3:13) Jehova wakatulenga aluyandisyo lwakubeleka. Uyanda kuti katulimvwa kabotu kujatikizya zintu nzyotucita.—Amubale Mukambausi 2:24; 5:18.

³ Aboobo, ino ncinzi cikonzya kutugwasya kuukkomanina mulimo wesu? Ino milimo iili buti Banakristo njobeelede kweeleba? Mbuti mbotukonzya kwaabanya kabotu ciindi ncotutola kumilimo yesu alimwi akukukomba Jehova? Alimwi ino mulimo nzi uuyandika kapati ngotweelede kucita?

4, 5. Ino Jehova ukubona buti kubeleka?

⁴ Jehova lwakwe ulakuyanda kubeleka. Lugwalo lwa Matalikilo 1:1 lwaamba kuti: “Kumatalikilo, Leza wakalenga julu anyika.” Leza naakamana kulenga zintu zyoonse munyika, wakaamba kuti zilenge zyakwe “nzibotu kapati.” (Matalikilo 1:31) Mulengi wesu wakakkutila azintu nzyaakalenga.—1 Timoteyo 1:11.

⁵ Jehova kunyina naleka kubeleka. Jesu wakaamba kuti: “Taata ulabeleka ambuli sunu.” (Johane 5:17) Nokuba kuti tatuzizyi zintu zibotu zyoonse Jehova nzyaali kucita, pele zimwi tulizizyi. Wali kusala aabo ibayoolela a Mwanaakwe, Jesu Kristo, kuba cibeela ca Bwami. (2 Bakorinto 5:17) Jehova alimwi ulabasololela bantu alimwi akubalanganya. Akaambo kamulimo wakukambauka uucitwa nyika yoonse, mamiliyoni aabantu bamuzyiba Jehova alimwi baba abulangizi bwakuyoopona mu Paradaiso anyika.—Johane 6:44; Baroma 6:23.

6, 7. Ino Jesu mubelesi uuli buti?

⁶ Mbubonya mbuli Bausyi, Jesu ulakuyanda kubeleka. Katanaboola anyika, Jesu wakali “mubelesi uucibwene,” katola lubazu mukulenga zintu zyoonse kujulu alimwi aanyika. (Tusimpi 8:22-31; Bakolose 1:15-17) Naakali anyika, Jesu wakazumanana kubeleka canguzu. Naakacili mukubusi, wakaiya kuba sikubeza mapulanga uucibwene, kuboneka kuti wakali kupanga zyakupanga-panga alimwi akuyaka maanda. Jesu wakali kucita kabotu mumulimo wakwe cakuti wakali kwiitwa kuti “sikubeza mapulanga.”—Marko 6:3.

⁷ Pele, mulimo uuyandika kapati ngwaakali kucita Jesu wakali wakukambauka makani mabotu alimwi akuyiisya bantu kujatikizya Jehova. Wakajisi buyo myaka yotatwe acisela kutegwa amanizye mulimo wakwe wakukambauka,  aboobo wakali kubeleka canguzu kuzwa mafwumofwumo mane kusikila ciindi camasiku. (Luka 21:37, 38; Johane 3:2) Jesu wakali kweenda misinzo milamfwu kapati, kakambauka makani mabotu kubantu banji kapati.—Luka 8:1.

8, 9. Nkaambo nzi Jesu ncaakali kuukkomanina mulimo wakwe?

⁸ Kuli Jesu, kubeleka mulimo wa Leza cakali mbuli cakulya. Mulimo ooyu wakali kumupa nguzu. Kwakali mazuba aamwi Jesu naakali kubeleka canguzu kapati cakuti tanaakali kujana aciindi cakulya. (Johane 4:31-38) Wakali kucibelesya coolwe cili coonse ncaakajisi kugwasya bamwi kwiiya kujatikizya Bausyi. Nkakaambo kaako wakaambila Jehova kuti: “Ndakulemeka anyika, kwiinda mukumanizya mulimo ngookandipa kuti ndicite.”—Johane 17:4.

⁹ Cilisalede kuti, Jehova a Jesu balabeleka canguzu alimwi balimvwa kukkomana alimwi akukkutila mumilimo yabo. Tweelede ‘kumwiiya Leza,’ alimwi ‘akutobela mikondo ya [Jesu].’ Nkakaambo kaako tulasoleka kubeleka canguzu alimwi akucita zyoonse nzyotukonzya mumulimo uuli woonse ngotucita.

10, 11. Ino ncinzi cikonzya kutugwasya kuulanga kabotu mulimo wesu?

¹⁰ Mbotuli babelesi ba Jehova, tulabeleka canguzu kutegwa katuligwasya alimwi akugwasya mikwasyi yesu. Tuyanda kuti katukkomene kujatikizya mulimo wesu, pele eeci cilakonzya kukatazya. Aboobo, ino ncinzi ncotukonzya kucita ikuti katutajani lukkomano mumulimo wesu?

¹¹ Amuzilange kabotu zintu. Ambweni inga tiitwacikonzya kucinca nkotubelekela naa kulampa kwaciindi ncotubeleka, pele tulakonzya kucinca mbotuzilanga zintu. Ikuzyiba Jehova nzyalangila kulindiswe kulakonzya kutugwasya. Mucikozyanyo, Jehova uyanda kuti silutwe  wamukwasyi kabeleka canguzu kutegwa alanganye mukwasyi wakwe akuujanina nzyouyandika. Mane buya Bbaibbele lyaamba kuti muntu iwaalilwa kujanina nzyouyandika mukwasyi wakwe “mubi kapati kwiinda muntu uunyina lusyomo.” (1 Timoteyo 5:8) Ikuti kamuli basilutwe bamukwasyi, mweelede kubeleka canguzu kutegwa mujanine mukwasyi wanu ziyandika. Kufwumbwa naa mulauyanda mulimo ngomucita naa pe, mulizyi kuti kwiinda mukujanina mukwasyi wanu nzyouyandika, mukkomanisya Jehova.

12. Ino kubeleka canguzu alimwi akusyomeka kutugwasya buti?

¹² Amubeleke canguzu alimwi akusyomeka. Eeci cilakonzya kupa kuti cuube-ube kuukkomanina mulimo wanu. (Tusimpi 12:24; 22:29) Basikumulemba mulimo balakonzya kumusyoma. Basikulemba mulimo banji balabayanda babelesi basyomeka, nkaambo tababbi mali, zibelesyo naa ciindi. (Baefeso 4:28) Iciyandika kapati ncakuti, Jehova ulizyi ciindi nomubeleka canguzu alimwi aciindi nomucita zintu cakusyomeka. Mulakonzya kuba ‘amanjezyeezya aasalala’ nkaambo mulizyi kuti mukkomanisya Leza.—Bahebrayo 13:18; Bakolose 3:22-24.

13. Ncinzi cimbi cikonzya kucitika ikuti katusyomeka kumulimo?

¹³ Amuzyibe kuti mbomulilemeka kumulimo kulakonzya kupa kuti Jehova atembaulwe. Eeci citupa kaambo kambi ncotweelede kuukkomanina mulimo wesu. (Tito 2:9, 10) Mane buya ambweni bamwi mbomubeleka limwi inga bayanda kwiiya Bbaibbele akaambo kacikozyanyo canu cibotu.—Amubale Tusimpi 27:11; 1 Petro 2:12.

14-16. Ncinzi ncotweelede kulanga-langa ciindi notusala mulimo?

¹⁴ Bbaibbele talijisi mulongo wamilimo Munakristo njayelede kuzumina naa kukaka. Pele lilijisi njiisyo zikonzya  kutugwasya kusala kabotu kujatikizya mulimo. (Tusimpi 2:6) Kwiinda mukubelesya njiisyo zyamu Bbaibbele, tulakonzya kulibuzya mibuzyo iitobela.

¹⁵ Sena mulimo ooyu uyooyanda kuti ndicite cintu Jehova ncaamba kuti ncibi? Twakaiya kujatikizya micito Jehova njatayandi, mbuli kubba akubeja. (Kulonga 20:4; Milimo 15:29; Baefeso 4:28; Ciyubunuzyo 21:8) Aboobo tweelede kucenjela kutegwa tutantamuke mulimo uuli woonse uukazyanya azyeelelo zya Jehova.—Amubale 1 Johane 5:3.

 ¹⁶ Sena mulimo ooyu usumpula micito Jehova njaamba kuti mibi? Mucikozyanyo, ikubeleka mulimo wakuyaka tacili cibi pe. Pele ino mbuti kuti Munakristo wapegwa mulimo wakuyaka cikombelo? Bwini mbwakuti, mulimo wakwe inga tiiwamupa kuti abugwasyilizye buya cacigaminina bukombi bwakubeja. Nokuba boobo, sena ikubelekela abusena ibuli boobu takukulwaizyi mulimo wakuyiisya zyakubeja kujatikizya Jwi lya Leza?—Ciyubunuzyo 18:4.

17. Ino ncinzi cikonzya kutugwasya kusala zintu zikkomanisya Leza?

¹⁷ Kwiinda mukubelesya njiisyo zya Leza, tulakonzya kuba mbuli bantu baambidwe mulugwalo lwa Bahebrayo 5:14, “aabo ibalaamaano aayiisyidwe kwaandaanya ciluzi acitaluzi kwiinda mukwaabelesya.” Amulibuzye kuti: ‘Ikuti naa ndauzumina mulimo ooyu, sena inga ndabalebya bamwi? Sena mulimo ooyu inga wandipa kuti ndisiye ngondikwetene limwi abana akuunka kucisi cimbi? Ino eeci inga cabajatikizya buti?’

18. Nkaambo nzi ncocikonzya kukatazya kubikkila maano kubukombi bwesu?

¹⁸ Cilakonzya kukatazya kubikka bukombi bwesu kuli Jehova mubusena bwakusaanguna ‘muziindi eezyi zikatazya ncobeni.’ (2 Timoteyo 3:1) Kujana mulimo akuzumanana kubeleka cilakonzya kukatazya kapati. Tweelede kulanganya mukwasyi wesu, pele tulizyi kuti bukombi bwesu bweelede kubikkwa mubusena bwakusaanguna. Tatweelede kulekela zintu zyakumubili kuba nzyezintu ziyandika kapati mubuumi bwesu. (1 Timoteyo 6:9, 10) Aboobo mbuti mbotukonzya ‘kusinizya zintu ziyandika kapati’ alimwi akujanina mukwasyi wesu ziyandika?—Bafilipi 1:10.

19. Ino kusyoma Jehova kutugwasya buti kuubona munzila yeelede mulimo?

 ¹⁹ Amumusyome Jehova cakumaninina. (Amubale Tusimpi 3:5, 6.) Tulizyi kuti Leza ulizyi zintu zini nzyotuyandika akuti ulatubikkila maano kapati. (Intembauzyo 37:25; 1 Petro 5:7) Ijwi lyakwe litwaambila kuti: “Ibukkale bwanu butabi bwakuyandisya mali pe, pele amukkutile azintu nzyomujisi lino. Nkaambo [Leza] wakaamba kuti: ‘Ziyume zitete, tandikakusiyi pe alimwi tandikakulekelezyi pe.’” (Bahebrayo 13:5) Jehova tayandi kuti lyoonse katulibilika kujatikizya mbotukonzya kujanina mukwasyi wesu ziyandika. Cakwiinduluka-induluka, Jehova watondezya kuti ulakonzya kubapa nzyobayandika bantu bakwe. (Matayo 6:25-32) Kufwumbwa naa bukkale bwesu kujatikizya mulimo buli buti, lyoonse tweelede kwiiya Bbaibbele, kukambauka makani mabotu alimwi akujanika kumiswaangano ya Bunakristo.—Matayo 24:14; Bahebrayo 10:24, 25.

20. Ino inga twabuubya-ubya buti buumi bwesu?

²⁰ Amube aliso lilangide buyo acintu comwe. (Amubale Matayo 6:22, 23.) Eeci caamba kuubya-ubya buumi bwanu kutegwa mucikonzye kubelekela Jehova. Tulizyi kuti mbufwubafwuba kulekela mali, buumi bubotu naa tuncini twaino-ino kuba nzyezintu ziyandika kapati kwiinda cilongwe cesu a Leza. Aboobo, ino ncinzi cikonzya kutugwasya kubikka zintu ziyandika kapati mubusena bwakusaanguna? Tweelede kusolekesya kapati kutaba azikwelete. Ikuti kamujisi kale zikwelete, amubone mbomukonzya kuzicesya-cesya naa kuzibbadela zyoonse. Ikuti naa tiitwacenjela, zintu zyakumubili zilakonzya kutumanina ciindi cesu coonse anguzu, alimwi inga twabula aciindi cakupaila, kwiiya naa kukambauka. Muciindi cakulekela zintu zyakumubili kunyonganya buumi bwesu,  tweelede kwiiya kukkutila azintu ziyandika ncobeni mbuli “cakulya azisani.” (1 Timoteyo 6:8) Kufwumbwa naa bukkale bwesu buli buti, tweelede kulilingula ciindi aciindi kutegwa tubone mbotukonzya kumubelekela Jehova cakumaninina.

21. Nkaambo nzi ncotweelede kusala zintu izyeelede kuba mubusena bwakusaanguna mubuumi bwesu?

²¹ Amuzibikke kumbele zintu ziyandika kapati. Tweelede kucibelesya kabotu ciindi cesu, nguzu alimwi azintu zyakumubili. Ikuti tiitwacenjela, zintu zitayandiki kapati  mbuli lwiiyo naa mali, zilakonzya kutumanina ciindi. Jesu wakaamba kuti: “Amuzumanane kusaanguna kuyandaula Bwami.” (Matayo 6:33) Zintu nzyotusala kucita, zilengwa, zintu nzyotucita buzuba abuzuba alimwi ambaakani zyesu, zyoonse eezyi zitondezya zintu nzyotuyandisya kapati mubuumi.

22, 23. (a) Ino mulimo nzi uuyandika kapati ngotweelede kucita Tobanakristo? (b) Ncinzi ciyootugwasya kuukkomanina mulimo wesu?

²² Mulimo uuyandika kapati ngotujisi ngwakubelekela Jehova. Alimwi nzila mpati yakucita boobo nkukambauka makani mabotu kuli bamwi. (Matayo 24:14; 28:19, 20) Mbubonya mbuli Jesu, tweelede kucita kufwumbwa ncotukonzya mumulimo ooyu. Bamwi baunka kuyoobelekela kumasena aabulide bakambausi. Bamwi baiya mwaambo uutali wabo kutegwa bacikonzye kukambaukila bantu babelesya mwaambo ooyo. Amubandike abaabo ibakacita kale oobo, akubabuzya mbobakacikonzya. Bayoomwaambila kuti balikkomene alimwi buumi bwabo bulakkomanisya kapati.—Amubale Tusimpi 10:22.

²³ Mazuba aano, bunji bwesu tulabeleka mawoola manji kumulimo naa kumilimo kutegwa tujanine mikwasyi yesu ziyandika. Jehova ulizyi oobo, alimwi ulakkomana akaambo kakusoleka nkotucita kulanganya mikwasyi yesu. Aboobo atuzumanane kwiiya Jehova alimwi a Jesu kwiinda mukubeleka canguzu, kufwumbwa naa mulimo nzi ngotubeleka. Alimwi tutalubi kuti mulimo wesu uuyandika kapati ngwakubelekela Jehova alimwi akukambauka makani mabotu aa Bwami bwa Leza. Ikucita boobu kuyootuletela lukkomano lwini-lwini.