Kuli baabo ibamuyanda Jehova Leza alimwi a Jwi lyakwe, Bbaibbele:

Jesu wakaamba kuti: “Muyoozyiba kasimpe, eelyo kasimpe kayoomwaangununa.” (Johane 8:32) Amuyeeye buyo mbomwakalimvwa nomwakajana kasimpe kamu Bbaibbele ciindi cakusaanguna! Cakali kukkomanisya kuzyiba kuti munyika iizwide makani aakubeja, tulakonzya kujana kasimpe.—2 Timoteyo 3:1.

Jehova Leza uyanda kuti tukazyibe kasimpe. Alimwi akaambo kakuti tulabayanda bantu, tweelede kubaambila abalo kujatikizya kasimpe. Nzinji zijatikizyidwe mukubelekela Leza. Tweelede kubeleka canguzu kutegwa katupona kweelana ambobeelede kupona Banakristo, nkaambo tulazilemeka kapati njiisyo zya Jehova. Jesu wakaamba nzila iiyandika kapati motukonzya kutondezya kuti tulamuyanda Leza. Wakaamba kuti: “Ikuti mwaitobela milawo yangu, mulazumanana muluyando lwangu, mbubonya andime mbondaitobela milawo ya Taata akuzumanana muluyando lwakwe.”—Johane 15:10.

Jesu ulabayanda ncobeni Bausyi, alimwi ulacita kufwumbwa Bausyi ncobamwaambila kucita. Ikuti twamwiiya Jesu mubuumi bwesu, Jehova unootuyanda alimwi tuyoojana lukkomano lwini-lwini. Mbubonya mbwaakaamba Jesu, “ikuti kamuzizyi zintu eezyi, munookkomene ikuti naa kamuzicita.”—Johane 13:17.

Tulaalusyomo lwakuti bbuku eeli liyoomugwasya kupona kweelana akasimpe kajanika mu Bbaibbele alimwi akuba mulongwe wa Leza. Tupailila kuti luyando lwanu kuli Leza lukomene alimwi akuzumanana kukkala ‘muluyando lwa Leza nomulindila buumi butamani.’—Juda 21.