1. Mbuti bukombi bwansiku mbobwakozyanyisyigwa aciluli?

INJIISYO zyabukombi zyansiku zyamu Afulika zilakonzya kukozyanisigwaa ciluli. Atalaa lyaciluli ngu Leza, ulaanguzu kapati zyamuuya. Mumabali-bali kuli tuleza naa myuuya yalo iili mbabelesi ba Leza. Bali antoomwe amizimo yabasikale, yalo iibikkila maanu kumikwasyi yabo anyika alimwi iilijatikizyidwe kapati kubukkale bwabo bubotu. Ansi aaciluli kuli nguzu zyamyuuya zisyoonto mbuli: zyamasalamuzi, kusonda alimwi abulozi.

2. Mbuti kaambyo kamwi kamu Afulika mbokatondezya kuti njiisyo zyansiku zilabuyunga bukombi?

² Eezi njiisyo zyansiku zyali kubuyunga kapati bukombi bumbi mu Afulika. Kaambyo kamwi kamu Afulika kaamba boobu: “Ikukakatila Kulusyomo (lwa Bunakristo naa lwaba Mozilemu) takutulesyi kukomba baleza bamucisi cokwesu pe.”

3. Nkuukuli nkotunga twaiya masimpe aabaabo bakkala mubusena bwamyuuya?

³ Ino zyamasimpe buti zilengwa zisyomwa mu Afulika? Ibbaibbele lilatwaambila masimpe kujatikizya baabo bakkala mubusena bwamyuuya.

4. Ncinzi zikombelo zipati-pati zijanika mu Afulika ncozisyoma?

⁴ Zikombelo zipati-pati zyotatwe zijanika mu Afulika zilazumina kuti Leza nkwali alimwi akuti mupatikampatila. Ibbaibbele limupandulula kuti “ngu-Leza wabaleza, mwami wabami, Leza mupati singuzu uuyoosya.” (Deuteronomo 10:17) Iba Mozilemu abalo basyoma muli Leza omwe buyo mupati. Geoffrey Parrinder Professor mulwiiyo lwabukombi bwansiku, wakaamba boobo kujatikizya bukombi bwansiku bwamu Afulika: “Bunji bwabana Afulika balasyoma muli Leza mupati, usyi wabaleza alimwi abantu mulengi wajulu aansi.”

5. Mazina nzi amwi abelesyegwa kwiita Leza?

⁵ Pele nokuba kuti lusyomo muli Leza lulidumide, ibantu banji tabazi kabotu kuti naa Leza nguni. Intaamu yakusaanguna iiyandika nomuyanda kuziba muntu, nkuziba zina lyakwe. Kuli kutamvwana muzikombelo kujatikizya zina lya Leza. Mu Kristendomu, ikanjikanji wiitwa buyo kuti Leza, izina lipandulula kuti “Singuzuzyoonse.” Ba Mozilemu bamwiita kuti Allah. Akati kabaabo batobela bukombi bwansiku, izina libelesyegwa kwiita Mupatikampatila liliindene-indene mumyaambo iisiyene-siyene. John S. Mbiti, mubbuku lyakwe litegwa Concepts of God in Africa, wakalemba mulongo wamazina aamu Afulika alimwi amazina aabulemu asiyene-siyene ainda ku 500 abelesyegwa kwiita Leza. Mucikozyanyo, mumwaambo wa Ciyoruba (waku Nigeria), Leza wiitwa kuti Olodumare; mu Cikkikkuyu  (caku Kenya) ngu Ngai; alimwi mumwaambo wa Cizulu (caku South Africa) wiitwa kuti Unkulunkulu.

6, 7. Ino nguni zina lyakwe Leza, alimwi tuzyi buti?

⁶ Ino ncinzi walo Leza mwini ncaamba kujatikizya zina lyakwe? Leza naakalailila Musa kusololela bana Israyeli kuzwa mu Egepita, Musa wakabuzya kuti: “Nenjoosika kubana ba-Israyeli akubaambila kuti, Leza wabamausowanu wandituma kulindinywe, ambweni bakandibuzye kuti, Ngwani izina lyakwe? Nkabavwiile buti?”—Kulonga 3:13.

⁷ Leza wakaingula kuti: “Mbuboobu mboelede kwaambila bana ba-Israyeli. Jehova Leza wabamausowanu, . . . wandituma kulindinywe, Ndendilyo izina lyangu lyoonse; mbuboobo mbunjeelede kwiibalukwa mumazyalani amazyalani.” (Kulonga 3:15) Eeli zina lya Leza lilajanika ziindi zili 7,000 mumalembe aa Bbaibbele nokuba kuti bamwi basikusandulula Bbaibbele bakaligwisya akubikka mazina aabulemu mbuli lyakuti “Leza” naa “Mwami.”

8. Ino Jehova uli buti, alimwi ncinzi ncotweelede kucita ikuti katuyanda kuzuminwa anguwe?

⁸ Ino Jehova mubwini uulibonya buti? Jehova muuya, ngusinguzuzyoonse, uulemekwa. Mupatikampatila uutakonzyi kweelanisyigwa acintu cili coonse. (Deuteronomo 6:4; Isaya 44:6) Jehova wakaambila Musa kuti: “Ndime Jehova Leza wako, ndi Leza sibuzuba.” Munzila imwi, ikuti katuyanda kuzuminwa a Jehova, tweelede kukomba nguwe alikke. Tayandi kuti katukomba zimwi zintu naa bantu bambi pe.—Kulonga 20:3-5.

9. Nkaambo nzi ncotukonzya kwaambila kuti Jesu alimwi a Jehova tabeelene?

⁹ Sunu kuli kunyongana kapati kwakutazyiba Jesu ikuti naa nguni. Ibanji mu Kristendomu basyoma kuti Jesu ncibeela ca Butatu “Cisetekene.” Pele Bbaibbele taakwe noliyiisya kuti Leza mbantu botatwe ibali mumuntu omwe pe. Alimwi taliyiisyi kuti Jesu baleelene a Jehova pe. Jesu mwini wakaamba kuti: “Taata mupati kwiinda ndime.”—Johane 14:28.

10. Nkuukuli nkwaakabede Jesu katanasika anyika?

¹⁰ Ibbaibbele liyiisya kuti Jesu katanaboola anyika mbuli muntunsi, wakali kukkala kujulu kali cilenge camuuya cilaanguzu. Jehova Wakalenga bantu bamuuya kujulu mbubwenya mbwaakalenga ba Adamu alimwi a Eva anyika. Jesu wakali ngomuntu wamuuya wakusaanguna Leza ngwaakalenga.—Johane 17:5; Ba-Kolose 1:15.

11. Mbuti Jesu mbwaakazyoozyalwa kali muntunsi?

¹¹ Imyaka iibalilwa ku 2,000 yainda, Jehova wakalonzya buumi bwacilenge eeci camuuya akucitola mwida lyanakalindu wazina lya Mariya. Mungelo Gabriyeli wakaambila Mariya kuti: “Ulamita, uzootumbuka mwana mulombe, ngozooulika zina lya-Jesu. Uyooendelezya . . . , [a]bwami bwakwe tabukooyoomana.”—Luka 1:31, 33. *

12. Ino nkaambo nzi kakusaanguna Jesu nkaakaboolela anyika?

¹² Aboobo Jesu wakazyalwa, wakomena mane waba mwaalumi alimwi wakayiisya bantu kujatikizya luyando lwa Jehova alimwi amakanze aakwe. Jesu wakaambila mweendelezi muna Roma kuti: “Ncendakazyalilwa, ncendakasikila ansi ano, kuti nkalungulule bwini.” (Johane 18:37) Tulakonzya kwiiya kasimpe kujatikizya luyando lwa Leza alimwi amakanze aakwe kwiinda mukulanga-langa nzyaakayiisya Jesu. Tulakonzya kwiiya ncotweelede kucita kutegwa tuzuminwe a Leza.

13. Nkaambo nzi kabili nkaakaboolela anyika Jesu?

¹³ Ikaambo kabili Jesu nkaakaboolela  anyika nkakuti aabe buumi bwakwe bwabuntunsi kutegwa bube cinunuzyo kubantu. (Matayo 20:28) Wakacita oobo kutegwa twaangululwe kucibi ncitwakakona kumuzyali wesu Adamu. Mpoonya eeci cakali kuyoopa kuti cikonzyeke kulindiswe kupona kukabe kutamani. Imwaapostolo Johane wakalemba kuti: “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.”—Johane 3:16.

14. (a) Ncinzi cakacitika kuli Jesu naakafwa kali muntunsi? (b) Ino ncuuno nzi ncajisi lino Jesu kujulu?

¹⁴ Naakafwa muciimo cabuntunsi, Jesu wakabusigwa akuunka kujulu, ooko alimwi nkwaakakupona kali cilenge camuuya canguzu. (Incito 2:32, 33) Kuzwa waawo, Jehova wakamupa “bweendelezi abulemu abwami, kuti bantu bazisi zyoonse abamisyobo yoonse abamyaambo yoonse bamumanine milimo.” (Daniele 7:13, 14) Jesu wabikkwa acuuno ca Bwami kali singuzu; ngo Mwami wamfwulumende ya Jehova yakujulu. Lino-lino uyootondezya nguzu zyakwe munyika yoonse.

15. Ndiilili bangelo nobakalengwa alimwi nkuukuli nkobakalengelwa?

¹⁵ Jehova alimwi a Jesu, tabali mbabantu balikke bakkala mubusena bwamyuuya. Jehova wakalenga zilenge zimbi zyamuuya, ibangelo. Gabriyeli, ooyo wakakananaa Mariya, ngumwi wabangelo aabo. Ibangelo tiibakatalikila anyika kupona kabali mbuli bantu balya maila. Bakalengwa kaindi kujulu ibantu kabatanalengwa anyika. (Jobu 38:4-7) Kuli tuulunzuma twabaangelo ituli mbotubede.—Daniele 7:10.

16. Nkaambo nzi bantu ncobateelede kukomba bangelo?

¹⁶ Bangelo basyomeka tabayandi kukombwa andiswe pe. Iziindi zyobile mwaapostolo Johane naakasola kukomba bangelo, bakamukasya akumwaambila kuti: “Pe, utaciti obo, . . . Komba Leza.”—Ciyubunuzyo 19:10; 22:8, 9.

17. Ncinzi citondezya kuti bangelo balakonzya kukwabilila babelesi ba Leza, alimwi nkaambo nzi makani aaya ncaumbulizya?

¹⁷ Bangelo tabacilibonyi kubantu ba Leza anyika mbuli mbubakacita nobakaangulula baapostolo ba Jesu muntolongo. (Incito 5:18, 19) Nokuba boobo, ikuti katukomba Jehova kweelanaa mbolyaamba Jwi lyakwe, Ibbaibbele, tulakonzya kubaa lusyomo lwakuti bangelo ba Leza batalibonyi basinguzu bayootukwabilila. Ibbaibbele lyaamba kuti: “Baangelo ba-Jehova balibazyungulukide bamuyoowa, kuti babavune.” (Intembauzyo 34:7; 91:11) Ino nkaambo nzi makani aaya ncayelede kutuumbulizya? Nkaambo kakuti kuli basinkondoma basinguzu mubusena bwamyuuya ibayanda kutunyonyoona!

18. (a) Nkaambo nzi mungelo umwi ncaakamuzangila Leza? (b) Ino mmazina nzi akapegwa kumungelo ooyu muzangi?

¹⁸ Tabali boonse bangelo ba Leza bakasyomeka kuli Leza pe. Bamwi bakamuzangila. Bakaba basinkondonyina a Leza alimwi abantu bali munyika. Ino eeci cakacitika buti? Boonse bangelo mbaakalenga Jehova bakali  luleme alimwi bakali kabotu. Nokuba boobo, umwi wabana bamuuya aaba balondokede wakali kuyanda kuti bantu kabamukomba, aboobo wakazumanana akulombozya ooku kubyaabi. Cilenge camuuya eeco cakapegwa zina lya Saatani, lyaamba kuti “Sikukazya [Leza].” Alimwi wiitwa kuti Diabolosi, lyaamba kuti “Sikubejelezya,” mbwaanga uubejelezya Jehova cabumpelenge.

19. Nkaambo nzi Saatani ncaakamupenzyela Jobu alimwi munzila nzi?

¹⁹ Saatani ulabalwana bantu kutegwa bamusangane mukuzangila Leza. Amulange-lange ncaakacita kumubelesi wa Leza uusyomeka Jobu. Jobu wakali muntu uuvwubide kapati. Wakajisi mbelele zili 7,000, inkamela zili 3,000, ŋombe zili 1,000 alimwi ambongolo mpwizi zili 500. Alimwi wakalijisi bana bali kkumi ababelesi banji. Cakusaanguna, Saatani wakajaya banyama mbakavwubide Jobu alimwi ababelesi. Kuzwa waawo, wakaleta “kambizi” kalo kakanyonyoona ŋanda alimwi akujaya bana boonse ba Jobu. Mpoonya, Saatani wakapenzya Jobu a “zilonda kuzwa kumaulu kusikila kukatwikilo.”—Jobu 1:3-19; 2:7.

20. (a) Mbuti Jobu mbwakalongezyegwa akaambo kakusyomeka kwakwe? (b) Nokuba kuti Jobu wakali kusyomeka kuli Leza, ino ncinzi Saatani ncaacita kubantu bamwi banji?

²⁰ Nokuba kuti Jobu wakasunkwa citaambiki, wakazumanana kusyomeka kuli Leza. Aboobo Jehova wakamuponya alimwi “wakapa tobile kuli-Jobu kwiinda nzyaakajisi kusaanguna.” (Jobu 42:10) Saatani wakaalilwa kunyonyoona lusyomo lwa Jobu, pele wazwidilila mukugwisya bantu banji kuli Leza. Ibbaibbele lyaamba kuti: “Nyika yoonse iikede muzibi.”—1 Johane 5:19.

21. (a) Mbuti Saatani mbwaakatondezya kulombozya kwakwe kwakuyanda kukombwa? (b) Nkaambo nzi Jesu ncaakakakila kukomba Saatani?

²¹ Saatani uuyanda kuti katumukomba. Eeci cakalibonya antangalala naakali kusunka Jesu imyaaka iitandila ku 2,000 yainda. Ibbaibbele liluula kuti: “Diabolosi wakamutola [Jesu] kucilundu cilamfwu loko, wakamutondezya zisi zyoonse zyanyika abulemu bwazyo, elyo wakamwaambila kuti, Ezi zyoonse ndakupa, kuti wafugama akundikomba.” Jesu wakakaka akumwaambila kuti: “Koya, uwe Saatani, nkaambo kulilembedwe kuti, nguwe Jehova Leza wako ngoelede kukomba, nguwenya alike ngoelede kumanina milimo.” (Matayo 4:8-10) Jesu wakaluuzi kabotu mulawo wa Jehova alimwi taakwe naakacita ceeco Saatani ncaakali kuyanda.

22. Ino nzintu nzi madaimona nzyaali kucita kubantu?

²² Ibambi bangelo bakamutobela Saatani mukuzangila Leza. Aaya madaimona mbaasinkondonyina abantu anyika. Alaalunya alimwi alapenzya citaambiki. Ikaindi, akali kupa bamwi bantu kuba basyataambi alimwi aboofwu. (Matayo 9:32, 33; 12:22) Bamwi akali kubapa kuciswa naa kubasondosya. (Matayo 17:15, 18; Marko 5:2-5) Mane abana buya akali kubapenzya.—Luka 9:42.

23. (a) Ino myuuya mibi ncinzi nciiyanda kubantu? (b) Ino ncinzi Saatani alimwi amadaimona ncobali mukweena bantu kuti bacite?

²³ Mbubwenya mbuli Saatani, myuuya mibi eeyi iyanda kukombwa. Muciindi cakukaka kukombwa abantu—mbwaanga ilizi kuti kukomba ooko kweelede buyo kuunka kuli Jehova—myuuya mibi eeyi ilalombozya, ilayandaula nzila alimwi ikulwaizya kuti kaikombwa. Kwiinda mukubelesya bumpelenge, bubeji alimwi akukonga bamwi, Saatani amadaimona aakwe babayunga bantu kuti babakombe. Ikwaamba masimpe, tabali bantu boonse bazyi kuti bakomba Saatani amadaimona aakwe pe. Ibantu banji balakonzya kugambwa kuziba kuti cikombelo cabo citobela Saatani. Aboobo, Ibbaibbele licenjezya kuti: “Zintu ezyo nzibapaizya bahedeni, nkubadaimona nkubazipaizizya, takweensi kuli-Leza pe.”—1 Ba-Korinto 10:20.

24. Ninzila nzi yomwe njabelesya Saatani kweena bantu?

²⁴ Inzila yomwe Saatani alimwi amadaimona aakwe njobabelesya kweena bantu kuti babakombe nkwiinda mukumwaya makani aataluzi kujatikizya bafwu. Nkooko lino atubone Bbaibbele ncoliyiisya kujatikizya makani aaya.