Mu Kaisareya, kwakali silutwe wabasikalumamba bana Roma iwakali kulemekwa kapati wazina lya Koneliyo. Nokuba kuti tanaakali mu Juda, ba Juda bakali kumulemeka. Wakalilyaabide kugwasya bantu bapengede. Koneliyo wakali kumusyoma Jehova alimwi lyoonse wakali kupaila kulinguwe. Bumwi buzuba, mungelo wakaboola kuli Koneliyo akumwaambila kuti: ‘Leza waimvwa mipailo yako. Lino kotuma bantu kumunzi wa Jopa, ooko nkwakkala Petro kutegwa bakamwiite aboole kulinduwe.’ Mpoonya aawo, Koneliyo wakatuma baalumi botatwe ku Jopa, ikulampa makkilomita aasika ku 50 kutozya kumusanza.

Kuciindi eeco, kali ku Jopa, awalo Petro wakalibwene kale cilengaano. Wakabona banyama ba Juda mbobakali kukasyigwa kulya, mpoonya wakamvwa jwi ilyakali kumwaambila kuti alye. Petro wakakaka kati: ‘Nsinalide munyama uusofweede mubuumi bwangu.’ Mpoonya ijwi eelyo lyakamwaambila kuti: ‘Utanikwaambi kuti banyama aaba balisofweede pe. Leza wabasalazya.’ Petro alimwi wakaambilwa kuti: ‘Kuli baalumi botatwe ibaimvwi amulyango wako. Kobatobela.’ Petro wakaunka kumulyango akubabuzya baalumi aabo ncobakali kuyanda. Bakaingula kuti: ‘Koneliyo, silutwe wabasikalumamba bana Roma watutuma. Ati  wiinke kuŋanda yakwe ku Kaisareya.’ Petro wakaambila baalumi aabo kuti boone kabali beenzu bakwe. Buzuba bwakatobela, wakaunka ambabo ku Kaisareya antoomwe abakwesu bamwi baku Jopa.

Ciindi Koneliyo naakabona Petro, wakafwugama ansi. Pele Petro wakamwaambila kuti: ‘Nyamuka! Ndili muntu mbubwenya mbuli nduwe. Leza wandaambila kuti ndiboole kuŋanda yako, nokuba kuti ba Juda tabanjili mumaanda aa Bamasi. Lino kondaambila ncoondiitila.’

Koneliyo wakaambila Petro kuti: ‘Mazuba ali 4 aainda ndakali kupaila kuli Leza, mpoonya mungelo wakandaambila kuti ndikwiite. Twalomba utuyiisye majwi aa Jehova.’ Petro wakati: ‘Lino ndazyiba kuti Leza tasalauli pe. Ulamutambula muntu uuli woonse uuyanda kumukomba.’ Petro wakabayiisya makani manji kujatikizya Jesu. Mpoonya muuya uusalala wakaboola ali Koneliyo alimwi aali baabo mbaakali limwi, kumane boonse bakabbapatizyigwa.