Ncolyaamba Bbaibbele

Ncomweelede Kwiicenjelela Mizimo

KUCISI cimwi caku Asia, nkamu yabantu bajisi pobwe lyakulemeka mizimo. Pobwe nolyasika mpolinonezya bamakaintu bobilo banjidwe basalwa kutegwa bakambilwe. Meso aabo atalika kuzinguluka alimwi bamakaintu aaba batalika kuzuzuma mbuli kuti bajatwa magesi.

Sibusangu umwi (santero) waku Puerto Rico, usola kwaambaula amuzimo uutegwa Changó, leza wamuzumo. Sibusangu ooyu wapandulula nzyaabona mpoonya bantu boonse mukaanda batalika kuzuzuma mbuli kuti banjilwa.

Mazuba aano, ikujatikizyigwa mumizimo kulidumide mumasi manji. Kusyoma mizimo kwayaambele alimwi bantu banji balayungwa. Mabbuku, zisobano, zisobano zyaacipekupeku, mavidiyo aatondezya madaimona, bulozi amaleele zilimwaikide koonse-koonse.

Nokuba boobo, Ibbaibbele liyiisya kuti ikujatikizyigwa mumicito yoonse iili boobu, nkusyoma mizimo. Kusyoma mizimo tacili cisobano buyo. Alimwi takuli buyo kuyanda kuzyiba zyintu zitazyibidwe pe. Caamba kuyanzana amadaimona, ibangelo babyaabi bakazangila Leza.—Ciyubunuzyo 12:9, 12.

Mubwini, madaimona abelesya mizimo koongelezya bantu mbubwenya muntu uuloba nswi mbwabelesya zyintu ziindene-indene. Muntu uuloba nswi ubelesya tulyo twiindene-indene ikujaya nswi ziindene-indene. Mbubwenya buyo, myuuya mibi ibelesya nzila ziindene-indene kutegwa yeendelezye bantu boonse. Mweendelezi wamadaimona “ngoleza waansi aano.” Wacikonzya kuboofwaazya aabo batakasyomi kasimpe kali mu Jwi lya Leza amakanze aakwe.—2 Bakolinti 4:4, BT.

Zicitika Akaambo Kakusyoma Mizimo

Imakanze amyuuya mibi ngakuti: Iyanda kuti tutabi acilongwe a Mulengi wesu. Myuuya mibi ipa kuti bantu batani kutobeli zyeelelo zya Leza ziluleme, kufwumbwa naa bacita caali naa pe. Aboobo, ikusyoma mizimo kupa kuti Leza anyeme, kuletela mapenzi alimwi kusololela kulufwu.—Ciyubunuzyo 21:8.

Luis, wakucisi ca Puerto Rico wakaamba kuti: “Kuzwa nindakacili mwana, mumukwasyi  wesu twakali kusyoma mizimo alimwi mbobwakali bukkale bwesu. Ndakali kuyeeya kuti ikuzyibila limwi ziyakucitika kumbele kwiinda mukubelesya makaadi aa tarot cakali cakuzyalwa ancico. Kanji-kanji ndakali kwaazyiba manamba aacisolo ca lottery akubagwasya bantu kuzunda mucisolo eeci kutegwa bajane mali. Nguzu eezyi tiizyakali cipego buya mbuli mbondakali kuyeeya, pele zyakali kundilesya kuba aluzyibo lwamu Bbaibbele akuba acilongwe a Leza.”—Johane 17:3.

Bantu banji balakonzya kuyeeya kuti ikujatikizyigwa amyuuya takujayi alimwi kulagwasya. Balakonzya kwaamba kuti zyeelo zilagwasya akuti ikuzisyoma inga kwabapa kuba aluzyibo, buvwubi naa lukkomano. Aaya taali masimpe. Luis wakati: “Ikuzisyoma kuletela mapenzi.”

Musankwa umwi wazyina lya Chad wakali kubona zyintu zyakali kumuyoosya cakuti lyoonse cakali kumupa kubuka. Wakati: “Madaimona akali kundipenzya lyoonse masiku.” Mbuti mbotukonzya kukwabililwa kutegwa tutapenzyegwi azyintu eezyi?

Mbotukonzya Kukwabililwa

Kutegwa tulikwabilile, tweelede kuzileka zyintu zyoonse zijatikizya mizimo. (Ba-Galatiya 5:19-21) Nkakaambo kaako Jehova Leza ulailila babelesi bakwe kwiileka micito eeyi: “Kutajanwi akati kanu muntu . . . uusonda, naba muŋanga, naba mulozi, naba mucape, naba simabibo, naba sibusangu, naba sibamooba, naba muntu uubuzya makani kubafu. Nkaambo kufumbwa muntu uucita ezi ncisesemyo kuli Jehova.”—Deuteronomo 18:10-12.

Kweelana amajwi aaya, bantu banji balalikwabilila kwiinda mukusowa mabbuku naa zyintu zili zyoonse zijatikizya mizimo. Ken, iwakali kukatazyigwa amadaimona wakaamba kuti: “Ndakabweza zyintu zyoonse nzyindakazyi kuti nzibi akuzisowa.”—Amubone Incito 19:19, 20.

Ikuba acilongwe a Jehova, Leza mwini-mwini kolikke nkokukonzya kutukwabilila. Amubone ncotweelede kucita kweelana ambokulembedwe kuli Jakobo 4:7, 8: “Eno amulibombye kuli Leza. Amumukazye Saatani, uyoomucija. Amuswenenene kuli-Leza, eelyo alakwe ulamuswenenena. Amusanzye maanza aanu, anywebo nobasizibi. Amulisalazye kumyoyo, nywebo nobasimyoyo-yobile.”

Jehova Leza ulabayiisya akubakwabilila aabo baba acilongwe anguwe. Tabali ‘bafwubafwuba batezyi makanze a Saatani’ alimwi tabeenwi pe. (2 Ba-Korinto 2:11; 11:14) Alimwi Jehova ngu Singuzu Zyoonse. Jehova ulakonzya kubavwuna aabo bapenzyegwa amyuuya mibi ikuti bapaila kulinguwe. Chad, iwaambwa kale wakati: “Akaambo kakuzyiba kuti myuuya mibi njiyakali kundipenzya, ndakali kupaila kuli Jehova Leza kuti andikwabilile aboobo yakaleka kundipenzya.”—Intembauzyo 91:1, 2.

Masimpe ngakuti, noliba lino babombe myoyo balakonzya kukkomana ikuzyiba kuti Leza ulabakwabilila akuti ino-ino imadaimona aboonse baasyoma baya kunyonyoonwa. Amuyeeye buyo lukkomano aluumuno luya kuba anyika ciindi bantu nobaya kuleka kupenzyegwa amizimo!—Isaya 11:9; Ciyubunuzyo 22:15.

SENA KULI NOMWAKABUZYIDE KUTI?

▪ Micito nzi iijatikizya mizimo Banakristo njobateelede kucita? —Deuteronomo 18:10-12; Ciyubunuzyo 21:8.

▪ Nguni uupa kuti bantu kabasyoma mizimo?—2 Ba-Korinto 2:11; 11:14; Ciyubunuzyo 12:9, 12.

▪ Mbuti mbotukonzya kulikwabilila kumyuuya mibi?—Jakobo 4:7, 8.

[Cifwanikiso icili apeeji 11]

Mubwini, madaimona abelesya mizimo koongelezya bantu mbubwenya muntu uuloba nswi mbwabelesya zyintu ziindene-indene