Ncolyaamba Bbaibbele

Ino Jesu Wakazyalwa Lili?

IBBUKU litegwa Encyclopedia of Early Christianity lyaamba kuti: “Ibuzuba bwini mbwaakazyalwa Kristo tabuzyibidwe pe.” Nokuba boobo, ibantu banji ibalyaamba kuti Mbanakristo nyika yoonse mboizulwa, balasekelela kuzyalwa kwa Jesu mu December 25. Pele buzuba oobu tabulembedwe mu Bbaibbele pe. Sena masimpe kuti Jesu wakazyalwa mu December?

Nokuba kuti Ibbaibbele kunyina nolibwaamba buzuba bwini mbwaakazyalwa Jesu, lilatondezya kuti tanaakazyalwa mu December. Alimwi ibumboni bumwi butali bwamu Bbaibbele bututondezya ncobakabusalila buzuba bwa December 25 kuti kabasekelela buzuba bwakuzyalwa kwakwe.

Nkaambo nzi Ncotukonzya Kwaamba Kuti Jesu Tanaakazyalwa mu December?

Jesu wakazyalilwa mumunzi wa Betelehemu mu Judaya. Mumakani Mabotu ngaakalemba Luka wakati: “Kwakali basikweembela kucisi eco, bakali musokwe, beembela butanga bwabo masiku.” (Luka 2:4-8) Eeci tiicakali ceenzu pe. Ibbuku lyakuti Daily Life in the Time of Jesus lyaamba kuti: “Iciindi cinji mumwaka ibanyama bakali kukkala anze.” Pele, sena beembezi nibakacikonzya kukkala anze masiku abanyama babo kakutontola mu December? Ibbuku ndimunya eeli lyaamba kuti kweelana aciindi caku Betelehemu: “Imupeyo, ibanyama bakali kujalilwa muluba naa muzyaanda kutegwa bataandwi mpeyo; aboobo kweelana akaambo aaka, tulakonzya kubona kuti ibuzuba bwa Kkilisimasi ibucitwa mumupeyo lyoonse tabukonzyi kuba mbobuzuba bwini pe, nkaambo Makani Mabotu aamba kuti ibeembezi bakali musokwe.”

Aaka kaambo kaleendelana akaambo kamwi kali mu Makani Mabotu aa Luka kakuti: “Mumazuba ayo kwakazwa mulao kuli-Kaisara Augusto kuti kulembwe cisi coonse. Oku kwakali kulembwa kwakusaanguna, elyo Kureniyo naakali mweendelezi waku-Suriya. Abantu boonse bakainka kuyoolembwa, umwi umwi kumunzi wakwe.”—Luka 2:1-3.

Augusto ndiza wakali kuyanda kuzyiba mweelwe wabantu kutegwa azyibe bantu beelede kutela mutelo ambakonzya kunjizya mulimo wabusikalumamba. Mariya akaambo kakuyanda kutobela malailile, wakeenda amulumaakwe Josefa musinzo  uulampa makkilomita aasika ku 150 kuzwa ku Nazareta kuya ku Betelehemu nokuba kuti wakali afwaafwi kutumbuka. Lino amuciyeeyele buyo eeci. Sena ncamaano kuyeeya kuti mwami Augusto watakali kuyanda kubapenzya bantu bakwe wakali kukonzya kubaita bama Juda ibakakakide kulelwa abana Roma kuti beende musinzo mulamfwu ooyu imupeyo?

Imasimpe ngakuti, basikwiiya makani aansiku abasikwiiya Bbaibbele banji abalo tababuzumini buzuba bwa December 25 kuti mbobuzuba mbwaakazyalwa Jesu. Makani aaya mulakonzya kwaajana mubbuku lya encyclopedia. Mucikozyanyo, ibbuku lyakuti Our Sunday Visitor’s Catholic Encyclopedia lyaamba kuti: “Banji balazumina kuti Jesu tanaakazyalwa mu December 25.”

Ncobakabusalila Buzuba bwa December 25

Nikwakainda myaka minji kafwide kale Jesu, ibuzuba bwa December 25 bwakasalwa kuba buzuba mbwaakazyalwa Jesu. Nkaambo nzi? Basikwiiya makani aansiku banji basyoma kuti iciindi ca Kkilisimasi nceciindi nibakali kuba amapobwe bantu batakombi.

Mucikozyanyo, ibbuku lya Encyclopædia Britannica lyaamba kuti: “Bupanduluzi budumide ibwaamba mbubwakatalika kusekelelwa buzuba bwa December 25 butondezya kuti Banakristo bakali kuyanda kucita zyintu nzibacita bantu bazikombelo zimwi mbuli kusekelela pobwe ‘lyakuzyalwa kwazuba litakonzyi kuzundwa’ ndyobati dies solis invicti nati. Oobu mbuzuba mbubakali kulyookezya bantu mu Bulelo bwa Roma akusekelela buzuba nolibbila kufwambaana zuba ciindi camupeyo. Eeci cakali citondezyo cakuti izuba lyazyalwa alimwi akuti imupeyo wamana cilimo catalika.”

Ibbuku lya Encyclopedia Americana litwaambila kuti: “Ikaambo takazyibidwe kabotu kakapa kuti buzuba bwa December 25 bube bwa Kkilisimasi. Pele cizyibidwe ncakuti buzuba oobu bwakasalwa kutegwa bweelane abuzuba mbubakali kuba amapobwe bantu batakombi Leza. Eeci cakali kucitika imupeyo nibakali kusekelela ‘kuzyalwa kwazuba.’ . . . Aciindi nceena eeci bakali kusekelela pobwe litegwa Roman Saturnalia (ilyakali kucitilwa leza wabulimi uutegwa Saturn, akusekelela kuti izuba lyaba anguzu alimwi).” Kumapobwe aali boobu ibakali kujanika bakali kucita bwaamu, tiibakali kulijata alimwi bakali kuyobeka kapati. Tacigambyi kuti eeci ncobacita bantu banji ibasekelela Kkilisimasi mazuba aano.

Mbotweelede Kumulemeka Kristo

Bamwi bayeeya kuti nokuba kuti buzuba tabuzyibidwe kabotu, Banakristo beelede[ kusekelela buzuba mbwaakazyalwa Jesu. Bayeeya kuti, ikuti naa kusekelela ooku kwacitwa munzila mbotu balakonzya kumulemeka Kristo.

Ibbaibbele litondezya kuti kuzyalwa kwa Jesu kulayandika kapati. Lyaamba kuti buzuba mbwaakazyalwa Jesu ibangelo banji bakalibonya cakutayeeyelwa alimwi bakakkomana akumutembaula Leza kabati: “Akube bulemu kuli-Leza kujulu lyamajulu, aalo ansi akube luumuno kubantu mbakondwa.” (Luka 2:13, 14) Nokuba boobo, Bbaibbele kunyina nolyaamba kuti tweelede kusekelela buzuba mbwaakazyalwa Jesu. Mukwiimpana, kuli mulawo wakuti katuyeeya lufwu lwa Jesu. Aboobo, Bakamboni ba Jehova balacita oobo amwaka ciindi comwe. (Luka 22:19) Eeyi nenzila imwi njotukonzya kumulemeka Jesu.

Ibuzuba bwamamanino imasiku kali anyika, Jesu wakati: “Munooli beenzuma mwanoozicita nzemwaambila.” (Johane 15:14) Alimwi wakati: “Mwanoondiyanda, kamubamba milao yangu.” (Johane 14:15) Masimpe ngakuti, nzila iinda kubota mbotukonzya kumulemeka Jesu Kristo nkwiinda mukwiiya akuccilila nzyakali kuyiisya.

SENA KULI NOMWAKABUZYIDE KUTI?

▪ Nkaambo nzi ncotukonzya kwaamba kuti Jesu tanaakazyalwa mu December?—Luka 2:1-8.

▪ Ino mbuzuba nzi bwiinda kubota kwiinda buzuba bwakuzyalwa?—Mukambausi 7:1.

▪ Ino ninzila nzi iinda kubota njotukonzya kubelesya kulemeka Jesu?—Johane 14:15.

[Majwi aakwelelezya sikubala aali apeeji 11]

Ibbaibbele lilatondezya kuti Jesu tanaakazyalwa mu December

[Cifwanikiso icili apeeji 10]

Sena beembezi nibakaunka kwaakweembela matanga aabo musyokwe imasiku nikwakali mpeyo?

[Kulumba]

Todd Bolen/Bible Places. com