Ipezni lya Maanzi Ino Ncinzi Cacitwa Kutegwa Limane?

Ipenzi lya maanzi nkolili munyika yoonse. Eeli penzi lyapa kuti bantu babalilwa kumabbiliyoni kabaciswa. Ino ncinzi cacitwa kutegwa bantu babe amaanzi akuti kaatamani?

SOUTH AFRICA: Imutwe wamakani aa Magazini iitegwa Science waambilizya kuti: “Bacete mudolopo lya Durban, ibakajisi penzi lyamaanzi kwamyaka minji, lino lyamana.” Magazini eeyi yaamba kuti bantu aaba bakajisi penzi lyamaanzi akaambo kakuti mfwulumende yakali kweendelezya yakali kukulwaizya kusalaulana musyobo. Alimwi yakaamba kuti mu 1994, “akati kamaanda aali 1,000,000 aakali mudolopo eeli, aali 250,000 akanyina maanzi mabotu azimbuzi.”

Ikutegwa limane penzi eeli, mu 1996 umwi haazibwene uubeleka kucibeela camaanzi wakabikka bubambe bwakuti ŋanda aŋanda kaipegwa maanzi aasika kumalita aali 200 abuzuba. Ino mbubotu nzi bwakajanika? Imagazini ya Science yaamba kuti: “Akati kabantu bali 3,500,000 bakkala mu Durban, ibali 120,000 mbobatajisi maanzi mabotu. Bantu kaindi bakali kweenda musinzo mulamfwu kuya kuteka maanzi pele mazuba aano tabaciti oobo akaambo kakuti maanzi aali munsi-munsi.

Imagazini eeyi yakati, ikutegwa zimbuzi kazitazuli kufwambaana, bakatalika kuyaka musyobo umbi wa “zimbuzi zijisi zilindi zyobilo naa ‘Urine Diversion (UD) double pit toilets’ kutegwa minsyo atubi kazyaandana kutegwa tubi katuyuma akubola cakufwambaana.” Kuzwa ciindi eeco kuzyikusika kumatalikilo aamwaka wa 2008, kwakayakwa zimbuzi zyamusyobo ooyu zisika ku 60,000 nokuba kuti bakali kwaamba kuti kulakonzya kutola myaka iimbi yobilo kuti maanda oonse ayakilwe zimbuzi eezyi.

Brazil: Mudolopo lya Salvador, bana banji bakali  kusoomona akaambo kakubula zimbuzi. * Kutegwa balimane penzi eeli bakabikka mipaipi iitola tubi kuzwa mumaanda aainda ku 300,000 iilampa makkilomita aali 2,000. Ino eeci cakabagwasya buti? Malwazi aakusoomona akaceya a 22 pesenti mudolopo lyoonse alimwi mumasena malwazi aaya mwaakavwulide kapati akaceya a 43 pesenti.

India: Mumasena aamwi munyika, amwaka kulaba maanzi manji mabotu; pele tabaayoboli kutegwa akabelesyegwe kabotu kumbele. Nokuba boobo, mu 1985, inkamu imwi yabamakaintu bana India mucilikiti ca Dholera, idolopo lya Gujarat nkolili kunyika lwaambo, bakajana nzila mbotu yakuyobola maanzi. Bakasya damu lyakuyobweda maanzi lipati mbuli bbuwa lyakuumina bbola. Kumane bakabikka mapulasitiki mumabali-bali aansi kutegwa maanzi atani kuyuminini. Makanze aabo akazwidilila. Nokwakainda myezi iili mbwiibede kuzwa naakamana mainza, maanzi akaciliko mudamu eeli—nokuba kuti “basimukobonyina abalo bakali kuteka mudamu ndilyonya eeli.”

Chile: Eeci ncisi camu South America cilampa makkilomita aali 4,265. Nkocili kumbo cijinkila munkomwe ya Lwaanje lwa Pacific mpoonya kujwe cijinkila Mumalundu aa Andes. Imfwulumende yacisi eeci njiiyendelezya bwaapauzi bwamaanzi alimwi njiizumizya kuyaka madamu akusya migelo yamaanzi. Mbubotu nzi bwakajanika? Akati kabantu bakkala mudolopo, basika ku 99 pesenti balijisi maanzi mabotu alimwi a 94 pesenti yabasicisi boonse balajana maanzi mabotu manji.

Mboliya Kumana Penzi Lyamaanzi

Kuboneka kuti mucisi acimwi kuli nzila njobabelesya ikumana penzi lyamaanzi. Mumasi amwi imuwo moubbubbula lyoonse, babelesya mincini iizingulusyigwa amuwo kupompa maanzi alimwi akupanga magesi. Mumasi bantu mobavwubide, babelesya mincini kugusya sautu mumaanzi aamu lwizi akwaabelesya milimo iindene-indene. Mumasena mumwi kwakayakwa madamu mapati. Inzila eeyi ilabeleka nokuba kuti mumasena aamwi 10 pesenti ya maanzi aaya alayuminina akaambo kakupya.

Basikulemba magazini eeyi, Bakamboni ba Jehova, basyoma kuti Leza alikke nguuya kulimana penzi eeli lyamaanzi ikutali muntu. Ibbaibbele lyaamba kuti: “Nyika azyoonse zili mulinjiyo nzya Mwami Leza, insi abaabo bakkede mulinjiyo. Nguwakiibikka alwizi, wiikkazika atala aamaanzi.”—Intembauzyo 24:1, 2, BT.

Masimpe, Leza wakapa bantu mukuli wakulanganya nyika eeyi. (Matalikilo 1:28) Nokuba boobo, bantu tabailanganyi kabotu nyika alimwi eeci capa kuti kube mapenzi mbubonya Bbaibbele mbolyaamba kuti “muntu ulaya bweenda, pele tabwene kweenzya intaamu zyakwe.”—Jeremiya 10:23.

Ino ncinzi Jehova ncaya kucita kutegwa nyika eeyi ikabote alimwi? Ibbaibbele litusyomezya kuti ‘uyoolengulula zyintu zyoonse kuti zibe zipya.’ (Ciyubunuzyo 21:5) Amuciyeeyele buyo, inyika iitajisi bantu bacete, cilanga, imuli maanzi manji alimwi imutakabi zambangulwe linyonyoona bantu amwaka. Mubwami bwakwe, Leza uyakucita zyintu zyoonse nzyaakasyomezya. Jehova lwakwe wakaamba kuti: “Mbubonya obo mbuliyooba ijwi lyangu lizwa kumulomo wangu. Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”—Isaya 55:11.

Sena mulayanda kwiiya zinji kujatikizya makanze aa Leza aakubambulula nyika yesu eeyi kweelana ancolyaamba Ijwi lyakwe, Bbaibbele? Cibalo citobela cilatondezya mbomukonzya kwiiya.

Bupanduluzi buyungizidwe

[Majwi aakwelelezya sikubala aali apeeji 13]

“Maanzi mbobuumi.”—Michael Parfit, imulembi wa National Geographic

[Majwi aakwelelezya sikubala aali apeeji 14]

Kutegwa kutebulwe cakulya cilema makkilogilamu aali 1,000, kuyandika maanzi aalema makkilogilamu aali 1,000,000.

[Majwi aakwelelezya sikubala aali apeeji 14]

“70 pesenti yamaanzi aali anyika abelesyegwa kwiida zisyango.”—Plan B 2.0, ibbuku lyakalembwa aba Lester R. Brown

 [Zitondezyo/Zifwanikiso izili apeeji 15]

(Kutegwa mubone bwini mbwaakkede mabala, amubone bbuku lini)

Ino maanzi mabotu manji buti?

Maanzi oonse

97.5%

Maanzi ajisi sautu

2.5%

Maanzi mabotu

Maanzi mabotu

99%

Caanda amaanzi aali kunsi aanyika

1%

Maanzi mabotu aabelesyegwa abantu batandila ku 7 bbiliyoni alimwi azyintu zipona

Cifwanikiso icili apeeji 15]

Kubikka mapaipi aaleta maanzi mabotu mudolopo lya Durban, mu South Africa

[Kulumba]

Courtesy eThekwini Water and Sanitation Programme

[Cifwanikiso icili apeeji 15]

Bamakaintu bakajisi mulimo wakusya damu ku Rajasthan, mu India, mu 2007

[Kulumba]

© Robert Wallis/Panos Pictures

[Cifwanikiso icili apeeji 15]

Bantu babamba mapompi aamaanzi aamunzi wabo uuli afwaafwi a Copán, ku Honduras

[Kulumba]

© Sean Sprague/SpraguePhoto. com